1-3. (a) Tutunö hadia niʼila Hezekieli hegöi nirongonia. (Faigi gambara ba wamobörö wamahaʼö.) (b)  Hadia waʼabölö nirasoi Hezekieli ba hadia lua-luania khönia?

IFAIGI-FAIGI moroi ba zaröu Hezekieli ba iʼila zaliwa-liwa sangondrasi yaʼia ba danö si mate sebolo sibai. No ifehaga hörönia Hezekieli. Iʼila zi hulö mbade moroi ba zaröu ba tenga simane si toʼölö mbade daʼa. Itörini angi sabölö-bölö mbu Hezekieli hegöi barunia, ba so moroi sa lawuo saweʼe-weʼe sangondrasi yaʼia. Mohola-hola lawuo andrö börö me so haga galitö bakha ba gotaluania ba hulö ganaʼa si faruka ba wirö laʼa-laʼania. Aefa daʼö, terongo ruru-ruru sabölö-bölö hulö mbeka-beka zaradadu sato sibai.​—Hez. 1:4, 24.

² Daʼa gangilata siföföna nitema Hezekieli moroi ba zi hauga ngawalö gangilata si tebai iʼolifugö. Te mato 30 fakhe ndröfinia me luo daʼö. ’Irasoi waʼabölö Yehowa’ yaʼia daʼö eheha niʼamoniʼö sahöli-höli dödö si otarai Yehowa. Börö waʼabölö andrö wa tola iʼila ba irongo zahöli-höli dödö si no aröu faböʼö moroi ba film sabölö sökhi nifazökhi niha sagatua-tua.  Me no itema gangilata daʼa, mangalulu Hezekieli ifalögu ia tou ba danö börö waʼahöli-höli dödö.​—Hez. 1:3, 28.

³ Wa iforomaʼö gangilata daʼa Yehowa khö Hezekieli, tenga enaʼö ahöli-höli dödönia. Fefu gangilata nisura ba mbuku Hezekieli hegöi angilata siföföna andre, ebua sibai geluahania khö Hezekieli hegöi ba nono mbanua Yehowa iadaʼa. Börö daʼö, datafahaʼö ita moroi ba gangilata Hezekieli awö nirongonia.

4, 5. Tutunö hadia zalua ba zilalö me awena itema gangilata andre Hezekieli?

⁴ Baso Hezekieli 1:1-3. Khalaigö waö-waö salua ba zilalö. Simane si no tafatunö ba faza si no tataluʼi, me luo daʼö ba Mbabilona so Hezekieli me döfi 613 SM. Fao ia ba niha sato niʼoloiʼö si toröi ba zinga Nungo Nidanö Khebara. Te nifazökhi nungo nidanö daʼa enaʼö tola itörö köfa. Lulunia moroi ba Nungo Nidanö Oiferati ba ifuli zui fahandro ia ba daʼö.

⁵ Moroi ba Yeruzalema ndra niha niʼoloiʼö andrö kira-kira 800 kilometer iʼotarai Mbabilona. * Ba gosali Lowalangi toröi mböröta nama Hezekieli, ba daʼö mohalöwö ia tobali ere. Hizaʼi, no lataʼunöisi nahia daʼö tobali naha wamosumange faya ba fanömba adu. No tobali fangaoha iadaʼa dadaoma waʼarazo Dawido hegöi Selomo si no tehöngö. No laʼoloiʼö ba Mbabilona Razo Yoyakhi si lö mamati. Fogatinia yaʼia daʼö  Razo Sedekia si lö mamöhöli faʼalösökhi ba tobali ia boneka ba danga razo samatörö Babilona.​—2 Ra. 24:8-12, 17, 19.

6, 7. Hadia mbörö wa tobali fangabu dödö Hezekieli zalua me luo daʼö?

⁶ Te daʼö ginötö fondrege zi lö sökhi salua ba niha samati simane Hezekieli. Hadia mbörö? So ösa ba gotalua nono mbanua Yehowa sangumaʼö, ’Hadia no iröi ita Yehowa sagötö faʼara? Hadia famatörö Mbabilona si lö sökhi andrö awö lowalanginia sato sibai, no mofozu ira ba wangohori famosumange satulö ba laheta wamatörö Yehowa ba gulidanö?’

⁷ Khalaigö zalua andre, baso waö-waö sadöni dödöda nisura Hezekieli sanandrösa ba gangilatania siföföna. Baliʼö famahaʼöu samösa daʼö. (Hez. 1:4-28) Ba ginötö öbaso, khalaigö hewisa menaʼö na yaʼugö Hezekieli sangila ba samondrongo li ba gangilata andrö.

8. Hadia niʼila Hezekieli ba hadia geluahania daʼö?

⁸ Hadia niʼila Hezekieli? Iʼila zi hulö gureta sebua sahöli-höli dödö. Tanö tounia, so öfa gaolo-gaolo segebua ba daöfa malaʼika. Ba gafuriata awena muʼila wa yaʼira andrö kerubi.  (Hez. 10:1) Yawa ba högöra, no tebologö zalo si hulö esi si takile ba oroma yawa ba detenia dadaoma Lowalangi solakhömi. Yehowa zi dadao ba dadaoma andrö! Hadia nifoʼamaedolagö gureta andrö? Ha sambua zi tefaudu na mufoʼeluaha gureta andrö, yaʼia daʼö organisasi Yehowa solakhömi ba zorugo. Hadia mbörö wa tola tawaʼö zimanö? Datafatunö tölu ngawalö zi möi fanuturu lala.

9. Hana wa tefaudu gureta daʼö muʼamaedolagö ia ba gamakhaita Yehowa khö ndra niwöwöinia ba zorugo?

⁹ Amakhaita Yehowa khö ndra niwöwöinia si so ba zorugo. Ba gangilata daʼa, yawa kerubi so dadaoma Yehowa ba waʼarazo. Ba ayati tanö böʼö, iʼamaedolagö wa no modadao Yehowa tanö yawa mazui ba gotalua ndra kerubi. (Baso 2 Razo 19:15; 2 Mo. 25:22; Si. 80:1) Tatu manö, tenga sindruhu-ndruhu modadao ia yawa ba kerubi, börö me lö moguna lafazawa ia ira niwöwöinia sagabölö. Baero daʼö, lö moguna khönia gureta weʼamöi gofu hezo. Hizaʼi hadia geluahania? Lafaduhuʼö ira kerubi wa Yehowa andrö Samatörö fondrege zalawa ba tola manö ifatenge ira gofu hezo so moloʼö ohitö dödönia. Simane ira malaʼika tanö böʼö, laʼoʼö goroisa Yehowa tobali ira enoni mazui sosalahini yaʼia. (Si. 104:4)  Yehowa zanuturu lala khöra, irege tefaudu na muʼamaedolagö ira simane kureta sebua nidöniaʼö Lowalangi.

10. Hezo taʼila wa kureta zorugo andrö tenga ha manandrösa ia khö ndra kerubi si daöfa?

¹⁰ Kureta andrö tenga ha iʼamaedolagö ndra kerubi si daöfa. Ba gangilata Hezekieli, so daöfa ndra kerubi. Si toʼölönia, asese iʼogunaʼö Sura Niʼamoniʼö numero öfa ba wangoromaʼö faʼamoʼahonoa, tefarahu ba daʼö fefu hadia ia. Andrö wa tefaudu na muʼamaedolagö kerubi si daöfa yaʼia daʼö fefu nono Yehowa si lö faröi ba zorugo. Nehegö göi wa oi mohörö fefu golo-gaolo andrö simanö göi ndra kerubi. Eluahania, tola laʼila mazui lanehegö ngawalö hadia ia. Ifatunö göi Hezekieli wa ebua sibai gureta daʼö irege no ide-ide tö ndra kerubi sagabölö andrö ba wamaiginia. (Hez. 1:18, 22; 10:12) Simane daʼö göi waʼebua organisasi Yehowa ba zorugo, tenga ha ira kerubi si daöfa andrö.

11. Tutunö gangilata Danieli si fakhili-khili ba gangilata Hezekieli ba hadia rahu-rahu si tola tahalö?

¹¹ Itema göi Danieli gangilata simane daʼö sanandrösa ba zorugo. Sagötö me teʼoloiʼö Danieli ba Mbabilona, itema gangilata sanandrösa ba zorugo. Ba gangilatania, iʼila dadaoma Yehowa si so gaolo-gaolo. Hizaʼi, ba daʼö teʼosambuaʼö dödö Danieli yaʼia daʼö ba waʼebua nösi nomo Yehowa ba zorugo. Iʼila Danieli, ”so saribu kali saribu . . . ba fulu ribu kali fulu ribu” ndra malaʼika si zizio fönania. Tohare ira föna dadaoma zanguhuku ba zorugo ba so nahiara mazui halöwöra zamösana. (Dan. 7:9, 10, 13-18) Tola muhalö rahu-rahu wa kureta ba gangilata Hezekieli yaʼia daʼö ira malaʼika solakhömi si so ba daʼö.

12. Hana wa möi folumöʼöda na tafahaʼö ita ba Zura Niʼamoniʼö sanandrösa ba gureta zorugo niʼila Hezekieli?

¹² Aboto ba dödö Yehowa wa tola telumöʼö ita ha na teʼosambuaʼö dödöda ba halöwö wamati. Ifotöi daʼö sinenge sotöi Faulo ”si lö oroma”. Hana? Börö me daʼö zaoha khöda yaʼita niha ba wangofönaiʼö ”soroma” yaʼia daʼö ngawalö zoguna ba mboto salio taya. (Baso 2 Korindro 4:18.) Asese iʼogunaʼö daʼa Satana enaʼö taʼokhögö wangera-ngera si fasala. Enaʼö lö adöni dödöda ba wamalua daʼö, si fao faʼomasi ifangelama ita Yehowa simane si no tesura ba mbuku Hezekieli. Tefasugi ba dödöda nösi nomo Yehowa sahöli-höli dödö ba zorugo!

13, 14. (a) Hadia niwaʼö Hezekieli sanandrösa ba gaolo-gaolo niʼilania? (b) Hadia mbörö wa tefaudu na muwaʼö so gaolo-gaolo gureta Yehowa?

¹³ Ba wamobörö, ha kerubi si daöfa andre ninehögö Hezekieli. Ba Faza 4, taʼila dania hadia manö wamahaʼö khöda sanandrösa khö Yehowa moroi khö ndra malaʼika awö zikhalara sahöli-höli dödö. Hizaʼi, datatutunö gaolo-gaolo si öfa ngawua si so ba gangilata Hezekieli. Si öfa gaolo-gaolo andre  so ba zinga ndra kerubi, te ba zi öfa watalinga si öfa sagi sebolo. (Baso Hezekieli 1:16-18.) Tefazökhi gaolo-gaolo daʼö moroi ba gara kirisoli, te moroi ba feremata sanifi-nifi, laʼa-laʼania aʼuzö-uzö mazui owugeʼe aʼuzö-uzö. Takile sibai feremata daʼa na mufaigi.

¹⁴ Oya nidunö-dunö Hezekieli sanandrösa ba gaolo-gaolo si so barö dadaoma Yehowa. Ahöli-höli dödöda dadaoma daʼö börö me so gaolo-gaolonia. Ba ginötö takhalaigö nifotöi dadaoma, te takhalaigö dadaoma daʼö ba zi sambua nahia. Si toʼölönia, lö mufindra-findrakö dadaoma niha ba waʼarazo börö me ha ba daʼö mamatörö ia ba zi sambua soi. Hizaʼi, faböʼö wamatörö Yehowa moroi ba niha. Simane niʼila Hezekieli aefa daʼö, lö ola kuaso Yehowa. (Neh. 9:6) Börö me yaʼia Zamatörö Fondrege Zalawa, gofu hezo manö tola ifalua gohitö dödönia!

15. Hadia niwaʼö Hezekieli sanandrösa ba gaolo-gaolo daʼö?

¹⁵ Ahöli-höli dödö Hezekieli me iʼila gaolo-gaolo segebua andrö. Imane, ”Alawa sibai gaolo-gaolo daʼö irege ahöli dödö zamaigi.” Khalaigö atö, te aröu si yawa ifaigi Hezekieli gaolo-gaolo sebua ba salawa andrö. Inönö wangombakha sadöni dödö andre: ”Afönu hörö zinga gaolo-gaolo andrö fasui.” Hizaʼi, sabölö adöni dödöda yaʼia daʼö lala wamazökhi gaolo-gaolo daʼö. Imane, ”Khala-khala hegöi famazökhi yaʼia simane gaolo-gaolo si dombua si no mufasoli.” Hadia geluahania?

16, 17. (a) Hadia geluahania gaolo-gaolo bakha ba gaolo-gaolo? (b) Hadia niʼilada sanandrösa ba wofanö gureta zorugo Yehowa?

¹⁶ Hulö ba wamaigida, ero sambua gaolo-gaolo yaʼia daʼö orudua gaolo-gaolo si dua rozi si no muʼadölöʼö wamasoli. Börö daʼö imane Hezekieli, ”Tola mofanö gaolo-gaolo daʼö gofu hezo ba lö moguna laholeʼö ira.” Moroi ba zalua andre, hadia niʼilada sanandrösa ba gureta zorugo andrö?

¹⁷ Ero sakali fafuta gaolo-gaolo salawa andrö, tatu fandröndröu nitörönia. Imane nasa Hezekieli wa hulö gari mbanua na mofanö gureta daʼö, alio sibai! (Hez. 1:14) Lö hadöi niha sonekhe ba mesin si tola mamazökhi gaolo-gaolo simane daʼö, si tola mofanö gofu hezo, ba iʼanemaiʼö tefuta ia lö taha-taha! Hizaʼi, tenga daʼö geluahania wa lö toföfö wofanö gureta daʼa. Afönu hörö zinga gaolo-gaolo andrö. Tola iʼila gofu hezo ba iʼila naso zalua ba zi fasuinia.

18. Hadia wamahaʼö nihalöda ba waʼebua gaolo-gaolo hegöi faʼoya hörö ba gureta andrö?

¹⁸ Hadia nifahaʼö Yehowa khö Hezekieli hegöi ba nono mbanuania sanandrösa ba organisasinia si so ba zorugo? Irugi iadaʼa no tafahaʼö ita wa gaolo-gaolo sebua ba si takile andrö, no faosatö moroi ba organisasinia si so ba zorugo  solakhömi ba sahöli-höli dödö. Simane gaolo-gaolo safönu hörö, faosatö organisasi si so ba zorugo andrö ahori iʼila fefu zalua. Ahori göi iʼila fefu hadia ia Yehowa. (Amd. 15:3; Yer. 23:24) Baero daʼö, so ngaotu zuta mazui miliaran ndra malaʼika Yehowa ba ifatenge ira gofu hezo ba mbanua si yawa awö danö. Tola lanehegö ngawalö hadia ia ba lafatunö daʼö khö Zamatörö yaʼira.​—Baso Heberaiʼo 1:13, 14.

19. Moroi ba waʼalio hegöi faʼatefuta gureta zorugo, hadia wamahaʼö niʼilada sanandrösa khö Yehowa hegöi organisasinia ba zorugo?

¹⁹ No tafahaʼö ita wa alio sibai gureta daʼö ba tola ifuta ia gofu hezo manö. Sindruhu-ndruhu wa faehu sibai organisasi Yehowa ba zorugo moroi ba wamatörö hegöi organisasi niha gulidanö si lö mangila wetahögö ba si tebai mamaudugö lala wamatöröra ba zawena alua irege so waʼatekiko! Samatörö kureta zorugo andre Lowalangi si lö fatandro ba sebolo tödö. Tefaudu daʼa ba geluaha döinia, tola ibaliʼö ia gofu hadia ia ba zomasi ia enaʼö alua gohitö dödönia. (2 Mo. 3:13, 14) Duma-dumania, tola tobali ia Saradadu sabölö ba wanolo ono mbanuania. Ba tola göi tobali ia Ama safönu faʼahakhö dödö. Omasi ia mangefaʼö sala, mamarou tödö, ba ifuli itemaʼö niha si no mamalalini era-era.​—Si. 30:5; Yes. 66:13.

20. Hana wa sinangea ahöli-höli dödöda gureta zorugo Yehowa?

²⁰ Irugi iadaʼa, te mangera-ngera ndraʼugö sanandrösa ba gangilata Hezekieli, ’Hadia sindruhu-ndruhu ahöli-höli dödögu ba gureta zorugo Yehowa?’ Böi olifu ita wa lö si tebato wofanö gureta daʼö irugi iadaʼa. Böi ömane tedöu wa lö iʼila Yehowa, Ononia hegöi ira malaʼika gabula dödö si möi börö wa ide-ide dödöu. Organisasinia daʼa tola itaögö zalua si bohou ba gulidanö si lö tatu andre. Moguna göi tatörö tödöda wa lö si tebulö mofanö organisasi Yehowa. Ba gangilata daʼö, irongo Hezekieli li si hede moroi ba zorugo: ”Miʼofanö, yaʼami gaolo-gaolo si tefuta-futa!” (Hez. 10:13) Tatu ahöli-höli dödöda na taʼangerönusi hewisa Yehowa ba wamofanönia organisasi daʼa. Hizaʼi, sabölö adöni dödöda yaʼia daʼö Sondröniaʼö organisasi andrö, Yehowa.

21, 22. Hewisa wa tola fakhai fefu gureta daʼö?

²¹ Iadaʼa ihaogö wamaigi Hezekieli hadia zi so yawa ba dete gaolo-gaolo gureta andrö. So ”zalo si takile si hulö esi”. (Hez. 1:22) Yawa ba högö ndra kerubi andrö, so zalo si hulö zörömi si takile si no tebologö. Ba ginötö öbaso daʼa, tola manö ahöli-höli dödö niha sonekhe ba mesin ba laʼangeragö, ’Hadia zi tola mangosambuaʼö salo daʼö ba gaolo-gaolonia? Hewisa wa faoma tefuta gaolo-gaolo si öfa ngawua na  lö hadöi samakhai yaʼia?’ Törö tödöu, kureta daʼa muʼamaedolagö hadia zi so ba zorugo. Fofanönia lö iʼolaini ia hukum alam. Nehegö göi ngawua wehede sabölö moguna andre: ”Börö me eheha niʼamoniʼö zamofaʼabölö malaʼika andrö awö gaolo-gaolonia.” (Hez. 1:20, 21) Hewisa geheha niʼamoniʼö ba wamofanönia ndra kerubi hegöi gaolo-gaolo andrö?

²² Eheha Yehowa yaʼia daʼö fondrege zabölö ba mbanua si yawa. Eheha daʼö zangosambuaʼö, samofanö, ba sanuturu lala gureta andrö enaʼö sökhi wofanöra. Iadaʼa, datafaigi nitutunö Hezekieli sanandrösa khö Zondröniaʼö kureta daʼa.

23. Hadia ngawua wehede niʼogunaʼö Hezekieli ba woʼamaedolagönia Yehowa, ba hadia mbörö?

²³ Baso Hezekieli 1:26-28. Ba ginötö itutunö Hezekieli gangilata daʼa, asese iʼogunaʼö ngawua wehede: ’si hulö’, ’hulö simane’, ’khili-khilinia simane’, hegöi ’famaiginia simane’. Hizaʼi, abölö asese iʼogunaʼö wehede daʼö ba zi tölu ngawua ayati andre. Tola manö abua khönia wanutunö si no iʼila. Iʼila ”zi hulö gara safiro si fakhili-khili ba dadaoma waʼarazo”. Khalaigö zi sambua dadaoma waʼarazo si no mufoe moroi ba  gara safiro sebua ba solaʼa-laʼa sobalau. Ba dadaoma andrö, no modadao ’samösa zi hulö niha ba daʼö’.

24, 25. (a) Hadia nitörö tödöda me so ndrumi ba zi fasui dadaoma Yehowa? (b) Hewisa dödö nono mbanua Lowalangi sanöndra angilata andrö?

²⁴ Lö anehe ita hewisa mboto Yehowa sahöli-höli dödö andrö, börö me iʼotarai ba löwi-löwinia numalö mitou hegöi löwi-löwinia numalö miyawa, iforomaʼö lakhöminia Yehowa si hulö galitö. Tola manö itöngö ia Hezekieli ba iʼodödögö wondruhö hörönia moroi ba kile-kile haga daʼö. Aefa daʼö, alua zahöli-höli dödö ba wamaigi Hezekieli: ”So haga ba zi fasuinia hulö ndrumi si so ba lawuo na moteu.” Hewisa dödöu na öfaigi ndrumi? Tatu omuso dödöu. Daʼö zamasugi ba dödöda waʼamolakhömi Zomböi yaʼita! Dumi andrö göi zamasugi ba dödöda mbuʼusa li Yehowa me no Anönö Danö Idanö. (1 Mo. 9:11-16) Hewaʼae lö ola waʼabölö Yehowa, omasi ia waʼatulö. (Heb. 13:20) Yaʼia andrö Lowalangi waʼatulö ba larasoi göi zimane daʼö ono mbanuania.

²⁵ Hewisa Hezekieli me iʼila lakhömi Lowalangi Yehowa? Imane, ”Me uʼila daʼö, mangalulu ndraʼo.” Faʼahöli-höli dödö ba famosumangenia khö Lowalangi wa ituhi danö Hezekieli. Lafalua göi zimane daʼö ira samaʼeleʼö tanö böʼö me latema gangilata börö me aboto ba dödöra wa lö eluaha ira na mufaedogö ira khö Yehowa. (Yes. 6:1-5; Dan. 10:8, 9; Fam. 1:12-17) Na no aefa daʼö, teʼaroʼö ira mangawuli moroi ba zi no laʼila andrö. Na simanö, hewisa ita ba ginötö tabaso ayati sanandrösa ba gangilata simane daʼa?

26. Hana wa tobali famarou dödö Hezekieli me no itema gangilata andrö?

²⁶ Na so waʼide-ide dödö khö Hezekieli mazui aombö dödönia ba nono mbanua Lowalangi si so ba Mbabilona, tatu manö möi fangaroʼönia gangilata andrö. Gofu hezo toröi nono mbanua Yehowa, he ba Yeruzalema, Babilona mazui ba nahia tanö böʼö, tola ikhamö ira kureta zorugo Yehowa andrö! Lö faʼabölö ba wamatörö nikuasoi Zatana ba wolawa Lowalangi, samatörö organisasinia sahöli-höli dödö. (Baso Zinunö 118:6.) Iʼila göi Hezekieli wa lö aröu gureta zorugo andrö moroi ba niha, börö me fatöfa ba danö gaolo-gaolonia! (Hez. 1:19) So so sa dödö Yehowa nono mbanuania si no teʼoloiʼö. Lö tebulö so ira ba lumö waʼomasi Namara!

27. Hadia lua-luania khöda gangilata Hezekieli?

²⁷ Hadia lua-luania khöda gangilata Hezekieli? Iadaʼa, iforege Satana ba wanuwö famosumange satulö khö Yehowa. Omasi sibai ifaduhuʼö khöda wa si lö awö-awö ita, fasambua, ba aröu ita moroi khö Namada hegöi organisasinia. Böi tehegö mowaʼa ba dödöu hegöi ba wangera-ngerau zimane  daʼö! (Si. 139:7-12) Simane Hezekieli, oya mbörö wa tola ahöli-höli dödöda ba organisasi Yehowa. Te lö tatuhi danö simane yaʼia. Hizaʼi, hadia tenga sinangea menaʼö ahöli-höli dödöda börö me taʼila wa no fondrege zabölö organisasi Yehowa si so ba zorugo, alio, tola mofanö ia gofu hezo, moloʼö-loʼö manö ba fondrege zolakhömi?

28, 29. Hadia dandra wa lö tebulö mofanö gureta Yehowa iʼotarai me otu fakhe silalö?

²⁸ Tenga ha ba zorugo so organisasi Yehowa, so göi ba gulidanö. Sindruhu sa wa yaʼira andre niha si lö moʼahonoa. Hizaʼi oya zi no lakhamö börö wanolo Yehowa! Buania, oya zi no lafalua ono mbanua Yehowa ba zi sagörö ulidanö ba tebai lafalua daʼö na ha faʼabölöra samösa. (Yoh. 14:12) Na tabokai ngaʼörö mbuku Mamatörö Mbanua Lowalangi! tola itörö tödöda halöwö fanuriaigö sahöli-höli dödö nifaluada barö zi otu fakhe silalö. Tefasugi göi ba dödöda hewisa organisasi Yehowa wangehenaigönia sekola ba niha Keriso sindruhu, möna ita ba huku, ba tola göi taʼogunaʼö teknologi ba wamalua ohitö dödö Lowalangi.

²⁹ Oya sibai zi no lafalua ba wamohouni famosumange satulö ba gulidanö si lö sökhi andre. Na taʼangerönusi fefu daʼö, itugu faduhu dödöda wa lö si tebato wofanö gureta zorugo Yehowa. No sambua töi sebua khöda daʼa börö me fao ita ba organisasi Yehowa ba tahalö halöwö khö Zamatörö simane yaʼia!​—Si. 84:10.

30. Hadia nifatunöda ba faza aefa daʼa?

³⁰ So nasa wamahaʼö si tola tahalö moroi ba gangilata Hezekieli. Ba faza aefa daʼa, tatutunö dania ndra ’malaʼika’ mazui kerubi si daöfa. Hadia wamahaʼö si tola tahalö moroi khöra sanandrösa khö Zamatörö solakhömi, Lowalangi Yehowa?