1, 2. Hadia zi tohude ba wofanö nifalua Mbaranaba hegöi Saulo, ba hewisa halöwö nifaluara andrö tefaudu moloʼö nifaʼeleʼö ba Halöwö Zinenge 1:8?

 DAʼA ngaluo sahöli-höli dödö ba mbanua niha Keriso Gandriokhia. Ba gotalua zamaʼeleʼö hegöi samahaʼö ba daʼö, Baranaba hegöi Saulo nifili geheha niʼamoniʼö ba wanuriaigö turia somuso dödö ba mbanua saröu. a (Hal. 13:1, 2) Sindruhu sa, so ösa ndra matua si no irai mufatenge ba zilalö. Hizaʼi me luo daʼö, möi ndra utusan injil ba mbanua si no manema Taromali Lowalangi. (Hal. 8:14; 11:22) Iadaʼa, Baranaba hegöi Saulo, fao khöra Yohane Mareko tobali sangai halöwö, mufatenge ba mbanua si lö irai mamondrongo turia somuso dödö.

² Mato 14 fakhe silalö, no irai iwaʼö Yesu khö ndra nifahaʼönia, ”Tobali ami samaduhuʼö khögu iʼotarai Yeruzalema, Yudea ba Samaria maʼasagörö, irugi wondrege danö.” (Hal. 1:8) Me no mufataro Mbaranaba hegöi Saulo tobali utusan injil, daʼö mbörö wa alio tefalua wamaʼeleʼö niwaʼö Yesu! b

3. Hadia daha-taha na möi ba mbanua sagaröu me abad siföföna?

³ Iadaʼa, börö me so moto hegöi köfa sihombo, alio na möi ba mbanua sagaröu, tola ha sambua za mazui dua za. Hizaʼi, tenga simane daʼö me abad siföföna. Me luo daʼö, na möi ira ba mbanua sagaröu, ha latörö ahe ba sasesenia lö baga lala. Na mofanö ira ba zi maʼö-maʼökhö, ha 30 kilometer tola lakhamö, ba no marase sibai ira! c Börö daʼö, hewaʼae terou sibai dödö Mbaranaba hegöi Saulo ba wamalua halöwöra, laʼila wa moguna wamorege hegöi faʼaoha gölö ba wamalua yaʼia.—Mat. 16:24.

4. (a) Haniha zanuyu Baranaba hegöi Saulo, ba hewisa ndra talifusö si sara lala wamati ba wanemaʼö angetula andrö? (b) Hewisa ita ba wotuhini ira talifusö nibeʼe noro dödö ba wamalua halöwö ba wamati?

 ⁴ Hizaʼi, hana wa Baranaba hegöi Saulo nituyu geheha niʼamoniʼö ’nifasafi ba wamalua halöwö’? (Hal. 13:2) Lö itutunö Sura Niʼamoniʼö. Si no tatu, eheha niʼamoniʼö zanuyu yaʼira. Lö irai tabaso wa fabuʼa-bua ndra samaʼeleʼö hegöi samahaʼö ba Gandriokhia börö gangetula daʼö. Soroi ba dödöra latuhini wamataro andrö. Khalaigö hewisa dödö Mbaranaba hegöi Saulo me lö faʼafökhö dödö khö ndra talifusöra ba wamati, ”fuasö ba mangandrö ira, latufa högö niha si darua andrö ba lafatenge ira ba halöwöra”. (Hal. 13:3) Sinangea göi tatuhini ndra talifusö sanema halöwö ba wamati, simane ira matua nifataro tobali sondröniaʼö ba mbanua niha Keriso. Moroi na afökhö dödöda khöra, moguna taforomaʼö wa ’sindruhu-ndruhu taʼomasiʼö ba tafosumange ira börö halöwö nifaluara’.—1 Te. 5:13.

5. Tutunö hadia manö zalua me manuriaigö ira ba Hulo Zifirusi.

⁵ Me no mofanö ira ba Zeloikia, labua sahatö ba Gandriokhia, moloyo zui Mbaranaba hegöi Saulo ba Hulo Zifirusi, mato 200 kilometer waʼaröu. d Börö me niha Zifirusi Mbaranaba, tatu owölö-ölö sibai ia wanuriaigö turia somuso dödö ba mbanua si tumbu yaʼia. Me larugi mbanua Zalami tanö ba  gatumbukha hulo andrö, lö latiboʼö ginötöra. Iʼanemaiʼö ”laturiaigö daromali Lowalangi misa ba nahia waʼowulo niha Yahudi”. e (Hal. 13:5) Baranaba hegöi Saulo latöröi mbanua Zifirusi. Manuriaigö ira ba mbanua segebua ba zi sandrohu fofanöra. So mato 220 kilometer waʼaröu danö nitöröra!

6, 7. (a) Haniha Seregio Faulo, ba hana wa iforege Bari-Yesu wanaisi yaʼia ba wamondrondrongo turia somuso dödö? (b) Hadia nifalua Zaulo ba wolawa fanaisi moroi khö Mbari-Yesu?

⁶ Asese lafalua wamosumange faya ba Zifirusi me abad siföföna. Oroma daʼö me larugi ira Baranaba hegöi Saulo ba Wafo, banua si so ba gaekhula hulo andrö. Ba daʼö ”falukha ira samösa niha Yahudi sotöi Bari-Yesu, niha sebua elemu ba samaʼeleʼö sofaya. Mohalöwö ia khö Gubernur [mazui Prokonsul] Seregio Faulo, samösa niha satua-tua”. f Me abad siföföna, ato niha Romawi si no sekola hegöi ”niha satua-tua” simane Seregio Faulo, asese laʼandrö wanuturu lala ba niha sebua elemu ba sanahö döfi ba ginötö lahalö gangetula si tohude. Hewaʼae simanö, adöni dödö Seregio Faulo ba duria somuso dödö ba ”omasi sibai ia wamondrongo taromali Lowalangi”. Lö fatema daʼö ba dödö Mbari-Yesu, sasese mufotöi Elimasi, eluahania ”Sebua Elemu”.—Hal. 13:6-8.

⁷ Lö omasi Mbari-Yesu ba duria somuso dödö. Sambua lala nifaluania ba wolumöʼö dadaomania tobali sohalöwö khö Seregio Faulo yaʼia daʼö ”iʼalui lala enaʼö lö mamati gubernur” andrö. (Hal. 13:8) Hizaʼi, lö ilau zi lö hede-hede Saulo ba lö itehegö mangoloi dödö Seregio Faulo ba nifalua niha sebua elemu andrö. Hadia nifalua Zaulo? Imane Sura Niʼamoniʼö, ”Ihaogö itöngö [Bari-Yesu andrö] Saulo nifotöi Faulo, börö me no fahöna khönia geheha niʼamoniʼö, ba imane, ’He ono Gafökha, no fahöna khöu walimosa hegöi faʼonekhe. Udu zindruhu  ndraʼugö. Hana wa öfuyuʼö lala satulö khö Yehowa? Ba hiza, ilawa ndraʼugö tanga Yehowa. Tobaliʼö niha sauʼa ba lö öʼila haga luo mato hawaʼara.’ Ba ginötö daʼö, iʼanemaiʼö molawuo hörönia ba ogömi. Ifuta-futa ia wangalui niha sololohe tangania.” g Hadia lua-luania dandra sahöli-höli dödö andrö? ”Faduhu dödö gubernur me iʼila zalua andrö börö waʼahöli-höli dödönia ba wamahaʼö Yehowa.”—Hal. 13:9-12.

8. Hewisa woloʼöda duma-duma waʼabarani Waulo iadaʼa?

⁸ Lö ataʼu Waulo khö Mbari-Yesu. Simane daʼö göi, böi mangiwa dödöda na so niha samadaö samorege ba wamangiwa famati niha sadöni tödö ba zindruhu. Tatu moguna ’tahaogö wehededa hulö nilau asio, enaʼö sökhi wamondrongo’. (Kol. 4:6) Hizaʼi, taforege göi wanolo niha sadöni tödö enaʼö lö tebulö lafahaʼö ira sanandrösa khö Yehowa hewaʼae so niha sanaisi yaʼira. Lö ataʼu ita wamatunö famahaʼö agama faya, ’samuyuʼö lala satulö khö Yehowa’ simane nifalua Bari-Yesu. (Hal. 13:10) Simane Faulo, yalöʼataʼu ita wamaʼema sindruhu ba taforege wamarou tödö niha satulö tödö. Hewaʼae lö oroma sibai wanolo Yehowa yaʼita, tenga simane salua khö Waulo, faduhu dödöda wa hasambalö iʼogunaʼö gehehania Yehowa ba wondröni niha ba zindruhu.—Yoh. 6:44.

9. Hewisa Waulo hegöi Baranaba tobali duma-duma si sökhi khö ndra talifusö nibeʼe noro dödö ba mbanua niha Keriso iadaʼa?

⁹ So waʼatebulö salua me laröi Wafo ba moloyo ira ba Werege, tanö ba Asia Kecil, mato 250 kilometer waʼaröu na mutörö nasi. Ba Halöwö Zinenge 13:13, mufotöi ngawawa andrö ’Faulo hegöi ira awönia’. Te Faulo iadaʼa zondröniaʼö halöwö nifaluara. Hizaʼi, lö nisura ba Zura Niʼamoniʼö wa afökhö dödö Mbaranaba khö Waulo. Lö tebulö falulu fohalöwö ira ba wamalua ohitö dödö Lowalangi. Faulo hegöi Baranaba, tobali ira duma-duma si sökhi khö ndra talifusö  nibeʼe noro dödö ba mbanua niha Keriso iadaʼa. Moroi na fahindri ira wolohi dadaoma si tohude, niha Keriso moguna latörö tödöra wehede Yesu, ”Si fatalifusö ami fefu.” Imane nasa, ”Haniha zangebuaʼö yaʼia daʼö niʼide-ideʼö, ba haniha zangide-ngideʼö yaʼia daʼö niʼebuaʼö.”—Mat. 23:8, 12.

10. Tutunö hewisa wofanöra moroi ba Werege numalö ba Gandriokhia Wizidia.

¹⁰ Me larugi Werege, mangawuli Yohane Mareko ba Yeruzalema, iröi Waulo hegöi Baranaba. Lö itutunö Sura Niʼamoniʼö hadia mbörö wa mofanö ia. Latohugö wofanöra Faulo hegöi Baranaba, iʼotarai Werege numalö ba Gandriokhia ba Wizidia, sambua mbanua ba provinsi Galatia. Tenga fofanö saoha daʼa, börö me ba hili so mbanua Gandriokhia Wizidia, faʼalawania 1.100 meter iʼotarai dete nasi. Ato sibai zorabu ba lala si numalö ba daʼö. Inönö nasa me luo daʼö, te mofökhö Waulo. h

11, 12. Me fahuhuo Waulo ba nahia waʼowulo ba Gandriokhia Wizidia, hewisa wamarounia tödö niha sangondrasi?

¹¹ Ba Gandriokhia Wizidia, möi Waulo hegöi Baranaba ba nahia waʼowulo ba ngaluo Sabato. Imane ba Zura Niʼamoniʼö, ”Me no aefa mubaso nösi Goroisa Moze hegöi Nisura Ndra Samaʼeleʼö, laʼoroisi khöra ira sondröniaʼö ba nahia waʼowulo, ’Yaʼami ira talifusö, na so wehede si möi famarou dödö, tola mifaʼema.’” (Hal. 13:15) Mosindro Waulo ba fahuhuo ia.

¹² Ibörögö fahuhuo Waulo ba iʼowai niha sangondrasi, ”Yaʼami ira talifusö, iraono Gizaraʼeli hegöi niha böʼö sangataʼufi Lowalangi.” (Hal. 13:16) Samondrongo fehede Waulo andrö yaʼia daʼö niha Yahudi hegöi proselit. Hewisa wangainia tödöra hewaʼae na lö faduhu dödöra ba halöwö nifalua Yesu ba wangoʼozui ohitö  dödö Lowalangi? Si oföna, itutunö waö-waö niha Yahudi. Itutunö hewisa me ’iʼalawaʼö ira Yehowa me fatewu ira ba danö Miserai’, ba hewisa me ”itaha wönunia khöra me so ira ba danö si mate” ba zi 40 fakhe waʼara me no aefa iʼefaʼö ira ba Miserai. Itutunö göi hewisa waʼamofozu ndraono Gizaraʼeli ba worabu Tanö Amabuʼula ba hewisa ’wombagi Yehowa tanö andrö tobali ondröita’. (Hal. 13:17-19) So zangumaʼö wa huhuo nifaʼema Waulo moʼamakhaita ia ba ayati sawena mubaso si tobali faosatö moroi ba gowasa Sabato. Na atulö daʼö, ba daʼö oroma wa ’iforege wamalua hadia ia Faulo enaʼö teʼorifi fefu niha’.—1 Ko. 9:22.

13. Hewisa enaʼö adöni dödö niha ba duria nifaʼemada?

¹³ Moguna taforege enaʼö adöni dödö niha ba duria nifaʼemada. Duma-dumania, na taʼila hadia agama zi samösa niha, tola tobali fanoloda daʼö ba wamili tuho sadöni dödönia. Baero daʼö, tola göi tabaso ayati sasese irongo. Te abölö sökhi na taʼandrö khö zokhö omo ba wombaso ayati moroi ba Zura Niʼamoniʼö-nia samösa. Alui lala enaʼö adöni dödö niha si fahuhuo khömö.

14. (a) Hewisa me ibörögö Faulo wanutunö turia somuso dödö sanandrösa khö Yesu, ba hadia wamangelama nibeʼenia? (b) Hewisa niha sato me larongo wehede Waulo?

¹⁴ Aefa daʼö, itutunö Faulo hewisa ngaʼötö razo-razo Gizaraʼeli aekhu ia khö zi ’samösa sangorifi, yaʼia daʼö Yesu’, si no ibörögö itutunö Yohane Samayagö Idanö. Itutunö göi hewisa me labunu Yesu ba tesusugi ia ba gotalua niha si no mate. (Hal. 13:20-37) Imane Faulo, ”Yaʼami ira talifusö, uʼombakhaʼö khömi wa lö hadöi sangefaʼö sala baero ia, ba börö ia wa satulö lawaʼö fefu zi faduhu tödö khönia.” Aefa daʼö, ifangelama ira Faulo, ”Miʼangelama enaʼö lö alua khömi Nisura Ndra Samaʼeleʼö: ’Yaʼami sangoʼaya niha böʼö, mifaigi atö, yaʼahöli-höli dödömi, ba yatekiko ami, börö me so nifaluagu ba götömi andre si lö faduhu dödömi hewaʼae lazara-zara wanutunö khömi.’” Sindruhu-ndruhu wa möi ba dödö zato me larongo wehede Waulo andrö. Imane Sura Niʼamoniʼö, ”Laʼandrö khöra enaʼö lafuli zui latutunö daʼö na luo Sabato.” Baero daʼö, me no awai gangowuloa ba nahia andrö, ”ato niha Yahudi hegöi si no faböbö ba agama Yahudi zamosumange Lowalangi, laʼoʼö Waulo hegöi Baranaba”.—Hal. 13:38-43.

15. Hadia zalua ba ngaluo Sabato aefa daʼö?

¹⁵ Ba luo Sabato aefa daʼö, ”arakhagö fefu niha ba mbanua andrö” owulo ira ba wamondrondrongo nifaʼema Waulo. So ösa niha Yahudi si lö omasi ba daʼö ba ”fadaʼawa ira ba wehede Waulo irege laʼoʼaya Lowalangi”. Hewaʼae simanö, lö ataʼu Waulo hegöi Baranaba wangumaʼö, ”Sindruhu wa khömi zi oföna muʼombakhaʼö daromali Lowalangi. Hizaʼi, börö me lö mitemaʼö ia ba no miʼoromaʼö wa tenga sinangea misöndra waʼauri si lö aetu, andrö wa maturiaigö ba soi böʼö. No iwaʼö khöma Yehowa, ’Ubaliʼö ndraʼugö haga ba soi fefu, enaʼö öʼohe wangorifi irugi ba wondrege danö misa.’”—Hal. 13:44-47; Yes. 49:6.

16. Hewisa dödö niha Yahudi ba wehede nifaʼema ndra utusan injil andrö, ba hadia nifalua Waulo hegöi Baranaba ba daʼö?

 ¹⁶ Me larongo daʼö ira niha si tenga Yahudi, omuso dödöra ba ”ibörögö faduhu dödö niha si sökhi amuata somasi manöndra faʼauri si lö aetu”. (Hal. 13:48) Iʼanemaiʼö tefazaewe daromali Yehowa ba zi sagörö banua andrö. Hizaʼi, faehu sibai nifalua ndra niha Yahudi. Lafatunö khöra ira utusan injil andrö wa hewaʼae na khöra ziföföna mufaʼema daromali Lowalangi, hizaʼi no latimbagö Mesia ba daʼö mbörö wa latema wanguhuku moroi khö Lowalangi. Maoso niha Yahudi lafaweʼe ndra matua hegöi ira alawe si tehöngö ba mbanua andrö irege ”lafakao Waulo hegöi Baranaba ba lafofanö ira ba mbanua daʼö”. Hadia nifalua Waulo hegöi Baranaba? ”Laʼanotogö gawu-gawu ba gahera si tobali famangelama ba mbanua andrö, aefa daʼö mofanö ira ba Ikoniu.” Hadia lö saʼae niha Keriso ba Gandriokhia Wizidia? Tatu manö so! ”Fahöna waʼomuso dödö hegöi eheha niʼamoniʼö khö ndra nifahaʼö” si toröi ba daʼö.—Hal. 13:50-52.

17-19. Hewisa woloʼöda duma-duma Waulo hegöi Baranaba, ba hewisa wa möi fonönö waʼomuso dödöda daʼö?

¹⁷ So wamahaʼö si sökhi khöda moroi ba nifalua ndra niha si lö faröi andre ba wanaögö folohi. Lö tabato wanuriaigö hewaʼae so niha si tehöngö ba gulidanö andre zanaisi halöwö fanuriaigö nifaluada. Nehegö nifalua Waulo hegöi Baranaba me lö lafondrondrongo ira niha Gandriokhia duria nifaʼemara, ”laʼanotogö gawu-gawu ba gahera”. Tenga daʼö geluahania wa mofönu ira, hizaʼi eluahania tenga saʼae khöra dania tezofu-zofu na so zalua. Aboto ba dödö ndra utusan injil andre wa tebai latatugöi nifalua niha. Si tola latatugöi yaʼia daʼö lafili wa lö laböhöli wanuriaigö. Sindruhu sa, lö laböhöli wanuriaigö sagötö fofanöra ba Ikoniu!

¹⁸ Hewisa ndra nifahaʼö si toröi ba Gandriokhia? Toröi ira ba mbanua si lö manemaʼö turia somuso dödö. Hizaʼi, faʼomuso dödöra lö teʼodaligö ba niha sanemaʼö turia nifaʼemara. Imane Yesu: ”Nifahowuʼö yaʼia daʼö, samondrongo ba samalua taromali Lowalangi!” (Luk. 11:28) Daʼö gangetula ndra nifahaʼö si toröi ba Gandriokhia Wizidia.

¹⁹ Simane Faulo hegöi Baranaba, datatörö tödöda wa halöwöda yaʼia daʼö ba wanuriaigö turia somuso dödö. Angetula ba wanemaʼö mazui ba wanimbagö turia andrö, so ba danga niha samondrongo. Na so niha si lö manemaʼö turia somuso dödö nifaʼemada, tola tafahaʼö ita moroi khö ndra nifahaʼö me abad siföföna. Na taʼandrö saohagölö ba zindruhu nitemada, ba tatehegö ibeʼe khöda wanuturu lala Sura Niʼamoniʼö, tola tarasoi waʼomuso dödö hewaʼae so wolohi.—Gal. 5:18, 22.