1, 2. Hewisa wamorege nifalua nudu ba wanaisi turia somuso dödö me abad siföföna tobali abula dödöra mangawuli?

 NO ALUA wolohi sabölö-bölö ba ibörögö ”wamakao” banua niha Keriso Saulo. Eluaha ngawua wehede daʼö ba li sindruhunia yaʼia daʼö faʼalösökhi si fao faʼabao dödö. (Hal. 8:3) Ahori moloi fefu ndra nifahaʼö, ba hulö mofozu gohitö dödö Zaulo ba wangohori ira niha Keriso. Hizaʼi, so mbua si lö mudöna-döna ba waʼamuzawili niha Keriso andrö. Hadia daʼö?

² Ira niha Keriso si no muzawili andrö, ibörögö ”laturiaigö duria somuso dödö moroi ba daromali Lowalangi” ba mbanua nirugira. (Hal. 8:4) Khalaigö atö! Hewaʼae so wolohi, lö tobali taha-taha daʼö ba wanuriaigö turia somuso dödö. Folohi andrö mbörö wa itugu ato niha samondrongo! Börö me no muzawili ndra nifahaʼö, amaedola no lalului ira niha si faʼudu ba wanuriaigö turia mbanua Lowalangi ba mbanua sagaröu misa. Simane niʼilada dania, alua göi zimane daʼö ba götöda iadaʼa.

3. (a) Haniha Wilifo andrö? (b) Hana wa ato niha Zamaria si lö irai mamondrongo turia somuso dödö, ba hadia nifaʼeleʼö Yesu salua ba daʼö?

³ Ba gotalua ”niha si no muzawili”, farahu ba daʼö Wilifo. a (Hal. 8:4; faigi kotak ” Filifo ’Samösa Sanuriaigö.’”) Möi ia ba Zamaria, sambua banua sebua sato niha si lö irai mamondrongo turia somuso dödö, börö me no irai iwaʼö Yesu khö ndra sinenge me luo daʼö, ”Böi miʼaeʼe . . . ba mbanua niha Zamaria. Ba ndraono Gizaraʼeli manö miʼaeʼe si hulö mbiri-biri selungu.” (Mat. 10:5, 6) Hewaʼae simanö, iʼila Yesu wa ba gafuriata larongo duria somuso dödö ira niha Zamaria, börö me no irai iwaʼö fatua lö mangawuli ia ba zorugo, ”Tobali ami samaduhuʼö khögu iʼotarai Yeruzalema, Yudea ba Samaria maʼasagörö, irugi wondrege danö.”—Hal. 1:8.

4. Hewisa wanemaʼö niha Zamaria duria nifaʼema Wilifo, ba hadia mbörö?

 ⁴ Iʼila Filifo wa no ”aʼusö [mbanua Zamaria] ba tola mubasi”. (Yoh. 4:35) Turia niʼohenia tobali fangomuso dödö niha si toröi ba daʼö, ba taʼila hadia mbörö. Barö daʼa, lö fahede niha Yahudi khö ndra niha Zamaria, ba ato niha Yahudi sangosiwawöi yaʼira. Hizaʼi, lawaʼö tödöra ira niha Zamaria wa turia somuso dödö andrö lö ifaböʼö-böʼöni niha. Faböʼö sibai daʼö ba lala wangera-ngera ndra Farizaiʼo samaböʼö-böʼöni niha. Börö me owölö-ölö Wilifo wanuriaigö turia somuso dödö khö ndra niha Zamaria ba lö ifaböʼö-böʼöni ira, no iforomaʼö wa lö khönia fanahö-nahö dödö ba lö iʼosiwawöi ira. Andrö wa lö ahöli dödöda na ato niha Zamaria ’sowulo’ ba wamondrongo nifaʼema Wilifo.—Hal. 8:6.

5-7. Beʼe duma-duma hewisa wa itugu ato niha samondrongo turia somuso dödö me no muzawili misa ndra niha Keriso.

⁵ Simane me abad siföföna, fanaisi salua ba nono mbanua Lowalangi iadaʼa lö tobali taha-taha ba wamalua halöwö fanuriaigö. Na lafaso ndra niha Keriso enaʼö findra ira ba nahia tanö böʼö, he ba gurunga mazui ba mbanua böʼö, tobali dela daʼö ba wanuriaigö turia mbanua Lowalangi ba niha si toröi ba daʼö. Duma-dumania, sagötö Wasuwöta Gulidanö II, tola lafalua halöwö fanuriaigö sahöli-höli dödö ira Samaduhuʼö Yehowa ba kamp konsentrasi Nazi. Imane samösa niha Yahudi si falukha khö ndra Samaduhuʼö Yehowa ba daʼö,  ”Faʼanau gölö ndra Samaduhuʼö Yehowa nibeʼe ba gurunga, daʼö zameʼe khögu faʼaro dödö wa famatira andrö teʼodane-dane ba Zura Niʼamoniʼö. Daʼö mbörö wa tobali ndraʼo Samaduhuʼö Yehowa.”

⁶ So ösa niha samadaö sanemaʼö sindruhu ba gafuriata. Duma-dumania, börö me lafindrakö zi samösa Samaduhuʼö sotöi Franz Desch ba kamp konsentrasi Gusen ba Austria, tola ifalua wamahaʼö ba Zura Niʼamoniʼö khö zi samösa perwira SS. Khalaigö waʼomuso dödö nirasoira mato hauga fakhe aefa daʼö me falukha ira ba zi sambua angowuloa sebua ndra Samaduhuʼö Yehowa. Me luo daʼö, faoma no tobali ira sanuriaigö!

⁷ Alua göi zimane daʼö me göna folohi sabölö-bölö ndra niha Keriso irege moloi ira ba soi tanö böʼö. Duma-dumania, me döfi 1970-an, lafalua wanuriaigö sebua ba Mozambik me moloi ba daʼö ndra Samaduhuʼö moroi ba Malawi. Hewaʼae na ifuli göna ira folohi sabölö-bölö ba Mozambik, lö tebato halöwö fanuriaigö. Imane Francisco Coana, ”Sindruhu sa, so niha Keriso niraʼu ba labeʼe ba gurunga mato hauga kali börö halöwö fanuriaigö. Hizaʼi, börö me ato niha sanemaʼö turia somuso dödö, faduhu dödöma wa itolo ndraʼaga Lowalangi, simane fanolonia niha Keriso me abad siföföna.”

8. Börö waʼatebulö salua ba politik hegöi faʼabua wangalui soguna, hadia lua-luania daʼö ba halöwö fanuriaigö?

⁸ Tatu manö, tenga ha börö wolohi wa itugu ato niha Keriso ba mbanua böʼö. Ba zi hauga wulu fakhe safuria andre, alua waʼatebulö ba politik hegöi ba wangalui soguna irege daʼö zi tobali dela ba wamazaewe turia somuso dödö ba niha sato ba ngawalö li hegöi soi. So ösa niha soloi moroi ba mbanuara börö wasuwöta mazui faʼatosasa wangalui soguna, lafahaʼö ira ba Zura Niʼamoniʼö ba mbanua nirugira. Börö me ato zoloi, daʼö mbörö wa oya mbanua sangogunaʼö li böʼö. Hadia öforege göi wameʼe famaduhuʼö ba niha ”moroi ba ngawalö soi, mado, banua, hegöi li” ba nahia si toröi yaʼugö?—Fam. 7:9.

9. Haniha Zimoni andrö, ba hadia mbörö wa ahöli-höli dödönia khö Wilifo?

⁹ Oya dandra sahöli-höli dödö nifalua Wilifo ba Zamaria. Duma-dumania, ifadöhö niha sofökhö ba ifofanö malaʼika si lö sökhi. (Hal. 8:6-8) So samösa ndra matua sadöni tödö börö mbuala nitema Wilifo ba wamalua tandra sahöli-höli dödö. Töinia Simoni, samösa niha sebua elemu ba niʼataʼufi, irege lamane niha sato sanandrösa khönia, ”Niha si Pade daʼa, so khönia Waʼabölö Lowalangi.” Hizaʼi iadaʼa, anehe Zimoni hewisa waʼabölö sindruhu moroi khö Lowalangi, simane salua ba dandra sahöli-höli dödö nifalua Wilifo. Ba gafuriata, tobali ia niha Keriso. (Hal. 8:9-13) Hizaʼi, lö ara aefa daʼö, tetandraigö gohitö dödö Zimoni. Hadia zalua?

10. (a) Hadia nifalua Wetero hegöi Yohane ba Zamaria? (b) Hadia nifalua Zimoni me iʼila Wetero hegöi Yohane latufa högö ndra nifahaʼö si bohou irege latema geheha niʼamoniʼö?

¹⁰ Me laʼila ira sinenge wa itugu ato nifahaʼö ba Zamaria, lafatenge Wetero  hegöi Yohane ba daʼö. (Faigi kotak, ” Iʼogunaʼö ’Nono Kusi Wamatörö Lowalangi’ Fetero”.) Me no larugi Zamaria, latufa högö ndra nifahaʼö si bohou andrö ira sinenge irege latema geheha niʼamoniʼö zamösana. b Me iʼila daʼö Simoni, adöni sibai dödönia. Imane khö ndra sinenge, ”Mibeʼe göi khögu waʼabölö daʼö, enaʼö tola ubeʼe ba niha böʼö geheha niʼamoniʼö na utufa högöra.” Iʼoroʼö khöra gefe Simoni börö me itötöna wa tola iʼöli mbuala niʼamoniʼö andrö!—Hal. 8:14-19.

11. Hadia degu-tegu nibeʼe Wetero khö Zimoni, ba hadia nifalua Zimoni?

¹¹ Abeʼe wehede Wetero khö Zimoni. Imane khönia sinenge andrö, ”Yafao ndraʼugö waʼamate ba gefemö andrö, börö me öwalinga tola muʼöli mbuala Lowalangi faoma kefe. Lö hadöi tana khöu ba daʼa, börö me no iʼila nösi dödöu si tobini Lowalangi.” Aefa daʼö, ifarou ia Fetero enaʼö ifalalini gera-erania ba mangandrö ia enaʼö teʼefaʼö zalania. Imane Fetero, ”Andrö khö Yehowa, maʼatö iʼefaʼö horöu ba gera-eramö si lö sökhi andrö.” Sindruhunia, tenga niha si lö sökhi Zimoni andre. Omasi ia ifalua zatulö. Hizaʼi, fasala lala wangera-ngerania me luo daʼö. Börö daʼö, iʼandrö khö ndra sinenge, ”Angandrö khö Yehowa salahigu enaʼö lö alua khögu niwaʼömi andrö.”—Hal. 8:20-24.

12. Hadia geluahania ”simoni”, ba hewisa wa tola tobali tandrawa daʼa ba niha Keriso faya?

¹² Tegu-tegu nibeʼe Wetero khö Zimoni tobali famangelama ba niha Keriso iadaʼa. Sindruhunia, ngawua wehede ”simoni” tehalö ia moroi ba zalua  andre. ”Simoni” eluahania halöwö ba wamawa hegöi ba wowöli faka, manandrösa ia ba agama. Sejarah agama niha Keriso sofaya sangerogö Lowalangi afönu ira amuata daʼa. Imane edisi si siwa The Encyclopædia Britannica (1878), ”Me no muhaogö mufareso waö-waö sanandrösa ba rafe me mufili Paus, daʼö zameʼe faʼafaduhu dödö khö zamareso wa lö irai lafalua wamili andrö na lö hadöi simoni, ba simoni nifaluara ba rafe daʼö sasesenia fondrege waʼalösökhi, si lö faʼaila, ba lö mbini-mbini.”

13. Hadia manö nifalua niha Keriso iadaʼa enaʼö mangelama ira ba zimoni?

¹³ Moguna mangelama niha Keriso sindruhu enaʼö lö lafalua zimoni. Duma-dumania, lö laduhugö wamuala ha enaʼö latema waʼahakhö dödö mazui lazuno-zuno sibai niha si tola mameʼe khöra halöwö si tohude ba mbanua niha Keriso. Baero daʼö, niha si tola mameʼe halöwö, moguna mangelama ira enaʼö lö laforomaʼö waʼebua dödö zambuana ba niha si kayo. Daʼa zi farahu ba zimoni. Fefu nono mbanua Lowalangi moguna laʼokhögö ’wangide-ngideʼö’, labaloi geheha Yehowa ba wamataro yaʼira ba halöwö si tohude khönia. (Luk. 9:48) Lö hadöi naha niha ’somasi nizuno-zuno’ bakha ba organisasi Yehowa.—Amd. 25:27.

14, 15. (a) Haniha ”niha salawa faka ba Gaitiofia”, ba hewisa wa tola falukha ira Wilifo? (b) Hewisa niha Gaitiofia andrö wanemaʼö turia nifaʼema Wilifo, ba hana wa tenga angetula nihalö ba waʼaösö me tebayagö ia idanö? (Faigi nisura ba gahe zura.)

¹⁴ Iadaʼa, ifarou Wilifo malaʼika Yehowa enaʼö itueli lala moroi ba Yeruzalema numalö ba Gaza. Fefu wanofu si so ba wangera-ngera Wilifo hadia mbörö wa möi ia ba daʼö, iʼanemaiʼö tebeʼe wanema li me falukha ia zi samösa sida-sida mazui niha salawa faka ba Gaitiofia ’sebua li ba wombaso nisura Yesaya samaʼeleʼö’. (Faigi kotak ” Hadia Geluahania ’Sida-Sida’?”) Ifarou Wilifo eheha Yehowa enaʼö iʼondrasi gureta kudo andrö. Me fagohi-gohi ia ba ngai gureta daʼö manofu ia khö niha Gaitiofia andrö, ”Hadia aboto ba dödöu nibasomö Pa?” Imane niha Gaitiofia andrö, ”Hewisa wa uʼila manö na lö sangombakha khögu?”—Hal. 8:26-31.

 ¹⁵ Ikaoni Wilifo weʼamöi yawa ba guretania. Khalaigö hawaʼomuso dödöra me fahuhuo ira! Iʼotarai mböröta, lö sangila haniha nifotöi ’biri-biri’ mazui ’enoni’ si so ba wamaʼeleʼö Yesaya. (Yes. 53:1-12) Hizaʼi, sagötö fofanöra, itutunö khönia Filifo wa famaʼeleʼö daʼö alua ia khö Yesu Keriso. Simane niha nibayagö idanö me Fendrakose 33 M, niha Gaitiofia andrö si tobali proselit Yahudi, iʼanemaiʼö iʼila hadia zinangea ifalua. Imane khö Wilifo, ”Hiza nidanö! Hadia daha-tahagu wa lö ubayagö ndraʼo idanö?” Iʼanemaiʼö ibayagö idanö niha Gaitiofia andrö Filifo! c (Faigi kotak ” Famayagö Idanö ba ’Nahia Soya Idanö’”.) Aefa daʼö, teʼohe Wilifo ba nahia si bohou yaʼia daʼö ba Gasoto, ba lö ibato wamaʼema turia somuso dödö ba daʼö.—Hal. 8:32-40.

16, 17. Hewisa wa tola fao malaʼika ba halöwö fanuriaigö iadaʼa?

¹⁶ Niha Keriso iadaʼa, laʼokhögö döi sebua ba wamalua halöwö simane nifalua Wilifo. Sasesenia, lafaʼema duria Wamatörö Lowalangi ba niha nifalukhaisira hewaʼae lö resmi, duma-dumania niha si falukha khöra ba lala. Oya zalua ba zilalö sangoromaʼö wa no fanuturu lala moroi khö Lowalangi na falukha ira ba niha satulö tödö. Lö ahöli dödöda ba daʼö börö me no ifatunö khöda Sura Niʼamoniʼö wa labeʼe khöda wanuturu lala ira malaʼika ba halöwö fanuriaigö enaʼö tola tafaʼema ia ”ba ngawalö soi, ba ngawalö mado, banua, hegöi li”. (Fam. 14:6) Fanuturu lala moroi khö ndra malaʼika no ifaʼeleʼö daʼö Yesu. Ba gamaedolania sanandrösa ba gandru hegöi oʼo, iwaʼö Yesu wa sagötö mbaŵa wamasi mazui amozua götö daʼa, samasi yaʼia daʼö ”ira malaʼika”. Baero daʼö, ira malaʼika andrö ’laʼowuloi niha sanawö huku ba samobörö horö ba niha böʼö. Lafofanö ira moroi ba Wamatörö  Lowalangi’. (Mat. 13:37-41) Ba ginötö si fagölö, laʼowuloi niha sangokhögö tötönafö ba zorugo hegöi ”ngawawa sato” moroi ba ”mbiri-biri tanö böʼö” nidöni Yehowa ba organisasinia.—Fam. 7:9; Yoh. 6:44, 65; 10:16.

¹⁷ Si tobali tandra wa itolo ita malaʼika, so ösa niha nifalukhaisida ba wanuriaigö sangumaʼö wa awena sibai mangandrö ira khö Lowalangi ba wangandrö fanuturu lala. Nehegö atö duma-duma salua khö zi darua sanuriaigö ba no fao khöra samösa ndraono side-ide. Me no arakhagö laluo, edöna laböhöli wanuriaigö ira Samaduhuʼö si darua andrö, hizaʼi omasi nasa nono daʼö möi ia itoko mbawandruhö ba nomo si tambai. Sindruhunia lö toʼölö khönia daʼö ba zilalö. Me ibokai mbawandruhö nomo andre ira alawe sokhö omo, tohare Zamaduhuʼö si darua andrö fahuhuo ira khönia. Itutunö wa awena sibai awai mangandrö ia enaʼö so zamalukhaisi ba sanolo yaʼia irege aboto ba dödönia Zura Niʼamoniʼö. Börö daʼö, tebörögö wamahaʼö ba Zura Niʼamoniʼö!

18. Hana wa tebai taʼaohasi ba dödö halöwö fanuriagö nifaluada?

¹⁸ Yaʼita si farahu ba mbanua niha Keriso, no tebeʼe khöda halöwö si tohude yaʼia daʼö falulu fohalöwö khö ndra malaʼika ba wamalua halöwö fanuriaigö ba zi sagörö ulidanö sabölö tohude moroi ba zilalö. Böi aohasi ba dödö wamalua halöwö daʼö. Na anau gölöu, tola örasoi waʼomuso dödö sebua ba wamalua halöwö fanuriaigö ’turia somuso dödö sanandrösa khö Yesu’.—Hal. 8:35.