FAZA 5
”Faigi Ngawalö zi Lö Sökhi hegöi si Raʼiö Nifaluara”
TUHO: Fondröi sindruhu ba faʼalösökhi gamuata niha Yehuda
1-3. Hadia zomasi Yehowa iforomaʼö khö Hezekieli ba gosali Yeruzalema, ba hadia mbörö? (Faigi gambara hegöi nisura ba Faosatö 2.)
BÖRÖ me ono gere ia, tatu manö aboto ba dödö Hezekieli samaʼeleʼö sanandrösa ba Goroisa Moze. Ahori iʼila sanandrösa ba gosali Yeruzalema hegöi famosumange satulö khö Yehowa sinangea mufalua ba daʼö. (Hez. 1:3; Mal. 2:7) Hizaʼi, tatu ahöli-höli dödö niha Yahudi si lö faröi hegöi Hezekieli börö me laʼila zalua ba gosali Yehowa me 612 SM.
2 Omasi Yehowa wangoromaʼö khö Hezekieli waʼalösökhi salua ba gosali enaʼö tola idunö-dunö Hezekieli khö ”ndra sondröniaʼö Yehuda”, yaʼia daʼö awönia niʼoloiʼö si no owulo ba nomonia. (Baso Hezekieli 8:1-4; Hez. 11:24, 25; 20:1-3) Si fao eheha niʼamoniʼö, ibeʼe gangilata Yehowa khö Hezekieli. Ba gangilata daʼö, teʼohe ia moroi ba nomonia ba Deli-abibi, sahatö ba Nungo Nidanö Khebara ba Mbabilona numalö ba gosali Yeruzalema, faʼaröunia ngaotu kilometer tanö ba gaekhula. Iʼohe zamaʼeleʼö andre Yehowa ba golayama tanö bakha sahatö ba mbawa göli tanö yöu. Moroi ba daʼö, ibörögö iforomaʼö hadia manö zalua ba gosali andrö maʼafefu.
3 So öfa ngawalö zalua niʼila Hezekieli sangoromaʼö wa no sindruhu-ndruhu tetaʼunöisi wamosumange soi daʼö. Sataʼu niha zalua andre. Hadia zalua ba wamosumange satulö? Ba hadia wamahaʼönia khöda moroi ba gangilata daʼö? Tafao khö Hezekieli ba wamaigi si öfa ngawalö andrö. Hizaʼi, si oföna aboto ba dödöda hadia niʼandrö Yehowa ba niha samosumange yaʼia.
”Yaʼo . . . Zangumaʼö Khömi Enaʼö Ha Khögu Mangalulu Ami”
4. Hadia niʼandrö Yehowa ba niha samosumange yaʼia?
4 Mato 900 fakhe fatua lö si tumbu Hezekieli, no ihaogö ifatunö Yehowa ba nono mbanuania hadia niʼandrönia. Ba goroisa si dua ba zi Fulu Oroisa, imane Yehowa ba ndraono Gizaraʼeli, * ”Yaʼo Lowalangimi Yehowa zangumaʼö khömi enaʼö ha khögu mangalulu ami.” (2 Mo. 20:5) Ngawua wehede ”ha khögu mangalulu ami” zangoromaʼö wa lö omasi Yehowa na mangalulu ira khö lowalangi böʼö. Simane nitutunöda ba Faza 2, dane-dane si oföna ba wamalua famosumange satulö yaʼia daʼö enaʼö ha khö Yehowa mufanandrösa wamosumange. Daʼö zi oföna lafalua ba waʼaurira. (2 Mo. 20:3) Omasi Yehowa enaʼö lö raʼiö nono mbanuania ba wamati ba lö lafaruka wamosumange satulö ba wamahaʼö faya. Me 1513 SM, no tefaböbö ndraono Gizaraʼeli ba Goroisa Moze khö Yehowa. No fao dödöra wa ha khö Yehowa mangalulu ira. (2 Mo. 24:3-8) Lö faröi Yehowa ba mbuʼusa linia, ba idöna-döna göi enaʼö simane daʼö nono mbanuania.—5 Mo. 7:9, 10; 2 Sa. 22:26.
5, 6. Hana wa ha Yehowa zinangea lafosumange iraono Gizaraʼeli?
5 Hadia sinangea na iʼandrö daʼö Yehowa ba ndraono Gizaraʼeli enaʼö ha yaʼia nifosumangera? Tatu manö! Yehowa andrö Lowalangi Fondrege Zabölö, Samatörö Banua si Yawa awö Danö hegöi Umbu ba Sotuhini faʼauri. (Si. 36:9; Hal. 17:28) Yaʼia göi Zangefaʼö iraono Gizaraʼeli. Ba ginötö ibeʼe khöra zi Fulu Oroisa, ifasugi ba dödöra, ”Yaʼo Yehowa Lowalangimi, si no mangeheta yaʼami ba danö Miserai, nahia wangosawuyu yaʼami.” (2 Mo. 20:2) Sindruhu sa, ha Yehowa zinangea lafosumange iraono Gizaraʼeli.
6 Lö irai tebulö Yehowa. (Mal. 3:6) Iʼandrö nasa ba nono mbanuania enaʼö ha yaʼia nifosumange. Andrö, khalaigö atö dödö Yehowa ba zi öfa ngawalö salua andrö niʼoromaʼönia khö Hezekieli.
Salua si Oföna: Adu Sangöndru Fönu Lowalangi
7. (a) Hadia nifalua niha Yahudi si no mondröi sindruhu ba mbawa göli tanö yöu gosali ba hadia nifalua Yehowa? (Faigi gambara ba wamobörö wamahaʼö.) (b) Hana wa sinangea na mofönu Yehowa? (Faigi nisura ba gahe zura 2.)
7 Baso Hezekieli 8:5, 6. Tatu ahöli-höli sibai dödö Hezekieli. Ba mbawa göli tanö yöu gosali, lafosumange nadu ira niha Yahudi si no mondröi sindruhu. Adu daʼö te eluahania döla-döla niʼamoniʼö si no amaedola Dewi Asera, nifosumange niha Ganaʼana ba lawalinga foʼomo Mbaʼali ira alawe daʼö. No lasawö mbuʼusa lira iraono Gizaraʼeli khö Yehowa börö me no lafosumange nadu. Mangalulu ira ba nadu, sindruhunia sa, ha Yehowa zi tola ba sinangea lafosumange. Lö ahöli dödöda na mofönu khöra Yehowa. * (5 Mo. 32:16; Hez. 5:13) Khalaigö atö, no 400 fakhe gosali niʼamoniʼö andrö tobali omo Yehowa. (1 Ra. 8:10-13) Hizaʼi iadaʼa, börö me laʼohe nadu bakha ba gosali, daʼö mbörö ’waʼaröu Yehowa moroi ba naha niʼamoniʼö khönia’.
8. Hadia gamakhaitania gangilata Hezekieli sanandrösa ba nadu ba götöda iadaʼa?
8 Hadia so gamakhaitania khöda iadaʼa gangilata Hezekieli sanandrösa ba nadu irege mofönu Yehowa? Yehuda si no mondröi sindruhu andre zamasugi ba dödöda sanandrösa ba gereja-gereja si no mangotöigö niha Keriso. Hewaʼae lafaduhuʼö wa yaʼira andrö samosumange Lowalangi, hizaʼi zaya-zaya gölö fefu daʼö börö me lafosumange nadu. Faduhu göi dödöda wa hasambalö mofönu khöra Yehowa börö me lö labulöʼö gamuatara. (Yak. 1:17) Tatu no aröu sibai Yehowa ba gereja simane daʼö!
9, 10. Hadia wamahaʼönia khöda gangilata sanandrösa ba wanömba adu ba gosali?
9 Hadia wamahaʼö khöda moroi ba gangilata sanandrösa ba wamosumange adu ba gosali andrö? Na omasi ita ’ha khö Yehowa mangalulu’, moguna ’taheta ita ba wanömba adu andrö’. (1 Ko. 10:14) Tola manö tamane tödöda, ’Lö niʼogunaʼögu nadu ba wamosumange Yehowa!’ Hizaʼi, tenga ha adu zi tefarahu ba wamosumange. So göi danö böʼö si lö taʼila. Moloʼö referensi Zura Niʼamoniʼö, na so zabölö tahöni-höni, sabölö tohude mazui sabölö taʼofönaiʼö ba waʼaurida moroi ba wamosumange Lowalangi, fagölö manö ira zamosumange adu. Gofu hadia niʼofönaiʼöda ba waʼauri andre si tola manimbagö famosumangeda khö Yehowa simane harato, kefe, fohorö mazui hiburan, mufotöi daʼö adu. (Mat. 6:19-21, 24; Ef. 5:5; Kol. 3:5) Moguna mangelama ita enaʼö lö tafalua wamosumange adu gofu hadia ia, börö me ha Yehowa zinangea manema famosumange ba tafalua ia soroi ba dödö!—1 Yo. 5:21.
10 Salua si oföna niforomaʼö Yehowa khö Hezekieli yaʼia daʼö ”ngawalö zi lö sökhi hegöi si raʼiö”. Hizaʼi, ifatunö Yehowa khö zamaʼeleʼönia si lö faröi andrö, ”So nasa dania zabölö raʼiö niʼilau baero daʼö.” Hadia nasa zabölö raʼiö moroi ba daʼö?
Salua si Dua: 70 Niha Zondröniaʼö Sameʼe Sumange Somuhua khö Lowalangi Böʼö
11. Hadia niʼila Hezekieli me no teʼohe ia ba golayama tanö bakha sahatö ba naha wanunu sumange ba gosali?
11 Baso Hezekieli 8:7-12. Moroi ba mbawa göli andrö, teʼohe Hezekieli ba golayama tanö bakha, ba naha wanunu sumange si so ba gosali. Itölaʼö sambua dowa, ba iʼila zahöli-höli dödö si no mufofoe ba dowa andrö yaʼia daʼö ’urifö sanana-nana, urifö si raʼiö, ba fefu nadu niʼogorofi andrö’. * Mufanandrösa fefu nifofoe andrö khö lowalangi böʼö. Hizaʼi, iʼila nasa zabölö raʼiö Hezekieli: So ”70 zondröniaʼö iraono Gizaraʼeli” sozizio ”ba zogömi-gömi” ba labeʼe zumange somuhua khö lowalangi böʼö. Moloʼö Oroisa Moze, hua zumange andrö mufoʼamaedola ia fangandrö sangomusoiʼö tödö Yehowa, nifaʼema nono mbanuania. (Si. 141:2) Hizaʼi, sumange somuhua nibeʼe khö lowalangi böʼö, no amaedola goboula khö Yehowa. Ogoro ia wangandrö ndra sondröniaʼö si 70 andrö. (Amd. 15:8) Lalimo samösa ira ba lamane, ”Lö iʼila ita Yehowa.” Sindruhunia sa, iʼila ira Yehowa ba ifaʼeleʼö khö Hezekieli hadia nifaluara ba gosalinia!
Iʼila Yehowa ngawalö zi lö sökhi nifalua ba ”zogömi-gömi” (Faigi ngenoli si 11)
12. Hadia mbörö wa tebai faröi ita hewaʼae ”ba zogömi-gömi”, ba haniha zinangeania tobali duma-duma?
12 Hadia wamahaʼö nihalöda ba nisura Hezekieli sanandrösa khö zi 70 sondröniaʼö iraono Gizaraʼeli sameʼe sumange somuhua khö lowalangi böʼö? Enaʼö ifondrondrongo wangandröda Lowalangi ba lö taʼunö zumange nibeʼeda khönia, moguna Amd. 15:29) Törö tödöu, wa hasambalö iʼila Yehowa gofu hadia ia nifaluada. Na faduhu dödöda wa sindruhu-ndruhu so Yehowa, lö tafalua gofu hadia ia zi lö mangomusoiʼö tödönia, hewaʼae ba zi ha yaʼita. (Heb. 4:13) Ira satua sokubaloi samahaʼö ba mimbar hegöi sondröniaʼö ba gangowuloa, yaʼira zi tobali duma-duma ba woloʼö goi-goi Zura Niʼamoniʼö. (1 Fe. 5:2, 3) Tatu manö latötöna ira talifusöda ba mbanua niha Keriso enaʼö laʼoʼö goi-goi Zura Niʼamoniʼö hewaʼae ba ”zogömi-gömi”, mazui ba ginötö lö sangila yaʼira.—Si. 101:2, 3.
lö faröi ita hewaʼae ba ”zogömi-gömi”. (Salua si Tölu: ’Ira Alawe Sangeʼesi Lowalangi Tamusi’
13. Ba gangilata Hezekieli, hadia nifalua ndra alawe sondröi sindruhu ba mbawa göli gosali?
13 Baso Hezekieli 8:13, 14. Me no iforomaʼö zi dua ngawalö si raʼiö andrö, imane zui Yehowa khö Hezekieli, ”So nasa dania zabölö raʼiö niʼilau baero daʼö.” Hadia niʼila Hezekieli aefa daʼö? Ba ”mbawandruhö si numalö bakha ba mbawa göli tanö yöu ba nomo Yehowa”, iʼila ”ndra alawe sodadao ba wangeʼesi lowalangi Tamusi”. Tamusi yaʼia daʼö lowalangi niha Mezofotamia, ba labaliʼö daʼö tuho dödö Istar, ratu fangatabö. * Fangeʼesi nifalua ndra alawe Gizaraʼeli tefarahu ba daʼö wamosumange, moʼamakhaita ia ba waʼamate Damusi. Lafalua daʼö ba nahia wamosumange satulö. Hewaʼae lafalua ia ba gosali Lowalangi, hasambalö raʼiö wamosumange nifaluara. Anuzu dödö Yehowa gamuata ndra alawe si no mondröi sindruhu andrö!
14. Hadia wamahaʼönia khöda moroi ba nifalua Yehowa börö gamuata ndra alawe andrö?
14 Hadia wamahaʼö nihalöda moroi ba nifalua Yehowa ba gamuata ndra alawe andrö? Enaʼö lö raʼiö wamosumangeda, tebai tafaruka ia ba zi toʼölö lafalua niha baero. Andrö, tebai farahu ita maʼifu manö ba gowasa nifalua agama niha baero. Hadia moguna muʼila hezo mbörötania? Tatu manö! Owasa si toʼölö lafalua simane Fanunu Fandru, Fasa (Easter), Tahun Baru hegöi ba wanörö tödö baŵa waʼatumbu, te lö salania daʼö ba wamaigida. Hizaʼi, moguna tatörö tödöda wa no irai iʼila Yehowa zi toʼölö lafalua niha baero si tobali famobörö gowasa nifalua iadaʼa. Hasambalö raʼiö daʼö khö Yehowa hewaʼae no ara lafalua ia mazui laʼodödögö wamaruka ba wamosumange satulö.—2 Ko. 6:17; Fam. 18:2, 4.
Salua si Öfa: 25 Ndra Matua ’Sangalulu ba Luo’
15, 16. Hadia nifalua ndra matua si 25 niha andrö ba golayama tanö bakha ba gosali, ba hana wa afökhö dödö Yehowa ba nifaluara?
15 Baso Hezekieli 8:15-18. Fatua lö iforomaʼö zalua safuria khö Hezekieli, imane Yehowa, ”So nasa dania zabölö raʼiö niʼilau baero daʼö.” Tola manö so ba wangera-ngera Hezekieli, ’Hadia nasa zabölö raʼiö moroi ba daʼa?’ Ba golayama tanö bakha, iʼila 25 ndra matua si so ba mbawandruhö gosali, no latuhi danö ba wangotahögö ’atumbukha, mangalulu ira ba luo’. Sindruhu-ndruhu wa lö sökhi gamuatara khö Yehowa! Hana wa muwaʼö zimane daʼö?
16 Khalaigö zalua andre. Bawandruhö weʼamöi bakha ba gosali Lowalangi no iʼotahögö gatumbukha. Na so zi möi bakha ba gosali, iʼotahögö gaekhula ba iʼerogö gatumbukha luo. Hizaʼi, ira matua si 25 andre ’laerogö gosali’ ba laʼotahögö gatumbukha ba mangalulu ira ba luo. Na simanö, no laʼerogö Yehowa börö me ’omo Yehowa’ gosali andrö. (1 Ra. 8:10-13) No laröi zindruhu ira matua si 25 andrö. Laröi Yehowa ba lasawö goroisa si so ba 5 Moze 4:15-19. Sindruhunia, ha khö Yehowa mangalulu ira, hizaʼi laʼafökhöiʼö dödönia!
Enaʼö ha khö Yehowa mangalulu nono mbanuania
17, 18. (a) Hadia wamahaʼönia khöda moroi ba zala nifalua niha sanömba luo ba gosali? (b) Hadia manö lua-luania ba niha Yehuda me no laröi zindruhu?
17 Hadia wamahaʼönia khöda moroi ba zala nifalua niha sanömba luo andrö? Enaʼö lö raʼiö wamosumangeda, moguna taʼalui wanuturu lala moroi khö Yehowa, Umbu haga sindruhu. Moguna tatörö tödöda wa ”Lowalangi Yehowa no amaedola luo”, ba Taromalinia ’fandru föna gaheda’. (Si. 84:11; 119:105) Taromali Lowalangi hegöi publikasi si teʼodane-dane ba Zura Niʼamoniʼö si otarai ba organisasinia, tola ihagaini dödöda awö wangera-ngerada. Ibeʼe wanuturu lala si sökhi khöda ba waʼauri enaʼö ohahau dödöda iadaʼa hegöi ba wanöndra faʼauri si lö aetu ba zi so miföna. Na taʼalui wanuturu lala ba gulidanö andre, hulö no taʼerogö Yehowa. Tola möi fangafökhö dödönia daʼö. Tatu lö omasi ita na taʼafökhöiʼö dödö Lowalangi! Tobali göi famangelama khöda gangilata Hezekieli enaʼö lö fariawö ita ba niha si no mondröi sindruhu.—Amd. 11:9.
18 Irugi iadaʼa, no iʼila Hezekieli zi öfa ngawalö salua sahöli-höli dödö. Fanömba adu hegöi famosumange faya si no iʼila, daʼö zangoromaʼö wa abölö-bölö sibai waʼalösökhi salua ba Yehuda. Lafakiko wahuwusara khö Yehowa börö me raʼiö ira ba wamati. Hizaʼi tenga ha daʼö manö. Moʼamakhaita wamosumange si raʼiö andrö ba gamuata si lö sökhi. Andrö, lö ahöli-höli dödöda na lafalua ngawalö zi lö sökhi iraono Gizaraʼeli si no mondröi sindruhu. Lua-luania, tenga ha fahuwusara khö Yehowa zi tekiko hizaʼi khö nawöra zamösana. Iadaʼa datatutunö hadia nisura Hezekieli samaʼeleʼö sanandrösa ba gamuata niha Yehuda si no mondröi sindruhu.
Amuta si Raʼiö—ʼÖfalua zi Lö Sökhi’
19. Hadia nisura Hezekieli sanandrösa ba waʼalösökhi nono mbanua Yehowa me götö daʼö?
19 Baso Hezekieli 22:3-12. Sindruhu-ndruhu lö sökhi gamuata soi daʼö, iʼotarai ndra samatörö irugi ba nono mbanuania. Laʼogunaʼö kuasora ira sondröniaʼö ba wamunu niha si lö sala. Fao göi nono mbanua ba wangosiwawöi Oroisa Lowalangi. Iraono ”laʼoʼaya namara faoma inara”. Lafalua waʼorudu khö ndra talifusöra. Mamadaö göi ndraono Gizaraʼeli, lalimo niha si fatewu ba lafakao lakha mbanua ba si lö ama. Lafalua waʼorudu iraono Gizaraʼeli ba zi tenga foʼomora. Alua wakhögusa ba latema zölö-sölö, lafakao niha ba lafobunga gefe na lafafizaʼö. Ono mbanua Yehowa manö laʼosiwawöi goroisania. Lö aboto ba dödöra wa ibeʼe goroisa daʼö börö me iʼomasiʼö ira. Khalaigö hawaʼafökhö dödö Yehowa ba gamuatara si lö sökhi andrö! Börö daʼö, iʼogunaʼö Hezekieli ba wanutunö khöra, ’Sindruhu-ndruhu wa no miʼolifugö ndraʼo.’
Börö wondrönisi dödö moroi ba gereja sangotöigö niha Keriso, andrö wa itugu lö sökhi ba raʼiö gulidanö andre (Faigi ngenoli si 20)
20. Hadia gamakhaitania khöda iadaʼa wehede Hezekieli sanandrösa ba waʼalösökhi niha Yehuda?
20 Hadia so gamakhaitania khöda iadaʼa ngawua wehede Hezekieli sanandrösa ba waʼalösökhi gamuata niha Yehuda? Faʼalösökhi gamuata niha Yehuda zamasugi ba dödöda sanandrösa ba gamuata niha ba ginötö iadaʼa. Laʼogunaʼö kuasora ira samatörö ba politik ba wamakao ono mbanua. Ira sondröniaʼö ba agama, töra-töra ndra sondröniaʼö ba gereja, mangandrö ira khö Lowalangi enaʼö ifahowuʼö wasuwöta si möi börö wamunu niha si hauga zuta faʼato. Laʼosiwawöi goi-goi Zura Niʼamoniʼö
sanandrösa ba wamalua fohorö. Lua-luania, itugu lö sökhi gamuata niha ba ginötö iadaʼa. Hasambalö fagölö niwaʼö Yehowa ba gereja andrö, ”Sindruhu-ndruhu wa no öʼolifugö ndraʼo.”21. Hadia wamahaʼönia khöda moroi ba waʼalösökhi niha Yehuda mböröta?
21 Börö me ono mbanua Yehowa ita, hadia wamahaʼö nihalöda moroi ba waʼalösökhi gamuata niha Yehuda mböröta? Enaʼö itema wamosumangeda Yehowa, moguna tahaogö gamuatada ba ngawalö hadia ia. Tatu lö aoha daʼa ba gulidanö si lö sökhi andre. (2 Ti. 3:1-5) Hizaʼi, aboto göi ba dödöda wa fatuwu khö Yehowa ngawalö gamuata si lö sökhi. (1 Ko. 6:9, 10) Börö me taʼomasiʼö Yehowa ba taʼoʼö goroisania, andrö wa omasi ita taʼoʼö zi no ifakhoi sanandrösa ba gamuata. (Si. 119:97; 1 Yo. 5:3) Na lö sökhi gamuatada, eluahania lö taʼomasiʼö Lowalangida niʼamoniʼö ba si lö taʼunö. Lö omasi ita na imane khöda Yehowa, ”Sindruhu-ndruhu wa no öʼolifugö ndraʼo.”
22. (a) Me no taʼila hadia nifalua Yehowa ba wangoromaʼö faʼalösökhi niha Yehuda, hadia gangetulamö? (b) Hadia nifatunöda ba faza aefa daʼa?
22 No taʼila hewisa wangoromaʼö Yehowa faʼalösökhi gamuata niha Yehuda hegöi fondröi sindruhu, ba no tahalö khöda wamahaʼö moroi ba daʼö. Tatu manö tahalö gangetula enaʼö ha Yehowa nifosumangeda börö me ha yaʼia zinangea mufosumange. Börö daʼö, moguna mangelama ita faböi tafosumange nadu ba ngawalö hadia ia ba tahaogö gamuatada faböi mosinegu. Hadia nifalua Yehowa ba nono mbanuania si faröi? Me no iʼohe Hezekieli ba gosali andrö fasui, imane khö genoninia andrö, ”Ufalua khöra wönugu sabölö-bölö.” (Hez. 8:17, 18) Moguna taʼila hadia wanguhuku nifalua Yehowa ba niha Yehuda börö me alua göi zimane daʼö dania ba gulidanö si lö sökhi andre. Tafatunö ba faza aefa daʼa wanguhuku nifalua Yehowa ba niha Yehuda.
^ par. 4 Ba mbuku Hezekieli, ngawua wehede ”Izaraʼeli” eluahania ono mbanua Yehuda hegöi Yeruzalema.—Hez. 12:19, 22; 18:2; 21:2, 3
^ par. 7 Eluaha ngawua wehede ’fönu’ zangoromaʼö wa moguna sibai khö Yehowa waʼalöfaröi nono mbanuania. Fagölö ira waʼolohu zi samösa ira matua sofönu khö woʼomonia ira alawe si faröi. (Amd. 6:34) No faröi nono mbanua Yehowa me lafosumange nadu börö me no tefaböbö ira sindruhunia ba mbuʼusa li khö Yehowa. Sinangea na mofönu khöra Yehowa. Imane sambua karya referensi, ”Olohu Lowalangi . . . börö me niʼamoniʼö ia. Ha yaʼia niʼamoniʼö . . . , andrö wa lö itehegö na so zi fahindri khönia.”—2 Mo. 34:14.
^ par. 11 Ba li Heberaiʼo, eluaha ngawua wehede ”adu niʼogorofi” te moʼamakhaita ia ba ngawua wehede ”si taʼunö” ba wangoromaʼö faʼogoro.
^ par. 13 Ba nisura niha Sumeri, mufotöi Tamusi andre Dumuzi. So zangumaʼö Tamusi andrö töi böʼö khö Nimerodi, hizaʼi lö hadöi dane-dane saro sangoromaʼö wa atulö daʼö.