Khalaigö atö: Me famai-mai Tim khö ndra awönia, lö i’odödögö wamazaumba bola ba göna ba zörömi moto si falazi omo khöra irege aboto.

Na Tim ndra’ugö, hadia nifaluau?

SO TÖLU ZINANGEA ÖFILI:

1. Moloi’ö.

2. Öfobahulu niha bö’ö.

3. Öfatunö hadia zalua khö zi falazi omo khöu ba öwa’ö wa hasambalö öbu’a zi tekiko.

Tola manö adöni dödöu ba wamili A. Hiza’i, gofu hadia zala nifaluau so gunania na ötörö zindruhu.

1. Börö me da’ö zi sökhi.

   Imane Sura Ni’amoni’ö, ”Mi’angandrö salahima, noa sa faduhu dödöma, wa lö iteguga tödöma, me si sökhi manö zedöna matörö, fefu, hadia ia.”—Heberai’o 13:18.

2. Börö me sindruhunia, aoha ba niha wangefa’ö zalada na tatörö zindruhu.

   Imane Sura Ni’amoni’ö, ”Samini’ö horönia, ba si lö fozu; ba sangombakha horönia ba samöhöi, ba falukha wa’ahakhö dödö.”—Gamaedola 28:13.

3. Ba sabölö moguna, tola möi fangomusoi’ö dödö Lowalangi da’ö.

   Imane Sura Ni’amoni’ö: ”Ni’ogorofi Yehowa sa’ae zanörö lala elungua; ba si fahuwu ia ba zadölö tödö.”—Gamaedola 3:32.

Karina, no 20 fakhe ndröfinia, ibini’ö zura tilang moroi khö wolisi ena’ö lö i’ila bapania. Hiza’i, ba gafuriatania sa’atö ba oroma. Imane Karina, ”Mato döfi aefa da’ö, irongo bapagu wa no itilang ndra’o folisi. Ba tobali bukala sebua da’ö!”

Hadia wamaha’önia? Imane Karina, ”Na tabini-bini’ö zala nifaluada, tola ebua sibai lua-luania. Ba khöda samösa mangandrauli ya’i dania!”

Imane Sura Ni’amoni’ö, ”Asese sa sala ita, dozi ita.” (Yakobo 3:2) Na lö tataha-taha wamatunö salada, da’ö zangoroma’ö wa so khöda wangide-ngide’ö ba no atua ita ba wangera-ngera.

Aefa da’ö, moguna öhalö wamaha’ö ba zala si no irai öfalua. Imane samösa ono alawe sotöi Vera, ”Uhalö wamaha’ö khögu ba zala si no irai ufalua, na ufalua zala ba ubali’ö da’ö si tobali dane-dane khögu ena’ö tola itugu sökhi ndra’o ba tola uhalö gangetula si sökhi.” Iada’a, datafaigi hewisa ena’ö tola göi öfalua zimanö.

Öfiza gureta bapamö ba lö ö’odödögö wamakiko ya’ia. Hadia nifaluau aefa da’ö?

• Ölau zi lö hede-hede ba ödöna-döna ena’ö lö i’ila bapamö.

• Ö’ombakha’ö hadia zalua sindruhunia.

• Ö’ombakha’ö hadia zalua ba öfobahulu niha bö’ö.

Kala ndra’ugö ba ujian börö me lö irai öfaha’ö ndra’ugö. Hadia nifaluau aefa da’ö?

• Öwa’ö wa talafo abua soal ujian.

• Törö zindruhu wa areu ndra’ugö wamaha’ö ya’ugö samösa.

• Öfobahulu gurumö wa ebua dödö zambuana ia.

 Iada’a, angeraigö na tobali’ö (1) bapamö ba (2) gurumö. Hewisa dödö bapamö hegöi gurumö na alio ö’ombakha’ö zalamö? Hewisa dödöra na öbini-bini’ö zalamö?

Iada’a, tandraigö törö tödöu zala nifaluau barö zi döfi andre, ba be’e wanema li ba zi dua wanofu andre.

Hadia zala nifaluau? Hadia ö’ombakha’ö ia?

• Lö’ö, uhaogö wamini’ö.

• Ufobahulu niha bö’ö.

• U’anemai’ö utörö zindruhu.

Na lö ötunö zala nifaluau, hewisa dödöu aefa da’ö?

• Omuso dödömö—Andrö le, lö la’ila!

• Itegu-tegu’ö tödöu—Atulösa uwa’ö manö zindruhu.

Hadia zinangea öfalua?

Hadia wamaha’ö si tola öhalö ba zala nifaluamö andrö?

Hana wa so niha samini-mini’ö zala nifaluara?

Hadia zi tumbu ba wangera-ngera niha na öbini-bini’ö manö zalamö, ba hadia göi zi tumbu ba wangera-ngerara na omasi’ö ö’ombakha’ö zalamö?—Luka 16:10.