1, 2. (a) Ba faza 13, hadia wamahaʼö nihalöda moroi ba gangilata Hezekieli sanandrösa ba gosali? (b) Hadia zi dombua fanofu nifatunöda ba faza daʼa?

NO ABOTO ba dödöda wa osali niʼila Hezekieli tenga osali wamati nitutunö zinenge sotöi Faulo ba zi hauga abad aefa daʼö. Taʼila göi wa mubeʼe gangilata daʼa enaʼö aboto ba dödö nono mbanua Lowalangi wa moguna sibai fefu goi-goi Yehowa ba wamalua famosumange satulö. Na laʼoʼö goi-goi daʼö, awena tola ifuli fahuwu ira khönia. Tola taʼila daʼö me imane Yehowa, ”Daʼa goroisa sanandrösa ba gosali,” aefa daʼö ifuli itandrösaigö wangumaʼö, ”Daʼö goroisa sanandrösa ba gosali.”​—Baso Hezekieli 43:12.

² Iadaʼa, so dombua wanofu sinangea tatutunö. Si oföna: Ba gangilata sanandrösa ba gosali, hadia wamahaʼö nihalö niha niʼoloiʼö ba götö Hezekieli ba goi-goi nibeʼe Yehowa ba wamosumange satulö? Fanema linia zanolo yaʼita ba wameʼe fanema li ba wanofu si dua, yaʼia daʼö hadia wamahaʼönia khöda ba ngaluo safuria andre safönu faʼalösökhi?

3. Hadia mbörö wa möi fangaila niha gosali si so ba hili salawa andrö?

³ Ba wameʼe fanema linia, nehegö hadia manö zadöni dödöda ba gosali si so ba gangilata Hezekieli. Si oföna, hili salawa. Te itörö tödö ndraono Gizaraʼeli wamaʼeleʼö Yesaya si möi fondrara dödö sanandrösa ba wamohouni. (Yes. 2:2) Hadia wamahaʼö nihalöra moroi ba naha gosali Yehowa si so ba hili salawa andrö? Lafahaʼö ira wa lö tola löʼö muʼalawaʼö mazui muʼofönaiʼö wamosumange satulö. Sindruhunia, no alawa wamosumange satulö, börö me Yehowa zamazökhi yaʼia, Lowalangi ’sabölö alawa moroi ba lowalangi tanö böʼö’. (Si. 97:9) Hizaʼi, lö lafalua iraono Gizaraʼeli hadia niʼandrö khöra. Ba zi hauga ribu fakhe, lö laböhöli ba wangoʼaya, ba wondröi hegöi ba wotaʼunöisi famosumange satulö. Ba ginötö teʼalawaʼö mazui tefolakhömi gosali Lowalangi niʼamoniʼö simane sinangeania, hasambalö aila niha sangomasiʼö sindruhu.

4, 5. Moroi ba mbawa göli salawa ba gosali, hadia zi tobali famahaʼö ba niha samondrondrongo Hezekieli?

⁴ Bawa göli salawa. Ba wamobörö gangilata daʼö, iʼila Hezekieli samösa malaʼika sanuʼa bawa göli gosali. Faʼalawania mato 30 meter! (Hez. 40:14) So naha zanaro ba lala weʼamöi bakha. Na so nono mbanua Lowalangi samahaʼö yaʼira ba gambara gosali andre, hadia mbuania khöra? Imane Yehowa khö Hezekieli, ”Haogö wanöngöni lala weʼamöi bakha ba gosali.” Hadia mbörö? Börö me no laʼohe bakha ba gosali niʼamoniʼö niha ”si lö sökhi [si lö nisuna tödö] ba si lö nisuna [boto]”. Andrö wa imane Yehowa, ”No mitaʼunöisi gosaligu.”​—Hez. 44:5, 7.

⁵ Niha ”si lö nisuna [boto]” no laʼosiwawöi goroisa Lowalangi, hewaʼae no aboto ba dödöra daʼö ba no so ia iʼotarai ba götö Gaberahamo. (1 Mo. 17:9, 10; 3 Mo. 12:1-3) Hizaʼi, abölö afaito nasa niha ”si lö sökhi [si lö nisuna tödö]”. Abeʼe högöra ba lö laʼoʼö wanuturu lala hegöi mene-mene nibeʼe Yehowa. Tenga sinangea möi ira ba gosalinia niʼamoniʼö! Fatuwu Yehowa wamodombua tödö, hizaʼi latehegö iraono mbanuania na möi niha samodombua tödö ba nomonia. Tobali, bawa göli hegöi naha zanaro ba gosali andrö, daʼö zangoromaʼö wa lö saʼae mutehegö na so zanawö huku ba gosali! Lö tola löʼö muʼoʼö gamakhoita salawa si no mufakhoi ba niha somasi möi ba nomo Lowalangi. Na no lafalua daʼö, awena ifahowuʼö wamosumange nifalua nono mbanuania.

6, 7. (a) Hewisa Yehowa wangogunaʼönia towa hegöi ewali sebolo ba zi fasui osali ba wamahaʼö ono mbanuania? (b) Hadia nifalua nono mbanua Yehowa ba gosali me mböröta? (Faigi nisura ba gahe zura.)

⁶ Towa ba zi fasui osali. Sindruhu-ndruhu no sahöli-höli dödö dowa andre. Moloʼö Hezekieli, faʼanaunia 500 sukhu fanuʼa mazui arakhagö 1,6 kilometer! (Hez. 42:15-20) Hizaʼi, osali hegöi olayamania, laʼoʼöfa sagi wamazökhi, ba faʼanau zingania ero tambai 259 meter mazui 500 siʼu. (Hez. 45:2) Börö  daʼö, so sambua naha sebolo ba zinga gosali ba no mufasui ia towa. * Hana wa tola simane daʼö?

⁷ Imane Yehowa, ”Na laböhöli gamuatara andrö ba laʼaröuʼö waniboʼö amatela razora, hasambalö toröi ndraʼo ba gotaluara sagötö faʼara.” (Hez. 43:9, nisura ba gahe zura.) ”Amatela razora” te manandrösa ia ba wamosumange adu. Sindruhunia, iʼogunaʼö naha sebolo si so ba gosali andrö Yehowa ba wamatunö ba nono mbanuania, ”Böi mihatöʼö ba gosaligu fefu niʼogorofi andrö.” Na lö raʼiö wamosumange nifalua nono mbanuania, so Yehowa ba nahia daʼö ba wamahowuʼö yaʼira.

8, 9. Hadia wamahaʼönia ba nono mbanua Yehowa me göna fotu sabölö-bölö ndra matua si no mubeʼe noro dödö?

⁸ Tegu-tegu sabeʼe khö ndra matua sangai halöwö ba gotalua nono mbanua Lowalangi. Ibeʼe khöra degu-degu sabeʼe Yehowa, hizaʼi ifalua daʼö safönu faʼomasi. Lö ibiniʼö woʼamenesi niha Lewi sangerogö yaʼia me lafosumange nadu iraono mbanuania. Hizaʼi, isuno ngaʼötö Zadoki, ”sangai halöwö ba naha niʼamoniʼö [khönia]” börö me lö tebulö lafalua halöwöra. Ihakhösi tödö zi dombua ngawawa andre ba ifalua khöra zi sökhi, moloʼö si no lafalua. (Hez. 44:10, 12-16) Baero niha Lewi, göna göi degu-degu sabeʼe ndra sondröniaʼö iraono Gizaraʼeli.​—Hez. 45:9.

⁹ Iforomaʼö Yehowa wa ira matua sangai halöwö hegöi ira sondröniaʼö, lö tola löʼö labuʼa föna Lowalangi lala wamaluara halöwö andrö. Moguna nasa khöra mene-mene, tegu-tegu hegöi fotu. Yaʼira zi tobali duma-duma ba woloʼö goi-goi Yehowa!

10, 11. Hadia manö dandra wa no lafalua zi tobali famahaʼö moroi ba gangilata Hezekieli andrö ira niha niʼoloiʼö si no mangawuli?

¹⁰ Hadia laʼaurifagö wamahaʼö nihalöra moroi ba gangilata Hezekieli sahöli-höli dödö andre ira niha niʼoloiʼö sangawuli ba mbanuara? Sindruhu sa wa lö taʼila sibai hewisa wanemaʼöra gangilata daʼa. Hizaʼi, ifatunö khöda Taromali Lowalangi hadia manö nifaluara ba hewisa wamaigira famosumange satulö andrö khö Yehowa. Hadia laʼoʼö goi-goi si so ba gangilata Hezekieli? Laʼoʼö, mendrua manö na tafaehusi nifaluara ba zi no lafalua ira tuara somasi mamadaö fatua lö teʼoloiʼö ira ba Mbabilona.

¹¹ Me no mangawuli niha niʼoloiʼö, so ndra matua samati, duma-dumania Hagaʼi samaʼeleʼö, Zakharia samaʼeleʼö, sanura hegöi ere sotöi Esera simanö göi Gubernur Nehemia. Laforege wamahaʼö niha ba goi-goi si fakhili-khili ba gangilata Hezekieli. (Esr. 5:1, 2) Lafahaʼö nono mbanua Lowalangi wa moguna teʼalawaʼö wamosumange satulö, ba abölö muʼofönaiʼö ia moroi ba wolohi faʼakayo mazui soguna khöra samösa. (Hag. 1:3, 4) Laʼabakhaiʼö göi wanutunö wa moguna laʼoʼö fefu goi-goi  wamosumange satulö. Duma-dumania, abeʼe li Gesera hegöi Nehemia ba wangombakha khöra enaʼö lafofanö woʼomora niha baero si möi fowuwu wamatira. (Baso Esera 10:10, 11; Neh. 13:23-27, 30) Hewisa göi sanandrösa ba wanömba adu? Me no teʼefaʼö ira, te fatuwu saʼae ira ba horö andrö si no hauga kali mamaʼala faʼaurira. Hewisa ndra ere hegöi sondröniaʼö? Simane soroma ba gangilata Hezekieli, itegu ba iʼamenesi ira Yehowa. (Neh. 13:22, 28) Ato niha soloʼö mene-mene daʼö si fao fangide-ngideʼö.​—Esr. 10:7-9, 12-14; Neh. 9:1-3, 38.

12. Hewisa Yehowa wamahowuʼö niha niʼoloiʼö si no mangawuli?

¹² Buania, ifahowuʼö nono mbanuania Yehowa. Laʼokhögö wahuwusa si sökhi khö Yehowa, lö mofökhö ira ba lasöndra waʼahono dödö si no ara taya. (Esr. 6:19-22; Neh. 8:9-12; 12:27-30, 43) Alua daʼö börö me laʼoʼö goi-goi salawa moroi khö Yehowa ba wamosumange satulö. Ato niha satulö tödö, tefarou ira börö wamahaʼö moroi ba gangilata Hezekieli sanandrösa ba gosali. Si löʼö-löʼönia, so dombua gunania ba niha niʼoloiʼö moroi ba gangilata daʼa. (1) Lafahaʼö ira lala ba woloʼö goi-goi ba wamosumange satulö. (2) Teʼaroʼö dödöra wa hasambalö mubohouni wamosumange satulö, ba ifahowuʼö ira Yehowa na lafalua daʼö. Hizaʼi, omasi ita göi taʼila, hadia alua nasa wamaʼeleʼö andrö ba götöda iadaʼa.

13, 14. (a) Hezo taʼila wa so gamakhaitania khöda iadaʼa gangilata Hezekieli sanandrösa ba gosali? (b) Hadia zi dombua famahaʼö niʼilada moroi ba gangilata daʼa? (Faigi göi kotak 13A, ”Dombua Gosali si Faböʼö Eluaha”.)

¹³ Hadia tola tafaduhusi tödö wa so gamakhaita gangilata Hezekieli andre ba götöda iadaʼa? Tola! Törö tödöu wa osali niʼamoniʼö niʼila Hezekieli so ia ba ”hili fondrege zalawa”, ba no ifaʼeleʼö Yesaya wa ”aro hili nahia nomo Yehowa ba tefasindro ia ba zuzu hili fondrege zalawa”. Ifatunö Yesaya wa alua dania wamaʼeleʼö daʼa ”ba ngaluo safuria” mazui ”ba gafuriata götö daʼö”. (Hez. 40:2; Yes. 2:2-4; nis.; faigi göi Mikha 4:1-4.) Alua wamaʼeleʼö daʼö ba ngaluo safuria iʼotarai 1919 me teʼalawaʼö ba tebohouni wamosumange satulö, hulö zi so ba dete hili fondrege zalawa. *

¹⁴ Ba daʼa oroma wa angilata Hezekieli moʼamakhaita ia ba wamosumange satulö nifalua ba götöda. Simane niha Yahudi niʼoloiʼö, so dombua gunania khöda gangilata daʼa. (1) Tafahaʼö ita lala ba woloʼö goi-goi Yehowa ba wamosumange satulö. (2) Teʼaroʼö dödöda wa hasambalö tebohouni wamosumange satulö, ba ifahowuʼö ita Yehowa.

15. Hadia zinangea itörö tödöda ba ginötö tafahaʼö ita ba gosali niʼila Hezekieli?

¹⁵ Datatutunö ösa zi so ba gangilata daʼö. Khalaigö fao ita khö Hezekieli ba wamasui osali sebua andrö. Törö tödöu wa tenga osali wamati solakhömi daʼö. Ohitö dödöda enaʼö taʼila hadia wamahaʼö si tola tahalö ba wamalua famosumange satulö iadaʼa. Hadia manö wamahaʼönia khöda?

16. Hadia manö wamahaʼönia khöda zuʼa-suʼa ba gangilata Hezekieli? (Faigi gambara ba wamobörö wamahaʼö.)

¹⁶ Hana wa oi musuʼa fefu? Ihaogö inehe-nehegö Hezekieli malaʼika si takile si hulö tembaga andrö me isuʼa dowa, bawa göli, naha zanaro, olayama hegöi naha wanunu sumange ba gosali. Te lö aboto ba dödöda fefu zuʼa-suʼa nitötöi andrö hewaʼae no muhaogö muzara-zara. (Hez. 40:1–42:20; 43:13, 14) Hizaʼi, angeragö hadia wamahaʼö sabölö moguna. Wa ihaogö wozara-zara wanutunö daʼö Yehowa enaʼö laʼila wa moguna sibai goi-goinia andrö. Yaʼia zotatugöi, tenga niha. Faböʼö moroi ba niwaʼö niha sato, lö fefu lala wamosumange ahori itema Lowalangi. Me no musuʼa gosali andrö, ifaduhuʼö Yehowa wa hasambalö tebohouni wamosumange satulö. No itatugöi wa ifalua mbuʼusa linia Lowalangi simane me itatugöi wanuʼa osali. Börö daʼö, teʼaroʼö waʼafaduhu dödöda ba gangilata Hezekieli wa hasambalö tebohouni wamosumange satulö ba ngaluo safuria andre!

17. Hadia zi tobali famasugi ba dödö khöda iadaʼa moroi ba dowa samasui osali?

¹⁷ Towa ba zi fasui osali. Simane si no tatutunö, towa ba zi fasui osali daʼö zamasugi ba dödö nono mbanua Lowalangi wa tebai mutaʼunöisi nomo Lowalangi. Fefu zi raʼiö, moguna  muʼaröuʼö moroi ba wamosumange satulö. (Baso Hezekieli 43:7-9.) Tefaudu sibai wamasugi ba dödö andrö khöda iadaʼa! Me no teʼoloiʼö ira ba zi hauga abad, teʼefaʼö nono mbanua Lowalangi moroi ba Mbabilona Sebua ba ifataro ndra sawuyu si lö faröi ba satua-tua Keriso me 1919. Iʼotarai daʼö, laforege sibai iraono mbanua Lowalangi ba wangeheta ngawalö wamahaʼö agama sofaya hegöi si toʼölö mufalua soʼamakhaita ba wanömba adu hegöi lowalangi tanö böʼö. Moguna tatatugöi wa no tafandröndröu ngawalö zi raʼiö moroi ba wamosumange satulö. Andrö wa tebai mogale ita ba Balai Mbanua Lowalangi enaʼö teʼaröuʼö ngawalö zoʼamakhaita ba gulidanö andre ba wamosumangeda Lowalangi.​—Mrk. 11:15, 16.

18, 19. (a) Hadia wamahaʼönia khöda mbawa göli salawa ba gosali andrö? (b) Hewisa ita na so niha sangodödögö mangosiwawöi goi-goi Yehowa? Beʼe duma-duma.

¹⁸ Bawa göli salawa. Hadia wamahaʼö nihalöda na taʼangerönusi mbawa göli salawa si so ba gangilata Hezekieli? Me föna, ba gangilata daʼö aboto ba dödö niha Yahudi niʼoloiʼö wa alawa goi-goi Yehowa sanandrösa ba gamuata. Hewisa göi ita? Iadaʼa, tafosumange Yehowa ba gosali wamati solakhömi. Hadia tenga daʼö geluahania khöda iadaʼa enaʼö abölö tarorogö gamuatada si lö raʼiö ba lö famodombua tödö? (Rom. 12:9; 1 Fe. 1:14, 15) Ba ngaluo safuria andre, izara-zara Yehowa ba wameʼe fanuturu lala ba nono mbanuania enaʼö laʼoʼö goi-goinia sanandrösa ba gamuata. * Duma-dumania, laʼefasi ba mbanua niha Keriso dozi samalua horö ba si lö mamalalini era-era. (1 Ko. 5:11-13) Baero daʼö, so göi wamasugi ba dödö nitemada ba gangilata sanandrösa ba naha zanaro si so ba mbawa göli gosali, yaʼia daʼö na lö omuso dödö Yehowa ba zi samösa niha, tebai möi niha daʼö wamosumange Yehowa ba gosali wamati. Duma-dumania, te so niha samodombua tödö si möi ba Balai Mbanua Lowalangi. Hizaʼi, lö omuso dödö Yehowa khönia na lö ifalua niʼandrö Yehowa. (Yak. 4:8) Murorogö wamosumange khö Yehowa enaʼö lö raʼiö ba gulidanö si lö sökhi andre!

¹⁹ No iwaʼö Sura Niʼamoniʼö wa itugu lö sökhi zalua ba gulidanö andre börö me no ahatö waʼadudunia. ”Niha si lö sökhi ba si falimo, itugu monönö waʼalösökhi, lafaelungu niha böʼö ba nifaelungu göi ira.” (2 Ti. 3:13) Itugu ato niha nifaelungu irege lawaʼö tödöra wa fasala goi-goi salawa nibeʼe Yehowa, talafo abeʼe ba ha me föna moguna daʼö. Hadia tola göi elungu ndraʼugö? Duma-dumania, hewisa na so niha sangumaʼö khöu wa talafo abeʼe goi-goi Yehowa sanandrösa ba homoseks? Hadia fao dödöu ba zimane daʼö? Hadia fao dödöu ba niwaʼö Lowalangi Yehowa wa ’amuata si raʼiö’ daʼö? Ifangelama ita Lowalangi enaʼö tatimbagö gamuata wohorö. (Rom.  1:24-27, 32) Na alua khöda zimane daʼö, khalaigö gosali si so ba gangilata Hezekieli hegöi bawa gölinia salawa sibai. Törö tödöu wa lö irai iʼalösi goi-goinia satulö andrö Yehowa, gofu hadia niwaʼö gulidanö si lö sökhi andre. Hadia fao dödöda khö Namada si so ba zorugö ba taʼoʼawögö zindruhu andrö khönia?

20. Hadia wamahaʼö samarou tödö ”ngawawa sato” moroi ba golayama gosali ba gangilata Hezekieli?

²⁰ Olayama gosali. Me ifakhölö ia Hezekieli ba iʼila wa ebolo sibai golayama tanö baero gosali andrö, hawaʼomuso dödönia me ikhalaigö ato zi tola owulo ba daʼö ba wamosumange Yehowa. Iadaʼa, lafosumange Lowalangi ira niha Keriso ba gosali sabölö teʼamoniʼö. So ”ngawawa sato sibai” samosumange Yehowa ba golayama tanö baero ba gosali wamati khönia ba lasöndra wamahaʼö si möi famarou dödö moroi ba gangilata Hezekieli andre. (Fam. 7:9, 10, 14, 15) Hadia wamahaʼönia khöda? Iʼila Hezekieli naha wemanga ba golayama tanö baero, nahia niha sato ba wemanga sumange fangatulö niʼohera. (Hez. 40:17) Hulö zi falulu manga ira khö Lowalangi Yehowa. Daʼa zangoromaʼö wa fahuwu ira khönia! Iadaʼa, lö saʼae tabeʼe zumange simane nifalua niha Yahudi samalua Oroisa Moze. Hizaʼi, tabeʼe ”zumange fanuno” ba wamalua famosumange satulö. Duma-dumania, yaʼia na tabeʼe mbua gera-era mazui tafaduhuʼö wamatida ba gangowuloa simanö göi na möi  ita manuriaigö. (Heb. 13:15) Teʼabusoiʼö göi ita ba gö wamati si no ihenaigö Yehowa. Tobali, fagölö waʼomuso dödöda simane nirasoi ngaʼötö Gora sanunö khö Yehowa, ”Sökhi zi ha maʼö-maʼökhö ba golayama nomomö moroi ba zi saribu hari ba nahia böʼö!”​—Si. 84:10.

21. Hadia wamahaʼö nihalö niha nibayoini moroi khö ndra ere ba gangilata Hezekieli?

²¹ Ira ere. Iʼila Hezekieli na möi ndra ere hegöi niha Lewi ba golayama tanö bakha, hasambalö latörö mbawa göli si fagölö ba mbawa göli golayama tanö baero nitörö niha sato moroi ba mado tanö böʼö. Tobali famasugi ba dödö si sökhi daʼa khö ndra ere, wa lö tola löʼö laʼoʼö goi-goi Yehowa sanandrösa ba wamosumange satulö. Hewisa göi iadaʼa? Sindruhu sa, lö hadöi amakhoita wa ngaʼötö Lewi zi tobali ere ba gotalua nono mbanua Lowalangi. Hizaʼi, no muwaʼö khö ndra niha Keriso nibayoini, ”Yaʼami ’mado nituyu, ere si tobali razo’.” (1 Fe. 2:9) Ba götö ndraono Gizaraʼeli me mböröta, lafosumange Lowalangi ira ere ba golayama tanö böʼö, na iadaʼa lafosumange Lowalangi ira niha nibayoini hegöi si sara lala wamati khöra ba nahia si fagölö. Hizaʼi, so wahuwusa si tohude niʼokhögö niha nibayoini khö Yehowa börö me ihalö ira tobali ononia. (Gal. 4:4-6) Hewaʼae simanö, latema wamasugi ba dödö moroi ba gangilata Hezekieli. Duma-dumania, laʼila wa moguna khöra mene-mene hegöi fotu simane ira ere me mböröta. Fefu ita nifotöi niha Keriso, böi taʼolifugö wa yaʼita andre ”ha sambawa nikubaloi ba ha samösa gubalo”.​—Baso Yohane 10:16.

22, 23. (a) Hadia wamahaʼö khö ndra satua sokubaloi moroi khö ndra sondröniaʼö ba gangilata Hezekieli? (b) Hadia manö zi tola alua ba zi so miföna?

²² Ira sondröniaʼö. Sondröniaʼö si so ba gangilata Hezekieli yaʼia daʼö niha si tehöngö. Börö me tenga ngaʼötö gere ia, moguna iʼoʼö wanuturu lala moroi khö ndra ere. Hizaʼi, tobali ia sondröniaʼö ba gotalua nono mbanua Lowalangi sanolo yaʼira ba wangehenaigö sumange. (Hez. 44:2, 3; 45:16, 17; 46:2) Tobali ia duma-duma khö ndra matua sangai halöwö ba mbanua niha Keriso iadaʼa. Fefu ndra satua sokubaloi hegöi satua samasui, moguna laʼoʼö wanuturu lala nibeʼe ndra sawuyu si lö faröi si no tebayoini. (Heb. 13:17) Laforege ira satua sokubaloi ba wanolo ono mbanua Lowalangi ba wameʼe sumange fanuno ba gangowuloa hegöi ba wanuriaigö. (Ef. 4:11, 12) Lafahaʼö ira göi wa no ibeʼe degu-degu Yehowa khö ndra sondröniaʼö iraono Gizaraʼeli börö me fasala ira wangogunaʼö halöwö si no tebeʼe khöra. (Hez. 45:9) Daʼö zameʼe faʼaboto ba dödö khö ndra satua sokubaloi wa moguna khöra mene-mene hegöi fotu. Omuso sibai dödöra ero ibeʼe khöra ginötö Yehowa ba wangaʼazökhi yaʼira, börö me daʼö zanolo yaʼira enaʼö tobali kubalo hegöi sondröniaʼö si sökhi.​—Baso 1 Fetero 5:1-3.

 ²³ Na no tobali Faradaiso dania gulidanö andre, lö aetu ihenaigö Yehowa ndra sondröniaʼö sonekhe ba safönu faʼomasi. Ato ndra satua sokubaloi iadaʼa sanema famahaʼö enaʼö tobali ira dania kubalo si sökhi ba Waradaiso. (Si. 45:16) Hadia lö teʼaroʼö wamatida na takhalaigö hewisa dania na tobali ira howu-howu ba gulidanö si bohou? Te awena aboto ba dödöda fefu geluaha gangilata Hezekieli na no irugi inötö si no itatugöi Yehowa simane famaʼeleʼö tanö böʼö sanandrösa ba wamohouni. Te so ösa nösi wamaʼeleʼö si tobali famahaʼö tanö böʼö mazui salua ba zi so miföna si tebai takhalaigö iadaʼa. Tabaloi ginötö waʼaluania dania.

24, 25. Ba gangilata Hezekieli, hadia manö howu-howu Yehowa si no tefaʼeleʼö ba nono mbanuania samalua famosumange satulö?

²⁴ Si tobali rahu-rahu, törö tödöu sambua zalua sahöli-höli dödö si so ba gangilata Hezekieli. Möi Yehowa bakha ba gosali andrö, ba fawuʼu li ia wa lö tebulö so ia ba daʼö, asala lö faröi nono mbanuania ba woloʼö goi-goi wamosumange satulö. (Hez. 43:4-9) Hadia lua-luania weʼaso Yehowa ba nono mbanuania hegöi ba soira?

²⁵ Ba gangilata daʼa, so dombua gambara soʼamaedolagö howu-howu Lowalangi. (1) So sara nungo nidanö sangele ba naha niʼamoniʼö ba gosali, solohe faʼauri ba fangatabö zinanö ba soi daʼö. (2) No muhaogö wombagi soi daʼö moloʼö suʼa-suʼa si no tehonogöi, bakha ba gotaluania so gosali hegöi si fasuinia. Hadia geluahania khöda iadaʼa? Hadia tenga no ibohouni Yehowa gosali wamati solakhömi khönia yaʼia daʼö amakhoita sabölö teʼamoniʼö ba wamosumange Lowalangi? Hadia omuso dödöda ba gamakhoita daʼö? (Mal. 3:1-4) Tafatunö dania zi dombua ngawalö andrö ba Faza  19 irugi 21.