Ira Talifusöma Niʼomasiʼö:

Faʼomasida khö Lowalangi hegöi ba nawöda niha daʼö zamarou yaʼita ba woloʼö niwaʼö Zura Niʼamoniʼö, ”Miʼae mibaliʼö nifahaʼögu fefu niha moroi ba ngawalö soi, mibayagö ira idanö.” (Mat. 28:​19, 20; Mrk. 12:​28-31) Mofaʼabölö waʼomasi soroi ba dödö andrö börö me tola idönisi dödö ”niha si sökhi amuata somasi manöndra faʼauri si lö aetu”.—Hal. 13:48.

Ba zilalö, ha ba daʼö taʼosambuaʼö dödöda ba duma-duma wamadumaisi si no muhenaigö, aefa daʼö taröi khöra mbuku. Iadaʼa moguna tadouʼö waʼatua-tuada ba wahuhuosa. Omasi ita taforomaʼö waʼomasi ba niha böʼö yaʼia daʼö na tatutunö duho sadöni dödöra. Eluahania, moguna taʼangeragö ba tafaudugö duho nifaʼemada ba zomasi ira mazui niʼaombösira tödö. Hewisa brosur daʼa wanolonia yaʼita ba wamalua daʼö?

Ba brosur daʼa, so 12 wamahaʼö sanutunö hadia manö zinangea tafalua ba wangoromaʼö faʼomasi hegöi ba wombaliʼö nifahaʼö. Ero sambua famahaʼö, tatutunö dania duma-duma nifalua Yesu hegöi niha Keriso me abad siföföna. Ohitö dödö wa mufazökhi brosur daʼa, tenga ha enaʼö tatöngöni duma-duma wamadumaisi, hizaʼi itolo ita hewisa lala ba wangoromaʼö faʼomasi ba niha böʼö. Sindruhu sa, amuata mazui bua-bua nitutunöda ba daʼa, moguna ia ba ginötö möi ita manuriaigö. Sagötö tatutunö ia, taʼila dania hewisa wamahaʼö ba brosur daʼa moguna ia ba ginötö tabörögö wahuhuosa, na tafuli tafalukhaisi, mazui na tafahaʼö niha ba Zura Niʼamoniʼö.

Sagötö mitutunö ero sambua famahaʼö, haogö angeragö hewisa wangoromaʼöu bua-bua mazui amuata andrö ba ginötö fahuhuo ndraʼugö ba niha si so ba mbanua si toröi yaʼugö. Douʼö waʼomasimö khö Yehowa hegöi ba niha böʼö. Faʼomasi andrö zanolo yaʼugö ba wogamö ohitö dödö ba wombaliʼö nifahaʼö, tenga ha onekhe fahuhuo.

Maʼandrö sibai saohagölö me tola falulu fohalöwö ndraʼaga khömi. (Zef. 3:9) Yafahöna howu-howu Yehowa khömi börö me lö aetu miʼomasiʼö niha böʼö ba mibaliʼö ira nifahaʼö!