Ba Zura Niʼamoniʼö, ngawua wehede nava ba li Heberaiʼo, mufoʼeluaha ia ”mamaʼeleʼö”. Asese muʼogunaʼö ia ba wamaʼema turia, fanguhuku, famahaʼö mazui fareta moroi khö Lowalangi. Eluaha tanö böʼö yaʼia daʼö mamaʼema fehede Lowalangi sanandrösa salua ba zi so miföna. Fefu daʼö so ia ba wamaʼeleʼö Hezekieli.​—Hez. 3:10, 11; 11:4-8; 14:6, 7; 37:9, 10; 38:1-4.

• ANGILATA

• DUMA-DUMA

• FAMADUMAISI

Ba mbuku Hezekieli, so gangilata, amaedola, manö-manö mazui famadumaisi. Fefu daʼö oi famaʼeleʼö.

So ösa wamaʼeleʼö Hezekieli si no alua töra ba zi sakali. Duma-dumania, famaʼeleʼö sanandrösa ba wamohouni. Alua ia me mangawuli nono mbanua Lowalangi ba Danö Amabuʼula. Hizaʼi, simane nitutunöda ba Faza 9, oya wamaʼeleʼö sanandrösa ba wamohouni salua ba götöda hegöi sabölö ebua ba zi so miföna.

Me mböröta, tawaʼö tödöda wa so ösa wamaʼeleʼö Hezekieli andre ha duma-duma si so famaedo, mazui salua ba zi so miföna. Hizaʼi ba mbuku daʼa, lö itutunö wa niha, gama-gama, nahia mazui salua, tobali duma-duma si so famaedo, na lö dane-dane saro ba Zura Niʼamoniʼö. * Nitutunönia yaʼia daʼö hewisa waʼalua wamaʼeleʼö Hezekieli sabölö ebua ba zi so miföna. Ba mbuku daʼa, tola tafahaʼö ita moroi ba duria nifaʼema, niha, nahia hegöi salua nitutunö Hezekieli.