Khalaigö atö: Mo’ugu-ugu dödö Brian me so darua ndra awönia sekola zangondrasi ya’ia. Barö migu andre, no dua kali lafaso ia woroko. Ba si tölu kalinia sa’ae da’a.

Imane ono matua si oföna:

Me iwa’ö wehede ”awöu”, ifamö’i hörönia ba ibe’e baero si so ba kandre-kandrenia ba i’oro’ö khö Brian.

I’ila Brian wa roko nibe’enia baero. Itugu monönö we’ugu-ugu dödönia.

Na Brian ndra’ugö, hadia nifaluau?

Hadia no lahaogö la’angeraigö ndra awö Brian andrö nifaluara? Hadia angetulara samösa da’ö? Tola manö tenga. Si to’ölönia, la’o’ö-o’ö nifalua nawöra. Omasi ena’ö latema ira, andrö wa la’o’ö nifalua ndra awöra.

Na alua khöu zimane da’ö, hewisa wanga’iu angetula hegöi ba wotimbagöu fanandraigö moroi khö ndra awöu?

1. ANGELAMAISI

   Imane Sura Ni’amoni’ö, ”Satua-tua, ba i’ila wamakao, ba ibini’ö ia; ba sowöhö-wöhö, ba latörö manö, ba te’ala.”—Gamaedola 22:3.

   Si to’olönia, tola ö’ila hadia lua-luania. Duma-dumania, na ö’ila moroi ba zaröu ndra awöu sekola soroko, tola mangelama ndra’ugö.

2. ANGERAIGÖ

   Imane Sura Ni’amoni’ö, ”Böi itegu ami tödömi.”—I Fetero 3:16.

   Sofu khöu samösa, ’Hadia lua-luania khögu na u’o’ö ndra awögu?’ Tola manö latema’ö ndra’ugö ira awöu. Hiza’i, hewisa dödöu aefa da’ö? Hadia ötehegö öbulö’ö wa’aro dödöu ha börö me omasi ndra’ugö ö’omusoi’ö dödö ndra awöu sekola?—II Moze 23:2.

3. ANGETULA

   Imane Sura Ni’amoni’ö, ”Satua-tua, ba ata’u, ba i’erogö zi lö sökhi.”—Gamaedola 14:16.

   Alio ara, hasambalö tahalö gangetula samösa ba ta’ila hadia lua-luania. Itutunö Sura Ni’amoni’ö sanandrösa khö ndra matua sangai angetula si sökhi simane Yosefo, Yobi, ba Yesu. Itutunö göi sanandrösa ba zangai angetula si lö sökhi simane Ka’ino, Ezau, ba Yuda. Hadia nifaluau?

Imane Sura Ni’amoni’ö, ’Falua zi duhu.’ (Gamaedola 12:22) Na no ö’era-era hadia lua-luania ba ö’ila hadia sinangea öfalua, tola aoha khöu wanutunö fetarou ba mo’eluaha ia khöu.

Lö moguna özara-zara wanutunö khö nawöu. Ibönö öwa’ö khöra LÖ’Ö. Mazui, ba wangoroma’ö wa so khöu wa’aro dödö, tola ömane wanguma’ö:

• ”Lö faodo!”

• ”Lö omasido ufalua da’ö!”

• ”No ö’ila nasa wa lö omasido!”

Moguna ö’anemai ötema lira ba falua ia si fao fa’afaduhu dödö. Na öfalua da’ö, abua khö nawöu ba wanandraigö ya’ugö!

Hewisa na la’o’aya ndra’ugö ira awöu? Hewisa na lamane khöu, ”Hadia zi sala ba da’a, hana wa ata’u’ö?” Fango’aya simane da’ö no fanandraigö si to’ölö alua. Hadia nifaluau? Si lö’ö-lö’önia, so zinangea öfili moroi ba zi dombua andre.

• Ötaögö manö na la’o’aya’ö. (”Atulö, ata’u ae ndra’odo!” Aefa da’ö, adogoi’ö wanutunö hadia mbörö.)

• Tola öfuli ötandraigö ia. Na no ötutunö hadia mbörö ba be’e si tobali famatimbaisi khö nawöu. (”Tatu, ö’ila samösa wa so lua-luania na moroko!”)

Na lö aetu-aetu la’o’aya ndra’ugö ira awöu, ofanö moroi ba da’ö! Törö tödöu, na öradö-radö ndra’ugö ba da’ö, itugu latandraigö ndra’ugö. Ba, na mofanö’ö moroi ba da’ö, öforoma’ö wa lö omasi’ö na niha bö’ö zamötörö ya’ugö.

Atulö wa tebai öbini’ö ndra’ugö ba wanandraigö nibe’e ndra awöu. Hiza’i, tola öhalö gangetula samösa hadia zinangea öfalua, oroma’ö wa’aro dödöu, ba ya’ugö samösa zotatugöi. Afuriatania, khöu samösa so gangetula!—Yosua 24:15.