1, 2. Hana wa itaria ibeʼe gangilata Yehowa ba wamahaʼö ono mbanuania si so ba gulidanö?

KHALAIGÖ zi sambua ösi nomo si no modadao ba zinga meza wemanga ba wamahaʼö yaʼira ba Zura Niʼamoniʼö. Enaʼö aboto ba dödö ndraononia si gide-ide wamahaʼö Zura Niʼamoniʼö, iforomaʼö khöra amara gambara salio laʼila eluaha. Faʼiki hegöi faʼaterou dödö niforomaʼö ndraononia, daʼö zangoromaʼö wa no mofozu namara andrö wamahaʼö yaʼira. Gambara daʼö zanolo iraononia enaʼö aboto ba dödöra zindruhu sanandrösa khö Yehowa hewaʼae abua ba ndraono side-ide wangiʼila eluahania.

² Simane ama no mege, iʼomasiʼö göi niha Yehowa si no amaedola ndraononia enaʼö aboto ba dödöra zi lö oroma. Andrö wa ibeʼe khöra gangilata. Duma-dumania, ba wangabakhaiʼö faʼaboto ba dödö sindruhu sanandrösa khönia, ibeʼe gangilata sahöli-höli dödö khö Hezekieli. No tatutunö ösa daʼa ba Faza 3. Iadaʼa datatutunö sambua faosatö moroi ba gangilata Hezekieli sahöli-höli dödö. Na aboto ba dödöda geluahania, itugu ahatö ita khö Yehowa.

3. (a) Moloʼö Hezekieli 1:4, 5, hadia niʼila Hezekieli ba gangilatania? (Faigi gambara ba wamobörö wamahaʼö.) (b) Hadia niʼilamö moroi ba nitutunö Hezekieli sanandrösa ba gangilatania?

³ Baso Hezekieli 1:4, 5. Imane Hezekieli, ”So daöfa [zi hulö] malaʼika”, ba simane angorudua si faruka ba malaʼika ira, niha hegöi urifö. Ba wanutunö yaʼia, iʼogunaʼö ngawua wehede ”daöfa [zi hulö] malaʼika”. Ba ginötö mibaso fefu gangilata daʼa si so ba Hezekieli faza 1, tola miʼila wa asese iʼogunaʼö samaʼeleʼö andre ngawua wehede ”si fakhili-khili”, ”simane”, ’si hulö’. (Hez. 1:13, 24, 26) Hizaʼi, aboto ba dödö Hezekieli wa daʼa ha amaedola si fakhili-khili moroi ba zi hauga ngawalö zi lö oroma si so ba zorugo.

4. (a) Hewisa Hezekieli me itema gangilata daʼö? (b) Hadia zaboto ba dödö Hezekieli sanandrösa khö ndra kerubi?

⁴ Tatu ahöli-höli dödö Hezekieli hadia zi no iʼila ba si no irongo. Malaʼika si daöfa andrö ”hulö mbo galitö si hola-hola”. Alio sibai wofanöra ”hulö haga gari mbanua”. Li gafira ”hulö goso-goso nidanö sabölö-bölö”, ba höngö-höngöra ”hulö ruru zaradadu sato”. (Hez. 1:13, 14, 24-28; faigi kotak ”Ira Malaʼika ba Gangilata Hezekieli”.) Moroi ba gangilata Hezekieli tanö böʼö nitemania, aboto ba dödöda wa malaʼika si daöfa andrö yaʼia daʼö ”kerubi”, mazui ira malaʼika sagabölö. (Hez. 10:2) Börö me Hezekieli andrö ngaʼötö gere, tatu aboto ba dödönia wa ira kerubi andrö zahatö khö Lowalangi ba wangai halöwönia.​—1 Ng. 28:18; Si. 18:10.

5. (a) Hewisa ndra kerubi hegöi bawara si öfa muʼamaedolagö ba waʼabölö Yehowa awö lakhöminia? (b) Hadia mbörö wa möi famasugi ba dödöda geluaha döi Lowalangi moroi ba zi öfa ngawalö niwöwöi andrö? (Faigi nisura ba gahe zura.)

⁵ Baso Hezekieli 1:6, 10. Iʼila göi Hezekieli wa so öfa ngawua mbawa ero sambua kerubi yaʼia daʼö bawa niha, bawa zingo, bawa zawi si matua hegöi bawa moyo. Me iʼila zi öfa bawa andrö, tatu manö adöni dödö Hezekieli börö waʼabölö hegöi lakhömi Yehowa sahöli-höli dödö. Hadia mbörö? Sikhalara hulö zikhala gomböila danga Yehowa soʼamaedolagö faʼamolakhömi, faʼebua kuaso ba faʼabölö. Singo yaʼia daʼö urifö sabölö, sawi si matua yaʼia daʼö urifö nifaliaro si tebai mukalaisi, moyo yaʼia daʼö fofo fondrege zabölö, ba niha yaʼia daʼö omböila danga Lowalangi solakhömi, samatörö ngawalö niwöwöi ba gulidanö. (Si. 8:4-6) Hewaʼae simanö, iʼila Hezekieli wa barö dadaoma Yehowa so zi öfa ngawalö niwöwöi fondrege zabölö andrö niʼamaedolagö si öfa bawa ero sambua kerubi. Tefaudu sibai daʼa börö me Yehowa andrö Samatörö Fondrege Zalawa ba tola iʼogunaʼö ngawalö niwöwönia ba wamalua ohitö dödönia! * Simane niwaʼö zanura sinunö, ”Mamatörö ia ba ngawalö hadia ia.”​—Si. 148:13.

6. Hadia zanolo Hezekieli irege aboto ba dödönia geluaha zi öfa bawa andrö?

⁶ Ba gafuriata, me no iʼangerönusi fefu niʼilania andrö Hezekieli, te itörö tödönia nono mbanua Lowalangi ba götö föna, no irai laʼogunaʼö gurifö si tobali famaedo. Duma-dumania,  ifaedogö Yakobo nononia Yehuda simane ono zingo, ba ononia Beniami simane asu gatua. (1 Mo. 49:9, 27) Hadia mbörö? Börö me oroma waʼafaböʼö gamuata zingo faoma asu gatua ba simanö göi nonora. Andrö, me iʼangerönusi duma-duma nisura ba mbuku Moze si no teʼehehaini, tola ihalö gangetula Hezekieli wa sikhala ndra kerubi andrö iʼamaedolagö gamuata sahöli-höli dödö. Hizaʼi hadia geluahania gamuata daʼö?

7, 8. Hadia gamuata sasese laʼamaedolagö ba zingo, moyo, sawi si matua hegöi niha?

⁷ Sanura Sura Niʼamoniʼö sauri fatua lö si tumbu Hezekieli, laʼamaedolagö ösa gamuata niha ba gurifö simane singo, moyo hegöi sawi si matua. Duma-dumania, so ba Zura Niʼamoniʼö ngawua wehede: ”Niha si barani sangokhögö tödö simane tödö zingo.” (2 Sa. 17:10, nisura ba gahe zura; Amd. 28:1) ”Muhombo moyo ba nahia salawa . . . ikhamö hörönia danö saröu.” (Yob. 39:27, 29) ”Fahöna mbua nowi börö waʼabölö zawi si matua.” (Amd. 14:4) Simane si no asese mututunö ba publikasida, bawa zingo muʼamaedolagö ia faʼabarani ba wangoʼawögö faʼatulö, bawa moyo muʼamaedolagö ia faʼatua-tua ba wangiʼila salua ba zi so miföna, ba bawa zawi si matua muʼamaedolagö ia faʼabölö sebua.

⁸ Hewisa göi ’mbawa niha’? (Hez. 10:14) Tatu manö muʼamaedolagö daʼa ba gamuata si lö iʼokhögö urifö, hizaʼi daʼa gamuata niʼokhögö niha si fakhili-khili khö Lowalangi. (1 Mo. 1:27) Ha niha gulidanö zangoromaʼö amuata simane daʼö, ba imane khöra Lowalangi, ”Miʼomasiʼö Yehowa Lowalangimi moroi siʼaikö ba dödömi,” ba ”Miʼomasiʼö nawömi simane faʼomasimi ami.” (5 Mo. 6:5; 3 Mo. 19:18) Na taʼomasiʼö nawöda soroi ba dödö simane si no muʼoroisi, eluahania no taʼoʼö waʼomasi Yehowa. Isura sinenge sotöi Faulo, ”Taʼomasiʼö Lowalangi börö me no oföna iʼomasiʼö ita.” (1 Yo. 4:8, 19) Börö daʼö, ”bawa niha” ba gangilata Hezekieli muʼamaedolagö ia faʼomasi.

9. Haniha manö zangokhögö amuata niʼamaedolagö kerubi si öfa bawa?

⁹ Haniha manö zangokhögö amuata daʼö? Börö me si öfa bawa nitutunöda andre yaʼia daʼö bawa ndra kerubi, tola tahalö rahu-rahu wa fefu ndra kerubi laʼokhögö gamuata daʼö. Yaʼira andre ösi nomo Yehowa si lö faröi ba zorugo. (Fam. 5:11) Börö me Yehowa Gumbu waʼauri ndra kerubi, yaʼia zameʼe khöra amuata andrö. (Si. 36:9) Börö daʼö, mufoʼamaedolagö mbawa ndra kerubi andrö amuata Yehowa. (Yob. 37:23; Si. 99:4; Amd. 2:6; Mi. 7:18) Hewisa wangoromaʼö Yehowa amuatania sahöli-höli dödö andre?

10, 11. Hadia manö gunania khöda moroi ba zi öfa ngawalö gamuata Yehowa?

 ¹⁰ Faʼatulö. Börö me Lowalangi ’somasi faʼatulö’ Yehowa andrö, ”lö ebua dödö zambuana” ia. (Si. 37:28; 5 Mo. 10:17) Hewaʼae no faböʼö-böʼö zalua khöda ba zilalö hegöi dadaomada, tola tobali ita ono mbanuania, lö taböhöli wangai halöwö khönia ba tasöndra howu-howu irugi zi lö aetu. Faʼatua-tua. Börö me Lowalangi ’satua-tua ia’, ibeʼe khöda Yehowa mbuku ’so iröʼö faʼatua-tua’. (Yob. 9:4; Amd. 2:7) Mene-mene Zura Niʼamoniʼö zanolo yaʼita ba wanaögö abula dödö sero maʼökhö ba sökhi waʼaurida. Kuaso. Börö me Lowalangi ”sebua kuaso ia”, iʼabölöʼö ita Yehowa faoma ehehania niʼamoniʼö. Buania, taʼokhögö ’waʼabölö sahöli-höli dödö’ ba wanaögö ngawalö gabula dödö sebua.​—Nah. 1:3; 2 Ko. 4:7; Si. 46:1.

¹¹ Faʼomasi. Börö me Lowalangi ’si fahöna faʼomasi si lö faröi’ ia, lö irai faröi Yehowa ba nono mbanuania si lö faröi. (Si. 103:8; 2 Sa. 22:26) Tola manö abu dödöda börö wökhö mazui me no atua mboto irege tebai saʼae mangai halöwö ita khö Yehowa simane ba zilalö. Hizaʼi, terara dödöda me taʼila wa itörö tödö Yehowa fefu waʼomasi hegöi halöwö nifaluada khönia. (Heb. 6:10) Tatu manö no oya tatema mbua moroi ba waʼatulö, faʼatua-tua, kuaso hegöi faʼomasi Yehowa. Ba lö aetu nasa tatema mbua moroi ba gamuatania si öfa ngawalö andrö.

12. Hadia zinangea itörö tödöda ba wogamö faʼaboto ba dödö sanandrösa ba gamuata Yehowa?

¹² Moguna tatörö tödöda wa ”awena singa-singa” niʼilada sanandrösa ba gamuata Yehowa. (Yob. 26:14) ”Lö ikhamö fangera-ngerada Wondrege Zabölö andrö” börö me ”tebai nisuʼa waʼabölönia”. (Yob. 37:23; Si. 145:3) Börö daʼö, tebai muʼerai gamuata Yehowa mazui muʼola-olaini. (Baso Roma 11:33, 34.) Iforomaʼö göi khöda angilata Hezekieli wa tebai muʼerai hawaʼoya ba hawaʼebua gamuata Lowalangi. (Si. 139:17, 18) Hadia gangilata sangoromaʼö daʼö?

13, 14. Hadia geluaha mbawa ndra kerubi andrö si öfa ba hadia mbörö wa tola tawaʼö zimanö?

¹³ Iʼila Hezekieli ero sambua kerubi andrö so öfa mbawara, tenga ha sambua. Hadia geluahania? Bakha ba Daromali Lowalangi asese iʼogunaʼö numero si öfa ba wamoʼeluaha faʼafönu mazui ahori so. (Yes. 11:12; Mat. 24:31; Fam. 7:1) Ba gangilata andre, so mato hauga kali itötöi Hezekieli numero si öfa! (Hez. 1:5-18) Börö daʼö, hadia rahu-rahunia? Kerubi si daöfa eluahania fefu ndra malaʼika si lö faröi, ba si öfa bawa ndra kerubi na murahugö, eluahania amuata Yehowa maʼafefu. *

¹⁴ Hana wa tola tahalö rahu-rahu wa si öfa bawa ndra kerubi andrö muʼamaedolagö ia töra moroi ba zi öfa amuata?  Datafaedogö gaolo-gaolo si öfa ngawua ba gangilata andre. Sindruhu-ndruhu wa ahöli-höli dödöda ero sambua gaolo-gaolo. Hizaʼi, na munehegö ia maʼafefu, tenga ha öfa gaolo-gaolo si fabali-bali. Daʼa fefu zi tobali dane-dane wondrasi ba gureta Yehowa. Simanö göi, na munehegö fefu zi öfa bawa andrö, tenga ha daʼö geluahania amuata si öfa ngawalö sadöni dödö si no mufasambu-sambua. Daʼö dane-dane gamuata Yehowa sahöli-höli dödö.

15. Hadia wamahaʼö si möi famarou dödö Hezekieli moroi ba gangilatania si oföna?

¹⁵ Moroi ba gangilata siföföna, so sambua wamahaʼö nihalö Hezekieli si möi fondrara dödö sanandrösa ba wahuwusania khö Yehowa. Nehegö ngawua wehede siföföna nisura zamaʼeleʼö daʼa. Isura wa so ia ”ba mbanua niha Galedaia”, ba imane, ”Ba daʼö, urasoi waʼabölö Yehowa.” (Hez. 1:3) Ba daʼö itema gangilata andrö ba Mbabilona tenga ba Yeruzalema. * Börö me Yehowa zangabölöʼö yaʼia ba Mbabilona, ifahaʼö ia Hezekieli hewaʼae na yaʼia andrö niha niʼoloiʼö ba fandröndröu ia moroi ba Yeruzalema hegöi ba gosali Lowalangi, tenga daʼö  geluahania wa aröu ia khö Yehowa ba lö ifalua wamosumange satulö. Gofu hadia dadaoma Hezekieli mazui gofu hezo toröi ia, tola ifalua wamosumange satulö na ifalua daʼö soroi ba dödö ba omasi ia wangai halöwö khö Yehowa.

16. (a) Hadia mbörö wa möi famarou dödöda gangilata Hezekieli? (b) Hadia zamarou yaʼugö irege lö öböhöli wamosumange Yehowa soroi ba dödö?

¹⁶ Hana wa tobali fangomuso dödö khöda wamahaʼö moroi khö Hezekieli andrö? Daʼö zangoromaʼö na tafosumange Yehowa soroi ba dödö, hasambalö ahatö ia khöda gofu hezo toröi ita, gofu hawaʼabua gabula dödö mazui hewisa waʼaurida. (Si. 25:14; Hal. 17:27) ”Fahöna waʼomasi si lö faröi” moroi khö Yehowa ba nono mbanuania. Lö irai faröi ia khöda. (2 Mo. 34:6) Lö irai fabali ita moroi ba waʼomasi Yehowa si lö faröi. (Si. 100:5; Rom. 8:35-39) Baero daʼö, tobali famasugi ba dödöda gangilata sanandrösa ba wangamoniʼö hegöi faʼabölö Yehowa sahöli-höli dödö wa sinangea mufosumange ia. (Fam. 4:9-11) Sindruhu-ndruhu wa taʼandrö saohagölö börö me no ibeʼe gangilata simane daʼö Yehowa ba wamahaʼö yaʼita ba zindruhu sanandrösa khönia hegöi amuatania! Na itugu monönö waʼaboto ba dödöda gamuata Yehowa, itugu ahatö ita khönia. Terou göi dödöda ba wanuno hegöi ba wamosumange yaʼia soroi ba dödö ba faʼabölöda maʼafefu.​—Luk. 10:27.

17. Hadia manö wanofu-nofu nifatunöda ba faza aefa daʼa?

¹⁷ Alimagö sibai, no tetaʼunöisi wamosumange satulö ba götö Hezekieli. Hana wa tola alua daʼö? Hewisa dödö Yehowa? Ba hadia gamakhaitania khöda iadaʼa? Fanema linia mututunö ba faza aefa daʼa.