1, 2. Hadia wasuwöta sebua si lö ara tö alua, ba hadia manö wanofu-nofu sinangea tabeʼe fanema li? (Faigi gambara ba wamobörö wamahaʼö.)

BA ZI hauga ribu fakhe, no tetaʼunöisi gulidanö börö ndro niha si mate ba wasuwöta. Duma-dumania me abad si 20, dua kali alua wasuwöta gulidanö ba ato niha si mate. Hizaʼi, ba zi lö ara tö alua wasuwöta sebua si lö irai alua sagötö faʼauri niha. Alua wasuwöta andre tenga ba gotalua niha mazui ba gotalua soi sangalui tana khöra. Daʼa ”wasuwöta sebua khö Lowalangi Fondrege Zabölö”. (Fam. 16:14) Alua wasuwöta daʼa börö me so nudu sasiliyawa sanuwö soi sebua böli ba wamaigi Lowalangi. Fanuwö nifaluara andrö mbörö wa ihori ira Lowalangi Fondrege Zalawa si fao faʼabölönia sahöli-höli dödö. Daʼö dania wanudugö sabölö-bölö salua ba gulidanö!

² So wanofu-nofu sinangea taʼila fanema li: Haniha nudu andrö? Soi haniha nisuwönia? Hawaʼara, hadia mbörö ba hewisa wanuwönia soi daʼö? Moguna taʼila fefu wanema linia, börö me farahu ita ba daʼö, yaʼita ono mbanua Yehowa samalua famosumange satulö ba gulidanö andre. Datafatunö  sambua wamaʼeleʼö sadöni dödöda nisura ba Hezekieli faza 38 ba 39.

3. Adogoiʼö wanutunö hewisa gangilata Hezekieli sanandrösa khö Gogi moroi ba Magogi.

 ³ Baso Hezekieli 38:1, 2, 8, 18; 39:4, 11. Na taʼadogoiʼö, daʼa nösi wamaʼeleʼönia: ”Ba gangohorita ndröfi daʼö”, udu nifotöi ”Gogi . . . moroi ba . . . Magogi” isuwö ”soi” tana khö nono mbanua Lowalangi. Börö wasuwöta si lö sökhi andrö wa ’mohola wönu Yehowa sabölö-bölö’ irege möi ia ba wokalaisi Gogi. * Aefa daʼö, fefu nudu Yehowa hegöi si fao khöra ibaliʼö ira ”balazo wofo si manga nagole awö gutu ndruʼu ba mbenua”. Ba gafuriata, no ihenaigö Lowalangi ”lewatö” khö Gogi. Enaʼö aboto ba dödöda wamaʼeleʼö daʼa, moguna taʼila haniha Gogi andrö.

4. Hadia rahu-rahu si tola tahalö sanandrösa khö Gogi moroi ba Magogi?

⁴ Haniha Gogi moroi ba Magogi? Simane nisura ba mbuku Hezekieli, tola tahalö rahu-rahu wa Gogi andrö udu wamosumange satulö. Hadia Gogi andrö eluahania Satana, udu fondrege zebua ba wamosumange satulö? Daʼa nitutunö publikasida ba zi hauga wulu fakhe. Hizaʼi, me no muhaogö mufareso wamaʼeleʼö Hezekieli, moguna muʼatulöʼö waʼaboto ba dödöda iadaʼa. Ifatunö khöda majalah Manuriaigö wa Gogi moroi ba Magogi tenga boto eheha, hizaʼi niha gulidanö niʼila hörö yaʼia daʼö angowuloa soi solawa famosumange satulö. * Fatua lö tafatunö hadia mbörö wa tefaudu waʼaboto ba dödö si bohou andre, datatutunö dombua ngawalö wamaʼeleʼö Hezekieli sangombakha khöda wa Gogi andrö tenga boto eheha.

5, 6. Hewisa wamaʼeleʼö Hezekieli wangoromaʼönia wa Gogi moroi ba Magogi tenga boto eheha?

⁵ ”Ubaliʼö ndraʼugö balazo wofo si manga nagole.” (Hez. 39:4) Ba ginötö ibeʼe wamangelama Sura Niʼamoniʼö sanandrösa ba wanguhuku moroi khö Lowalangi, asese iʼogunaʼö wofo si manga oboula tobali duma-duma. Ibeʼe wamangelama simane daʼö Lowalangi ba ndraono Gizaraʼeli hegöi ba soi böʼö. (5 Mo. 28:26; Yer. 7:33; Hez. 29:3, 5) Haogö angeragö, tenga khö ndra malaʼika ibeʼe wamangelama daʼa hizaʼi ba niha si so nagole ba do. Baero daʼö, fofo si manga nagole hegöi urifö samuʼi tatu manö nagole göra tenga eheha. Na simanö famangelama ba wamaʼeleʼö Hezekieli daʼö zangoromaʼö wa Gogi andrö tenga boto eheha.

⁶ ”Uhenaigö lewatö khö Gogi ba danö Gizaraʼeli.” (Hez. 39:11) Lö nifatunö Zura Niʼamoniʼö wa so mboto eheha nikoʼo ba gulidanö. Hizaʼi, tefazaumba Zatana awö ndra malaʼika si lö sökhi ba mbaho sabakha sibai sagötö zi 1.000 fakhe. Ba gafuriata tetiboʼö ira ba mbaho alitö mazui faʼamate sagötö  faʼara. (Luk. 8:31; Fam. 20:1-3, 10) Börö me ba gulidanö so ”lewatö” Gogi, andrö wa tawaʼö tenga boto eheha ia.

7, 8. Simane Gogi moroi ba Magogi, hawaʼara tehori ”razo tanö yöu”?

⁷ Na tenga boto eheha, haniha Gogi moroi ba Magogi samalua fasuwöta safuria ba niha samosumange satulö? Datafaigi dombua wamaʼeleʼö Zura Niʼamoniʼö si tola manolo yaʼita ba wanöndra fanema li.

⁸ ”Razo tanö yöu.” (Baso Danieli 11:40-45.) Mamaʼeleʼö Danieli sanandrösa khö ndra samatörö ba gulidanö iʼotarai ba götönia irugi ba götöda iadaʼa. Itutunö göi ba wamaʼeleʼönia wa so dombua ngawawa politik si lö aetu fahindri yaʼia daʼö ”razo tanö raya” ba ”razo tanö yöu”. Razo si darua samatörö andrö fagati-gati manö börö me so ngawalö soi si faʼudu ba wamadöni haniha zabölö ebua kuaso. Me itutunö wasuwöta safuria nifalua Razo tanö yöu ”ba götö safuria”, imane Danieli, ”Mofanö ia si fao fönu ba wamakiko hegöi ba wangohori niha sato.” Si oföna isuwö yaʼia daʼö ono mbanua Yehowa. * Hizaʼi, simane Gogi moroi ba Magogi, hasambalö ”tehori” razo tanö yöu me no aefa isuwö nono mbanua Lowalangi hewaʼae lö aʼozu.

9. Hadia zalua si fagölö khö Gogi moroi ba Magogi faoma ’razo-razo ba zi sagörö ulidanö’?

⁹ ”Ira razo ba zi sagörö ulidanö.” (Baso Wamaʼeleʼö 16:14, 16; 17:14; 19:19, 20.) No tefaʼeleʼö ba mbuku Wamaʼeleʼö wa tohare ”razo-razo ba gulidanö” ba wanuwö ”Razo yawa razo”, yaʼia daʼö Yesu si no modadao ba Wamatörö Lowalangi ba zorugo. Hizaʼi, börö me tebai lakhamö zorugo, andrö wa lasuwö niha si faʼawö ba Wamatörö Lowalangi ba gulidanö. Ba gafuriata, tekalaisi ndra razo daʼö ba wasuwöta Hamagedo. Nehegö atö, tehori ira me no aefa lasuwö nono mbanua Yehowa simane salua khö Gogi moroi ba Magogi. *

10. Irugi iadaʼa, hadia niʼilada sanandrösa khö Gogi moroi ba Magogi?

¹⁰ Irugi iadaʼa, hadia niʼilada sanandrösa khö Gogi? Si oföna, yaʼia andrö tenga boto eheha. Si dua, Gogi eluahania ngawalö soi ba gulidanö si lö ara tö manuwö ono mbanua Lowalangi. Börö me no muzawili nono mbanua Lowalangi ba zi sagörö ulidanö, tatu manö mangosara fefu soi ba laʼalui lala ba wolawa yaʼira. (Mat. 24:9) Sindruhunia, Satana zamarou yaʼira. Iʼotarai mböröta, no idönisi ngawalö soi ba wolawa famosumange satulö. (1 Yo. 5:19; Fam. 12:17) Hizaʼi, sabölö itutunö ba wamaʼeleʼö Hezekieli sanandrösa khö Gogi moroi ba Magogi yaʼia daʼö nifalua ngawalö soi ba gulidanö sedöna manuwö ono mbanua Yehowa. *

11. Hadia niwaʼö wamaʼeleʼö Hezekieli sanandrösa ba ”soi” nisuwö Gogi?

¹¹ Simane si no tatutunö ba  ngenoli si 3, mofönu sibai Yehowa khö Gogi moroi ba Magogi börö me isuwö soi sebua  böli ba wamaigi Lowalangi. Soi haniha daʼö? Datatutunö zui wamaʼeleʼö Hezekieli. (Baso Hezekieli 38:8-12.) Möi Gogi ba ’wanuwö banua niha si no teʼefaʼö’ ba ’teʼowuloi moroi ba ngawalö soi’. Niha si so ba soi daʼö ”lö sametaʼu yaʼira”, ”lö hadöi towa solumöʼö banuara, lö baʼa-baʼa ba lö bawa göli”, ba ’lahöna waʼakayo’. Si toröi ba soi andrö yaʼia daʼö ono mbanua Yehowa samalua famosumange satulö. Soi hadia daʼö?

12. Hadia wamohouni salua ba Gizaraʼeli me götö Zura Niʼamoniʼö?

¹² Si oföna, moguna tatutunö hewisa wamohouni soi Gizaraʼeli me föna, nahia waʼatoröi nono mbanua Yehowa, nahia wohalöwö hegöi famosumange Lowalangi ba zi hauga abad. Me mamadaö ndraono Gizaraʼeli, ifaʼeleʼö Yehowa khö Hezekieli wa hasambalö mududugö soi daʼö ba lö hadöi sangiagö. (Hez. 33:27-29) Hizaʼi, ifaʼeleʼö göi Yehowa wa so nono mbanuania si toröi samalalini era-era sangawuli moroi ba nahia wangoloiʼö ba Mbabilona ba labohouni wamosumange satulö ba mbanuara. Börö howu-howunia, ifuli tobali tanö satabö sinanö soi Gizaraʼeli ”hulö Kabu Edena”. (Hez. 36:34-36) Tebörögö wamohouni andrö 537 SM, me mangawuli niha Yahudi ba Yeruzalema ba wamohouni famosumange satulö ba daʼö.

13, 14. (a) Hadia nifotöi soi wamati? (b) Hana wa ebua mböli soi daʼö ba wamaigi Yehowa?

¹³ Ba götöda iadaʼa, tebohouni göi nono mbanua Lowalangi samalua famosumange satulö. Simane nitutunö ba Faza 9, me no ara teʼoloiʼö ira ba Mbabilona Sebua, teʼefaʼö ira me 1919.  Ba ndröfi daʼö, iʼohe nono mbanuania Yehowa ba soi wamati. Soi daʼa faradaiso ba wamati yaʼia daʼö nahia safönu faʼahono dödö ba faʼakayo ba wamati, si fagölö-gölö tarasoi börö me tafosumange Lowalangi sindruhu. Lö khöda faʼataʼu ba daʼö. Tasöndra waʼahono dödö ba fangera-ngera satulö. (Amd. 1:33) Fahöna khöda gö wamati hegöi halöwö somasi ita yaʼia daʼö fanuriaigö Famatörö Lowalangi. Sindruhu-ndruhu wa alua wehede daʼa: ”Howu-howu Yehowa zameʼe faʼakayo ba niha, ba maʼifu lö ifaogö wangabu dödö.” (Amd. 10:22) Gofu hezo toröi ita, sindruhunia no so ita ba waradaiso wamati, asala lö taböhöli wamosumange satulö ba wehede hegöi ba gamuata.

¹⁴ Ebua sibai mböli soi wamati andrö ba wamaigi Yehowa. Hadia mbörö? Börö me hulö ”gama-gama sebua böli moroi ba ngawalö soi” nono mbanuania, yaʼia daʼö niha nidöni ba wamalua famosumange satulö. (Hag. 2:7; Yoh. 6:44) Laforege wamohouni amuatara mazui laʼoʼö gamuata Lowalangi sahöli-höli dödö. (Ef. 4:23, 24; 5:1, 2) Laʼodödögö wangai halöwö khö Lowalangi si tobali tandra wa laʼomasiʼö ba lafolakhömi ia. (Rom. 12:1, 2; 1 Yo. 5:3) Khalaigö atö hawaʼomuso dödö Yehowa me laforege wohalöwö ba wangaʼazökhi soi wamati. Törö tödöu daʼa: Na öʼofönaiʼö wamalua famosumange satulö, tenga ha öhaogö waradaiso ba wamati, hizaʼi no öʼomusoiʼö dödö Yehowa!​—Amd. 27:11.

15, 16. Hawaʼara tohare Gogi moroi ba Magogi ba wanuwö soi wamatida si no tebohouni?

¹⁵ Aboto ba dödöda wa lö ara tö owulo ngawalö soi ba wanuwö soi wamati sebua böli. Börö me ono mbanua Yehowa samalua famosumange satulö ita, hasambalö lasuwö ita simane si no tefaʼeleʼö. Andrö, sökhi na oya niʼilada sanandrösa ba daʼa. Datafaigi wanofu si tölu ngawua andre.

¹⁶ Hawaʼara tohare Gogi moroi ba Magogi ba wanuwö soi wamatida si no tebohouni? Imane famaʼeleʼö Hezekieli, ”Ba gangohorita ndröfi daʼö.” (Hez. 38:8) Lasuwö ita ba gangohorita götö daʼa. Törö tödöu, tebörögö wamakao sabölö-bölö na tedudugö Mbabilona sebua, yaʼia daʼö agama sofaya ba zi sagörö ulidanö. Me no aefa tehori agama sofaya, ba fatua lö tebörögö Hamagedo, ifalua Gogi wasuwöta safuria ba wanuwö niha samalua famosumange satulö.

17, 18. Hewisa Yehowa wotatugöi salua sagötö wamakao sabölö-bölö?

¹⁷ Hana wa möi Gogi wanuwö soi si no tebohouni okhöta nono mbanua Yehowa? Moloʼö famaʼeleʼö Hezekieli, so dombua mbörö. Si oföna, börö me Yehowa zangoʼou yaʼira ba si dua börö gohitö dödö si lö sökhi nifalua Gogi.

 ¹⁸ Yehowa zangoʼou yaʼira. (Baso Hezekieli 38:4, 16.) Imane Yehowa khö Gogi, ”Ubeʼe gai ba zimbimö” ba ”ufatenge ndraʼugö ba wanuwö soigu.” Hadia eluahania Yehowa mbörö wa lasuwö nono mbanuania ira soi böʼö? Tatu manö tenga! Lö ba dödönia ba wamakao ono mbanuania! (Yob. 34:12) Hizaʼi, aboto ba dödö Yehowa gera-era zi faʼudu khönia. Fatuwu ira ba niha samalua famosumange satulö, ba laʼalui ginötö si tefaudu ba wangohori ono mbanuania. (1 Yo. 3:13) Andrö wa ibeʼe Yehowa gai ba zimbi Gogi mazui idönisi dödö, iʼogunaʼö zalua enaʼö tefaudu daʼö ba gohitö dödönia ba moloʼö inötö si no itatugöi. Ba zi sambua inötö me no tedudugö Mbabilona Sebua, te so lala niʼogunaʼö Yehowa ba wamarou ngawalö soi enaʼö lafalua zi so ba dödöra. Lua-luania, laʼosaraʼö dödöra ba wasuwöta safuria ba daʼö mbörö wa tohare Hamagedo, fasuwöta sabölö-bölö ba gulidanö. Iʼefaʼö nono mbanuania Yehowa, ifaduhuʼö wa yaʼia zinangea mamatörö, ba ifolakhömi döinia niʼamoniʼö.​—Hez. 38:23.

19. Hana wa edöna Gogi worabu famosumange satulö?

 ¹⁹ Ohitö dödö Gogi si lö sökhi. Mangosara fefu soi ba ’laʼera-era zi lö sökhi’. Edöna lafalua wönura ba faʼabao dödöra si no mowaʼa ba nono mbanua Yehowa. Na luo daʼö, hulö zi lö faʼabölö nono mbanua Yehowa simane ’banua si lö hadöi towa solumöʼö, lö baʼa-baʼa ba lö bawa göli’. Simanö göi ngawalö soi, laforege enaʼö ’oya gama-gama nirabu ba niʼoloiʼöra’ moroi ba ’nono mbanua sangöhöna faʼakayo’ andrö. (Hez. 38:10-12) ”Faʼakayo” hadia? Faʼakayo ba wamati niʼokhögö nono mbanua Yehowa mazui okhötada sebua yaʼia daʼö famosumange satulö nibeʼeda khö Yehowa. Omasi ira larabu daʼö tenga börö me ebua mbölinia ba wamaigira, hizaʼi börö waʼafatuwura ba wamosumange satulö hegöi ba niha samalua daʼö.

20. Hewisa dania Gogi wanuwö soi wamati andrö?

²⁰ Hadia nifalua Gogi ba wanuwö soi ba wamati mazui faradaiso ba wamati? Te laforege fefu soi ba gulidanö andre enaʼö taröi lala waʼaurida yaʼita niha Keriso hegöi famosumange Lowalangi. Duma-dumania, laforege enaʼö lö tehenaigö gö ba wamati, lö latehegö khöda weʼamöi ba gangowuloa, laʼalui lala enaʼö lö khöda fahasara dödö ba lasaisi ita weʼamöi manuriaigö. Fefu nisuwöra andrö faosatö moroi ba waradaiso wamati. Börö me ifarou ira Satana, hasara dödö fefu soi ba wangohori ono mbanua Yehowa irege lö hadöi famosumange satulö ba gulidanö.

21. Hana wa öʼandrö saohagölö khö Yehowa me no ibeʼe wamangelama ba zi lö ara tö alua?

²¹ Fefu zamosumange Yehowa si so ba soi wamati hasambalö göna ira lua-lua wasuwöta nifalua Gogi moroi ba Magogi. Taʼandrö sibai saohagölö me no oföna ifangelama ita Yehowa! Iadaʼa, fatua lö tohare wamakao sabölö-bölö, datahalö gangetula ba wangofönaiʼö wamalua famosumange satulö. Na tafalua daʼö, no fao ita ba wangaʼazökhi soi si no tebohouni ba taʼila dania zahöli-höli dödö salua ba zi lö ara tö, yaʼia daʼö ba ginötö iʼoʼawögö nono mbanuania Yehowa hegöi töinia niʼamoniʼö ba Hamagedo, simane nitutunöda ba faza aefa daʼa.