1-3. (a) Hadia zalua si tola mamoto fahasara dödö ba mbanua niha Keriso me abad siföföna? (b) Hadia mbuania khöda na tafahaʼö ita moroi ba waö-waö nisura ba mbuku Halöwö Zinenge sanandrösa ba gamadöniwa andre?

 OMUSO dödö Waulo hegöi Baranaba. Awena sibai mangawuli ira moroi ba mbanua Gandriokhia si so ba Ziria me no lafalua halöwöra tobali utusan injil siföföna. Omuso sibai dödöra börö me ”ibokai lala [Yehowa] ba soi böʼö enaʼö mamati ira”. (Hal. 14:26, 27) No ahori larongo fefu duria somuso dödö niha mbanua Gandriokhia, ba ”ibörögö ato” niha Keriso si tenga Yahudi si farahu ba mbanua niha Keriso ba daʼö.—Hal. 11:20-26.

² Turia faʼatedou andre si möi fangomuso dödö, iʼanemaiʼö ofeta ba Yudea. Hizaʼi lö fefu omuso dödöra, faʼatedou daʼa tobali famobörö watötöisa sabölö-bölö sanandrösa ba wosuna. Hewisa zindruhunia gotalua niha Keriso Yahudi khö ndra niha si tenga Yahudi, ba hewisa göi zatulönia niha Keriso si tenga Yahudi wamaigira Oroisa Moze? Amadöniwa daʼa mbörö wa alua watötöisa sabölö-bölö irege arakhagö aboto wahasara dödö ba mbanua niha Keriso. Hewisa wangasiwai abula dödö andre?

³ Oya wamahaʼö si sökhi si tola tahalö moroi ba waö-waö nisura ba mbuku Halöwö Zinenge sanandrösa ba gamadöniwa daʼa. Ba tola göi tobali fanolo khöda ba wangai angetula si sökhi na alua gabula dödö si tola mamoto fahasara dödöda iadaʼa.

4. Hadia wangera-ngera si fasala niʼokhögö niha Keriso Yahudi, ba hadia wanofu si tumbu ba dödöda?

⁴ Imane Luka, ”So niha si tohare moroi ba Yudea [si numalö ba Gandriokhia] ba labörögö wamahaʼö ira talifusö, ’Na lö lasuna ami moloʼö Oroisa Moze, lö teʼorifi ami.’” (Hal. 15:1) Lö ifatunö khöda hadia si farahu ba agama Warizaiʼo ndra ”niha si tohare” andre ba zilalö mazui tenga. Hizaʼi, oroma wa no tedönisi lala wangera-ngerara ba agama daʼö, samorege ba woloʼö Oroisa Moze. Baero daʼö, tola manö göi lafaduhuʼö wa yaʼira zi tobali salahi ndra sinenge hegöi ira satua sokubaloi ba Yeruzalema. (Hal. 15:23, 24) Hizaʼi, hadia mbörö wa lafaso sibai ira niha Yahudi enaʼö lasuna fefu dozi sedöna tobali niha Keriso, hewaʼae no 13 fakhe  silalö itemaʼö Fetero ndra niha si tenga Yahudi bakha ba mbanua niha Keriso, simane niwaʼö Lowalangi khönia? a—Hal. 10:24-29, 44-48.

5, 6. (a) Hadia mbörö wa so ösa niha Keriso Yahudi si fatandro ba woloʼö oroisa sanandrösa ba wosuna? (b) Hadia buʼusa li ba wosuna andre no faosatö moroi ba mbuʼusa li Lowalangi khö Gaberahamo? Tutunö. (Faigi nisura ba gahe zura.)

⁵ Oya zi tobali dane-danenia. Si oföna, Yehowa samösa zotatugöi enaʼö lasuna fefu ndra matua, ba daʼö zi tobali tandra wa so gamakhaitara si tohude khönia. Fatua lö hadöi mbuʼusa li Goroisa, no mufalua wosuna andre, ba awena ba gafuriata labaliʼö daʼö sambua faosatö moroi ba Goroisa andrö. Ibörögö wamalua daʼa Aberahamo hegöi ösi nomonia. b (3 Mo. 12:2, 3) Barö Goroisa Moze, hasambalö lasuna fefu niha si fatewu fatua lö fao ira ba wangowasaini owasa nifalua nono mbanua Lowalangi, duma-dumania ba wemanga sumange Wasa. (2 Mo. 12:43, 44, 48, 49) Ba daʼa taʼila lala wangera-ngera ndra niha Yahudi, ba wamaigira raʼiö ndra matua si lö nisuna.—Yes. 52:1.

⁶ Börö daʼö, moguna wamati hegöi fangide-ngideʼö khö ndra niha Keriso Yahudi ba wamaudugö lala waʼaurira ba zindruhu sawena latema. No saʼae mufalalini mbuʼusa li Goroisa Moze faoma buʼusa li si bohou. Tobali, iraono si tumbu khö ndra niha Yahudi, lö iʼanemaiʼö tobali ono mbanua Lowalangi. Niha Keriso Yahudi si toröi ba mbanua niha Yahudi sato, simane niha Keriso ba Yudea, moguna khöra waʼabarani ba wamaduhuʼö Keriso ba latemaʼö göi ndra talifusöra si sara lala wamati si tenga Yahudi si lö nisuna.—Yer. 31:31-33; Luk. 22:20.

7. Hadia zindruhu si lö aboto ba dödö ”niha si tohare” andrö?

⁷ Tatu manö, lö si tebulö goi-goi Lowalangi. Duma-dumania, ba mbuʼusa li si bohou, so ba daʼö goi-goi moroi ba Goroisa Moze. (Mat. 22:36-40) Sanandrösa ba wosuna, imane Faulo, ”Tobali ia niha Yahudi sindruhu börö dödönia. Tödönia nisuna moloʼö eheha niʼamoniʼö, tenga börö goroisa si no tesura.” (Rom. 2:29; 5 Mo. 10:16) ”Niha si tohare moroi ba Yudea” lö aboto ba dödöra zindruhu andre ba fatandro ira wa lö irai ibulöʼö goroisania Lowalangi sanandrösa ba wosuna. Hadia omasi ira latemaʼö waʼaboto ba dödö si bohou?

8. Hana wa laʼohe gamadöniwa wosuna andre khö ndra boto solohe ba Yeruzalema?

⁸ Itohugö wangumaʼö Luka, ”Fabuʼa-buʼa [niha moroi ba Yudea andrö] khö Waulo ba khö Mbaranaba irege alua watötöisa ba gotaluara. Lahalö gangetula ira talifusö ba wamatenge Faulo, Baranaba, hegöi ira talifusö tanö böʼö khö  ndra sinenge ba satua sokubaloi ba Yeruzalema ba wanofu amadöniwa daʼa.” c (Hal. 15:2) ’Fabuʼa-buʼasa hegöi fatötöisa andrö’ zangoromaʼö wa faoma fatandro ira ba tebai laʼasiwai gamadöniwa daʼa ira talifusö ba mbanua Gandriokhia. Enaʼö lö tebulö so wahasara dödö hegöi faʼatulö, lahalö gangetula ira talifusö ba mbanua niha Keriso ba wanofu amadöniwa daʼa khö ndra ”sinenge ba satua sokubaloi ba Yeruzalema”, mazui boto solohe. Hadia zi tola tahalö khöda famahaʼö moroi khö ndra satua sokubaloi ba Gandriokhia?

9, 10. Hadia duma-duma si sökhi si tola tahalö moroi khö ndra talifusöda ba Gandriokhia, Faulo hegöi Baranaba?

⁹ Sambua wamahaʼö si sökhi si tola tahalö yaʼia daʼö moguna sibai tafaduhusi tödö organisasi Lowalangi. Angeragö daʼa: Aboto ba dödö ndra talifusö ba Gandriokhia wa fefu ndra boto solohe andrö, ira niha Keriso moroi ba soi Yahudi. Hewaʼae simanö, faduhu dödöra wa tola laʼasiwai ira boto solohe gamadöniwa sanandrösa ba wosuna andre moloʼö goi-goi Zura Niʼamoniʼö. Hadia mbörö? Faduhu dödö mbanua niha Keriso wa Yehowa zameʼe fanuturu lala moroi ba gehehania niʼamoniʼö, ba Yesu Keriso zi tobali Högö ba mbanua niha Keriso. (Mat. 28:18, 20; Ef. 1:22, 23) Na alua göi gabula dödö sebua iadaʼa, dataʼoʼö duma-duma si sökhi moroi khö ndra talifusöda ba Gandriokhia, tafaduhusi tödö organisasi Lowalangi hegöi ira Boto Solohe, yaʼia daʼö niha Keriso si no tebayoini.

¹⁰ Tefasugi göi ba dödöda wa moguna sibai wangide-ngideʼö ba faʼebolo dödö. Hewaʼae eheha niʼamoniʼö zamataro Faulo hegöi Baranaba ba wanuriaigö ba soi böʼö, hizaʼi lö laʼogunaʼö waʼabölö nibeʼe khöra andrö ba wangasiwai amadöniwa sanandrösa ba wosuna salua ba Gandriokhia. (Hal. 13:2, 3) Baero daʼö imane Faulo ba gafuriata, ”Wa möi ndraʼo ba [Yeruzalema] börö me so nifaʼeleʼö Zoʼaya”. Daʼö  zangoromaʼö wa eheha niʼamoniʼö zameʼe khönia fanuturu lala. (Gal. 2:2) Laforege göi ira satua sokubaloi iadaʼa enaʼö laʼokhögö wangide-ngideʼö ba faʼebolo dödö na alua gabula dödö si tola mamoto fahasara dödö. Moroi na fatandro ira ba niwaʼöra samösa, laʼodaligö Yehowa ba lafareso Zura Niʼamoniʼö hegöi fanuturu lala nihenaigö ndra sawuyu si lö faröi.—Fil. 2:2, 3.

11, 12. Hana wa moguna sibai tabaloi Yehowa?

¹¹ Moguna tabaloi Yehowa ba wameʼe fanuturu lala si tefaudu na so gamadöniwa salua. Datatörö tödöda ndra talifusö ba götö Waulo. Ara labalo-baloi hawaʼara iʼasiwai gabula dödö andre Yehowa, hadia moguna lasuna niha si tenga Yahudi mazui löʼö. Labaloi daʼö ofeta döfi 49 M, kira-kira 13 fakhe me no tebayoini Gonelio ba ndröfi 36 M. Hana wa ara sibai? Te omasi Lowalangi ba wameʼe inötö khö ndra niha Yahudi satulö tödö ba wamaudugö lala waʼaurira ba waʼatebulö sebua andrö. Ba sindruhu wa abua khöra wamalua daʼö. Tenga angetula side-ide ba wangasiwai buʼusa li sanandrösa ba wosuna si no mufalua sagötö zi 1.900 fakhe, nibörögö duara Aberahamo niʼomasiʼöra!—Yoh. 16:12.

¹² Sindruhu-ndruhu wa no töi sebua khöda börö me ifahaʼö ba iʼazökhi ita Amada safönu faʼebolo dödö ba sahakhö tödö! Hasambalö sökhi mbua nitemada ba mofozu lala waʼaurida. (Yes. 48:17, 18; 64:8) Börö daʼö, böi fatandro ita ba mbua gera-erada samösa mazui fabuʼa-buʼa ita na so waʼatebulö salua ba organisasi Yehowa hegöi na so waʼaboto ba dödö si bohou sanandrösa ba ayati Zura Niʼamoniʼö. (Sango. 7:8) Na tumbu ba dödöu wangera-ngera si lö sökhi, angandrö khö Yehowa ba wameʼe khöu fanuturu lala ba angerönusi goi-goi nisura ba Halöwö Zinenge faza 15 andre. d

13. Hewisa woloʼöda faʼebolo dödö Yehowa ba halöwö fanuriaigö nifaluada?

¹³ Te moguna khöda waʼebolo dödö na tafahaʼö zi samösa niha ba Zura Niʼamoniʼö, sabua ba wondröi si toʼölö ifaduhusi tödö ba agama faya mazui si fasala si toʼölö ifalua si no mowaʼa bakha ba dödönia. Ba niha simane daʼö, moguna tabeʼe khönia ginötö enaʼö mohalöwö geheha Lowalangi ba dödönia. (1 Ko. 3:6, 7) Baero daʼö, sökhi göi na taʼohe ia ba wangandrö. Oya lala si tola ifalua Lowalangi ba ginötö si tefaudu irege taʼila hadia lala sabölö sökhi ba wanolo yaʼia.—1 Yo. 5:14.

14, 15. Hewisa mbanua niha Keriso ba Gandriokhia wamosumangera Faulo, Baranaba hegöi ira talifusö tanö böʼö, ba hewisa wa tobali ira howu-howu khö ndra talifusö si sara lala wamati?

¹⁴ Itohugö wanura Luka imane, ”Me no lafasao ira banua niha Keriso irugi dalu lala, latohugö wofanö, latörö Wenisia ba Samaria. Ba daʼö, lazara-zara wanutunö hewisa me ibörögö lafosumange Lowalangi niha moroi ba soi böʼö. Me larongo daʼö, omuso dödö ndra talifusö.” (Hal. 15:3) Angetula mbanua niha  Keriso ba wamasao Faulo, Baranaba hegöi ira talifusö tanö böʼö, daʼö dandra waʼomasi sindruhu si fao famosumange ba latötöna enaʼö tefahowuʼö Waulo hegöi ira awönia tanö böʼö. Ifuli zui labeʼe khöda duma-duma si sökhi ira talifusöda ba Gandriokhia! Hadia öfosumange ndra talifusömö ba wamati ’töra-töra ndra satua sokubaloi serege tödö ba wangombakha hegöi ba wamahaʼö taromali Lowalangi’?—1 Ti. 5:17.

¹⁵ Sagötö wofanöra, ira talifusö andrö no tobali ira howu-howu khö ndra talifusö ba Wenisia hegöi Samaria me ”lazara-zara” wanutunö waö-waö salua sanandrösa ba halöwö fanuriaigö ba niha si tenga Yahudi. Ba gotaluara, te so ösa niha Keriso Yahudi soloi ba mbanua andrö me no aefa mate Zitefano tobali martir. Simane daʼö göi iadaʼa, angombakhata sanandrösa ba howu-howu nibeʼe Yehowa ba halöwö fombaliʼö nifahaʼö nifaluada, no tobali famarou dödö ndra talifusöda mendrua manö yaʼira sanaögö folohi. Hadia no öhalö khöu famahaʼö moroi ba gangombakhata andrö yaʼia na öʼondrasi gangowuloa ero migu hegöi angowuloa sebua ba öbaso waö-waö waʼauri nifaʼanö ba publikasida, he si no tercetak mazui ba jw.org?

16. Hadia zangoromaʼö wa no tobali abula dödö sebua gamadöniwa sanandrösa ba wosuna?

¹⁶ Me no mofanö ira tanö raya mato 550 kilometer, ofeta ira ba mbanua nirugira. Imane Luka, ”Me larugi Yeruzalema, latemaʼö ira banua niha Keriso, ira sinenge, hegöi ira satua sokubaloi. Ladunö-dunö hewisa me iʼogunaʼö ira Lowalangi ba wamalua hadia ia.” (Hal. 15:4) Hizaʼi, ”so ösa moroi ba agama Warizaiʼo zi no faduhu tödö, mozizio ira ba lamane, ’Moguna lasuna ira ba laʼoʼö Goroisa Mozeʼ”. (Hal. 15:5) Ba daʼa aboto ba dödöda wa no tobali amadöniwa sebua ba si lö tola löʼö muʼasiwai hadia lasuna ndra niha Keriso si tenga Yahudi mazui löʼö.

17. Haniha manö ndra boto solohe si so ba Yeruzalema, ba hadia mbörö wa so ba gotaluara ndra ”satua sokubaloi”?

¹⁷ Imane Amaedola 13:10, ”Iʼokhögö waʼatua-tua niha sangandrö mene-mene.” Tefaudu ba goi-goi si sökhi andrö, ”owulo ndra sinenge hegöi satua sokubaloi ba wamatunö amadöniwa [sanandrösa ba wosuna]”. (Hal. 15:6) ’Ira sinenge hegöi satua sokubaloi’ daʼö zosalahini banua niha Keriso maʼafefu,  simane ira Boto Solohe iadaʼa. Hadia mbörö wa falulu fohalöwö ndra ”satua sokubaloi” khö ndra sinenge? Böi olifu ita wa no mate Yakobo, ba no irai mukuru Wetero. Hadia tola alua göi zimane daʼö khö ndra sinenge tanö böʼö? Na alua zimanö, lö tebulö toföfö halöwö fondröniaʼö ba mbanua niha Keriso börö me so ndra matua tanö böʼö si no tebayoini ba satua-tua ba wangai angetula.

18, 19. Hadia niwaʼö Wetero, ba hadia rahu-rahu sinangea lahalö ira niha samondrongo?

¹⁸ Itohugö wangumaʼö Luka, ”Me oya laʼogunaʼö ginötö ba wamatunö amadöniwa andrö ba lö aetu fabuʼa-buʼa ira, mozizio Wetero imane, ’He yaʼami ira talifusö, no miʼila iʼotarai mböröta wa no ifili ndraʼo Lowalangi ba gotaluada, enaʼö larongo soi böʼö daromali sanandrösa ba duria somuso dödö ba faduhu dödöra. Ba no ifaduhuʼö ira Lowalangi sangila tödö niha, me ibeʼe khöra geheha niʼamoniʼö simane nibeʼenia khöda. Maʼifu lö ifaehusi ita khöra. Hizaʼi, ihaogö dödöra börö me mamati ira.’” (Hal. 15:7-9) Moloʼö sambua karya referensi, ngawua wehede Yunani nifoʼeluaha tobali ”fabuʼa-buʼa” ba ayati 7 tola göi mufoʼeluaha ia nifalua zi samösa niha ba ”wangalui” mazui ’ba wanofu’. Ba daʼa oroma wa so mbörö irege faböʼö-böʼö mbua gera-era ndra talifusö, ba lö labiniʼö wangombakha daʼö.

¹⁹ Fehede nifaʼema Wetero, daʼö zamasugi ba dödö niha sato wa no iʼila samösa hewisa ndra niha si tenga Yahudi siföföna si lö nisuna yaʼia daʼö Konelio hegöi ösi nomonia, tebayoini ira faoma eheha niʼamoniʼö me döfi 36 M. Börö daʼö, na lö saʼae ifaböʼö-böʼöni niha Yahudi hegöi si tenga Yahudi Lowalangi Yehowa, ba hana dania wa lö lafalua zimane daʼö niha gulidanö? Mendrua manö, sangehaogö tödö niha si faduhu tödö yaʼia daʼö famatinia khö Keriso, tenga börö woloʼönia Oroisa Moze.—Gal. 2:16.

20. Hana wa tobali ’sanandraigö Lowalangi’ ndra niha si fatandro ba wamalua oroisa sanandrösa ba wosuna?

²⁰ Teʼodane-dane ba wamaduhuʼö si tebai mufadaʼawaisi moroi ba daromali Lowalangi hegöi eheha niʼamoniʼö, ihalö rahu-rahu Fetero imane: ”Tobali, hana wa mitandraigö Lowalangi me mibeʼe noro sabua khö ndra nifahaʼö, si tebai laʼonoro ira tuada hegöi yaʼita samösa? Sindruhunia, mamati ita simane yaʼira wa hasambalö teʼorifi ita börö waʼasökhi dödö sebua moroi khö Zoʼaya Yesu.” (Hal. 15:10, 11) Niha si fatandro ba woloʼö oroisa sanandrösa ba wosuna, sindruhunia no ’latandraigö Lowalangi’, mazui moloʼö famoʼeluaha tanö böʼö ’latandraigö waʼebolo dödönia’. Omasi ira lafonoro ndra niha si tenga Yahudi ba woloʼö oroisa si tebai laʼoʼö maʼafefu ira niha Yahudi si möi börö wamunura. (Gal. 3:10) Sindruhunia menaʼö, laʼandrö saohagölö ira niha Yahudi samondrongo fehede Wetero andrö ba waʼasökhi dödö sebua niforomaʼö Lowalangi ba khö Yesu.

21. Hadia niwaʼö Waulo hegöi Baranaba irege lahalö gangetula si tefaudu ira talifusö?

²¹ Tefaudu sibai wehede Wetero andrö irege ”lö hede-hedera me larongo daʼö”. Aefa daʼö, latutunö ira Baranaba hegöi Faulo ’ngawalö dandra awö zahöli-höli dödö nifalua Lowalangi ba gotalua soi böʼö’. (Hal. 15:12) Ba gafuriata me no lafareso fefu dandra awö zalua, tola lahalö gangetula si sökhi ira sinenge awö ndra satua sokubaloi, si tefaudu ba gohitö dödö Lowalangi sanandrösa ba wosuna.

22-24. (a) Hewisa ndra Boto Solohe iadaʼa woloʼöra duma-duma ndra boto solohe me abad siföföna? (b) Hadia nifalua ndra satua sokubaloi enaʼö tefaudu moloʼö somasi Yehowa gangetula nihalöra?

 ²² Iadaʼa göi na lafalua rafe ira Boto Solohe, lafareso Daromali Lowalangi enaʼö lasöndra wanuturu lala ba laʼandrö geheha niʼamoniʼö soroi ba dödö. (Si. 119:105; Mat. 7:7-11) Enaʼö tola lahalö gangetula si tefaudu ba gohitö dödö Lowalangi, ero samösa Mboto Solohe no ara latema agenda rafe irege tola laʼangeragö ba laʼohe ba wangandrö hadia zinangea lafatunö. (Amd. 15:28) Sagötö lafalua rafe, ira talifusö nibayoini andre lö lataha-taha ba lahaogö wamaʼema bua gera-erara. Sagötö famaluara rafe andrö, asese sibai labokai Zura Niʼamoniʼö.

²³ Enaʼö göi laʼoʼö duma-duma simane daʼö ira satua sokubaloi ba mbanua niha Keriso. Na so gabula dödö sebua si tebai laʼasiwai hewaʼae no lafatunö daʼö ba rafe ndra satua sokubaloi, tola manofu ira ba gödo ndraha mazui khö zalahi si no lafataro duma-dumania ira satua samasui. Aefa daʼö, na lö laʼila labeʼe wanema li ira talifusö si so ba gödo ndraha, tola manofu ira ba lafaʼoheʼö zura khö ndra Boto Solohe.

²⁴ Sindruhu wa ifahowuʼö Yehowa niha soʼameʼegö tödö si no ifakhoi, sangoromaʼö fangide-ngideʼö, faʼalöfaröi ba sebolo tödö. Simane nitutunöda ba faza aefa daʼa, ifahowuʼö ira Lowalangi, ibeʼe khöra waʼakayo ba wamati, fahasara dödö ba mbanua niha Keriso ba faʼohahau dödö sindruhu.