Me föna, no irai itutunö publikasida wa Yeruzalema si faröi eluahania Gereja mazui agama niha Keriso faya. Sindruhu wa fakhili-khili nifalua Yeruzalema si no faröi ba nifalua Gereja, simane fanömba adu ba faʼalösökhi. Hizaʼi, buku daʼa hegöi publikasi tanö böʼö nifazökhi barö-barö daʼa, lö saʼae idunö-dunö duma-duma hegöi famaedo ba zi sambua famaʼeleʼö baero na ifatunö daʼö Sura Niʼamoniʼö. Na simanö, hadia so dane-dane saro ba Zura Niʼamoniʼö wa Yeruzalema andrö eluahania Gereja? Löʼö.

Fatimbaisi daʼa: Yeruzalema andrö nahia wamosumange satulö me föna, hewaʼae ba gafuriata laröi zindruhu iraono mbanuania. Hizaʼi, Gereja lö irai ifalua wamosumange satulö. Iʼotarai me no tefasindro Gereja me abad si öfa, lö irai ifahaʼö zindruhu.

Baero daʼö, me no aefa tedudugö Yeruzalema ba danga Mbabilona, ifuli omasi Yehowa mbanua daʼö ba ifuli zui ibaliʼö nahia wamosumange satulö. Hizaʼi, lö irai omasi Lowalangi ba Gereja. Ba wamakao sabölö-bölö dania, hasambalö tedudugö Gereja ba muhori ia sagötö faʼara.

Hadia rahu-rahunia? Ba ginötö tafahaʼö ita ba wamaʼeleʼö si so ba Zura Niʼamoniʼö sanandrösa ba Yeruzalema si no faröi, te tamane tödöda, ’Fakhili sibai ia ba gereja-gereja iadaʼa.’ Hewaʼae simanö, lö hadöi dane-dane ba Zura Niʼamoniʼö wa Yeruzalema si no mondröi sindruhu andrö eluahania Gereja.