Khalaigö atö: Me ifaigi ia Julia ba zörömi, i’ila wa esolo sibai ia. Imane wanguma’ö, ”Moguna u’alösi wa’esologu andre.” Sindruhunia, molo’ö satuania hegöi ndra awönia ”afuo” ia.

Barö-barö da’a, no i’angeraigö Julia lala ena’ö i’alösi wa’abuania ”mato hauga kilo tö”. Sindruhunia, abua sibai wamalua ya’ia börö me itaögö wa’olofo ba zi hauga hari wa’ara . . .

Na alua khöu zimane khö Julia, hadia nifaluau?

Lö fasala na ta’era-era hewisa mbotoda. Ba Zura Ni’amoni’ö manö, musuno hewisa zikhala Sara, Rakhela, Abigaila, Yosefo hegöi Dawido. Imane Sura Ni’amoni’ö wa no ”si sökhi si’ai bawa” Abizagi.—I Razo 1:4.

Tobali, ato zi bohou ebua sangonorogö tödö sibai mbotora. Tola möi fama’ala da’a. Angeraigö atö:

• Molo’ö survei, 58 persen ndraono alawe sanguma’ö wa esolo ira. Sindruhuniasa, ha 17 persen zesolo.

• Molo’ö survei tanö bö’ö, 45 persen ndraono alawe sanguma’ö wa esolo sibai ira. Sindruhuniasa, afuo sibai ira!

• Börö me laforege la’alösi wa’esolora, so zi bohou ebua si göna anoreksia. Ya’ia da’ö fa’atebulö lagu wemanga irege tobali fangala khöra, hulö na latehegö olofo ira.

 Na no göna khöu anoreksia mazui fa’atebulö lagu wemanga, moguna ö’alui wanolo. Moguna ötutunö khö zatuau mazui ba niha si tola öfaduhusi tödö, salawa ndröfi moroi khömö. Imane Sura Ni’amoni’ö, ”Sindruhu si fahuwu, ba no fadoro i’omasi’ö nawönia; ba ba wamakao, ba tumbu ia si fatalifusö.”—Gamaedola 17:17.

Sindruhunia, börö gamuatada wa tola adöni dödö niha mazui lö’ö khöda. Duma-dumania, ono Razo Dawido sotöi Abisalomi. Imane Sura Ni’amoni’ö:

”Ba lö famaedo wa’asökhi mboto Gabisalomi, . . . ba lö hadia ia zinegu.”—II Zamueli 14:25.

Hiza’i, so khönia fa’asiliyawa, ohitö dödö si fasala, ba tobali ia si manga mböli! Molo’ö Sura Ni’amoni’ö, lö sökhi gamuata Gabisalomi. Faröi ia, lö khönia fa’aila, si fahö’ö ia ba samunu.

Andrö wa i’amenesi ita Sura Ni’amoni’ö:

”Mi’onukha zi bohou andrö.”—Kolose 3:10.

”Böi fangehao baero wangehao zimanö, . . .  fangehaora niha bakha andrö, si no tobini, tödö andrö.”—I Fetero 3:3, 4.

Lö fasala na omasi ita ena’ö adöni dödö niha ba wamaigi ya’ita. Hiza’i, sabölö moguna ya’ia da’ö amuatada. Ba gafuriatania, tenga börö me sökhi ba moadu mboto wa adöni dödö niha khömö, hiza’i börö amuatamö si sökhi. Samösa nono alawe sotöi Phylicia, imane, ”Na baga-baga ndra’ugö, lafaigi-faigi sibai ndra’ugö niha. Hiza’i, si lö irai la’olifugö ya’ia da’ö amuata hegöi bua-bua si sökhi nifaluamö.”

Hadia asese ö’abusi tödö mbotomö?

Hadia no irai tumbu ba wangera-ngerau ena’ö ötörö operasi plastik mazui lö manga-manga’ö ena’ö sökhi mbotomö?

Na tola, hadia zinangea öbulö’ö ba mbotomö? (Fili zinöndrau.)

• FA’ALAWA

• FA’ABUA

• BU

• BOTO

• SIKHALA

• ULI

Na ya wanemau li moroi ba zi dombua wanofu si oföna, mazui moroi ba wanofu si tölu no tölu nifiliu mazui töra, angeraigö atö da’a: Te lö ahono nasa dödöu mazui ö’abusi tödö mbotou. Sindruhuniasa, lö tatu na so ba wangera-ngera niha simane ni’era-eramö.—I Zamueli 16:7.