1-3. (a) Hana wa tokea dödö Hezekieli, ba hadia zaboto ba dödönia sanandrösa ba waʼadudu Yeruzalema? (b) Hadia manö wanofu-nofu nitutunöda?

TOKEA Hezekieli! Awena sibai itema gangilata sanandrösa ba ngawalö niʼogorofi nifalua niha Yahudi sondröi sindruhu ba gosali Yeruzalema. * Ira samadaö andrö lataʼunöisi nahia wamosumange sebua ba Gizaraʼeli. Hizaʼi, tenga ha osali nitaʼunöisira. Afönu faʼalösökhi zi sagörö tanö Yehuda ba lö hadöi saʼae fanötöna. Sindruhu wa afökhö dödö Yehowa ba gamuata nono mbanua nifilinia andrö. Ifatunö khö Hezekieli, ”Ufalua khöra wönugu sabölö-bölö.”​—Hez. 8:17, 18.

² Khalaigö waʼabu dödö Hezekieli me irongo wa mofönu Yehowa ba idudugö Yeruzalema hegöi osali niʼamoniʼö andrö mböröta. Tatu imane tödönia samaʼeleʼö andrö, ’Hewisa niha si lö faröi ba mbanua daʼö? Hadia teʼorifi ira? Na yaʼia, hewisa wa tola teʼorifi ira?’ Hizaʼi, lö moguna manofu-nofu manö ia. Lö ara me no irongo duria wanguhuku andrö, so li sebua sogaoni niha samalua fanguhuku moroi khö Lowalangi.  (Hez. 9:1) Ahono dödö Hezekieli ba niʼilania aefa daʼa börö me iʼila ba gangilata andrö wa lö tehori fefu niha. Teʼorifi niha si lö faröi!

³ Me no ahatö wangohori ulidanö si lö sökhi andre, te manofu-nofu ita, ’Haniha dania niʼorifi na tedudugö gulidanö andre?’ Enaʼö taʼila wanema linia, datatutunö: (1) Hadia niʼila Hezekieli? (2) Hewisa waʼalua gangilata daʼö ba götönia? (3) Hadia geluahania khöda?

4. Tutunö hadia nirongo hegöi niʼila Hezekieli.

⁴ Hadia niʼila hegöi nirongo Hezekieli? (Baso Hezekieli 9:1-11.) Ba gosali, iʼila dafitu ndra matua ”si tohare moroi ba mbawa göli tanö yawa sangotahögö tanö yöu”, te ahatö ba nadu sangöndru fönu Lowalangi mazui ba nahia ndra alawe sangeʼesi lowalangi Tamusi. (Hez. 8:3, 14) Ira matua si dafitu andre möi ira ba golayama tanö bakha ba mozizio ira ba zinga naha wameʼe sumange nifazökhi moroi ba tembaga. Wa möi ira ba daʼö tenga ba wameʼe sumange. Me luo daʼö, lö saʼae itema zumange nibeʼera Lowalangi. Daönö moroi ba gotalua ndra matua andrö no laʼohe ”wangöna ba wamunu”. Hizaʼi, faböʼö ndra matua si samösa tö, no ifake nukha si sökhi ba tenga föda niʼohenia hizaʼi ”naha fena sekretaris” mazui moloʼö nisura ba gahe zura, ”naha dawa fena sekretaris”.

5, 6. Hadia gangetula si tola tahalö sanandrösa ba niha nifotandro? (Faigi gambara ba wamobörö wamahaʼö.)

⁵ Hadia nifalua ndra matua solohe naha fena andrö? So halöwö sabölö moguna nitemania moroi khö Yehowa. Imane Yehowa, ”Töröi fefu mbanua daʼa awö Yeruzalema, ba fotandro gangango niha sabu tödö ba sangarö-ngarö börö ngawalö zi raʼiö nifalua ba mbanua daʼö.” Me irongo daʼö Hezekieli, te itörö tödönia hadia zalua me mböröta: Dozi satua ndraono Gizaraʼeli si faduhu tödö, lafagule ndro ba högö mbawandruhö nomora enaʼö lö mate nonora siaʼa. (2 Mo. 12:7, 22, 23) Hadia fagölö geluaha dandra nifagule ba gangango nifalua ndra matua ba gangilata Hezekieli? Hadia teʼorifi niha si no mubeʼe tandra andrö me tedudugö Yeruzalema?

⁶ Nehegö haniha manö nifotandro. Tebeʼe dandra andrö ba gangago ”niha sabu tödö ba sangarö-ngarö börö ngawalö zi raʼiö nifalua ba mbanua daʼö”. Hadia zi tola tahalö rahu-rahu sanandrösa ba niha nifotandro? Abu dödöra tenga ha börö me no afönu gosali Lowalangi famosumange adu, hizaʼi börö me no afönu mbanua daʼö faʼalösökhi, fohorö-horö ba faʼafaito. (Hez. 22:9-12) Baero daʼö, lö labiniʼö nösi dödöra ira niha sadölö tödö andre. Moroi ba wehede hegöi nifaluara, ba daʼö  oroma wa ogoro ira zalua ba zi fasuira, ba laforege wamalua famosumange satulö. Daʼö mbörö wa lö ihori ira Yehowa Lowalangi sahakhö tödö.

7, 8. Hadia halöwö ndra matua solohe fangöna andrö, ba hewisa lua-lua waö-waönia?

⁷ Hewisa ndra matua si daönö solohe fangöna ba wamunu? Hadia halöwöra? Irongo Hezekieli wa no iwaʼö khöra Yehowa enaʼö laʼoʼö ndra matua solohe naha fena, aefa daʼö labunu fefu niha si lö hadöi tandra ba gangago. Imane Yehowa, ”Mibörögö ba naha niʼamoniʼö khögu.” (Hez. 9:6) Labörögö moroi ba hunö Yeruzalema mazui osali si no tetaʼunöisi föna Yehowa. Si oföna tehori yaʼia daʼö ’ira matua sagalawa döfi si so föna gosali’. Yaʼira andrö sondröniaʼö iraono Gizaraʼeli si 70 niha sameʼe sumange somuhua ba nadu.​—Hez. 8:11, 12; 9:6.

 ⁸ Hewisa gafuriata zalua andrö? Iʼila ba irongo Hezekieli me möi ndra matua solohe naha fena daʼö ba wangondrasi Yehowa imane, ”No ufalua fefu simane niwaʼöu.” (Hez. 9:11) Na simanö, hadia zalua ba Yeruzalema? Hadia so niha si lö faröi niʼorifi me tedudugö mbanua andrö?

9, 10. Haniha manö niha si lö faröi sauri me tedudugö Yeruzalema, ba hadia zi tola tahalö angetula sanandrösa khöra?

⁹ Baso 2 Ngaʼötö 36:17-20. Alua gangilata Hezekieli me 607 SM, me tohare Mbabilona ba wanudugö Yeruzalema hegöi osalinia. Simane ’mako anaʼa ba danga Yehowa’, iʼogunaʼö Mbabilona Yehowa ba wanuwagö fönunia ba Yeruzalema si no faröi. (Yer. 51:7) Hadia göna fefu niha wanguhuku andrö lö famaigi bawa? Löʼö. Ifaʼeleʼö ba gangilata Hezekieli wa so niha soloi ba danga zaradadu Mbabilona.​—1 Mo. 18:22-33; 2 Fe. 2:9.

¹⁰ Ba gotalua niha si lö faröi niʼorifi, so ngaʼötö Rekhabi, Ebedi-melekhi niha Gaitiofia, simanö göi Yeremia samaʼeleʼö hegöi Barukhi sekretarisnia. (Yer. 35:1-19; 39:15-18; 45:1-5) Moroi ba gangilata Hezekieli, tola tahalö rahu-rahu wa yaʼira andrö ”niha sabu tödö ba sangarö-ngarö börö ngawalö zi raʼiö” nifalua ba Yeruzalema. (Hez. 9:4) Fatua lö alua wanudugö andrö, tatu manö no laforomaʼö waʼanuzu dödöra ba ngawalö zi lö sökhi salua ba zi fasuira ba laforege wamalua famosumange satulö. Daʼö mbörö wa teʼorifi ira.

11. Haniha niʼamaedolagö ndra matua si daönö andrö solohe fangöna hegöi ira matua solohe naha fena sekretaris?

¹¹ Hadia sindruhu-ndruhu lafotandro gangango niha si lö faröi andrö? Lö nifatunö Zura Niʼamoniʼö wa möi Hezekieli, samaʼeleʼö tanö böʼö mazui niha böʼö ba wamasui Yeruzalema ba wamotandro niha si lö faröi. Tatu manö angilata Hezekieli ifaʼeleʼö zalua ba zorugo irege lö oroma ba duduma hörö niha. Ira matua solohe naha fena sekretaris hegöi ira matua si daönö solohe fangöna ba wamunu, eluahania ira malaʼika si lö faröi si no mamaʼanö yaʼira ba wamalua ohitö dödö Yehowa. (Si. 103:20, 21) Iʼogunaʼö ndra malaʼikania Yehowa ba wanguhuku Yeruzalema si faröi. Börö me no lafotandro gangango niha niʼorifi, eluahania no latatugöi ira malaʼika wa nibunu ha niha si faröi, irege lö fao niha si lö faröi ba wamunu andrö.

12, 13. (a) Hadia mbörö wa ifalua wönunia Yehowa ba Yeruzalema, ba hadia göi mbörö wa ifalua zimane daʼö ba götöda iadaʼa? (b) Hadia Yeruzalema si faröi andrö eluahania Gereja? Tutunö. (Faigi kotak ”Hadia Yeruzalema si Faröi Andrö Eluahania Gereja?”)

¹² Ba götöda, ifalua dania Lowalangi wanguhuku sebua yaʼia daʼö ’famakao sabölö-bölö si lö irai alua, iʼotarai me tewöwöi gulidanö irugi iadaʼa, ba lö göi saʼae alua dania’. (Mat. 24:21)  Hizaʼi, so wanofu sabölö moguna: Hadia no latatugöi niha nihori dania? Hadia no mufotandro nono mbanua Yehowa samalua famosumange satulö enaʼö teʼorifi ira? Hadia sindruhu so ba ginötöda iadaʼa ndra matua solohe naha fena simane nifaʼeleʼö Hezekieli? Fefu wanema linia ya. Hezo taʼila? Datafuli tatutunö gangilata Hezekieli.

¹³ Hadia lö olifu ndraʼugö hadia mbörö wa ifalua wönunia Yehowa ba Yeruzalema? Fuli faigi Hezekieli 9:8, 9. (Baso.) Me aombö dödö Hezekieli wa tehori ”fefu ndraono Gizaraʼeli si toröi” ba ginötö tedudugö Yeruzalema, ifatunö Yehowa öfa ngawalö mbörö wa tehori mbanua daʼö. Si oföna, ’ebua sibai zalara’. * Si dua, ”afönu fanuwagö do” mbanua Yehuda. Si tölu afönu ”faʼalösökhi” Yeruzalema ibu kota famatörö Yehuda. Si öfa, si fao faʼonekhe lawaʼö niha sato wa ’lö iʼila Yehowa’ ngawalö zi lö sökhi nifaluara. Hadia tenga daʼö göi zalua ba gulidanö si lö sökhi andre safönu falöʼatulö ba si lö mamati? Börö me lö ”tebulö” Yehowa, hasambalö göi mofönu ia ba gulidanö si so yaʼita iadaʼa. (Yak. 1:17; Mal. 3:6) Ira matua solohe naha fena hegöi ira matua si daönö solohe fangöna ba wamunu, fagölö halöwö nitemara ba ginötöda iadaʼa!

14, 15. Hadia manö dandra wa no ifangelama niha sato Yehowa fatua lö ihori ira?

¹⁴ Hewisa waʼalua gangilata Hezekieli andrö ba götöda iadaʼa? Na tafahaʼö ita hewisa waʼalua gangilata daʼö me götö föna, tola aboto ba dödöda hadia zalua iadaʼa hegöi sedöna alua dania. Nehegö hadia manö zi no alua mazui sedöna alua moloʼö angilata Hezekieli.

¹⁵ Ibeʼe wamangelama Yehowa fatua lö ifalua wanguhuku. Simane si no tafatunö ba Faza 11, ituyu Hezekieli andrö Yehowa ”tobali sanaro ba ndraono Gizaraʼeli”. (Hez. 3:17-19) Iʼotarai me 613 SM, no ihaogö wamaʼema famangelama daʼö Hezekieli ba ndraono Gizaraʼeli wa tehori dania ira. Ira samaʼeleʼö tanö böʼö sotöi Yesaya hegöi Yeremia, labeʼe göi wamangelama sanandrösa ba wanudugö Yeruzalema. (Yes. 39:6, 7; Yer. 25:8, 9, 11) Ba götöda iadaʼa, iʼogunaʼö Yesu andrö Yehowa ba wamataro ngawawa side-ide enoninia nibayoini. Tenga ha labeʼe gö ba niha sohalöwö ba nomo khönia mazui niha samalua famosumange satulö, hizaʼi lafangelama göi niha böʼö ba wamakao sabölö-bölö si lö ara tö alua.​—Mat. 24:45.

16. Yaʼita ono mbanua Yehowa, hadia fao ita ba wamotandro niha niʼorifi? Tutunö.

¹⁶ Tenga ono mbanua Yehowa zamotandro niha niʼorifi. Törö tödöu, lö tebeʼe halöwö khö Hezekieli ba wamasui Yeruzalema hegöi ba wamotandro niha. Simanö göi iadaʼa, lö tebeʼe ba nono mbanua Lowalangi halöwö ba wamotandro niha.  Börö me sohalöwö ba nomo Keriso ita, andrö wa tebeʼe khöda halöwö fanuriaigö. Taʼila wa tenga si famai-mai halöwö daʼa, andrö wa taforege weʼamöi manuriaigö turia somuso dödö sanandrösa ba Wamatörö Lowalangi, ba tafangelama niha wa lö ara tö tehori gulidanö si lö sökhi andre. (Mat. 24:14; 28:18-20) Na tafalua daʼö no tatolo niha satulö tödö enaʼö fao ira ba wamosumange satulö.​—1 Ti. 4:16.

17. Hadia nifalua niha ero samösa enaʼö mufotandro ia ba teʼorifi?

¹⁷ Enaʼö tola teʼorifi moroi ba waʼadudu si lö ara tö alua, dozi niha moguna laforomaʼö wamatira iʼotarai iadaʼa. Simane si no tatutunö, so ösa niha sauri moroi ba waʼadudu Yeruzalema me 607 SM. Alua daʼö, börö me oföna laforomaʼö waʼanuzu dödöra ba gamuata si lö sökhi ba laʼosambuaʼö dödöra ba wamalua famosumange satulö. Andrö, fatua lö tedudugö gulidanö andre, fefu niha hasambalö ’abu dödöra ba mangarö-ngarö ira’, mazui tefakao waʼaurira börö waʼalösökhi salua. Tebai labiniʼö nirasoira. Fehede hegöi amuatara zangoromaʼö wa laforege wamalua famosumange satulö. Hewisa wamaluara? Moguna latemaʼö duria somuso dödö, laforege wangokhögö amuata Keriso, lalulu waʼaurira khö Yehowa ba labayagö ira idanö, ba lö faröi ira wotuhini talifusö Keriso. (Hez. 9:4; Mat.  25:34-40; Ef. 4:22-24; 1 Fe. 3:21) Lö laböhöli wamalua daʼö ba lö laröi wamosumange satulö irege alua wamakao sabölö-bölö, börö me ha niha samalua daʼö nifotandro ba wangorifi.

18. (a) Hawaʼara ba hadia nifalua Yesu Keriso ba wamotandro niha? (b) Hadia moguna mufotandro niha nibayoini si lö faröi? Tutunö.

¹⁸ Yesu dania zamotandro niha sinangea muʼorifi. Ba götö Hezekieli, mohalöwö ndra malaʼika ba wamotandro niha si lö faröi. Ba götöda andre, ira matua solohe naha fena sekretaris muʼamaedolagö ia ba halöwö Yesu Keriso ba zi so miföna, ba ginötö ’tohare ia ba lakhöminia’ tobali Sanguhuku ba ngawalö soi. (Mat. 25:31-33) Tohare ia dania ba wamakao sabölö-bölö, na no tehori agama sofaya. * Ba ginötö wamakao andrö, lö ara fatua lö tohare Hamagedo, Yesu dania zanguhuku mazui samotandro niha si tobali biri-biri mazui nambi. Ifotandro ”ngawawa sato” si tobali biri-biri enaʼö ”lasöndra waʼauri irugi zi lö aetu”. (Fam. 7:9-14; Mat. 25:34-40, 46) Hewisa göi niha nibayoini si lö faröi? Lö saʼae mufotandro ira enaʼö teʼorifi ba Hamagedo. Latema dania wamotandro safuria fatua lö mate mazui fatua lö tebörögö wamakao sabölö-bölö. Aefa daʼö, fatua lö tebörögö Hamagedo, tefazawa ira ba zorugo.​—Fam. 7:1-3.

19. Haniha zanguhuku ulidanö andre si fao khö Yesu? (Faigi kotak ”Faʼabu Dödö ba Fangarö-ngarö, Famotandro ba Fanudugö​—Hawaʼara ba Hewisa?”)

¹⁹ Yesu Keriso si no mamatörö tobali Razo ba zorugo, tohare dania ia awö ndra saradadunia ba wanguhuku ulidanö andre. Ba  gangilata Hezekieli, ira matua si daönö solohe fangöna awena lafalua halöwöra na no awai ifotandro fefu niha ira matua samake nukha si sökhi andrö. (Hez. 9:4-7) Simane daʼö göi ba götöda, awena alua wanudugö na no ifalua Yesu wanguhuku hegöi famotandro niha si tobali biri-biri enaʼö teʼorifi. Ba Hamagedo dania, idöniaʼö ndra saradadunia Yesu ba zorugo yaʼia daʼö awönia si 144.000 awö ndra malaʼikania niʼamoniʼö ba wanuwö ulidanö si lö sökhi andre. Tehori dania gulidanö daʼa, hizaʼi niha samalua famosumange satulö, teʼohe ira ba gulidanö si bohou si lö hadöi faʼalösökhi.​—Fam. 16:14-16; 19:11-21.

20. Hadia manö wamahaʼö samarou tödöda moroi ba gangilata Hezekieli andre?

²⁰ Taʼandrö saohagölö me oya wamahaʼö si möi famarou dödö ba gangilata Hezekieli sanandrösa khö ndra matua solohe naha fena sekretaris! Sindruhu-ndruhu faduhu dödöda wa lö ifaogö Yehowa wangohori niha si sökhi ba niha si lö sökhi. (Si. 97:10) Taʼila hadia zinangea tafalua iadaʼa enaʼö mufotandro ita dania ba teʼorifi. Börö me yaʼita samosumange Yehowa, taforege ba wamaʼema turia somuso dödö ba niha sabu tödö ba sangarö-ngarö börö waʼalösökhi gulidanö Zatana ba tafangelama ira sanandrösa ba wangohori ulidanö si lö sökhi andre. Na tafalua daʼö, taʼokhögö döi sebua ba wanolo niha ”si sökhi amuata somasi manöndra faʼauri si lö aetu” irege fao ira ba wamalua famosumange satulö, tefotandro ira enaʼö teʼorifi ba lakhamö gulidanö si bohou si lö hadöi faʼalösökhi.​—Hal. 13:48.