Ira talifusöma sangomasiʼö Yehowa,

Me döfi 1971, omuso sibai dödö niha sangondrasi Kebaktian Distrik ”Nama Ilahi” börö me so hauga ngawua mbuku si bohou nitemara. Lawaʼö wa ”abölö baga mbuku daʼö moroi ba nikhalaigö niha”. Samösa dalifusöda sangumaʼö sanandrösa ba zi sambua buku andrö, ”Tola takhalaigö hawaʼahöli-höli dödöda zalua ba zi so miföna. Lö irai tatema zimane daʼa!” Hadia mbuku daʼö? Buku ”Bangsa-Bangsa Akan Mengetahui Bahwa Akulah Yehuwa​—Bagaimana?” (”The Nations Shall Know That I Am Jehovah”—How?) Hadia mbörö wa adöni sibai dödö niha ba mbuku daʼa? Börö me itutunö hadia manö zi no mubohouni ba wamaʼeleʼö Hezekieli si so ba Zura Niʼamoniʼö. Famaʼeleʼö daʼa moʼamakhaita ia ba dötönafö niha gulidanö.

Ngafulu fakhe me no aefa mu-rilis mbuku daʼa, itugu ato zamosumange Lowalangi. Ba wamobörö mato 1,5 zuta, iadaʼa töra 8 zuta. (Yes. 60:22) Töra 900 ngawalö li niʼogunaʼöra. (Zak. 8:23) Ato ba gotaluara zi lö irai mamahaʼö yaʼia ba mbuku sanandrösa ba wamaʼeleʼö Hezekieli.

Iʼotarai 1971 irugi iadaʼa, oya zindruhu moroi ba Zura Niʼamoniʼö niʼilada börö me itugu mohaga zindruhu. (Amd. 4:18) Me 1985 ibörögö aboto ba dödöda hewisa wa tola mufaduhuʼö tobali si fahuwu khö Lowalangi ”mbiri-biri tanö böʼö”. (Yoh. 10:16; Rom. 5:18; Yak. 2:23) Aefa daʼö, me 1995 aboto ba dödöda wa fanguhuku ”mbiri-biri” hegöi ”nambi” alua ia sagötö ”wamakao sabölö-bölö”. (Mat. 24:21; 25:31, 32) Fefu wamohouni daʼa molua-lua ia ba waʼaboto ba dödö niʼokhögöda sanandrösa ba mbuku Hezekieli.

Ba zi hauga fakhe barö daʼa, oya nasa waʼaboto ba dödö si bohou nitemada. Duma-dumania, oya wamahaʼö sawena taʼila moroi ba gamaedola niʼogunaʼö Yesu ba itugu tofakha ia ba dödöda. So ösa duma-duma andrö zoʼamaedolagö hadia zalua ba wamakao sabölö-bölö si lö ara tö alua. Itugu aboto göi ba dödöda wamaʼeleʼö Hezekieli, duma-dumania sanandrösa khö Gogi moroi ba Magogi (faza 38 ba 39), ira matua si so naha fena sekretaris (faza 9), hegöi töla soköli si so ba ndraso awö ziʼo si dua rozi si no muʼosambuaʼö (faza 37). Faʼaboto ba dödö si bohou andre zombulöʼö hadia zi no musura ngafulu fakhe ba zilalö ba mbuku ni-rilis me döfi 1971.

Börö daʼö, lö tokea ita na ato nono mbanua Yehowa sanofu, ”Hawaʼara tatema mbuku sanutunö faʼaboto ba dödö si bohou sanandrösa ba wamaʼeleʼö Hezekieli?” Daʼa mbuku si no ara tabalo-baloi. Tuhonia: ”Tebohouni Wamosumange Satulö khö Yehowa!” Ba ginötö öbaso zi 22 faza ba mbuku daʼa ba öʼangerönusi gambarania si sökhi sibai, hasambalö wa ahöli-höli dödöu riset nifalua ba wamaʼanö yaʼia. Mangandrö ndraʼaga soroi ba dödö enaʼö maʼila hadia mbörö wa ihenaigö Yehowa mbuku Hezekieli andre sahöli-höli dödö. Mahaogö sibai woʼangeragö fanofu-nofu daʼa: Hadia wamahaʼönia ba niha si so ba götö Hezekieli hegöi ba götöda iadaʼa? Hadia manö wamaʼeleʼö salua ba zi so miföna? Hadia moguna taʼalui duma-duma hegöi famaedonia? Fanema linia zanolo yaʼita enaʼö itugu aboto ba dödöda mbuku Hezekieli töra moroi ba zilalö ba taʼameʼegö tödö daʼö.

 Ba ginötö öbaso mbuku Hezekieli iʼotarai wamobörö ofeta awai, ahöli-höli dödöu sanandrösa ba faosatö organisasi Yehowa si so ba zorugo. Adöni göi dödöu ba goi-goi Yehowa fondrege zalawa si no ihonogöi ba khö ndra samosumange yaʼia ba zorugo hegöi ba gulidanö. Buku Famosumange Satulö zanolo yaʼugö enaʼö itugu öʼameʼegö tödö hadia nifalua Yehowa hegöi si lö ara tö ifalua ba nono mbanuania. Öʼila dania wa so dombua duho sasese mututunö ba mbuku daʼa. Si oföna, ba wangomusoiʼö tödö Yehowa, moguna aboto ba dödöda ba tafaduhuʼö wa yaʼia Zamatörö Banua si Yawa awö Danö. Si dua, tafosumange Yehowa moloʼö somasi ia ba tafaudugö lala waʼaurida ba goi-goinia salawa.

Matötöna enaʼö möi fanolomi mbuku daʼa ba wangaʼaroʼö faʼomasimi ba wamosumange Yehowa ba lala satulö irege tefolakhömi döinia niʼamoniʼö. Yaʼitolo ami buku daʼa enaʼö lö aetu manötöna ami wa samuza inötö dania fefu soi aboto ba dödöra haniha Yehowa andrö.​—Hez. 36:23; 38:23.

Yaʼifahowuʼö nifaluami Yehowa, Amada sebua faʼomasi ba wangokhögö faʼaboto ba dödö nisura zamaʼeleʼö andrö khönia sotöi Hezekieli.