FANOFU 9
Hadia Moguna Faduhu Dödögu ba Wamaha’ö Evolusi?
HADIA NIFALUAU?
Khalaigö atö: Manofu-nofu dödö Alex. Faduhu dödönia wa so Lowalangi hegöi fomböwöi. Hiza’i, ma’ökhö andre, ifaha’ö ira guru biologira si fao fa’afaduhu dödö wa atulö wamaha’ö evolusi andrö, ba te’odane-dane ia moroi ba penelitian ilmiah si tola mufaduhusi tödö. Lö omasi Alex na hulö niha si bodo ia. Imane tödönia, ’Niha sagatua-tua manö no laforoma’ö wa atulö wamaha’ö evolusi andrö, hana wa lö faduhu nasa dödögu?’
Na Alex ndra’ugö, hadia faduhu dödöu wamaha’ö evolusi andrö ha börö me mututunö ba mbuku-buku wamaha’ö wa sindruhu alua ia?
BATOGÖ SABATA BA ANGERAIGÖ!
Si to’ölönia, niha si faduhu tödö ba evolusi hegöi ba womböwöi, fagölö-gölö alio labe’e wanema lira. Hiza’i, lö la’ila latutunö hadia mbörö wa faduhu dödöra.
-
So ösa niha si faduhu tödö sanandrösa ba womböwöi börö wamaha’ö ba gosali.
-
So ösa niha si faduhu tödö ba evolusi börö wamaha’ö ba zekola.
ÖNÖ WANOFU SINANGEA MU’ANGERAIGÖ
Imane Sura Ni’amoni’ö, ”Fefu nomo sa, ba so zotomo, ba samazökhi fefu, hadia ia, ba ya’ia Lowalangi.” (Heberai’o 3:4) Hadia faduhu dödöda da’a?
Na öwa’ö so manö wa’auri tenga börö Zomböi, fagölö ira na öwa’ö wa so manö nomo ba lö hadöi zamazökhi
LAWA’Ö: Fefu hadia ia zi so ba mbanua si yawa awö danö andre, te’asogö manö ia börö wamoka sebua.
1. Haniha mazui hadia mbörö wa alua wamoka sebua andrö?
2. Hezoso zabölö fagöna ba dödö—so manö gofu hadia ia lö mbörönia mazui so zowöwöi ya’ia?
LAWA’Ö: Te’asogö niha börö evolusi moroi ba gurifö.
3. Na da’ö mböröta niha moroi ba evolusi gurifö, duma-dumania moroi ba mba’e, hana wa faehu sibai wa’atua-tua niha moroi ba mba’e?
4. Ngawalö ”zi gide-ide” manö na’i sauri ba gulidanö andre no abua wangosisi’ö ya’ia. Hadia mbörö?
LAWA’Ö: Atulö wamaha’ö evolusi börö me no mutandraigö ia.
5. Hadia niha sanguma’ö da’ö no sindruhu-ndruhu ifareso samösa wa’atulö wamaha’ö andrö?
6. Hawa’ato niha si faduhu tödö ba evolusi ha börö me lawa’ö wa fefu niha sagatua-tua faduhu dödöra ba da’ö?
”Na mowaö-waö ndra’ugö ba gatua ba ö’ila nomo si baga, hadia ömane tödöu, ’Sökhi sibai! So manö nomo da’a börö wa’aso’a hogu geu.’ Tatu manö lö’ö! Lö fagöna ba dödöda da’ö. Na simanö, hadia faduhu dödöda wa fefu hadia ia zi so ba mbanua si yawa awö danö andre so manö ia na lö mbörö?”
—Julia.
”Khalaigö na so niha sanguma’ö khöu wa mamoka sambua pabrik percetakan irege fefu daŵania tokana ba dowa hegöi ba narö zagö, ba tesura ngawua wehede si so ba kamus. Hadia faduhu dödöu?”
—Gwen.
HANA WA FADUHU DÖDÖU WA SO LOWALANGI?
Ifarou ndra’ugö Sura Ni’amoni’ö ena’ö ’ötandra fefu, hadia ia’. (I Tesalonika 5:21) Eluahania, na faduhu dödöu wa so Lowalangi, böi faduhu dödöu ha börö
-
NIRASOIMÖ (Imane tödögu wa so wondregö zabölö)
-
NIHA BÖ’Ö (Solo’ö ba agama fefu niha ba zi fasuigu)
-
ME NO SINANGEA MUFALUA (I’otarai ba wa’ide-ide, no lafaha’ö ndra’o ira satuagu ena’ö faduhu dödögu khö Lowalangi, andrö wa u’o’ö manö)
Tobali, moguna so khöu dane-dane saro si tobali mbörö wa faduhu dödöu.
”Ba ginötö itutunö guruma ba kelas sanandrösa hewisa na mohalöwö mbotoda, itugu faduhu dödögu wa so Lowalangi. Fefu zi so ba mbotoda irege ba wondrege zide-ide, so gunania, ba zi lö tadöna-döna göi mohalöwö da’ö fefu!”
—Teresa.
”Na ufaigi gödo sagalawa, köfa pesiar, mazui moto, asese manofu-nofu ndra’o, ’Haniha zamazökhi ya’ia?’ Duma-dumania moto. Tatu manö, so niha sonekhe wamazökhi ya’ia, börö me oya sibai gama-gamania wondrege zide-ide, ba moguna atulö wamasa ya’ia ena’ö tola mofanö moto andrö. Na moto manö so zamazökhi ya’ia, mendrua manö niha gulidanö.”
—Richard.
”Itugu ara ufaha’ödo ba sains, itugu lö tefaudu ba wangera-ngeragu wamaha’ö evolusi. . . . Ba wamaigigu, moguna ba niha ’wamati’ saro ba wamaduhusi tödö evolusi, moroi na lafaduhusi tödö Zomböi ya’ira.”
—Anthony.
MOGUNA MU’ANGERAIGÖ
Hewa’ae no ngafulu fakhe no lafalua penelitian, lö manö nisöndra ndra ilmuwan sanandrösa ba wanutunö wamaha’ö evolusi si no lafaduhusi tödö. Na niha sagatua-tua manö lö khöra fahasara dödö, hadia moguna faduhu dödöda ba wamaha’ö andrö?
Te Göi Adöni Dödöu
WHAT YOUR PEERS SAY
Hana Wa Faduhu Dödöda Wa Sindruhu So Zomböi?
Darua zi bohou ebua sanaögö fa’aombö dödö ba la’aro’ö wamatira.
