1-3. (a) Hana wa tola terara dödö Hezekieli me no itema gangilata sanandrösa ba gosali sebua? (Faigi gambara ba wamobörö wamahaʼö.) (b) Hadia manö nifatunöda ba faza daʼa?

KHALAIGÖ atö, 50 fakhe saʼae ndröfi Hezekieli. No 25 fakhe toröi ia ba nahia wangoloiʼö. No ara saʼae tedudugö gosali ba Yeruzalema. Hewaʼae no irai manötöna Hezekieli wa mangawuli ia tobali ere ba Yeruzalema, hizaʼi aboto ba dödönia wa basaki alua daʼö. Lö nasa niʼefaʼö soinia ba teʼoloiʼö ira ba zi 56 fakhe tö. (Yer. 25:11) Andrö wa lö manötöna ia wa iʼila na mangawuli nono mbanua Yehowa ba mbanuara zamösana, mendrua manö ba wamazökhi osali mangawuli. Hadia möi fangafatö dödönia daʼa?

² Si fao faʼasökhi dödö, iʼogunaʼö ginötö daʼa Yehowa ba wameʼe si sambua angilata khö zamaʼeleʼö samati andre ba no ihaogö wozara-zara. Tatu manö möi fondrara dödönia ba fangaro wamatinia. Ba gangilata daʼa, teʼohe Hezekieli ba danö si tumbu yaʼia ba mudadao ia ba dete hili fondrege zalawa. Ba daʼö falukha ia khö ”ndra matua si takile si hulö tembaga”. Ira matua daʼö malaʼika, ba iʼohe Hezekieli wamasui osali salawa andrö. (Baso Hezekieli 40:1-4.) Sindruhu-ndruhu alua daʼö  ba wamaiginia! Tatu terou dödö Hezekieli ba monönö wamatinia, hewaʼae na lö aboto ba dödönia hadia zalua. Oya sibai zi fakhili-khili ba gosali daʼö simane osali niʼilania ba Yeruzalema mböröta, hizaʼi oya göi zi faböʼö.

³ Tesura gangilata sahöli-höli dödö andre ba zi siwa faza safuria mbuku Hezekieli. Datatutunö hadia manö lala niʼogunaʼöda enaʼö aboto ba dödöda gangilata daʼö. Aefa daʼö, tatutunö göi hadia fagölö gosali niʼila Hezekieli ba gosali wamati solakhömi nitutunö zinenge sotöi Faulo ba zi hauga ngaotu fakhe aefa daʼö. Ba safuria, tatutunö göi geluaha gangilata daʼa khö Hezekieli hegöi khö ndra niha niʼoloiʼö.

4. Hewisa publikasida me mböröta wanutunönia angilata sanandrösa ba gosali, hizaʼi hadia lala sabölö aoha iadaʼa?

⁴ Me mböröta, no irai iwaʼö publikasida wa osali ba gangilata Hezekieli fagölö ira gosali wamati khö Yehowa nitutunö Waulo ba zurania ba niha Heberaiʼo. * Me luo daʼö, taʼogunaʼö nitutunö Waulo sanandrösa ba nose Lowalangi ba wotatugöi hadia geluaha ngawalö faosatö ba gosali Hezekieli. Hizaʼi, me no oya mufalua riset, fangandrö hegöi foʼangerönusi, sindruhunia so lala saoha enaʼö alio aboto ba dödöda geluaha gosali ba gangilata Hezekieli.

5, 6. (a) Hadia niwaʼö Waulo sanandrösa ba nose Lowalangi, ba hewisa wangoromaʼönia fangide-ngideʼö ba wanutunö daʼa? (b) Hewisa woloʼöda amuata Waulo ba ginötö taforege enaʼö aboto ba dödöda gosali andrö niʼila Hezekieli?

⁵ Hulö ambö tefaudu na ahori tanehegö fefu geluaha ngawalö zi so bakha ba gosali niʼila Hezekieli. Hadia mbörö? Nehegö duma-duma sahöli-höli dödö andre. Me itutunö Faulo sanandrösa ba gosali wamati, izara-zara wangombakha si so ba nose Lowalangi, simane naha wanunu kumöyö nifazökhi moroi ba ganaʼa, lagö-lagö dawöla hegöi rumbi anaʼa si no mufoʼösi faoma mana. Hadia izara-zara wanutunö eluaha daʼö fefu? Te löʼö, börö me lö ifarou ia eheha niʼamoniʼö ba wamalua daʼö? Imane Faulo, ”Tenga inötönia iadaʼa wozara-zara fanutunö yaʼia.” (Heb. 9:4, 5) Iʼoʼö wanuturu lala andrö Faulo moroi ba geheha niʼamoniʼö, ba si fao fangide-ngideʼö ibaloi ginötö moroi khö Yehowa ba wanutunö daʼö.​—Heb. 9:8.

⁶ Simane daʼö göi lala enaʼö aboto ba dödöda gangilata Hezekieli sanandrösa ba gosali. Oya sibai zinangea mututunö, hizaʼi abölö sökhi na tabaloi Yehowa zanutunö yaʼia na moguna wamotokhi ba dödö sabölö tefaudu. (Baso Mikha 7:7.) Na simanö, hadia so wanuturu lala moroi ba geheha Yehowa sanandrösa ba gangilata andre? So!

7, 8. (a) Hadia wamahaʼö si no mubohouni iadaʼa? (b) Hadia gamaehutania gosali niʼila Hezekieli faoma osali wamati nitutunö Waulo?

⁷ Simane si no mututunö ba zilalö, no hauga fakhe itutunö publikasida wa angilata Hezekieli eluahania osali wamati khö Yehowa nitutunö Waulo ba zurania si no teʼehehaini sofeta ba  niha Heberaiʼo. Hizaʼi, me no muhaogö wamareso, tenga daʼö geluahania. Hadia mbörö?

⁸ Fanema li si oföna: Osali niʼila Hezekieli faböʼö moroi ba nitutunö Waulo si no teʼehehaini. Iwaʼö Faulo wa ose Lowalangi ba götö Moze me föna, eluahania so nasa dania zabölö ebua. So duma-duma si fagölö ba wamazökhi ose Lowalangi moroi ba gosali Zelomo hegöi osali Zerubabeli. Fefu oi so ”Nahia Wondrege Niʼamoniʼö”. Ifotöi Faulo nahia daʼö ”Nahia niʼamoniʼö nifazökhi danga niha” eluahania ”famaedo zindruhunia”. Hadia zindruhunia andrö? Moloʼö Faulo yaʼia zi otarai ”zorugo” andrö. (Heb. 9:3, 24) Hadia sorugo niʼila Hezekieli andrö? Tenga. Ba gangilata Hezekieli, lö hadöi tandra sangoromaʼö wa si so ba zorugo fefu niʼilania andrö.​—Fatimbaisi Danieli 7:9, 10, 13, 14.

9, 10. Hadia gamaehutania zumange ba gosali niʼila Hezekieli moroi ba zumange ba gosali wamati nitutunö Waulo?

⁹ Tandra tanö böʼö sameʼe khöda faʼafaduhu dödö yaʼia daʼö amaehuta zumange ba gangilata Hezekieli moroi ba nitutunö Waulo. No irongo Hezekieli wa no latema wanuturu lala ira ere, ira sondröniaʼö hegöi ono mbanua sanandrösa ba wameʼe sumange. Labeʼe daʼö börö zala nifaluara. Hasambalö göi labeʼe zumange fangatulö, ba tola falulu manga ira ba wemanga gö daʼö ba naha wemanga si so ba gosali. (Hez. 43:18, 19; 44:11, 15, 27; 45:15-20, 22-25) Tenga ha sakali lafalua wameʼe sumange andrö. Hadia mufalua göi wameʼe sumange andrö ba gosali wamati solakhömi?

¹⁰ Fanema linia no öna-öna. Itutunö Faulo, ”Me tohare Keriso tobali ere sebua ba wolohe ngawalö zi sökhi nirasoida iadaʼa, italuʼi nose sabölö moguna ba sabölö moʼahonoa, tenga nifazökhi danga niha mazui niwöwöi ba gulidanö. Möi ia ba nahia niʼamoniʼö, lö iʼohe ndro nambi mazui do nono zawi si matua, hizaʼi donia samösa, sakali irugi zi lö aetu, ba wameʼe khöda fangefa götö-götö waʼara.” (Heb. 9:11, 12) Börö daʼö, ha sambua zumange nibeʼe sagötö faʼara ba gosali wamati solakhömi, yaʼia daʼö höli nibeʼe Gere Sebua Solakhömi, Yesu Keriso. Hizaʼi, ba gosali niʼila Hezekieli, oya sibai nambi hegöi sawi si matua nibeʼe sumange. Ba daʼö oroma wa tenga osali wamati solakhömi niʼilania andrö.

11. Hana wa lö nasa ifaʼeleʼö zindruhu Lowalangi ba götö Hezekieli sanandrösa ba gosali wamati solakhömi?

¹¹ Fanema li si dua: Me luo daʼö lö nasa irugi inötö khö Lowalangi ba wangoromaʼö sindruhu sanandrösa ba gosali wamati. Törö tödöu, si oföna sibai mufaʼema gangilata Hezekieli andre khö ndra niha Yahudi niʼoloiʼö ba Mbabilona. Barö mbawa Goroisa Moze so ira nasa. Me no aefa wangoloiʼö, mangawuli ira ba Yeruzalema ba lafalua wamosumange satulö moloʼö oroisa andrö. Eluahania, lö tola löʼö lafuli lafazökhi gosali hegöi naha  wanunu sumange, ba labeʼe zumange ba daʼö. Arakhagö 600 fakhe no lafalua zimane daʼö. Hizaʼi, khalaigö lua-luania khöra na angilata Hezekieli andrö no iforomaʼö khöra sanandrösa ba gosali wamati. Na lafatunö khöra wa ba gosali daʼö ibeʼe nosonia ere sebua irege lö moguna saʼae zumange tanö böʼö, tola manö lawaʼö tödöra wa lö moguna laʼoʼö Goroisa Moze. Oroma ba daʼa wa tenga osali wamati solakhömi niʼila Hezekieli. Ifatunö fefu zindruhu andrö Yehowa ba ginötö si tefaudu ba na no tola latemaʼö daʼö ono mbanuania.

12-14. Hadia gamakhaitania gosali niʼila Hezekieli hegöi osali wamati nitutunö Waulo? (Faigi kotak ”Dombua Gosali si Faböʼö Eluaha”.)

¹² Na simanö, hadia gamakhaita gosali ba gangilata Hezekieli faoma osali wamati nitutunö Waulo? Moguna tatörö tödöda wa nitutunö Waulo yaʼia daʼö ose Lowalangi si so ba götö Moze, tenga osali niʼila Hezekieli. Sindruhu sa wa so ösa nitutunö Waulo, so ia ba gosali Zelomo, osali Zerubabeli hegöi osali niʼila Hezekieli. Hizaʼi, faböʼö geluaha nitutunö Hezekieli moroi ba nitutunö Waulo. * Hewaʼae simanö, oi zara moʼamakhaita. Hezo tola taʼila?

¹³ Amakhaita zi dombua nisura ba Zura Niʼamoniʼö andre yaʼia daʼö: Moroi khö Waulo, tafahaʼö ita sanandrösa ba gamakhoita  wamosumange si no itatugöi Yehowa. Moroi khö Hezekieli, tafahaʼö ita sanandrösa ba goi-goi wamosumange. Ba wamahaʼö yaʼita sanandrösa ba gamakhoita wamosumange satulö khö Yehowa, itutunö ösa Faulo geluaha faosatö si so ba gosali wamati, simane ere sebua, sumange, naha wanunu sumange hegöi Nahia Wondrege Niʼamoniʼö. Hizaʼi, ba wangabakhaiʼö goi-goi salawa moroi khö Yehowa ba wamosumange satulö, ihaogö itutunö khöda Hezekieli gosali niʼilania. Buania, oya goi-goi Yehowa niʼilada ba tola tatanögö ia ba gera-era hegöi ba dödöda.

¹⁴ Me no muʼatulöʼö waʼaboto ba dödöda, hadia so nasa gunania khöda gangilata Hezekieli andrö? So. Si oföna, datatutunö hadia gunania ba niha Yahudi si lö faröi ba götö Hezekieli hegöi me no aefa daʼö. Na tafalua daʼö, tola taʼila hadia gunania khöda.

15. (a) Hadia zindruhunia nifaʼeleʼö ba gangilata Hezekieli? (b) Tutunö hadia manö gamaehutania Hezekieli faza 8 ba Hezekieli faza 40 irugi 48?

¹⁵ Ba wangalui fanema linia ba Zura Niʼamoniʼö ba enaʼö taʼila fefu zalua, databeʼe wanema li ba wanofu-nofu daʼa. Si oföna,  hadia zindruhunia nifaʼeleʼö ba gangilata daʼa? Fanema li sadogo-dogo yaʼia daʼö tebohouni wamosumange satulö! Daʼö rahu-rahu nihalö Hezekieli. Ba mbuku Hezekieli faza 8, isura sanandrösa ba wondröi sindruhu ba gosali Yeruzalema si no ifaʼeleʼö Yehowa khönia. Tobali, terara sibai dödönia me faböʼö nisurania moroi ba zi oföna, tola tabaso daʼö ba faza 40 irugi 48. Tenga famosumange si raʼiö nitutunönia ba daʼö, hizaʼi famosumange satulö sinangea itema Yehowa moloʼö Oroisa Moze.

16. Hewisa gangilata Hezekieli sanandrösa ba gosali, ifaduhuʼö wamaʼeleʼö Yesaya ba zilalö?

¹⁶ Moguna teʼalawaʼö wamosumange satulö khö Yehowa enaʼö tefangawuli simane ba zilalö. Töra otu fakhe ba zilalö, imane samaʼeleʼö sotöi Yesaya, ”Ba ngaluo safuria, aro hili nahia nomo Yehowa ba tefasindro ia ba zuzu hili fondrege zalawa. Teʼalawaʼö ia yawa hili-hili andrö maʼafefu.” (Yes. 2:2) Aboto ba dödö Yesaya wa teʼalawaʼö wamosumange satulö khö Yehowa, hulö no tebeʼe ia ba zuzu hili fondrege zalawa. Ba gangilata Hezekieli sakali daʼa, hezo gamaudu so nomo Yehowa? Ba ”hili fondrege zalawa”! (Hez. 40:2) Angilata Hezekieli andre zamaduhuʼö wa tebohouni wamosumange satulö.

17. Adogoiʼö wanutunö angilata ba Hezekieli faza 40 irugi 48.

¹⁷ Na muʼadogoiʼö ia, daʼa gangilata nisura ba Hezekieli faza 40 irugi 48: So malaʼika niʼila Hezekieli sanuʼa bawa göli, towa, olayama hegöi naha niʼamoniʼö ba gosali. (Hez. 40-42) Aefa daʼö alua zahöli-höli dödö: Tohare Yehowa ba gosalinia si fao lakhömi! Iʼamenesi nono mbanuania si no mangerogö yaʼia, ira ere awö ndra sondröniaʼö. (Hez. 43:1-12; 44:10-31; 45:9-12) Baero daʼö, iʼila nungo nidanö sangele moroi ba naha niʼamoniʼö andrö numalö ba Nasi si Mate, ba iʼohe wangorifi hegöi howu-howu ba geleania andrö. (Hez. 47:1-12) Ba iʼila göi wa no mubagi-bagi soi daʼö moloʼö si no mutatugöi, ahatö ba gotaluania so ba daʼö nahia wamosumange satulö. (Hez. 45:1-8; 47:13–48:35) Hadia nifaʼema Yehowa? Iʼaroʼö waʼafaduhu dödö nono mbanuania wa teʼalawaʼö ba tebohouni wamosumange satulö. Ifahowuʼö gosalinia andrö ba weʼasonia. Ifangele howu-howu moroi ba gosali andrö ba wangaʼasogö famohouni, faʼauri hegöi faʼahono dödö ba soi daʼö.

18. Hadia sindruhu-ndruhu tomosa gosali geluaha gangilata andrö? Tutunö.

¹⁸ Si dua, hadia sindruhu-ndruhu tomosa gosali geluaha gangilata andrö? Tenga. Tatu aboto ba dödö Hezekieli hegöi niha niʼoloiʼö wa tenga sindruhu-ndruhu tomosa gangilata daʼö. Hadia mbörö? Törö tödöu wa osali daʼö ba ”hili fondrege zalawa” so ia. Tefaudu daʼa ba gangilata Yesaya, hizaʼi lö tefaudu ba naha gosali sindruhunia. Osali Zelomo ba Hili Moria so daʼö ba Yeruzalema, ba daʼö göi mufuli mufazökhi gosali andrö. Hadia tola mufotöi Hili Moria andrö ”hili fondrege zalawa”? Löʼö,  börö me so nasa ba zi fasuinia hili tanö böʼö si fagölö khönia mazui sabölö alawa moroi ba daʼö. Ba gangilata Hezekieli, ebolo sibai gosali andrö ba no ifasui towa irege lö monaha daʼö ba zuzu Hili Moria. Simanö göi ba mbanua Yeruzalema ba götö Zelomo! Baero daʼö, lö hadöi ba wangera-ngera ndra niha niʼoloiʼö wa so nungo nidanö sangele moroi ba gosali niʼamoniʼö saekhu ba Nasi si Mate, ba ifuli ohahau nasi daʼö enaʼö tola monahia ngawalö zonoso. Baero daʼö, börö me mohili-hili Danö Amabuʼula, andrö wa tebai mufagölösi hawaʼebua mbanua daʼö ero sambua mado simane nitutunö ba gangilata. Börö daʼö, eluaha gangilata andrö tenga sindruhu tomosa gosali.

19-21. Hadia gohitö dödö Yehowa wa ibeʼe gangilata daʼa ba nono mbanuania, ba hadia mbörö wa lawaʼö zimanö?

¹⁹ Si tölu, hadia gohitö dödö wa mubeʼe gangilata andrö ba soi Hezekieli? Wa mubeʼe daʼö enaʼö aila ira ba ginötö laʼangerönusi goi-goi salawa khö Yehowa ba wamalua famosumange satulö. Iwaʼö Yehowa khö Hezekieli enaʼö ’itutunö hewisa zindruhunia gosali andrö ba ndraono Gizaraʼeli’. Moguna muzara-zara wanutunö yaʼia enaʼö tola lakhalaigö ’gambara gosali’ andrö. Hana wa mufalua daʼö? Simane si no tatutunö, ohitö dödönia tenga ba wamazökhi mangawuli. Hizaʼi, simane niwaʼö Yehowa, ”Enaʼö aila ira ba zala si no lafalua.”​—Baso Hezekieli 43:10-12.

 ²⁰ Hana wa möi famarou dödö niha sadölö tödö gangilata daʼa irege aila ira? Ifatunö khö Hezekieli, ”He ono niha, ameʼegö tödö, faigi, ba haogö wamondrongo fefu niwaʼögu khöu sanandrösa ba gamakhoita awö goroisa ba gosali Yehowa”. (Hez. 44:5) Ba gangilata daʼa, asese irongo Hezekieli gamakhoita hegöi oroisa. (Hez. 43:11, 12; 44:24; 46:14). Lö aetu göi tefasugi ba dödönia sanandrösa ba goi-goi Yehowa hegöi goi-goi wanuʼa si sambua siʼu awö wanuʼa faʼabua si tefaudu. (Hez. 40:5; 45:10-12; fatimbaisi Gamaedola 16:11.) Ba li sindruhunia, töra 50 kali iʼogunaʼö Hezekieli ngawua wehede ”isuʼa” mazui ’suʼa-suʼa’ ba gangilata daʼa!

²¹ Hana wa itötöi Yehowa sanandrösa ba zuʼa-suʼa, fanuʼa waʼabua, amakhoita hegöi oroisa? Hulö na ifuli iʼabakhaiʼö zindruhu andrö Yehowa ba nono mbanuania yaʼia daʼö ha yaʼia zinangea motatugöi goi-goi ba wamosumange satulö. Sinangea na aila niha si lö moloʼö goi-goinia. Na simanö, hewisa wa tola tefahaʼö niha Yahudi moroi ba gangilata daʼa? So ösa dania nitutunö ba faza aefa daʼa. Na tafahaʼö ita ba daʼö, monönö waʼaboto ba dödöda gangilata sahöli-höli dödö andrö.