Lö idöna-döna Anette wa latuli’ö ia irege alabu tou ba danö. Imane wanguma’ö, ”Ufalua zi tolado ba wolawa ya’ia. Ulau mu’ao ba lö kalua ligu. Utuli’ö, utifa, ubözi, ba ukha’ai ia. Ba, ba zi lö udöna-döna ifahödo faoma förögi. I’anemai’ö atata dölagu.”

Na alua khöu zimane da’ö, hadia nifaluau?

Hewa’ae no öfa’anö ndra’ugö, hiza’i tola manö alua zi lö sökhi na mofanö-fanö’ö ba zi bongi. Imane Sura Ni’amoni’ö, ”No tenga ba zalio ahe wagohisa, . . . ba tenga ba zaboto ba dödö wa’ebua dödö; no ha sambua ginötö ba no ha sara zi göna ira fefu.”—Zangombakha 9:11.

So ösa zi bohou ebua, simane annette, lafakao ira niha si lö la’ila. Tanö bö’önia, lafakao ira niha sasese la’ila, mazui soroi yomora. Me fulu fakhe ndröfi Natalie, no irai ihoröni ia ono matua si fasinga omo khönia. Imane wanguma’ö, ”Ata’udo ba ailado sibai. Andrö wa lö ufatu-fatunö.”

Isala-salaikö manö ia Annette na itörö tödönia zalua andrö. Imane wanguma’ö, ”Itörö-törö manö tödögu zalua me bongi da’ö. Moguna uforege ba wolawa ya’ia mena’ö. Hiza’i, me no aefa tefahö ndra’o, atata dölagu börö wa’ata’u. Lö u’ila hadia zinangea ufalua. Hiza’i, iwa’ö tödögu wa moguna so nifaluagu.”

Isalaikö ia göi Natalie. ”Si bagania mena’ö, böi alio faduhu dödögu,” itutunö Natalie. ”Lawa’ö ira satuagu wa tebai aröu-röu ndra’o khö ga’agu na fawudega baero. Hiza’i, lö u’o’ö. Hulö ufolala zi fasinga omo khögu ba wamalua si lö sökhi. Abu sibai dödö zoroi yomogu ba zalua andrö. Umane tödögu wa ya’o zi sala. Ba, abua sibai da’a khögu.”

Na so khöu dödö simane Annette ba Natalie, törö tödöu wa tenga börö me’omasi’ö wa lahoröni ndra’ugö. So zanguma’ö wa simanö sa ndra matua, si to’ölö sa’ae na lafalua simane da’ö mazui nihoröni andrö sangandrö-ngandrö ena’ö lafalua khönia zi lö sökhi. Hewa’ae simanö, lö sinangea muhoröni zi samösa niha. Na no irai lafalua khöu zimane da’ö, tenga salamö da’ö!

Tatu manö, asese örongo ngawua wehede ”tenga salamö da’ö”, hiza’i abua khöu wamaduhusi tödö. So niha sangai angetula wa lö la’ombakha’ö zalua andrö. Lua-luania, itegu-tegu ira tödöra ba lö khöra fa’owua-wua dödö. Hiza’i, na ölau zi lö hede-hede, omuso sibai dödö niha samalua khöu zi lö sökhi andrö. Moguna öfatunö ia, börö me da’a gangetula si sökhi.

Itutunö Sura Ni’amoni’ö wa no irai alua wa’abu dödö simane da’ö ba ndra matua satulö tödö sotöi Yobi. Irege imane wanguma’ö, ”Humede ndra’o, ba wa’afökhö bakha dödögu.” (Yobi 10:1) Tola ö’o’ö nifalua Yobi. Na ötutunö zalua ba niha nifaduhusiu tödö, tola aoha khöu wanema’ö salua andrö ba so khöu wa’ahono dödö.

Sindruhu-ndruhu no irasoi da’a Anette. Imane wanguma’ö, ”Ututunö ba zi fahuwu khögu. Ifarou ndra’o ba wamatunö khö ndra satua sokubaloi niha Keriso ba gangowuloa khöma. Harazaki manö wa ufatunö. Mato hauga kali möi ira khögu ba nomo ba lawa’ö wa tenga salagu da’ö, no faudu sibai khögu wehedera.”

Ifatunö göi Natalie khö zatuania sanandrösa ba zalua khönia. Imane wanguma’ö, ”Latolodo. La’alui lala ena’ö aoha khögu wanutunö ya’ia. Da’ö mbörö wa lö talafo abu dödögu wanema’ö salua khögu andrö.”

So göi wa’ahono dödö khö Natalie me no ilau mangandrö. Imane wanguma’ö, ”Tetolo ndra’o me fahuhuodo khö Yehowa, mendrua manö na ba ginötö lö u’ila ufa’ema nösi dödögu ba niha bö’ö. Na mangandrödo, ufatunö fefu. Ba ahono sibai dödögu.”

Itugu numalö ginötö, lö sa’ae khöu fa’ata’u. (Zangombakha 3:3) Moguna örorogö mbotou ba fangera-ngerau. Moguna göi oya ginötöu wolombase. Ba sabölö moguna, odaligö Lowalangi Yehowa, si fahöna fondrara dödö.—II Korindro 1:3, 4.

Na ono alawe ndra’ugö, ba lafaso’ö wamalua amuata wohorö, böi ata’ufi wanguma’ö, ”Böi lau da’ö!” mazui, ”Böi gohe-gohedo!” Böi lau zi lö hede-hede börö wa’ata’umö na iröi’ö kawamö. Na i’etu’ö wakawasami ha börö-börö da’ö, tenga ira matua si sökhi ia! Moguna ö’alui niha si sangosinangegö botou ba angetula nihalöu.

”Me SMP ndra’o, so ndraono matua zosöbi-söbi tali behagu ba lawa’ö wehede si lö sökhi, simane hawa’omuso dödögu na orudu ndra’o khöra.”—Coretta.

Molo’ö ya’ugö, nifaluara andrö

1. Ha bude-bude?

2. Ha fondrönisi?

3. No möi fangailasi ya’ia?

”Ba bus, so nono matua sanguma’ö fehede si lö baga khögu ba igohe-gohedo. Ubözi dangania ba ufofanö ia. Hulö niha sowöhö ndra’o ba wamaiginia.”—Candice.

Molo’ö ya’ugö, hadia nifalua nono matua andrö khö Candice?

1. Ha bude-bude?

2. Ha fondrönisi?

3. No möi fangailasi ya’ia?

”Me ndröfia, so nono matua si lö aetu-aetu manguma’ö wa omasi ia khögu ba omasi ia na fakawa ndra’aga, ba lö irai utema’ö ia. Itaria i’omösi-mösi dangagu. Mofönudo ba lö ibe’e dödönia. Aefa da’ö, me ufabu’u tali sifatugu, ibözi gogogu.”—Bethany.

Molo’ö ya’ugö, nifalua nono matua andrö:

1. Ha bude-bude?

2. Ha fondrönisi?

3. No möi fangailasi ya’ia?

Fanema li satulö moroi ba wanofu andrö fefu ya’ia da’ö C.

Hadia gamaehutara wangailasi, bude-bude, mazui fondrönisi?

Ha samösa zohare na so fangailasi ba wohorö. Ba lö aetu-aetu ifalua da’ö hewa’ae no lategu ia.

Tebai ni’aohasi ba dödö nifotöi fangailasi andrö. Börö me tola mofozu ia ba wamalua horö.