LALA BA WAMÖRÖGÖ FAHUHUOSA
FAMAHAʼÖ 5
Atua-tua
Goi-goi: ”Böi tebulö khömi wangehaogö fehedemi.”—Kol. 4:6.
Hadia Nifalua Waulo?
1. Faigi VIDEO, mazui baso Halöwö Zinenge 17:22, 23. Aefa daʼö, angeragö wanofu-nofu daʼa:
-
Hewisa dödö Waulo me iʼila ato zanömba adu ba Atena?—Faigi Halöwö Zinenge 17:16.
-
Lö isalaikö niha Atena Faulo, hizaʼi si fao faʼatua-tua, iʼogunaʼö nifaduhusira tödö andrö si tobali dela ba wamaʼema turia somuso dödö. Hewisa wamaluania daʼö?
Hadia Wamahaʼönia Khöda?
2. Abölö omasi niha wamondrondrongo nifatunöda na atua-tua ita ba wamili ngawua wehede, lala wamaʼema hegöi inötö si tefaudu ba wangumaʼö yaʼia.
Oʼö Waulo
3. Fili ngawua wehede si tefaudu. Duma-dumania, na fahuhuo ita ba zi tenga niha Keriso, tola öfaudugö wangogunaʼö ngawua wehede niʼilara ba ginötö ötutunö duho sanandrösa khö Yesu hegöi Sura Niʼamoniʼö.
4. Böi anemaiʼö waʼö wa fasala mbua gera-erania. Beʼe khönia ginötö ba wamaehagö ösi dödönia. Na so mbua gera-erania si fasala moloʼö Sura Niʼamoniʼö, böi fabuʼa-buʼa khönia. (Yak. 1:19) Na öfondrondrongo wehedenia, aboto ba dödöu hadia zi faduhu dödönia ba hadia mbörö wa ifaduhusi tödö daʼö.—Amd. 20:5.
5. Na atulö niwaʼönia, foromaʼö wa fao dödöu ba suno ia. Tola manö faduhu sibai dödönia ba agama si so yaʼia. Tandraigö tutunö duho si faoma fatema ba dödömi ba daʼi-daʼi wamatunö khönia hadia zindruhunia nifahaʼö Zura Niʼamoniʼö.
