Ba Hezekieli faza 23, tesura wamangelama sabeʼe moroi khö Lowalangi ba nono mbanuania si no faröi. Fakhili-khili faza daʼa ba faza 16. Ösinia manandrösa khö ndra alawe sohorö-horö. Akhinia muʼamaedolagö Yeruzalema ba Samaria gaʼania. Abölö-bölö wohorö nakhinia moroi khö gaʼania. Ba faza 23, ifotöi ira Yehowa Ohola ba Oholiba. Ohola muʼamaedolagö gaʼania yaʼia daʼö Samaria, ibu kota famatörö Gizaraʼeli si fulu mado ba Oholiba nakhinia yaʼia daʼö Yeruzalema, ibu kota famatörö Yehuda. *—Hez. 23:1-4.

So nasa zi fagölö nitutunö ba faza 16 ba 23. Te daʼa waʼafagölö sabölö tohude: Ira alawe sohorö-horö andrö yaʼia daʼö foʼomo Yehowa si no mondröi yaʼia ba gafuriata. So göi dötönafö ba zi dombua faza daʼö. Sindruhu sa, lö iʼanemaiʼö iwaʼö ba faza 23 wa ifuli itema nono mbanuania Lowalangi. Hizaʼi, ba faza daʼa so sambua zi fakhili-khili si no musura ba faza 16. Ifabuʼu Yehowa, ”Ubatogö gamuatamö si lö sökhi hegöi fohorö nifaluamö.”​—Hez. 16:16, 20, 21, 37, 38, 41, 42; 23:4, 11, 22, 23, 27, 37.

No irai iwaʼö publikasida me föna wa gaʼa akhi sotöi Ohola ba Oholiba niʼamaedolagö Gereja saboto yaʼia daʼö Katolik ba Protestan. Hizaʼi me no muhaogö wamareso, muʼangerönusi ba muʼohe ba wangandrö, lua-luania oya sibai wanofu-nofu. Hadia no irai tobali foʼomo Yehowa Gereja andrö? Hadia no irai tefaböbö ira ba mbuʼusa li? Tatu löʼö. Lö si so nasa Gereja me tobali Yesu sangagö talu gotalua ba ”gamabuʼula li si bohou” khö ndraono Gizaraʼeli ba wamati (niha Keriso nibayoini), ba lö irai farahu Gereja ba soi daʼö. (Yer. 31:31; Luk. 22:20) Ara me no aefa mate ndra sinenge, yaʼia daʼö me abad si öfa, awena so Gereja. Niha Keriso si fao ba organisasi sondröi sindruhu ba si lö sökhi andre yaʼia daʼö niha Keriso sofaya niʼamaedolagö simane ”oʼo” ba wamaʼeleʼö Yesu sanandrösa ba gandru faoma oʼo.​—Mat. 13:24-30.

So nasa danö böʼö sangoromaʼö wa gaʼa akhi andre tenga eluahania Gereja: Ibeʼe wanötöna Yehowa ba Yeruzalema hegöi Samaria si faröi andrö wa ifuli itema ira. (Hez. 16:41, 42, 53-55) Hadia ifatunö Sura Niʼamoniʼö wa so wanötöna daʼö ba Gereja? Löʼö! Tebai saʼae mutolo organisasi daʼö simane agama-agama tanö böʼö si farahu ba Mbabilona Sebua.

Na simanö, Ohola faoma Oholiba tenga Gereja geluahania. Hewaʼae simanö, tobali fanoloda zalua khöra andrö enaʼö aboto ba dödöda sambua zabölö moguna, yaʼia daʼö hewisa dödö Yehowa ba niha sangotöigö ono mbanuania hizaʼi lataʼunöisi döinia niʼamoniʼö ba laʼosiwawöi goi-goinia ba wamalua famosumange satulö. Sindruhu wa fasala Gereja ba daʼa, börö me fefu aliran hegöi sektenia soya sibai laʼotöigö wa yaʼira andrö salahi Lowalangi moloʼö Sura Niʼamoniʼö. Lafaduhuʼö göi wa Yesu Keriso zondröniaʼö yaʼira, Ono niʼomasiʼö Yehowa. Hizaʼi lafahaʼö niha wa Yesu andrö Lowalangi si Sambua Tölu. Lö laʼameʼegö tödö goroisania faböi tobali ira ”tana khö niha gulidanö”. (Yoh. 15:19) Börö me lö laböhöli wanömba adu ba fao ira ba politik, ba daʼö taʼila wa no fao Gereja ba ”zohorö sebua”. (Fam. 17:1) Faduhu dödöda wa tehori Gereja simane salua ba organisasi agama sofaya ba zi sagörö ulidanö andrö!