KOTAK FAMAHAʼÖ 1B
Nehegö Mbuku Hezekieli
Tola mubagi mbuku Hezekieli andre ba zi hauga faosatö:
FAZA 1 IRUGI 3
Me 613 SM, me teʼoloiʼö Hezekieli hegöi niha Yahudi tanö böʼö ba Mbabilona, itema gangilata moroi khö Yehowa ba tebeʼe khönia halöwö ba wamaʼema famaʼeleʼö ba niha Yahudi si toröi ba zinga Nungo Nidanö Khebara.
FAZA 4 IRUGI 24
Ba gotalua ndröfi 613 ofeta 609 SM, turia siföföna nifaʼema Hezekieli yaʼia daʼö fanguhuku salua ba Yeruzalema hegöi ba nono mbanuania samadaö ba samosumange adu.
FAZA 25 IRUGI 32
Iʼotarai döfi 609 SM me lafaʼuʼu Yeruzalema ira niha Mbabilona ba zafuria sibai, tenga saʼae ba Yeruzalema tefanandrösa duria wanguhuku nifaʼema Hezekieli, hizaʼi ba nudu si so ba zi fasui Gizaraʼeli, yaʼia daʼö Amoni, Edomo, Filisiti, Miserai, Moabi, Sidona hegöi Tiro.
FAZA 33 IRUGI 48
Iʼotarai döfi 606 SM me no adudu Yeruzalema hegöi osali si so ba daʼö, ifaʼema dötönafö sahöli-höli dödö Hezekieli yaʼia daʼö wa ifuli tebohouni wamosumange satulö khö Lowalangi Yehowa. Me luo daʼö ngaotu kilometer gotalua nomonia moroi ba Yeruzalema.
Mufaʼanö mbuku Hezekieli moloʼö inötö waʼalua hegöi tuhonia. Oföna mututunö wamaʼeleʼö sanandrösa ba waʼadudu Yeruzalema hegöi osalinia moroi ba wamaʼeleʼö soya sanandrösa ba wamohouni famosumange satulö. Tefaudu daʼö börö me awena so wamaʼeleʼö sanandrösa ba wamohouni famosumange satulö me no aefa tedudugö gosali irege tebato saʼae wamosumange ba daʼö.
Turia fanguhuku ba nudu si so ba zi fasui ndraono Gizaraʼeli (faza 25 irugi 32) tesöndra ia ba gotalua duria wanguhuku Yeruzalema hegöi famaʼeleʼö ba wamohouni famosumange satulö. Sanandrösa ba duria wanguhuku nifaʼema Hezekieli, imane si samösa pakar, ”[Turia fanguhuku ba nudu] no famalali si tefaudu moroi ba wehede fönu Lowalangi ba wehede faʼahakhö dödö ba nono mbanuania, börö me fanguhuku nudu andrö no faosatö moroi ba wangefaʼö ono mbanua Lowalangi.”
