FANOFU 7
Hewisa Na Ladönisi Ndra’o Wohorö?
HADIA NIFALUAU?
Khalaigö atö: Awena dua waŵa fakawa Helen khö Mike, hiza’i hulö zi no ahatö sibai sa’e ira. Lö aetu-aetu fa SMS ira, fa tele-telefo mato hauga za, ba asese fendronga niwa’öra! Hiza’i, iada’a omasi Mike zi töra moroi ba wahuhuosa.
Barö zi dua waŵa, ha fagohe-gohe tanga Helen ba Mike, ba itaria fa’uma ira. Ba lö omasi Helen wamalua si töra moroi ba da’ö. Lö omasi ia göi na ibato wakawasa khö Mike. Lö niha bö’ö baero Mike zi tola mame’e ya’ia hulö wondrege zi baga ba tohude moroi ba danö bö’ö. Imane Helen, ’Hana ua ba, faoma sa’atö omasiga nawöma . . .’
Na no ibönö ndröfiu fakawa ba alua khöu simane salua khö Helen, hadia nifaluau aefa da’ö?
BATOGÖ SABATA BA ANGERAIGÖ!
Farongasa no buala moroi khö Lowalangi ba niha si no mangowalu. Na mufalua da’ö fatua lö mangowalu, no ta’osiwawöi buala andrö. Hulö na la’amualagö khöda mbaru sebua böli, ba tabali’ö ia losi-losi
Na manaoka’ö moroi yawa ba hogu geu ba ötandraigö wohombo simane fofo, tola manö ötema lua-luania. Tola göi örasoi lua-luania na lö ö’o’ö goi-goi sanandrösa ba mbua-bua, simane huku sanguma’ö, ”Ena’ö lö mibabaya wohorö.”
Hadia lua-luania na lö ö’o’ö nifakhoi andrö? Imane Sura Ni’amoni’ö, ”Ba sohorö, ba ba mbotonia ifazökhi horö.” (I Korindro 6:18) Hewisa wa sindruhu da’a?
No oya dandra zangoroma’ö wa so lua-luania khö zi bohou ebua me lafalua horö fatua lö mangowalu ira.
-
FANIASA. Ato zi bohou ebua saniasa börö me lafalua wohorö fatua lö mangowalu.
-
FANAHÖ TÖDÖ. Me no aefa lafalua wohorö, so ba wangera-ngerara zimane da’a, ’Haökhö manö no irai mohorö ia andre?’
-
FA’AFATÖ DÖDÖ. Sindruhunia, ato ndraono alawe somasi na ono matua andrö tobali solumö’ö ya’ira, tenga samakiko fa’aurira. Ba, ato ndraono matua si lö omasi sa’ae ba nono alawe salio mudönisi.
-
Rahu-rahunia: Na öfalua wohorö fatua lö mangowalu, no ö’ositengagö mbotou. No ötibo’ö wondrege zebua böli khöu. (Roma 1:24) Böi lulu manö mbotou börö me no sebua böli ia!
Oroma’ö wa so khöu wa’aro dödö wa ’lö öbabaya wohorö’. (I Tesalonika 4:3), Awena tola öfalua ia, na no mangowalu’ö. Ba, tola sindruhu-ndruhu örasoi ia. Lö khöu fa’aombö-aombö dödö, faniasa, falö’ahono-hono dödö, simane niha samalua fohorö fatua lö sangowalu.
HEWISA MOLO’Ö YA’UGÖ?
-
Hadia ifakiko mbotou mazui i’afökhoi’ö dödöu niha sangomasi’ö ya’ugö?
-
Hadia ifosala ndra’ugö föna Lowalangi niha so’ame’egö tödö ndra’ugö?
—Heberai’o 13:4.
