1-3. Hewisa niha Mbabilona wangoʼayara ono mbanua Yehowa ba hadia mbörö?

KHALAIGÖ atö, na yaʼugö niha Yahudi samati si so ba Mbabilona. No teʼoloiʼö soimö mato 50 fakhe. Simane si toʼölö na luo Sabato, fao ndraʼugö ba danö böʼö weʼamöi ba wamosumange Yehowa. Ötörö lala si rami niha ba oya öʼila gosali sagalawa. Ato niha sameʼe sumange nitunu ba daʼö ba laʼanunöisi zinunö famosumange lowalangi faya simane Maruduki.

² Fandröndröu moroi ba zato niha andrö, te so sambua nahia si lö niha-niha sahatö ba nungo nidanö, faoʼö wangandrö ba nono mbanua Yehowa si lö atoto, * ba woʼanunöisi sinunö hegöi ba wodunö-dunö Taromali Lowalangi. Me fao ami wangandrö, te örongo li göfa si fakiki si no muböbö ba zinga nidanö. So khöu waʼahono dödö. Te ötötöna enaʼö lö hadöi niha Mbabilona si tohare ba wanaisi famosumange nifaluamö, simane sasese lafalua. Hana wa lafalua daʼö?

³ Asese sibai möna niha Mbabilona ba wasuwöta, ba lawalinga moroi khö lowalangira waʼamönara andrö. Ba wamaigira,  faʼadudu Yeruzalema zangoromaʼö wa abölö nasa lowalangira sotöi Maruduki moroi khö Yehowa! Laʼoʼaya Lowalangi nifosumangemö hegöi ono mbanuania. Itaria lafatörö li lamane, ”Miʼanunöisi khöma sambua zinunö sanandrösa ba Ziona.” (Si. 137:3) Oya zinunö nifazökhi ba wangowasaini faʼamöna Ziona mazui Yeruzalema ba wolawa udu Yehowa. Te sinunö daʼö zasese laʼoʼaya ira niha Mbabilona. So göi zinunö sanandrösa ba niha Mbabilona yaʼia daʼö, ”No labaliʼö akhökhöla Yeruzalema. . . . Laʼoʼaya ba laʼigiʼö ndraʼaga niha ba zi fasuima.”​—Si. 79:1, 3, 4.

4, 5. Hadia dötönafö salua ba wamaʼeleʼö Hezekieli, ba hadia nitutunöda ba faza daʼa? (Faigi gambara ba wamobörö wamahaʼö.)

⁴ Te göi laʼoʼaya ndraʼugö ira niha Yahudi si no mondröi sindruhu börö me lö öböhöli wamati khö Yehowa hegöi khö ndra samaʼeleʼö khönia. Hewaʼae simanö, omuso dödöu awö nösi nomou ba wamalua famosumange satulö. Omuso dödöu wangandrö hegöi ba wanunö. Ösöndra waʼahono dödö me öbaso Daromali Lowalangi. (Si. 94:19; Rom. 15:4) Samuza maʼökhö, so samösa nono mbanua Yehowa solohe gölu-gölu zura ba nahia wamosumange andrö. Daʼö gölu-gölu zura wamaʼeleʼö Hezekieli. Omuso sibai dödöu me örongo mbuʼusa li Yehowa wa hasambalö iʼefaʼö nono mbanuania. Itugu monönö waʼaterou dödöu me labaso wamaʼeleʼö andrö ba ötötöna wa samuza inötö dania tola mangawuliʼö ba danö si tumbu yaʼugö ba simanö göi nösi nomou. Fao ami ba wamohouni famosumange satulö!

⁵ Oya wamaʼeleʼö Hezekieli sanandrösa ba mbuʼusa li famohouni. Datafatunö mbuʼusa li sahöli-höli dödö andre. Hewisa wa tola itörö niwaʼönia andrö ba niha niʼoloiʼö? Hadia gamakhaitania khöda iadaʼa? Hadia manö nasa mbuʼusa li salua dania ba zi so miföna?

6. Hewisa Yehowa wameʼe famangelama ba nono mbanuania samadaö ba zi hauga kali?

⁶ Ifatunö Yehowa khö Hezekieli wa hasambalö ihuku nono mbanuania börö me mamadaö ira. Imane Yehowa, ”Teʼoloiʼö ira”. (Hez. 12:11) Simane nitutunöda ba Faza 6, ifadumaisi Hezekieli hadia zedöna alua. Hizaʼi, famangelama nifaʼema Hezekieli tenga sawena. Arakhagö saribu fakhe ba zilalö iʼotarai ba götö Moze, no ifangelama nono mbanuania Yehowa wa hasambalö teʼoloiʼö ira na lö laböhöli wamadaö. (5 Mo. 28:36, 37) No göi irai ifaʼema wamangelama simane daʼa Yesaya samaʼeleʼö hegöi Yeremia.​—Yes. 39:5-7; Yer. 20:3-6.

7. Hewisa Yehowa wanguhuku ono mbanuania?

⁷ Hizaʼi, famangelama simane daʼö irongo tögi dalinga kabera ba kalua ba gambölö. Afökhö sibai dödö Yehowa ba nono  mbanuania me iʼila mamadaö ira, lasömba nadu, faröi ira ba monönö waʼafaitora börö wondrönisi dödö nifalua ndra kubalo si lö sökhi. Börö daʼö, itehegö Yehowa göna ira lofo sabölö-bölö. Tobali fangaila khöra zalua andre börö me sindruhunia ”fahöna susu awö wewani” ba danöra. (Hez. 20:6, 7) Aefa daʼö, simane si no mufaʼeleʼö ba wamobörö, ifalua Yehowa wanguhuku ba nono mbanuania si no mondröi sindruhu ba teʼoloiʼö ira. Me 607 SM, möi Nebukanesa razo Mbabilona ba wanuwö yaʼira. Adudu Yeruzalema hegöi osalinia. So ribu niha Yahudi niʼoloiʼö ba Mbabilona. Laʼoʼaya ba lafakao ira ba daʼö simane nitutunö ba wamobörö faza daʼa.

8, 9. Hewisa Lowalangi ba wameʼe famangelama ba mbanua niha Keriso sanandrösa ba wondröi sindruhu?

⁸ Hadia no irai hulö zi no teʼoloiʼö mbanua niha Keriso ba Mbabilona? Noa. Simane niha Yahudi me föna, no ara göi mufangelama ndra nifahaʼö Yesu mböröta. Iʼotarai ba wamobörö no iwaʼö Yesu, ”Miʼangelamaisi zamaʼeleʼö sofaya andrö samake nukha mbiri-biri. Sindruhunia sa, yaʼira andrö asu gatua soluʼa-luʼa.” (Mat. 7:15) Ba gafuriata, ibeʼe wamangelama sinenge sotöi Faulo, ”Uʼila na no mofanö ndraʼo, so moroi baero nasu gatua sagamuʼi si möi khömi, lö sökhi wamatöröra nikubaloi. Baero daʼö, so moroi ba gotaluami zamaʼema famahaʼö selungu enaʼö fao khöra ndra nifahaʼö.”​—Hal. 20:29, 30.

⁹ No mufahaʼö niha Keriso me abad siföföna enaʼö laʼila ba laʼaröuʼö ira moroi ba niha si möi famaʼala andrö. Tebeʼe wanuturu lala khö ndra satua sokubaloi ba wangefasi niha si no mondröi sindruhu ba mbanua niha Keriso. (1 Ti. 1:19; 2 Ti. 2:16-19; 2 Fe. 2:1-3; 2 Yo. 10) Hizaʼi, simane Izaraʼeli hegöi Yehuda me mböröta, ato niha Keriso sangosiwawöi famangelama safönu faʼomasi andrö. Ba gafuriata abad siföföna, no mowaʼa wondröi sindruhu ba mbanua niha Keriso. Sinenge safuria sotöi Yohane sauri ba gangohorita abad siföföna, iʼila wa ato niha Keriso si no elungu ba samadaö. Hatö Yohane andre zinenge si toröi si tobali baʼa-baʼa enaʼö lö monönö wondröi sindruhu. (2 Te. 2:6-8; 1 Yo. 2:18) Hadia zalua me no aefa mate Yohane?

10, 11. Hewisa gamaedola Yesu sanandrösa ba gandru hegöi oʼo alua daʼö me abad si dua M?

¹⁰ Me no aefa mate Yohane, ibörögö alua gamaedola Yesu sanandrösa ba gandru hegöi oʼo. (Baso Mataiʼo 13:24-30.) Simane niʼila Yesu ba wamobörö, ifazaewe ”goʼo” andrö Satana ba mbanua niha Keriso. Yaʼira andrö niha Keriso faya. Lua-luania, alio sibai monönö wondröi sindruhu. Khalaigö atö hawaʼafökhö dödö Yehowa me iʼila no tetaʼunöisi mbanua niha Keriso nifasindro Nononia me lafosumange nadu, laʼowasaini ngaluo sebua hegöi si toʼölö lafalua niha baero, tedönisi  dödöra ba mbua gera-era niha sagatua-tua si lö faduhu tödö khö Lowalangi hegöi famahaʼö agama faya moroi khö Zatana! Börö daʼö, hadia nifalua Yehowa? Simane nifaluania ba ndraono Gizaraʼeli si no faröi, itehegö teʼoloiʼö nono mbanuania. Te me abad si dua, ibörögö abua wamaehusi niha Keriso sindruhu ba gotalua niha Keriso faya. Iʼotarai daʼö, teʼoloiʼö niha Keriso sindruhu ba Mbabilona Sebua yaʼia daʼö agama faya ba zi sagörö ulidanö ba farahu göi niha Keriso faya ba Mbabilona Sebua si lö sökhi andrö. Itugu monönö niha Keriso faya ba lafasindro nifotöi Gereja.

¹¹ Sagötö mamatörö Gereja, no faʼogömi-gömi zalua. Hewaʼae simanö, lö tebulö so niha Keriso sindruhu ba mufotöi ira ”gandru” ba gamaedola Yesu. Simane niha niʼoloiʼö nitötöi ba Hezekieli 6:9, lö laʼolifugö Lowalangi sindruhu. So zi barani ba wolawa famahaʼö faya nitutunö ba Gereja irege laʼoʼaya ba lafakao ira. Hadia itehegö manö Yehowa na teʼoloiʼö nono mbanuania ba waʼogömi-gömi wamati sagötö faʼara? Löʼö! Simane ba götö Gizaraʼeli me föna, tenga siʼogötöʼö wönu Yehowa ba so nola-olania. (Yer. 46:28) Baero daʼö, lö ilulu manö  nono mbanuania na lö fanötöna. Datatutunö hewisa wameʼe Yehowa fanötöna ba niha Yahudi si no teʼoloiʼö ba Mbabilona.

12, 13. Hana wa alö wönu Yehowa ba nono mbanuania si no teʼoloiʼö?

¹² Lö ibiniʼö wamalua fönunia Yehowa ba nono mbanuania. Hizaʼi ifaduhuʼö göi khöra wa tenga siʼogötöʼö wonunia. Imane Yehowa, ”Lö hadöi saʼae fönugu. Alö wönugu ba ahono dödögu. Me no ulau mbakhu dödögu khöra, awena dania aboto ba dödöra wa yaʼo Yehowa zi fahuhuo börö me uʼandrö khöra enaʼö ha yaʼo lafosumange.” (Hez. 5:13) Hadia mbörö wa alö wönu Yehowa?

¹³ Ba gotalua niha niʼoloiʼö, so göi niha Yahudi si lö faröi. Imane Lowalangi khö Hezekieli wa so ösa nono mbanuania samalalini era-era me teʼoloiʼö ira. Maniasa ira ba gamuatara si möi fangaila awö wamadaö si no lafalua khö Yehowa. Aefa daʼö, laʼandrö waʼahakhö dödö hegöi fangefaʼö sala. (Hez. 6:8-10; 12:16) Si farahu ba niha si lö faröi andrö yaʼia daʼö Hezekieli, Danieli samaʼeleʼö hegöi awönia si datölu. Anau noso Danieli irege iʼila hewisa wamobörö hegöi afuriata wangoloiʼö  andrö. Mangandrö ia soroi ba dödö ba wangefaʼö sala ndraono Gizaraʼeli simane si no tesura ba Danieli faza 9. Tatu manö fangandrönia andrö zosalahini nirasoi niha niʼoloiʼö si ribu faʼato somasi mangandrö fangefa sala khö Yehowa ba enaʼö tefahowuʼö ira. Terara sibai dödöra ba mbuʼusa li Lowalangi sanandrösa ba wangefa hegöi famohouni nifaʼema Hezekieli!

14. Hana wa itehegö mangawuli nono mbanuania Yehowa ba danöra?

¹⁴ Sindruhunia, so sambua zabölö tohude moroi ba wangefa hegöi famohouni ono mbanua Yehowa. Teʼasiwai ginötö wangoloiʼö yaʼira, tenga börö me sinangea latema wangefa andrö hizaʼi börö me no irugi inötö khö Yehowa ba wangamoniʼö töinia föna soi böʼö. (Hez. 36:22) Moguna laʼila ira niha Mbabilona wa fefu lowalangira si lö sökhi, farahu ba daʼö Maruduki, tebai lakhamö waʼabölö Lowalangi Fondrege Zalawa sotöi Yehowa! Datatutunö zi lima ngawua mbuʼusa li Yehowa nifaʼema Hezekieli ba niha niʼoloiʼö. Si oföna, datafaigi hadia lua-lua mbuʼusa li andrö ba niha niʼoloiʼö si lö faröi ba aefa daʼö tatutunö mbuʼusa li sabölö ebua dania ba zi so miföna.

15. Hadia nifabuʼu Yehowa sanandrösa ba wamosumange nifalua niha niʼoloiʼö si no mangawuli?

¹⁵ BUʼUSA LI SI 1. Lö hadöi saʼae fanömba adu mazui amuata si raʼiö soʼamakhaita ba agama faya. (Baso Hezekieli 11:18; 12:24.) Simane nitutunöda ba Faza 5, no tetaʼunöisi Yeruzalema hegöi osalinia börö zasese lafalua agama faya simane fanömba adu. Lua-luania, monönö waʼafaitora ba fandröndröu ira khö Yehowa. Iʼogunaʼö Hezekieli Yehowa ba wamaʼema fanötöna ba niha niʼoloiʼö wa hasambalö ifuli lafalua wamosumange satulö ba si lö raʼiö. Sabölö tohude yaʼia daʼö ba wamohouni famosumange satulö khö Lowalangi. Na no aefa daʼö, awena lasöndra howu-howu tanö böʼö ira niha niʼoloiʼö.

16. Hadia nifabuʼu Yehowa sanandrösa ba danö si tumbu ono mbanuania?

¹⁶ BUʼUSA LI SI 2. Mangawuli niha niʼoloiʼö ba mbanuara. Imane Yehowa ba niha niʼoloiʼö, ”Ubeʼe khömi danö Gizaraʼeli.”  (Hez. 11:17) Sindruhu-ndruhu wa sahöli-höli dödö zi no mufabuʼu andre börö me laʼoʼaya nono mbanua Lowalangi ira niha Mbabilona, ba lö irai labeʼe dötönafö ba niha niʼoloiʼö wa mangawuli ira ba mbanuara. (Yes. 14:4, 17) Na no dania mangawuli ira ba lö faröi ira, hasambalö lasöndra zoguna khöra börö me atabö zinanöra ba mohalöwö ira si fao faʼomuso dödö. Lö saʼae alua khöra mbaŵa lofo si möi fangaila.​—Baso Hezekieli 36:30.

17. Hadia nifabuʼu sanandrösa ba zumange khö Yehowa?

¹⁷ BUʼUSA LI SI 3. Lafuli labeʼe zumange ba naha wanunu sumange khö Yehowa. Simane nitutunöda ba Faza 2, sumange nitunu hegöi sumange tanö böʼö nibeʼe moloʼö Oroisa Moze no faosatö moroi ba wamosumange satulö. Na lö faröi niha niʼoloiʼö sangawuli ba lö raʼiö ira ba wamati, awena itema zumange nibeʼera Yehowa. Buania, teʼefaʼö horöra ba tobali ira si fahuwu khö Lowalangi. No ifabuʼu Yehowa, ”Ba soi daʼö dania, lafosumange ndraʼo iraono Gizaraʼeli maʼafefu. . . . Omuso dödögu khöra ba daʼö, ba uʼandrö khömi ba wameʼe tolo-tolo awö zumange fondrege zi sökhi yaʼia daʼö okhötami niʼamoniʼö.” (Hez. 20:40) Sindruhu-ndruhu wa tebohouni wamosumange satulö ba iʼasogö howu-howu ba nono mbanua Lowalangi.

18. Hewisa Yehowa wokubaloi ono mbanuania?

¹⁸ BUʼUSA LI SI 4. Muheta dania ndra kubalo si lö sökhi. Sambua mbörö wa tola elungu nono mbanua Lowalangi yaʼia daʼö börö wondrönisi dödö nifalua ndra sondröniaʼö yaʼira. Ifabuʼu Yehowa wa ibulöʼö zalua andrö. Imane, ”Lö utehe khöra wameʼe gö mbiri-birigu . . . uʼefaʼö mbiri-birigu moroi ba mbawara.” Ifaduhuʼö ba nono mbanuania Yehowa, ”Yaʼo dania zameʼe göra.” (Hez. 34:10, 12) Hewisa wamaluania daʼö? Ifataro ndra matua safönu famati ba si lö faröi tobali kubalo.

19. Hadia nifabuʼu Yehowa sanandrösa ba wahasara dödö?

 ¹⁹ BUʼUSA LI SI 5. Teʼosambuaʼö dania zamosumange Yehowa. Khalaigö atö, fatua lö teʼohe ira ba nahia wangoloiʼö, tefakao sibai nono mbanua Yehowa si lö faröi börö me lö hadöi fahasara dödö ba nono mbanua Lowalangi. Ato zi tedönisi tödö khö ndra samaʼeleʼö faya hegöi khö ndra kubalo si lö sökhi. Lua-luania, lalawa ndra samaʼeleʼö si lö faröi sosalahini Yehowa. Lafasindro ngawawara zamösana ba faoma laʼuduni nawöra. Andrö wa tobali fondrara dödö mbuʼusa li Yehowa si no isura Hezekieli: ”Uʼosambuaʼö ira”. (Hez. 11:19) Na lö faröi niha Yahudi si no teʼefaʼö andrö khö nawöra hegöi khö Yehowa, lö hadöi udu si tola molawa yaʼira. Lö saʼae teʼoʼaya ba laʼigiʼö döi Lowalangi ba nifaluara hizaʼi möi famolakhömi Yehowa.

20, 21. Hewisa waʼalua nifabuʼu Lowalangi ba niha niʼoloiʼö si no mangawuli?

²⁰ Hadia alua mbuʼusa li si lima ngawalö andrö ba niha Yahudi si no mangawuli? Törö tödöu hadia zi no irai iwaʼö niha samati sotöi Yosua, ”Wa no itörö fefu zi no ifabuʼu Yehowa Lowalangimi khömi. No ahori ifalua. Lö zi lö itörö.”  (Yos. 23:14) Simane ba götö Yosua, ifalua göi mbuʼusa linia Yehowa ba niha Yahudi si no teʼoloiʼö si no mangawuli ba soira.

²¹ Lö saʼae lafalua wamosumange adu ira niha Yahudi mazui laʼoʼö zi toʼölö lafalua agama faya si no irai mangaröuʼö yaʼira khö Yehowa. Ba gafuriata, aʼozu niʼera-erara. Ifuli toröi ira ba danöra, latanö zinanö ba larasoi waʼowua-wua dödö ero maʼökhö. Lö ara me no mangawuli ira, lafuli lafazökhi naha wanunu sumange khö Yehowa ba Yeruzalema ba labeʼe zumange si möi fangomuso dödö Lowalangi. (Esr. 3:2-6) Ifahowuʼö ira Yehowa ba ibeʼe khöra gubalo ba wamati si sökhi amuata ba si lö faröi, duma-dumania ere sotöi Esera sanura, Gubernur Nehemia hegöi Serubabeli, Ere Sebua sotöi Yosua hegöi ira samaʼeleʼö si barani simane Hagaʼi, Zakharia ba Maleakhi. Sagötö laʼoʼö wanuturu lala ba wamati si no mubeʼe, hasambalö larasoi wahasara dödö si no ara ladöna-döna.​—Yes. 61:1-4; baso Yeremia 3:15.

22. Hezo taʼila wa alua dania mbuʼusa li sabölö ebua sanandrösa ba wamohouni?

 ²² Tatu möi famarou dödö niha Yahudi mbuʼusa li Yehowa si no alua sanandrösa ba wamohouni! Hizaʼi, lö sahori alua mbuʼusa li andrö. Hezo taʼila? Na lö tebulö moloʼö nono mbanua Yehowa khönia, hasambalö alua mbuʼusa li andrö. Ba gafuriata, lö moloʼö zui niha Yahudi ba mamadaö ira irege lö aʼozu fefu mbuʼusa li Yehowa. Sindruhunia sa, simane niwaʼö Yosua hasambalö aʼozu fefu mbuʼusa li Yehowa. Andrö wa tola muhalö rahu-rahu wa ifuli zui alua mbuʼusa li sabölö ebua ba si lö irai tebulö sagötö faʼara. Datafaigi hewisa waʼalua daʼö.

23, 24. Hawaʼara tebörögö ”teʼazökhi fefu hadia ia”? Tutunö.

²³ No tafahaʼö ita ba Zura Niʼamoniʼö wa no irugi gamozua gulidanö si lö sökhi andre mazui ngaluo safuria me 1914. Hizaʼi, lö faʼaombö dödö ba nono mbanua Yehowa. Itutunö khöda Sura Niʼamoniʼö wa alua zahöli-höli dödö me 1914 yaʼia daʼö ”ifuli teʼazökhi fefu hadia ia”. (Hal. 3:21) Hezo taʼila? Hadia zalua ba zorugo me 1914? Mufataro Yesu Keriso, yaʼia daʼö Mesia tobali Razo! Hadia awena tebörögö wamohouni andrö me no tefataro ia? Törö tödöu, no fawuʼu li Yehowa khö Dawido wa lö tebulö so moroi ba ngaʼötönia zi tobali razo. (1 Ng. 17:11-14) Hizaʼi, iʼotarai me tedudugö Yeruzalema ba danga Mbabilona me 607 SM, lö hadöi saʼae samatörö moroi ba ngaʼötö Dawido si tobali razo.

²⁴ Börö me ’Ono niha’ Yesu, mufotöi ia ngaʼötö Dawido ba yaʼia zindruhu zokhö ba wanohugö famatörö Razo Dawido. (Mat. 1:1; 16:13-16; Luk. 1:32, 33) Me döfi 1914, ifataro Yesu andrö Yehowa ba zorugo ba ”ifuli teʼazökhi fefu hadia ia”! Iʼotarai daʼö, tola iʼogunaʼö Razo soʼahonoa andrö Yehowa ba wanohugö famohouni si no mufabuʼu.

25, 26. (a) Hamega teʼefaʼö niha niʼoloiʼö moroi ba Mbabilona Sebua? Tutunö. (Faigi kotak ”Döfi 1919”.) (b) Hadia wamaʼeleʼö salua iʼotarai me döfi 1919?

 ²⁵ Si oföna sibai nifalua Keriso me no tobali ia Razo yaʼia daʼö fao ia khö Namania ba wamareso lala wamosumange satulö ba gulidanö. (Mal. 3:1-5) Abua wamaehusi gandru hegöi oʼo simane ba gamaedola Yesu. Simanö göi, ara ginötö awena tola mufaehusi niha Keriso nibayoini moroi ba niha Keriso faya. * Hizaʼi, me no tebörögö mbaŵa wamasi 1914, itugu oroma waʼafaehunia. Sagötö zi hauga wulu fakhe me arakhagö 1914, lö laböhöli Ono Zekola Zura Niʼamoniʼö ba wangombakha falimosa niʼogorofi andrö nifalua Gereja. Labörögö göi lafabali ira moroi ba organisasi Gereja si lö manörö sindruhu. Irugi inötö khö Yehowa ba wamohouni yaʼira. Me börötö ndröfi 1919, lö ara me no tebörögö ’mbaŵa wamasi’, teʼefaʼö nono mbanua Lowalangi ba Mbabilona Sebua. (Mat. 13:30) Lö saʼae teʼoloiʼö ira!

²⁶ Iʼotarai daʼö, ibörögö alua wamaʼeleʼö Hezekieli andrö töra moroi ba zi no lakhalaigö ono mbanua Lowalangi me götö föna. Datatutunö hewisa zi lima ngawalö mbuʼusa li si no mututunö andrö abölö ebua waʼaluania dania.

27. Hadia nifalua Lowalangi ba wamohouni ono mbanuania moroi ba wamosumange adu?

²⁷ BUʼUSA LI SI 1. Lö hadöi saʼae fanömba adu mazui niʼogorofi sasese lafalua agama faya. Ba gangohorita ndröfi 1800-an mazui böröta ndröfi 1900-an, owulo niha Keriso sindruhu ba laröi saʼae zasese lafalua agama faya. Aboto ba dödöra wa famahaʼö Lowalangi Sambua Tölu, noso si lö mate hegöi alitö narako, daʼö moroi ba agama faya tenga moroi ba Zura Niʼamoniʼö. Laʼila göi wa fangogunaʼö adu ba naha wamosumange fagölö ia ba zanömba adu. Ba gafuriata, aboto göi ba dödö nono mbanua Lowalangi wa fangogunaʼö röfa no farahu ia ba wanömba adu.​—Hez. 14:6.

28. Hezo tefangawuli nono mbanua Yehowa?

 ²⁸ BUʼUSA LI SI 2. Tefangawuli nono mbanua Lowalangi ba soi wamati. Me no laröi Mbabilona Sebua ira niha Keriso sindruhu, larasoi waʼowua-wua dödö ba wamati. Lasöndra howu-howu ba lö olofo ira ba wamati. (Baso Hezekieli 34:13, 14.) Simane nitutunöda dania ba Faza 19, no ifahowuʼö ira Yehowa ba fahöna gö wamati töra moroi ba zilalö.​—Hez. 11:17.

29. Hana wa itugu tedou halöwö fanuriaigö iʼotarai ndröfi 1919?

²⁹ BUʼUSA LI SI 3. Mufuli mubeʼe zumange ba naha wanunu sumange khö Yehowa. Me abad siföföna, tefahaʼö niha Keriso ba wameʼe sumange fanuno, abölö ebua mbölinia moroi ba gurifö nibeʼe sumange. Lasuno Yehowa ba laturiaigö sanandrösa khönia. (Heb. 13:15) Hewaʼae simanö, me teʼoloiʼö nono mbanua Lowalangi ba zi hauga abad, lö hadöi mufakhoi ba wameʼe sumange fanuno simane daʼö. Hizaʼi, me arakhagö teʼefaʼö  ira, labörögö wameʼe sumange fanuno. Möi ira manuriaigö ba omuso dödöra wanuno Yehowa ba gangowuloa. Iʼotarai 1919 iʼabakhaiʼö wangumaʼö ’sawuyu si lö faröi ba satua-tua’ wa moguna sibai wanuriaigö hegöi ba wamöföʼö halöwö andrö. (Mat. 24:45-47) Itugu ato zameʼe sumange khö Yehowa sanuno töinia niʼamoniʼö irege afönu naha wanunu sumange!

30. Hadia nifalua Yesu enaʼö so gubalo si sökhi sokubaloi biri-birinia?

³⁰ BUʼUSA LI SI 4. Muheta dania ndra kubalo si lö sökhi. Keriso zangefaʼö ono mbanua Lowalangi moroi khö ndra kubalo safaito ba sangalui tana khöra ba Gereja. Muheta göi ba mbanua niha Keriso na so gubalo simane daʼö. (Hez. 20:38) Yesu, Kubalo si Sökhi, ihaogö wamaigi enaʼö terorogö nono mbiri-birinia. Me 1919, ifataro zawuyunia si lö faröi ba satua-tua. Moʼömö ngawawa si lö atoto andre yaʼia daʼö niha Keriso nibayoini ba wangehenaigö ö wamati niʼogunaʼö nono mbanua Lowalangi. Ba gafuriata, lafataro ndra satua sokubaloi ba wokubaloi ’biri-biri Lowalangi’. (1 Fe. 5:1, 2) Asese muʼogunaʼö ngawua wehede nifaʼema Yehowa si so ba Hezekieli 34:15, 16 si tobali famasugi ba dödö khö ndra kubalo niha Keriso sanandrösa ba goi-goi nibeʼe Lowalangi Yehowa hegöi Yesu Keriso.

31. Hewisa wamalua Yehowa buʼusa linia simane nisura ba Hezekieli 11:19?

³¹ BUʼUSA LI SI 5. Teʼosambuaʼö zamosumange Yehowa. Sagötö ba zi hauga abad, tebagi Gereja tobali ngafulu ribu sekte ba lö aetu mowaʼudu ira. Hizaʼi, ono mbanua Lowalangi si no tebohouni, larasoi dandra sahöli-höli dödö moroi khö Yehowa. Ifalua mbuʼusalinia Yehowa ba ifaʼema daʼö khö Hezekieli: ”Uʼosambuaʼö ira.” (Hez. 11:19) Ba zi sagörö ulidanö, zuta niha soloʼö khö Keriso moroi ba ngawalö mado, agama, faʼebua gokhöta hegöi dadaoma. Hizaʼi fagölö wamahaʼö yaʼira ba zindruhu ba lafalua halöwö si fagölö. Ba gafuriata waʼauri Yesu ba gulidanö, mangandrö ia soroi ba dödö enaʼö hasara dödö ndra nifahaʼönia. (Baso Yohane 17:11, 20-23.) Ba götöda andre, no ifondrondrongo Yehowa wangandrö daʼö.

32. Hewisa dödöu me no alua fefu nifaʼeleʼö sanandrösa ba wamohouni? (Faigi kotak ”Famaʼeleʼö Sanandrösa ba Wangoloiʼö hegöi Famohouni”.)

³² Hadia lö omuso dödöu me auri ndraʼugö ba ginötö wamohouni sahöli-höli dödö andre? No taʼila wa no alua gangilata Hezekieli ba wamosumangeda iadaʼa. Tatu omuso sibai dödö Yehowa ba nono mbanuania, moloʼö famaʼeleʼönia si no isura Hezekieli: ”Miʼomusoiʼö dania dödögu.” (Hez. 20:41) Me no teʼoloiʼö ira ba zi hauga abad, teʼefaʼö nono mbanua niʼosambuaʼö andrö ba larasoi waʼafahöna gö ba wamati. Hadia tenga no sambua töi sebua daʼa börö me no fao ndraʼugö ba wanuno Yehowa ba zi sagörö ulidanö? Sindruhunia, so nasa  wamaʼeleʼö Hezekieli sabölö ebua moroi ba daʼö sanandrösa ba wamohouni.

33-35. (a) Hadia nikhalaigö niha si no teʼoloiʼö me latema mbuʼusa li ba Hezekieli 36:35? (b) Hewisa waʼalua gangilata andrö ba nono mbanua Yehowa iadaʼa? (Faigi göi kotak ”Ifuli Teʼazökhi Fefu Hadia Ia”.)

³³ Törö tödöu wa ”ifuli teʼazökhi fefu hadia ia” ba tebörögö wamohouni me igogohe wamatörö andrö ngaʼötö Dawido tobali razo, yaʼia daʼö me mufataro Yesu me döfi 1914. (Hez. 37:24) Aefa daʼö, ibeʼe kuaso Yehowa khö Keriso ba wamohouni famosumange satulö ba nono mbanuania si no teʼoloiʼö ba wamati barö zi hauga abad. Hadia ha ndrege daʼö halöwö Keriso? Tenga. Itohugö nasa halöwönia ba zi so miföna ba oya zi no tezara-zara sameʼe khöda famarou dödö si tesöndra ba wamaʼeleʼö Hezekieli.

³⁴ Sambua moroi ba wamaʼeleʼö andrö imane, ”Lamane niha, ’Hulö Kabu Edena danö si no muröi andrö.’” (Hez. 36:35) Hadia nikhalaigö Hezekieli hegöi niha niʼoloiʼö tanö böʼö me latema mbuʼusa li daʼö? Te lö lakhalaigö wa tobali Kabu Edena dania soira andrö mazui simane Faradaiso nifazökhi Yehowa ba wamobörö! (1 Mo. 2:8) Tatu aboto ba dödöra hadia geluaha niwaʼö Yehowa yaʼia daʼö wa tobali tanö satabö sinanö soira ba si sökhi famaigi.

³⁵ Hadia alua mbuʼusa li daʼö ba götöda iadaʼa? Sagötö mamatörö Gafökha Satana ba gulidanö si lö sökhi andre nasa, tatu aboto ba dödöda wa lö hadöi faradaiso. Hizaʼi, taʼila geluaha mbuʼusa li daʼö moʼamakhaita ia ba waradaiso wamati si no tarasoi yaʼita ono mbanua Yehowa iadaʼa. Ba daʼa tasöndra waʼohahau dödö sindruhu ba taʼofönaiʼö wamalua halöwö ba wamosumange Yehowa. Itugu ara, itugu monönö waʼasökhi waradaiso wamati andre. Hadia no awai wamohouni andrö?

36, 37. Hadia manö mbuʼusa li salua dania ba Waradaiso?

³⁶ Na no awai wasuwöta ba Hamagedo, tetohugö nasa wamohouni. Ifuli iʼazökhi maʼasagörö gulidanö andre Yesu. Sagötö Famatörö si Saribu Fakhe, ibeʼe wanuturu lala ba niha enaʼö tobali Kabu Edena mazui Faradaiso gulidanö andre simane ohitö dödö Yehowa ba wamobörö! (Luk. 23:43) Ba ginötö daʼö, fefu niha ahori atulö ira khö nawöra zamösa ba larorogö gulidanö. Gofu hezo möi ira lö hadöi si tobali famaʼala sametaʼu yaʼira. Khalaigö dania na alua mbuʼusa li andre: ”Fawuʼu li ndraʼo khöra ba waʼatulö. Uheta dania gurifö samuʼi ba safaito ba soi daʼö, irege lö sametaʼu yaʼira ba mbenua soduʼu ba mörö ira ba gatua misa.”​—Hez. 34:25.

³⁷ Hadia tola ökhalaigö? Tola möi ndraʼugö gofu hezo manö ba zi sagörö ulidanö andre ba lö hadöi ametaʼuö. Lö hadöi  urifö samuʼi sangusu yaʼugö. Lö samawukaisi faʼahono dödöu. Tola öʼanöröi gatua sebolo, oya nahia si sökhi sinangea öfaigi, ohahau dödöu wemörö ba daʼö, lö sagafökhö ba nösiu na maosoʼö ba lö samesokho yaʼugö!

38. Hewisa dödöu na ökhalaigö waʼalua zi no ifabuʼu ba Hezekieli 28:26?

³⁸ Taʼila göi dania waʼalua mbuʼusa li daʼa: ”Mowanua ira ba daʼö ba lö sametaʼu yaʼira. Lafazökhi nomora hegöi kabu nagu. Mowanua ira ba daʼö ba lö sametaʼu yaʼira na uhuku fefu soi sangoʼaya yaʼira ba zi fasuira. Ba awena dania aboto ba dödöra wa yaʼo Yehowa Lowalangira.” (Hez. 28:26) Na no tehori fefu nudu Yehowa ba awena dania afönu gulidanö andre faʼatulö ba faʼahono dödö. Baero halöwöda ba wondrorogö ulidanö, taʼalui zoguna khöda hegöi ba nösi nomoda. Tafazökhi nomo awö kabu nagu.

39. Hana wa faduhu dödöu wa alua fefu wamaʼeleʼö Hezekieli sanandrösa ba Waradaiso?

³⁹ Hadia ha anga-anga mbuʼusa li daʼa? Na daʼö nirasoimö, törö tödöu hadia zi no irai öʼila sagötö ”ifuli teʼazökhi fefu hadia ia”. Börö waʼabölö Yehowa, tola mofozu Yesu ba wamohouni famosumange satulö sagötö ihawui faʼogömi-gömi gulidanö andre. Sindruhunia, iforege Satana enaʼö lö aʼozu mbuʼusa li daʼö. Daʼa dandra si tola tafaduhusi tödö wa alua fefu mbuʼusa li Yehowa nifaʼemania khö Hezekieli!