Khalaigö atö: Tanö owi Rabu da’a. Jefri si 17 fakhe, molombase ia me no awai fefu halöwönia. Mudadao ia ba gurusi ba i’orifi TV.

Izumaigi tohare bapania ba lö khönia fa’omuso dödö.

Na Jefri ndra’ugö, hadia nifaluau ena’ö lö alua wakarasa?

Hulö zamofanö moto ita na fahuhuo ba zatua. Na so daha-taha ba lala nitörömö, tatu manö ö’alui lala bö’ö.

 DUMA-DUMANIA:

Imane samösa nono alawe sotöi Lea, ”Abua khögu fahuhuo khö bapagu. Itaria, aefa fahuhuodo khönia, imane khögu, ’Khögu fahuhuo’ö ba?’”

SO TÖLU NGAWALÖ SI TOLA IFILI LEA.

1. Mofönu ia khö bapania.

   Ihangöi bapania, ”Fondro-ndrongo ma’ifu ba pa, moguna wö da’a!”

2. Ibato wahuhuosa khö bapania.

   Lö omasi itutunö sa’ae gabula dödönia khö bapania.

3. I’alui ginötö si tefaudu ba wahuhuosa.

   Tola fahuhuo ia föna-föna bapania ba ginötö bö’ö, mazui ibe’e zura khö bapania sanandrösa ba gabula dödönia.

Hezo zi fao ba dödöu sinangea ifili Lea?

ANGERAIGÖ: No mangoloi wangera-ngera bapania irege lö i’ila gabula dödö Lea. Na Ifili A, tola manö lö i’ila bapania hadia mbörö wa mofönu ia. Ba tola manö lö fatema ba dödö bapania hadia niwa’önia, ba lö khönia famosumange zatua. (Efeso 6:2) Lö sökhi lua-luania na mufili da’a.

Na Ifili B, hulö zaoha wamalua ya’ia, sindruhuniasa lö baga. Hadia mbörö? Ena’ö te’awaisi gabula dödönia, moguna fahuhuo ia khö bapania. Ena’ö tola ibe’e bapania wanolo, moguna i’ila hadia zalua khönia. Na ilau zi lö hede-hede, lö eluahania.

Na Ifili C, eluahania iforege ba wahuhuosa khö bapania, hewa’ae so daha-taha khönia. Ifaigi hawa’ara ginötö si tefaudu ba wanutunö ya’ia. Ba na ifili wame’e zura khö bapania, tola manö aoha noro dödö Lea.

Na isura zura, tola manö möi fanolo Lea ba wanutunö ösi dödönia. Ba ginötö ibaso bapania, tola i’ila hewisa dödö Lea ba tola aboto ba dödönia hadia gabula dödönia. Sökhi lua-luania khö Lea hegöi khö bapania na C nifili. Na fahuhuo ia föna bapania mazui i’oguna’ö zura, no tefaudu da’a ba mene-mene Zura Ni’amoni’ö ya’ia da’ö ba ’wolohi zoguna, ena’ö atulö’.—Roma 14:19.

Hadia nasa zi tola ifili Lea?

Tandraigö ö’angeraigö, ba sura ia ba nahia si no muhenaigö ba da’a. Angeraigö göi hadia zalua na öfalua da’ö.

Törö tödöu wa hadia nifatunömö tola manö lö fagölö ba ni’era-era zatuamö.

DUMA-DUMANIA:

Manofu zatuau khöu, hana wa no öfangerau manö mbawa. Ömane wanguma’ö, ”Areudo wanutunö ya’ia.”

Hiza’i, molo’ö satuamö, eluaha niwa’ömö andrö, ”Lö faduhu dödögu khömi. Abölö omasido ututunö khö nawö-awögu moroi na khömi.”

Khalaigö atö na so gabula dödöu ba omasi zatuau wanolo ya’ugö. Hiza’i, ömane khöra, ”Lö salania. U’ila hadia zinangea ufalua ba gabula dödögu.”

• Hadia zi so ba wangera-ngera zatuau?

• Hadia zabölö sökhi sinangea öwa’ö?