1. Tutunö hadia nifalua zanaro si no ifili Yehowa ba hadia zalua aefa daʼö.

SO SAMÖSA zanaro si zizio ba dete göli Yeruzalema samaigi-maigi si tohare moroi ba zaröu. Ilumöʼö hörönia moroi ba haga luo si lö ara tö aekhu. Iʼanemaiʼö ifoli dorofe tandra wa so deʼala. Tohare zaradadu Mbabilona! No ahou nono mbanua si lö tödö andrö ba woʼameʼegö tödö famangelama moroi khö zanaro. Ba zi hauga wulu fakhe, no ara labeʼe wamangelama ira sanaro nituyu Yehowa mazui ira samaʼeleʼö, hizaʼi lö ba dödöra, lö mamati ira ba lasömba nadu. No teʼuʼu ira iadaʼa. Ba zi hauga waŵa aefa daʼö, ladudugö göli Yeruzalema ira saradadu Mbabilona, fadaya tou ba danö gosali, labunu ba laʼoloiʼö nono mbanuania.

2, 3. (a) Hadia zi lö ara tö alua ba niha gulidanö, ba hadia zinangea lafalua iadaʼa? (b) Hadia manö wanofu-nofu nitutunöda?

² Ba ginötöda andre, ira saradadu Yehowa si so ba zorugo no lafaʼanö ira wanuwö niha gulidanö si lö mamati. (Fam. 17:12-14) Alua wasuwöta daʼö dania ba gafuriata wamakao sabölö-bölö sagötö sejarah niha gulidanö. (Mat. 24:21) Hizaʼi, so nasa ginötö iadaʼa ba niha na omasi ira laʼameʼegö tödö wamangelama moroi khö ndra sanaro nituyu Yehowa.

 ³ Hana wa ifili ndra sanaro andrö Yehowa? Hadia duria nifaʼemara? Haniha manö zanaro ba hadia zinangea tafalua? Datatutunö wanema linia.

4. Hana wa so nifili Yehowa tobali sanaro? (Faigi gambara ba wamobörö wamahaʼö.)

⁴ Baso Hezekieli 33:7. Si toʼölönia me föna, mozizio zanaro yawa ba dete göli ba wolumöʼö ono mbanua. Daʼö zangoromaʼö wa iʼameʼegö tödö nono mbanuania samatörö banua andrö. Hewaʼae aföli ira wamondrongo ba modokea zi no mörö, hizaʼi möi fangorifi niha soʼameʼegö tödö. Andrö göi wa ituyu ndra sanaro Yehowa, tenga enaʼö alangu dödö ndraono Gizaraʼeli ba duria wanudugö. Sindruhunia sa iʼameʼegö tödö nono mbanuania ba omasi ia na teʼorifi ira.

5, 6. Hadia dandra sangoromaʼö wa atulö Yehowa andrö?

⁵ Me no ituyu Hezekieli tobali sanaro, sindruhunia ba daʼö oroma gamuata Yehowa si möi fondrara dödö. Datatutunö dombua moroi ba gotaluania.

⁶ Faʼatulö: Oroma waʼatulö Yehowa andrö börö me lö ebua dödö zambuana ia. Duma-dumania, hewaʼae ato zi lö omasi ba duria nifaʼema Hezekieli, hizaʼi lö fefu ndraono Gizaraʼeli ba wamaigi Yehowa oi samadaö. No hauga kali ifangelama ”niha si lö sökhi” hegöi ”niha si sökhi”. Daʼa zangoromaʼö wa omasi Yehowa na iʼila hewisa wanemaʼöra turia andrö ero samösa. Tobali, ihuku ira Yehowa moloʼö fanemaʼöra turia nifaʼema andrö.​—Hez. 33:8, 18-20.

7. Hewisa Yehowa wanguhukunia niha?

⁷ Oroma waʼatulö Yehowa moroi ba lala wamaluania fanguhuku. Ihuku niha tenga moloʼö sala nifaluara ba zilalö, hizaʼi moloʼö fanemaʼöra famangelama nibeʼenia. Imane Yehowa khö Hezekieli, ”Na umane göi ba niha si lö sökhi, ’Lö tebulö wa si mate ndraʼugö.’ Hizaʼi na iböhöli gamuatania si lö sökhi, ifalua zindruhu ba satulö, . . . lö mate ia.” Aefa daʼö imane nasa Yehowa, ”Muʼolifugö saʼae horö nifaluania.” (Hez. 33:14-16) Hizaʼi, niha si no mamalua satulö tebai ibaliʼö dane-dane gamuatania satulö andrö ba wamadaö khö Yehowa. Imane Yehowa na fasala niha satulö ”börö me faduhu dödönia wa teʼorifi ia ba gamuata satulö si no ifalua”, ”muʼolifugö saʼae gamuata satulö nifaluania, ba mate ia börö zalania samösa”.​—Hez. 33:13.

8. Hewisa wamangelama nifaʼema ndra samaʼeleʼö tobali tandra wa satulö Yehowa andrö?

⁸ Oroma göi waʼatulö Yehowa börö me lö iböhöli wameʼe famangelama fatua lö ihalö gangetula. Ibörögö mamaʼeleʼö Hezekieli te mato önö fakhe fatua lö ladudugö Yeruzalema ira saradadu Mbabilona. Hizaʼi, tenga sibai Hezekieli zamaʼeleʼö si oföna ba wamangelama ono mbanua Lowalangi. Mato dua ngaotu fakhe fatua lö tedudugö Yeruzalema, ifatenge zi tobali sanaro  Yehowa yaʼia daʼö Hosea samaʼeleʼö, Yesaya, Mikha, Obedi hegöi Yeremia. Ifatenge Yeremia andrö Yehowa ba wamangelama iraono Gizaraʼeli, ”No ufataro ndra sanaro sangumaʼö, ’Mifondrondrongo li dorofe nifazökhi moroi ba dandru!’” (Yer. 6:17) Andrö wa tebai latahigö Yehowa hegöi ira sanaro na mate ira ba ginötö iʼogunaʼö Mbabilona ba wanguhuku yaʼira.

9. Hezo oroma waʼomasi Yehowa si lö faröi?

⁹ Faʼomasi: Oroma waʼomasi Yehowa si lö faröi ba ginötö ifatenge ndra sanaro ba wameʼe famangelama tenga ha ba niha satulö hizaʼi ba niha si lö sökhi. Sindruhunia, no laʼafökhöiʼö dödönia ba lataʼunöisi döinia si sökhi. Khalaigö atö, aboto ba dödö niha wa Izaraʼeli andrö ono mbanua Yehowa, hizaʼi no hauga kali laʼosilöʼögö ia ba laʼoʼö lowalangi faya! Iwaʼö Yehowa wa afökhö sibai dödönia hulö simane foʼomo ira matua khö woʼomonia ira alawe samalua horö. (Hez. 16:32) Hewaʼae simanö, lö atage Yehowa. Lö omasi ia wanulöni hizaʼi omasi ia na mangawuli nono mbanuania. Na lö saʼae lafondrondrongo ba gafuriata, awena idöni wöda fanguhuku khönia si tobali angetula. Hadia mbörö? Imane khö Hezekieli, ’Lö omuso dödögu ba waʼamate niha si lö sökhi. Omuso dödögu na ifalalini gamuatania niha si lö sökhi ba isöndra waʼauri.’ (Hez. 33:11) Simane daʼö dödö Yehowa irugi iadaʼa.​—Mal. 3:6.

10, 11. Hadia manö wamahaʼönia khöda moroi ba lala Yehowa wamatörö ono mbanuania?

¹⁰ Hadia wamahaʼö nihalöda moroi ba waʼatulö hegöi faʼomasi Yehowa nifaluania ba ndraono Gizaraʼeli? Si oföna, böi  tawaʼö tödöda wa fagölö fefu niha nituriaigöda. Moguna taʼila wa no faböʼö-böʼö niha ero samösa. Böi tamane tödöda wa tenga sinangea ia ba wanemaʼö turia nifaʼemada, ha börö gamuatania me föna mazui si toʼölö lafalua ba mbanuania, mado, li mazui börö waʼatosasania! Hadia nifahaʼö Yehowa khö zinenge sotöi Fetero, moguna khöda irugi iadaʼa yaʼia daʼö: ”Lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.”​—Hal. 10:34, 35.

¹¹ Famahaʼö si dua yaʼia daʼö moguna mangelama ita. Moguna aboto ba dödöda wa aoha khöda wamalua horö, hulö simane niha nifalukhaisida ba wanuriaigö. Oʼö mene-mene nibeʼe zinenge sotöi Faulo me föna ba mbanua niha Keriso ba Gorindro: ”Na so zangumaʼö tödönia si zizio ia, ba yamufaigi enaʼö böi alau ia. Fanandraigö salua khömi sindruhunia ha fanandraigö si toʼölö alua ba niha.” (1 Ko. 10:12, 13) Baero daʼö, amuata si sökhi si no tafalua böi tabaliʼö daʼö dane-dane ba wamalua sala. Andrö böi tawaʼö tödöda wa tola manö tafalua zala asala tafalua zi sökhi. (Hez. 33:13) Hewaʼae no ara mangai halöwö ita khö Yehowa, moguna so wangide-ngideʼö ba foloʼö.

12. Na no irai tafalua horö sebua, hadia zi tebai taʼolifugö?

¹² Hewisa na no irai tafalua horö sebua hizaʼi itahi-tahigö ia tödöda irugi iadaʼa? Moroi ba nisura Hezekieli, ba daʼö aboto ba dödöda wa Yehowa zanguhuku niha samalua sala si lö mamalalini  era-era. Hizaʼi, aboto göi ba dödöda wa Yehowa andrö Lowalangi sebua faʼomasi, lö itanö ba dödönia golalöwa. (1 Yo. 4:8) Oroma moroi ba mbua-buada wa no tafalalini gera-erada, ba böi tawaʼö wa ebua sibai horöda khö Lowalangi irege tebai iʼefaʼö saʼae. (Yak. 5:14, 15) Omasi Yehowa wangefaʼö olalöwa ndraono Gizaraʼeli si no mohorö ba wamati ba omasi ia göi iʼefaʼö zalada.​—Si. 86:5.

13, 14. (a) Hadia duria si lö tola löʼö lafaʼema ira sanaro? (b) Hadia duria nifaʼema Yesaya?

¹³ Baso Hezekieli 33:2, 3. Hadia duria si lö tola löʼö lafaʼema ira sanaro nituyu Yehowa? Sambua halöwö sabölö moguna nifaluara yaʼia daʼö ba wamaʼema famangelama. Hewaʼae simanö, lafatunö göi duria somuso dödö. Faigi atö duma-dumania.

¹⁴ Mamaʼeleʼö Yesaya te iʼotarai 778 SM ofeta 732 SM. Ifangelama ndraono Gizaraʼeli wa tohare niha Mbabilona ba worabu Yeruzalema ba laʼoloiʼö nono mbanuania. (Yes. 39:5-7) Hizaʼi tebeʼe göi khönia geheha ba wanura, ”Mifondrondrongo weʼao ndra sozago andrö khöu. Ha samuza waʼomuso dödöra, börö me laʼila samösa hewisa wangowuloi Yehowa fefu nono mbanua Ziona.” (Yes. 52:8) Turia fondrege zi sökhi nifaʼema Yesaya yaʼia daʼö tebohouni wamosumange satulö!

15. Hadia duria nifaʼema Yeremia?

¹⁵ Mamaʼeleʼö Yeremia iʼotarai 647 SM ofeta 580 SM. Mufotöi ia ”sanuriaigö sanguhuku”. Tatu manö soroi ba dödönia wamaʼema famangelama ba ndraono Gizaraʼeli sanandrösa ba wanguhuku nifalua Yehowa. * Hizaʼi ifaʼema göi duria somuso dödö yaʼia daʼö mangawuli dania nono mbanua Lowalangi ba soira ba tebohouni wamosumange satulö ba daʼö.​—Yer. 29:10-14; 33:10, 11.

16. Hadia gunania ba niha niʼoloiʼö ba Mbabilona duria nifaʼema Hezekieli?

¹⁶ Me 613 SM, mutuyu Hezekieli tobali sanaro ba ifalua halöwö daʼö si löʼö-löʼönia irugi 591 SM. Simane si no mututunö ba Faza 5 ba 6, owölö-ölö sibai ia ba wameʼe famangelama ba ndraono Gizaraʼeli sanandrösa ba waʼatekiko salua khöra. Andrö wa lö hadöi foʼömönia ba ndro niha si göna faʼamate. Me luo daʼö tenga ha ifangelama niha niʼoloiʼö ba Mbabilona, hizaʼi ifangelama göi nono mbanua Yeruzalema si no mondröi sindruhu wa hasambalö ihuku ira Yehowa. Itolo göi niha niʼoloiʼö andrö Hezekieli enaʼö lö tebulö ahatö ira khö Yehowa ba tefaʼanö dania ira ba wamalua halöwöra. Me no teʼoloiʼö ira ba zi 70 fakhe, ifuli iʼohe ndraono Gizaraʼeli si toröi andrö Yehowa ba danöra si no tebohouni. (Hez. 36:7-11) Satonia moroi ba gotaluara yaʼia daʼö maʼuwu ndra niha niʼoloiʼö soʼameʼegö tödö turia nifaʼema Hezekieli. Simane nitutunö ba faza tanö  böʼö ba Faosatö si 3, oya duria somuso dödö nifaʼema Hezekieli samaduhuʼö wa ifuli tebohouni wamosumange satulö ba Yeruzalema.

17. Hamega manö ibeʼe halöwö ndra sanaro Yehowa?

¹⁷ Hadia so nasa zanaro nifatenge Yehowa baero ndra samaʼeleʼö khönia ba wameʼe famangelama ba nono mbanua Lowalangi fatua lö tedudugö Yeruzalema me 607 SM? So. Fatua lö alua ngawalö zoʼamakhaita ba gohitö dödö Yehowa, ifatenge ua ndra sanaro ba wameʼe famangelama hegöi ba wamaʼema turia somuso dödö.

18. Hadia halöwö nifalua Yohane Samayagö Idanö?

¹⁸ Me abad siföföna M, Yohane Samayagö Idanö zi tobali sanaro. Ibeʼe wamangelama wa lö ara tö mutimbagö soi ndraono Gizaraʼeli. (Mat. 3:1, 2, 9-11) Hizaʼi so göi halöwönia tanö böʼö. Iwaʼö Yesu wa Yohane andrö tenge-tenge sangehenaigö lala khö Mesia. (Mal. 3:1; Mat. 11:7-10) Eluahania göi ituriaigö duria somuso dödö wa no tohare Yesu ”Ono Mbiri-biri andrö khö Lowalangi”, ”sangeheta horö niha gulidanö”.​—Yoh. 1:29, 30.

19, 20. Hewisa Yesu hegöi ira nifahaʼönia wa tola lahalö halöwö zanaro?

¹⁹ Ba gotalua ndra sanaro maʼafefu, sabölö ebuara yaʼia daʼö Yesu. Simane Hezekieli, ifatenge ia Yehowa ba ”ndraono Gizaraʼeli”. (Hez. 3:17; Mat. 15:24) Ibeʼe wamangelama Yesu wa lö ara tö mutimbagö soi ndraono Gizaraʼeli ba tedudugö Yeruzalema. (Mat. 23:37, 38; 24:1, 2; Luk. 21:20-24) Hizaʼi, halöwönia si oföna sibai yaʼia daʼö manuriaigö turia somuso dödö.​—Luk. 4:17-21.

²⁰ Me so Yesu ba gulidanö, imane khö ndra nifahaʼönia, ”Böi miförö.” (Mat. 24:42) Laʼoʼö niwaʼönia ba tobali ira sanaro. Labeʼe wamangelama wa no itimbagö ndraono Gizaraʼeli ba waʼaniha Yehowa hegöi Yeruzalema si so ba gulidanö. (Rom. 9:6-8; Gal. 4:25, 26) Simane ira sanaro me föna, lafaʼema göi duria somuso dödö. Duma-dumania, lafatunö wa tola tobali Izaraʼeli khö Lowalangi iadaʼa niha si tenga Yahudi ba laʼokhögö döi si sökhi falulu fohalöwö ira khö Keriso ba wamohouni famosumange satulö ba gulidanö.​—Hal. 15:14; Gal. 6:15, 16; Fam. 5:9, 10.

21. Hana wa tobali duma-duma si sökhi Waulo?

²¹ Samösa Waulo zi no irai tobali sanaro me abad siföföna, ba tobali ia duma-duma si sökhi. Iʼonorogö tödö halöwö nibeʼe khönia. Simane Hezekieli, aboto ba dödö Waulo wa tobali foʼömönia ndro niha na lö iʼodödögö wamalua halöwönia. (Hal. 20:26, 27) Simane ira sanaro ba zilalö, tenga ha famangelama nibeʼe Waulo, hizaʼi ifaʼema göi duria somuso dödö. (Hal. 15:35; Rom. 1:1-4) Tebeʼe khönia geheha niʼamoniʼö ba wanötöi famaʼeleʼö Yesaya: ”Hawaʼasökhi gahe niha sanuriaigö turia  somuso dödö!” Imane Faulo wa hasambalö alua daʼö ba ginötö laturiaigö Wamatörö Lowalangi ira nifahaʼö Keriso.​—Yes. 52:7, 8; Rom. 10:13-15.

22. Hadia zalua me no aefa mate ndra sinenge?

²² Me no aefa mate ndra sinenge, monönö wondröi sindruhu ba mbanua niha Keriso simane si no mufaʼeleʼö. (Hal. 20:29, 30; 2 Te. 2:3-8) Itugu numalö ginötö, itugu monönö niha Keriso faya si no amaedola goʼo moroi ba niha Keriso sindruhu si hulö gandru. Tebalu duria Wamatörö Lowalangi börö wamahaʼö faya. (Mat. 13:36-43) Hizaʼi, me arakhagö irugi inötö khö Yehowa, faʼomasi hegöi faʼatulönia zamarou yaʼia ba wanuyu ira sanaro mangawuli. Lahaogö wamaʼema famangelama ba laturiaigö duria somuso dödö. Haniha manö ndra sanaro andrö?

23. Hadia halöwö nifalua C. T. Russell hegöi ira awönia?

²³ Me no arakhagö irugi 1914, Charles Taze Russell hegöi ira awönia tobali ira tenge-tenge ba ”wangehenaigö lala”, fatua lö tefasindro Wamatörö Mesia. * (Mal. 3:1) Tobali göi ira sanaro. Ba majalah ”Manuriaigö Ziona hegöi Angombakhata ba Waʼatohare Keriso” (Zionʼs Watch Tower and Herald of Christʼs Presence), lafaʼema wamangelama sanandrösa ba wanguhuku  nifalua Lowalangi hegöi ba wanuriaigö turia somuso dödö ba Wamatörönia.

24. (a) Hewisa ndra sawuyu si lö faröi tobali ira sanaro? (b) Hadia wamahaʼö si tola öhalö moroi khö ndra sanaro ba götö föna? (Faigi kotak ”Ira Sanaro si Tobali Duma-Duma”.)

²⁴ Me no mosindro Wamatörö andrö, ifataro ngawawa niha si lö atoto Yesu, tobali sawuyu si lö faröi. (Mat. 24:45-47) Iʼotarai daʼö, sawuyu si lö faröi zi tobali sanaro, tefotöi ira iadaʼa Boto Solohe. Tenga ha laʼiagö tanö föna ba wamaʼema ”baŵa wolau balö”, hizaʼi laturiaigö göi ’ndröfi waʼasökhi dödö Yehowa’.​—Yes. 61:2; faigi göi 2 Korindro 6:1, 2.

25, 26. (a) Hadia halöwö si lö tola löʼö lafalua ira soloʼö khö Keriso, ba hewisa wamaluara daʼö? (b) Hadia nifatunöda ba faza aefa daʼa?

²⁵ Sindruhu wa laʼonorogö tödö halöwöra ira sawuyu si lö faröi tobali sanaro. Hewaʼae simanö, no ibeʼe Yesu ”fefu” halöwö khö ndra soloʼö khönia ’faböi mörö ira’. (Mrk. 13:33-37) No tatuhini zanaro yaʼita iadaʼa na lö tebulö taʼameʼegö tödö zoguna ba wamatida. Oroma wa taʼameʼegö tödö wamatida iadaʼa na tafalua halöwö fanuriaigö. (2 Ti. 4:2) Sambua dane-dane wa möi ita manuriaigö yaʼia daʼö enaʼö teʼorifi fefu niha. (1 Ti. 4:16) Aboto ba dödöda wa lö ara tö ato niha si mate börö me lö laʼameʼegö tödö wamangelama moroi khö ndra sanaro yaʼita iadaʼa. (Hez. 3:19) Hizaʼi, dane-dane si oföna wa tafalua daʼa yaʼia daʼö ba wanuriaigö turia fondrege zi sökhi, tebohouni wamosumange satulö! Iadaʼa, sagötö alua ’ndröfi waʼasökhi dödö Yehowa’ tebeʼe ginötö ba niha sato enaʼö fao ira ba wamosumange Yehowa, Lowalangida sebua faʼomasi ba safönu faʼatulö. Ba zi lö ara tö, dozi niha si teʼorifi moroi ba gulidanö si lö sökhi andre, larasoi wamatörö Keriso Yesu, Ono Lowalangi safönu faʼahakhö dödö. Tatu lö omasi ita na lö tatuhini ndra sanaro ba götöda iadaʼa ba wanuriaigö turia somuso dödö andrö!​—Mat. 24:14.

²⁶ Sindruhunia, no iʼosambuaʼö nono mbanuania Yehowa fatua lö tehori gulidanö daʼa. Sindruhu-ndruhu wa tandra sahöli-höli dödö daʼa! Mufatunö nasa dania ba faza aefa daʼa sanandrösa ba wahasara dödö andrö ba zi sambua famaʼeleʼö sanandrösa ba ziʼo si dua rozi.