1, 2. Hadia manö zalua me so Waulo hegöi Baranaba ba Lisitera?

 KALIRU niha mbanua Lisitera. So samösa ndra matua sombuyu-mbuyu ahe iʼotarai me tumbu tola saʼae manaoka-naoka ia ba waʼomuso dödö me no lafadöhö ia si darua niha si lö iʼila. Ahöli-höli dödö niha sangila, ba so samösa gere solohe takula moroi ba mbulu geu khö zi darua niha si hulö Lowalangi ba wamaigi niha sato andrö. Mogele-gele zawi si matua me arakhagö ifahö ira ere khö Zeo. Mofönu Waulo hegöi Baranaba. Lasika nukhara ba möi ira ba gotalua niha sato, laforege wanaha enaʼö lö lafosumange ira.

² Aefa daʼö, tohare niha Yahudi samadaö moroi ba Gandriokhia Wizidia hegöi Ikoniu. Si fao faʼafökhö dödö, lafaweʼe niha sato si so ba Lisitera. Lua-luania, niha somasi mamosumange Faulo ba wamobörö, iadaʼa latebu ia kara irege arakhagö mate. Me no lafalua wönura, lasöbi Waulo baero mbanua börö me lawalinga no mate.

3. Hadia manö wanofu nitutunöda ba faza daʼa?

³ Hewisa wa tola alua gabula dödö andre? Moroi ba zalua khö Mbaranaba, Faulo hegöi ono mbanua Lisitera si hulö mbulu gae hili, hadia wamahaʼö nihalö ndra sanuriaigö iadaʼa? Ba hewisa ndra satua sokubaloi ba woloʼö duma-duma Mbaranaba hegöi Faulo si lö faröi ba sanau ölö wamalua halöwöra, ’si lö faʼataʼu ba wahuhuosa, börö waʼabölö moroi khö Yehowa’?—Hal. 14:3.

4, 5. Hana wa möi Waulo hegöi Baranaba ba Ikoniu, ba hadia zalua ba daʼö?

⁴ Mato hauga hari ba zilalö, mofanö Waulo hegöi Baranaba laröi mbanua Romawi Gandriokhia Wizidia me no laʼasogö khöra wangabu dödö ira niha Yahudi ba daʼö. Lö ide-ide dödöra, hizaʼi ”laʼanotogö gawu-gawu ba gahera” ba mbanua si lö manemaʼö yaʼira andrö. (Hal. 13:50-52; Mat. 10:14) Mofanö Waulo hegöi Baranaba si fao faʼahono dödö ba latehegö enaʼö latema wanguhuku moroi khö Lowalangi ira  samadaö andrö. (Hal. 18:5, 6; 20:26) Ira utusan injil si darua andre, omuso dödöra ba latohugö wanuriaigö turia somuso dödö. Me no mofanö ira mato 150 kilometer tanö raya gatumbukha, ofeta ira ba danö sohili satabö sinanö, ba gotalua Hili Taurus hegöi Hili Sultan.

⁵ Ba wamobörö, möi Waulo hegöi Baranaba ba Ikoniu, banua si tehöngö börö zasese lafalua ira niha Yahudi ba daʼö, ba sambua banua si tohude ba provinsi Galatia. a Ba mbanua daʼö, so niha Yahudi si tehöngö ba ato proselit si tenga niha Yahudi. Simane sasese lafalua, möi Waulo hegöi Baranaba ba nahia waʼowulo ba ibörögö manuriaigö ira. (Hal. 13:5, 14) ”Sökhi sibai huhuora irege ato niha Yahudi hegöi Yunani zi faduhu tödö.”—Hal. 14:1.

6. Hana wa tobali samahaʼö si sökhi Waulo hegöi Baranaba, ba hewisa woloʼöda duma-dumara?

⁶ Hana wa sökhi sibai lagu wahuhuosa Waulo hegöi Baranaba? Oya waʼaboto ba dödö niʼokhögö Waulo sanandrösa ba Zura Niʼamoniʼö. Onekhe ia wangogunaʼö sejarah, famaʼeleʼö hegöi Oroisa Moze ba wamaduhuʼö wa Yesu andrö Mesia nifabuʼu. (Hal. 13:15-31; 26:22, 23) Baranaba göi, iʼameʼegö tödö sibai niha böʼö. (Hal. 4:36, 37; 9:27; 11:23, 24) Lö laʼodaligö waʼatua-tuara samösa, hizaʼi fahuhuo ira börö ’waʼabölö moroi khö Yehowa’. Hewisa woloʼömö duma-dumara ba halöwö fanuriaigö? Falua daʼa: Forege enaʼö aboto ba dödömö nösi Zura Niʼamoniʼö. Alui ayati sadöni dödö niha samondrongo. Alui hadia lala si tola öfalua ba wondrara dödö niha nituriaigömö. Ba böi tebulö fodane-dane wamahaʼö nifaʼemamö ba Daromali Yehowa, tenga faʼatua-tuamö samösa.

7. (a) Hadia nifalua niha sato me larongo duria somuso dödö? (b) Na faböʼö nifaduhusimö tödö moroi ba nösi nomomö börö me ötemaʼö duria somuso dödö, hadia zi tebai öʼolifugö?

⁷ Hizaʼi, lö fefu niha Ikoniu omuso dödöra me larongo nifaʼema Waulo hegöi Baranaba. Imane Luka, ”Ira niha Yahudi si lö faduhu tödö, lafaweʼe niha sato moroi ba soi böʼö enaʼö latandrawaisi ndra talifusö andrö.” Aboto ba dödö Waulo hegöi Baranaba wa moguna toröi ira ba laʼoʼawögö duria somuso dödö, ba ’oya ginötö niʼogunaʼöra ba wahuhuosa si fao faʼabarani’. Lua-luania, ”tebagi dua mbanua andrö. So zi faʼawö ba niha Yahudi, ba so göi zi faʼawö khö ndra sinenge”. (Hal. 14:2-4) Iadaʼa, simane daʼö nirasoi niha sato ba duria somuso dödö. So ösa zangumaʼö wa turia somuso dödö andrö umbu wahasara dödö; so göi zangumaʼö wa daʼö zamoto fahasara dödö. (Mat. 10:34-36) Na faböʼö nifaduhusimö tödö moroi ba nösi nomomö börö me ötemaʼö duria somuso dödö, törö tödöu wa sasesenia alua wanaisi börö me larongo duria si lö atulö mazui fangobousi sanandrösa khöda. Amuatamö si sökhi zi tobali fangokafu irege samuza inötö dania alulu dödöra.—1 Fe. 2:12; 3:1, 2.

8. Hana wa mofanö Waulo hegöi Baranaba laröi Ikoniu, ba hadia wamahaʼönia khöda?

⁸ Lö ara aefa daʼö, ira samadaö ba Ikoniu, laʼera-era ba wanebu kara Baranaba hegöi Faulo. Me no larongo daʼö, lahalö gangetula ira utusan injil si  darua andre, mofanö ira ba mbanua tanö böʼö ba latohugö wanuriaigö ba daʼö. (Hal. 14:5-7) Lafalua göi zimane daʼö ira sanuriaigö iadaʼa. Na so niha sanandrawaisi nifaʼemada, moguna fahuhuo ita si fao faʼabarani. (Fil. 1:7; 1 Fe. 3:13-15) Hizaʼi na so zamaʼala faʼaurida, abölö sökhi na mofanö ita moroi ba daʼö moroi na teʼala waʼaurida mazui ira talifusöda.—Amd. 22:3.

9, 10. Hezo gametahö so mbanua Lisitera, ba hadia zaboto ba dödöda sanandrösa ba niha si toröi ba daʼö?

⁹ Möi Waulo hegöi Baranaba ba Lisitera, sambua mbanua nifatörö Romawi mböröta mato 30 kilometer tanö raya gaekhula Ikoniu. Aro sibai gamakhaita mbanua Lisitera ba mbanua Gandriokhia Wizidia, hizaʼi lö ato niha Yahudi ba Lisitera. Hewaʼae na ato zi toröi ba daʼö sangila li Yunani, li sasese laʼogunaʼö yaʼia daʼö li Likaonia. Te börö me lö nahia waʼowulo ba daʼö, andrö wa manuriaigö Waulo hegöi Baranaba ba nahia sato niha. Me so Wetero ba Yeruzalema, no irai ifadöhö ndra matua sombuyu-mbuyu töla iʼotarai me tumbu. Me so göi Waulo ba Lisitera, ifadöhö ndra matua sombuyu-mbuyu ahe iʼotarai me tumbu. (Hal. 14:8-10) Börö dandra sahöli-höli dödö nifalua Wetero, ato niha si faduhu tödö. (Hal. 3:1-10) Hizaʼi, tenga simane daʼö zalua me ifalua dandra sahöli-höli dödö Faulo.

¹⁰ Simane nitutunöda ba wamobörö faza andre, me manaoka-naoka ba mofanö ndra matua sombuyu-mbuyu ahe andrö, fasala lala wangera-ngera niha si lö faduhu tödö ba Lisitera. Labeʼe töi Mbaranaba Zeo, lowalangi sabölö ebua nifosumangera, ba Faulo lafotöi Heremesi, ono Zeo ba salahi ndra lowalangira ba wahuhuosa. (Faigi kotak ” Banua Lisitera ba Famosumange Zeo hegöi Heremesi.” ) Hewaʼae simanö, iforege Baranaba hegöi Faulo ba wameʼe faʼaboto ba dödö ba niha sato andrö wa fehede nifaʼemara hegöi faʼabölö nitemara tenga moroi khö lowalangi faya, hizaʼi moroi khö Yehowa, Lowalangi sindruhu si ha samösa.—Hal. 14:11-14.

11-13. (a) Hadia niwaʼö Waulo hegöi Baranaba ba niha mbanua Lisitera? (b) Hadia wamahaʼö siföföna nihalöda moroi ba wehede Waulo hegöi Baranaba?

¹¹ Ba höngö-höngö waʼakaliru andre, iforege nasa Faulo hegöi Baranaba enaʼö aboto ba dödö niha sato geluaha wehedera. Moroi ba zalua andre, isura Luka lala wanuriaigö ba niha si lö faduhu tödö. Nehegö wehede Waulo hegöi Baranaba ba wamarou tödö niha samondrongo, lamane, ”Hana wa mifalua daʼa? Yaʼaga göi niha si lö moʼahonoa simane yaʼami. Maturiaigö khömi duria somuso dödö, enaʼö miröi ngawalö zi tobali zaya-zaya gölö andre ba mifosumange Lowalangi sauri samazökhi banua si yawa, tanö, asi, ba ösinia maʼafefu. Me mböröta, itehegö ba soi niha fefu wanörö lalara zamösana, hewaʼae lö tebulö ia ba wamaduhuʼö sanandrösa khönia ba ifalua zi sökhi yaʼia daʼö ibeʼe khömi deu hegöi baŵa wamasi, ba iʼabusoiʼö ami faoma ö si möi fangomuso dödömi.”—Hal. 14:15-17.

¹² Hadia wamahaʼö nihalöda moroi ba wehedera si möi famarou dödö andrö? Si oföna, Faulo hegöi Baranaba lö lawaʼö tödöra wa abölö tohude ira moroi ba niha sato. Lö laʼosipade. Si fao fangide-ngideʼö lafaduhuʼö wa yaʼira göi niha si lö moʼahonoa, fagölö simane niha si lö faduhu tödö andrö. Sindruhu sa, Faulo hegöi Baranaba no latema geheha niʼamoniʼö ba no teʼefaʼö ira moroi ba wamahaʼö faya. No göi tebeʼe khöra mbuala yaʼia daʼö tötönafö ba wamatörö awö Keriso ba zorugo. Hewaʼae  simanö, aboto ba dödöra wa tola göi laʼokhögö mbuala simane daʼö ira niha Lisitera na laʼoʼö Keriso.

¹³ Hewisa ita ba niha nifalukhaisida ba wanuriaigö? Hadia tawaʼö tödöda wa fagölö ira khöda? Ba ginötö tatolo niha böʼö ba wamahaʼö yaʼira ba zindruhu si so ba Zura Niʼamoniʼö, hadia taʼoʼö duma-duma Waulo hegöi Baranaba, lö taʼalui lala enaʼö lasuno-suno ita? No ibeʼe khöda duma-duma si sökhi talifusöda Charles Taze Russell, samösa samahaʼö si sökhi sangagö föna ba wamalua halöwö fanuriaigö ba gafuriata abad si 19 ofeta ba wamobörö abad si 20. Imane talifusöda Charles, ”Lö omasiga nizuno-zuno mazui nifosumange, he khöma samösa mazui ba nisurama; lö omasiga lakaoni khöma Bapak Pendeta mazui Samahaʼö.” Fangide-ngideʼö nifalua dalifusöda Russell, daʼö zangoromaʼö wa no iʼoʼö nifalua Waulo hegöi Baranaba. Simane daʼö göi, ohitö dödöda wamalua halöwö fanuriaigö tenga enaʼö tefolakhömi ita, hizaʼi ba wanolo niha enaʼö lafosumange ”Lowalangi sauri”.

14-16. Hadia wamahaʼö si dua hegöi si tölu nihalöda ba wehede Waulo hegöi Baranaba ba niha mbanua Lisitera?

¹⁴ Nehegö wamahaʼö si dua nihalöda ba wehede andrö. Faulo hegöi Baranaba aoha khöra ba wamaudugö fehedera. Tenga simane niha Yahudi hegöi proselit si so ba Ikoniu, niha Lisitera ambö khöra faʼatua-tua mazui lö khöra faʼaboto ba dödö sanandrösa ba Mbuku Niʼamoniʼö hegöi amakhaita Lowalangi ba ndraono Gizaraʼeli. Hewaʼae simanö, niha samondrondrongo huhuo Waulo hegöi Baranaba, yaʼira niha danö. Baga cuaca ba Lisitera ba atabö zinanö. Niha si so ba daʼö, tola laʼila dandra sangoromaʼö amuata Zomböi, soroma moroi ba ngawalö ginötö mazui baŵa sangaʼasogö bua zinanö soya sibai. Laʼogunaʼö daʼa ira utusan injil andrö si tobali dela enaʼö tola fahuo-huo ira.—Rom. 1:19, 20.

¹⁵ Hadia tola göi taforege ba wamaudugö fehede hegöi nifaluada? Hewaʼae fagölö danömö nitanö zi samösa niha ba zi hauga nahia, moguna faböʼö-böʼö nifaluania ba wangehenaigö tanö andrö. So danö si sökhi si no tohöna mufohokha ba tola iʼanemaiʼö mutanö zinanö ba daʼö. So göi danö sabeʼe si lö tola löʼö mufaku. Simanö göi, fagölö danömö nitanöda, yaʼia daʼö turia somuso dödö moroi ba Daromali Lowalangi. Na taʼoʼö nifalua Waulo hegöi Baranaba, eluahania taforege ba wangila salua khöra hegöi agamara ba zilalö. Na no aboto ba dödöda daʼö, taʼila tafaudugö lala wamaʼemada turia somuso dödö.—Luk. 8:11, 15.

¹⁶ So wamahaʼö si tölu nihalöda moroi ba zalua khö Waulo, Baranaba hegöi niha mbanua Lisitera. Hewaʼae no taforege ba wananö tanömö zinanö, itaria so danömö zinanö niʼa wofo mazui saekhu ba dete gara. (Mat. 13:18-21) Na alua daʼö, böi ide-ide dödömö. Ifasugi ba dödö ndra nifahaʼö si so ba Roma Faulo wa ”tezofu-zofu dania khöda zamösana [farahu ba daʼö niha nifahaʼöda ba Zura Niʼamoniʼö], yaʼita zanema li föna Lowalangi”.—Rom. 14:12.

17. Me no laröi mbanua Derebe, hezo möi Waulo hegöi Baranaba, ba hadia mbörö?

¹⁷ Me no aefa ladöni Waulo baero ba mbanua Lisitera ba lawalinga no mate, owulo ndra nifahaʼö ba zi fasuinia irege mosindro Waulo ba mörö ia sara wongi ba mbanua daʼö. Mahemolunia, mofanö ia hegöi Baranaba 100 kilometer waʼarou numalö ba Derebe. Tola takhalaigö hawaʼabua ba hawaʼamarase Waulo ba lala, mendrua manö me bohou latebu ia kara. Hizaʼi lö awuwu ia hegöi Baranaba, ba me no larugi Derebe, ”ato niha nitolora tobali nifahaʼö”. Aefa daʼö, me mangawuli ira ba Gandriokhia Siria, lö latörö lala foto, hizaʼi latörö mbanua ”Lisitera, Ikoniu, ba Andriokhia [Wizidia]”. Hadia mbörö? ’Ba wangaʼaroʼö dödö ndra nifahaʼö enaʼö lö tebulö ira ba wamati’. (Hal. 14:20-22) No sahöli-höli dödö duma-duma nibeʼe ndra matua si darua andre! Abölö laʼofönaiʼö zoguna ba mbanua niha Keriso moroi ba zoguna khöra samösa. No laʼoʼö duma-duma simane daʼö ira satua samasui hegöi utusan injil iadaʼa.

18. Hadia zi tefarahu ba wamataro ira satua sokubaloi?

¹⁸ Me no lafarou dödö ndra nifahaʼö moroi ba wehede hegöi nifaluara, Faulo hegöi Baranaba ”lafataro ndra satua sokubaloi ero sambu-sambua banua niha Keriso”. Hewaʼae na ”nifatenge eheha niʼamoniʼö” ira ba wamalua halöwö utusan injil, hizaʼi lö tebulö mangandrö ba fuasö ira ba ginötö ”latouʼö ba danga Yehowa ndra satua sokubaloi andrö”. (Hal. 13:1-4; 14:23) Lafalua göi zimane daʼö iadaʼa. Fatua lö mufataro zi samösa niha, mangandrö ndra satua sokubaloi ba lafaigi hadia no iʼoʼö goi-goi Zura Niʼamoniʼö si samösa niha si lö tola löʼö ifalua satua sokubaloi. (1 Ti. 3:1-10, 12, 13; Tit. 1:5-9; Yak. 3:17, 18; 1 Fe. 5:2, 3) Hewaʼae no ara tobali Samaduhuʼö Yehowa zi samösa niha, tenga daʼö zotatugöi wa no sinangea tobali ia satua sokubaloi. Moroi ba wehede, amuata hegöi töi si sökhi niʼokhögönia, daʼö zangoromaʼö wa no mohalöwö geheha niʼamoniʼö ba waʼaurinia. Na no iʼoʼö goi-goi Zura Niʼamoniʼö si lö tola löʼö ifalua si samösa sondröniaʼö, daʼö zotatugöi hadia tola tobali satua sokubaloi zi samösa niha mazui löʼö. (Gal. 5:22, 23) Satua samasui nibeʼe noro dödö ba wamataro ira satua sokubaloi.—Fatimbaisi 1 Timoteo 5:22.

19. Hadia zinangea laʼonorogö tödö ira satua sokubaloi, ba hewisa woloʼöra duma-duma Waulo hegöi Baranaba?

¹⁹ Aboto ba dödö ndra satua sokubaloi wa yaʼira zameʼe li föna Lowalangi hewisa wondröniaʼöra banua niha Keriso. (Heb. 13:17) Simane Faulo hegöi Baranaba, ira satua sokubaloi zangagö föna ba wamalua halöwö fanuriaigö. Lafarou dödö ndra talifusö moroi ba wehedera. Ba abölö laʼofönaiʼö zoguna ba mbanua niha Keriso moroi ba zoguna khöra samösa.—Fil. 2:3, 4.

20. Hadia mbuania khöda na tabaso waö-waö waʼalöfaröi ndra talifusöda?

²⁰ Ba gafuriata me mangawuli Waulo hegöi Baranaba ba nahia waʼatoröira ba Gandriokhia Siria, ”latutunö hewisa me iʼogunaʼö ira Lowalangi ba wamalua hadia ia, ba hewisa me ibokai lala ba soi böʼö enaʼö mamati ira”. (Hal. 14:27) Na tabaso waö-waö waʼalöfaröi ndra talifusöda ba taʼila hewisa wamahowuʼö Yehowa nifaluara, itugu tefarou dödöda enaʼö ’lö khöda faʼataʼu ba wahuhuosa börö waʼabölö moroi khö Yehowa’.