Tola manö no irai iʼila nadu sebua Hezekieli sozago bawandruhö gödo razo hegöi nahia wamosumange. Adu daʼö hulö zawi si matua faoma singo, moʼafi ba hulö högö niha. Simane daʼö zi toʼölönia gambara nadu ba mbanua Asiria hegöi ba Mbabilona mböröta. Ahöli-höli dödö niha sangila, simanö göi Hezekieli börö me arakhagö 6 meter waʼalawa nadu andrö. Hizaʼi, hewaʼae abölö ba wamaigi niha gambara daʼö, sindruhunia lö noso, ha gama-gama nifofoe moroi ba gara.

Sindruhunia, kerubi si daöfa ba gangilata Hezekieli yaʼia daʼö ira ”malaʼika”. Sindruhu-ndruhu wa faböʼö ira! Ahöli-höli sibai dödö Hezekieli irege iʼogunaʼö ngawua wehede ira ”malaʼika” mato hauga kali ba wamobörö famaʼeleʼönia. (Hez. 1:5-22) Iʼila malaʼika si daöfa andrö fendronga wofanöra barö dadaoma Lowalangi. Tatu aboto ba dödö Hezekieli wa Yehowa zamatörö fefu niwöwönia. Iadaʼa, angilata sadöni dödö andrö zangoromaʼö khöda wa Yehowa andrö no fondrege zalawa, sabölö, solakhömi ba sinangea mamatörö ba ngawalö hadia ia.​—1 Ng. 29:11.