FAZA 1
”Miʼae Mibaliʼö Nifahaʼögu Fefu Niha”
Tuho nitutunö ba mbuku Halöwö Zinenge ba amakhaitania khöda iadaʼa
1-6. Tutunö zi no irai alua sagötö lafalua halöwö fanuriaigo ira Samaduhuʼö Yehowa.
SAMÖSA dalifusöda si bohou ebua sotöi Rebecca si toröi ba Ghana, ibaliʼö nahiania wanuriaigö sekola si möi ia. Ero maʼökhö iʼohe publikasida na möi ia sekola. Sagötö molombase ira, iʼalui lala enaʼö tola manuriaigö ia khö ndra awönia sekola. So moroi ba gotalua ndra awönia zamahaʼö yaʼira khö Rebecca.
2 Ba hulo Madagaskar, lö aröu moroi ba gatumbukha zinga nasi Afrika, so darua perintis si lö tebulö manörö ahe 25 kilometer ba latörö zino siriri-riri numalö ba zi sambua banua side-ide. Ba daʼö so niha sadöni tödö nifahaʼöra ba Zura Niʼamoniʼö.
3 Enaʼö tola lafalukhaisi niha si toröi ba ngai nasi Paraguay hegöi Paraná, ira talifusöda si toröi ba Paraguay hegöi si 15 relawan moroi ba soi tanö böʼö lafazökhi khöra göfa. Köfa si 127 meter kubik andre töra 12 niha monaha. Laʼogunaʼö göfa daʼa ira sanuriaigö ba wangombakha turia somuso dödö ba mbanua daʼö, börö me ha daʼa lala si tola laʼogunaʼö ba wamalukhaisi niha si toröi ba daʼö.
4 Ira Samaduhuʼö Yehowa ba Alaska, laʼogunaʼö ginötö si tohude andre ba wanuriaigö khö ndra turis si möi manörö-nörö ba mbaŵa lökhö. Ba mbaŵa daʼö, tohare göfa pesiar solohe niha sanörö-nörö moroi ba ngawalö soi. Börö daʼö, no lafaʼanö ira Samaduhuʼö Yehowa ngawalö publikasi si teʼodane-dane ba Zura Niʼamoniʼö sadöni dödö niha moroi ba ngawalö li. Ba mbanua daʼö göi moguna sibai göfa sihombo enaʼö tola möi ira ba mbanua side-ide irege ofeta duria somuso dödö ba Aleut, Atabaskan, Simsian hegöi Tlingit.
5 Larry, si toröi ba Texas, AS, so nahia si tohude sasese möi ia manuriaigö yaʼia daʼö panti wreda, nahia waʼatoröinia. Hewaʼae na modao-dao manö ia ba gurusi roda börö me no alabu ia, hizaʼi oya zi tola ifalua. Idunö-dunö duria somuso dödö, yaʼia daʼö fanötöna moroi ba Zura Niʼamoniʼö wa tola ifuli abölö ia dania na no alua Wamatörö Lowalangi.—Yes. 35:5, 6.
6 Ba wangondrasi angowuloa sebua nifalua tanö ba gaekhula Myanmar, so sambua ngawawa ndra Samaduhuʼö sanörö köfa nasi tölu hari waʼara iʼotarai Mandalay. Ira talifusö sowölö-ölö ba wanuriaigö turia somuso dödö andre, laʼohe publikasi ba labeʼe daʼö ba niha böʼö sanörö köfa andrö. Ero molombase göfa andrö ba zi sambua banua, möi ira tou ba laʼaliokö wamalukhaisi niha si toröi ba daʼö ba wameʼe publikasi. Me no mangawuli ira yawa ba göfa, ifuli zui so niha sawena falukha khöra, yaʼia daʼö niha sawena möi yawa ba göfa andrö.
7. Hadia manö nifalua nono mbanua Yehowa ba wanuriaigö Famatörö Lowalangi, ba hadia gohitö dödöra?
7 Simane ira talifusö si no tadunö-dunö moroi yawa, ira samosumange Yehowa sowölö-ölö ba zi sagörö ulidanö ’lahaogö wamaduhuʼö sanandrösa ba Wamatörö Lowalangi’. (Hal. 28:23) Lafalukhaisi niha ba nomo-omo misa, laʼondrasi niha sanörö lala, lafaʼoheʼö zura, ba laʼogunaʼö telefo ba wahuhuosa ba niha. Laʼalui lala enaʼö tola latutunö Wamatörö Lowalangi andrö ba niha sanörö moto, si so ba taman, mazui awöra wohalöwö. Hewaʼae no faböʼö-böʼö lala wamaluara daʼö, hizaʼi ha sambua gohitö dödöra, yaʼia daʼö laturiaigö duria somuso dödö gofu hezo falukha ira niha.—Mat. 10:11.
8, 9. (a) Hadia mbörö wa no amaedola dandra sahöli-höli dödö waʼatedou halöwö fanuriaigö Wamatörö Lowalangi? (b) Hadia wanofu sadöni dödöda, ba hadia zinangea tafalua enaʼö tasöndra wanema li?
8 Ira talifusö sombaso niʼomasiʼöma, hadia no fao ndraʼugö ba gotalua niha samalua halöwö fanuriaigö iadaʼa nifalua ba zi töra 235 soi? Na noa, eluahania no falulu fohalöwö ndraʼugö ba wondrouʼö halöwö fanuriaigö Wamatörö Lowalangi sahöli-höli dödö andre! Hadia zi no mufalua andrö ba zi sagörö ulidanö, tola mufotöi ia tandra sahöli-höli dödö. Hewaʼae na oya zi tobali taha-taha hegöi fanandraigö, duma-dumania fanaisi hegöi folohi moroi khö ndra samatörö, hizaʼi lö laböhöli ira Samaduhuʼö Yehowa ba wanuriaigö turia sanandrösa ba Wamatörö Lowalangi ba niha fefu moroi ba ngawalö soi.
9 So wanofu sadöni dödöda sinangea taʼangeragö: Hadia mbörö wa tebai mubatogö halöwö fanuriaigö Wamatörö Lowalangi hewaʼae na so daha-taha mazui fanaisi moroi khö Zatana? Enaʼö tasöndra wanema linia moguna ifuli tatutunö zalua me abad siföföna M. Mendrua manö, hadia tenga yaʼita Samaduhuʼö Yehowa zanohugö halöwö nibörögö me luo daʼö?
Halöwö Sofeta ba zi Sagörö Ulidanö
10. Hadia mbörö wa ilulu waʼaurinia Yesu ba hadia zaboto ba dödönia sanandrösa ba halöwö daʼa?
10 Samasindro banua niha Keriso yaʼia daʼö Yesu Keriso, no ilulu waʼaurinia ba wanuriaigö turia somuso dödö sanandrösa ba Wamatörö Lowalangi. Daʼö halöwönia siföföna. No irai itutunö: ”Hasambalö möido uturiaigö duria somuso dödö sanandrösa ba Wamatörö Lowalangi. Daʼö mbörö wa tefatenge ndraʼo.” (Luk. 4:43) Aboto ba dödö Yesu wa ibörögö halöwö si tebai iʼasiwai samösa. Lö ara fatua lö mate ia, no ifaʼeleʼö wa teturiaigö dania duria somuso dödö ”ba ngawalö soi”. (Mrk. 13:10) Hizaʼi, hewisa wamalua daʼö, ba haniha zamalua yaʼia?
”Miʼae mibaliʼö nifahaʼögu fefu niha moroi ba ngawalö soi.”—Mataiʼo 28:19
11. Hadia halöwö si tohude nibeʼe Yesu khö ndra nifahaʼönia, ba hadia zoguna khöra enaʼö tola lafalua halöwö daʼö?
11 Me no aefa mate ba tesusugi Yesu, iforomaʼö ia khö ndra nifahaʼönia ba ibeʼe khöra halöwö si tohude andre, ”Miʼae mibaliʼö nifahaʼögu fefu niha moroi ba ngawalö soi, mibayagö ira idanö ba döi Nama, ba döi Nono, ba döi geheha niʼamoniʼö. Mifahaʼö ira ba woloʼö fefu niwaʼögu khömi. Ba hiza, fao khömi ndraʼo ero maʼökhö irugi gamozua götö daʼa.” (Mat. 28:19, 20) Ngawua wehede ”fao khömi ndraʼo”, daʼö zangoromaʼö wa itolo ndra nifahaʼönia Yesu ba wamalua halöwö fanuriaigö hegöi ba wombaliʼö nifahaʼö. Moguna khöra wanolo börö me no ifaʼeleʼö Yesu wa ”dozi soi fatiu dödöra khömi”. (Mat. 24:9) So nasa gumbu tanö böʼö si tola laʼodaligö ira nifahaʼö Yesu. Tefaudu fatua lö mangawuli Yesu ba zorugo ifatunö khö ndra nifahaʼönia wa latema dania geheha niʼamoniʼö ba tobali ira samaduhuʼö khönia ”irugi wondrege danö”.—Hal. 1:8.
12. Hadia wanofu-nofu si tohude si tumbu ba dödöda, ba hana wa moguna taʼila wanema linia?
12 Iadaʼa, so wanofu-nofu si tohude si tumbu ba dödöda: Hadia laʼameʼegö tödö wamalua halöwöra andre ira sinenge Yesu hegöi nifahaʼö tanö böʼö me abad siföföna? Hadia lö laböhöli wanuriaigö sanandrösa ba Wamatörö Lowalangi andre ira niha si sambua ngawawa ndra matua hegöi ira alawe niha Keriso si lö atoto hewaʼae göna ira folohi sabölö-bölö? Hadia sindruhu no latema wanolo moroi ba zorugo hegöi eheha Yehowa ba wamalua halöwö fombaliʼö nifahaʼö? Fanofu daʼa hegöi fanofu-nofu tanö böʼö, tasöndra wanema linia ba mbuku Halöwö Zinenge si so ba Zura Niʼamoniʼö. Hadia mbörö wa moguna aboto ba dödöda wanema linia? No ifabuʼu Yesu wa mufalua halöwö daʼa ”irugi gamozua götö daʼa”. Börö daʼö, halöwö daʼa moguna lafalua ira niha Keriso sindruhu maʼafefu, farahu ita yaʼita sauri ba ginötö safuria andre. Andrö wa adöni sibai dödöda ba waö-waö sejarah nisura ba mbuku Halöwö Zinenge.
Tuho Nitutunö ba Mbuku Halöwö Zinenge
13, 14. (a) Haniha zanura buku Halöwö Zinenge, ba hezo moroi duria nifaʼemania? (b) Hadia nitutunö ba mbuku Halöwö Zinenge?
13 Haniha zanura buku Halöwö Zinenge? Lö irai tesura haniha zanura yaʼia bakha ba mbuku daʼö. Hizaʼi moroi ba wehede famasao ba mbuku daʼö, taʼila wa fagölö ira zanura buku Halöwö Zinenge faoma sanura Injil Luka. (Luk. 1:1-4; Hal. 1:1, 2) Börö daʼö iʼotarai mböröta, Luka, samösa ’doto niʼomasiʼö’ ba sejarawan satua-tua, lafotöi ia sanura buku Halöwö Zinenge. (Kol. 4:14) Ba mbuku daʼa, itutunö waö-waö salua sagötö zi 28 fakhe, iʼotarai me manahae Yesu ba zorugo me döfi 33 M irugi me lakuru Waulo ba Roma te me döfi 61 M. Börö me no ifaböʼöni Luka ngawua wehede ’yaʼira’ tobali ’yaʼaga’, ba daʼö oroma wa so ia ba ngawalö waö-waö nidunö-dunönia. (Hal. 16:8-10; 20:5; 27:1) Börö me samösa samareso satua-tua Luka andre, tatu manö no isofu-sofu zalua andrö khö Waulo, Baranaba, Filifo hegöi ba niha tanö böʼö nitötöi ba zurania.
14 Hadia nösi mbuku Halöwö Zinenge? Ba Injil Luka isura sanandrösa ba wehede hegöi nifalua Yesu. Hizaʼi ba mbuku Halöwö Zinenge, ifatunö Luka wehede hegöi nifalua ndra soloʼö khö Yesu. Börö daʼö, buku Halöwö Zinenge itutunö sanandrösa ba niha samalua halöwö sahöli-höli dödö, hewaʼae na ato niha baero sangumaʼö khöra wa yaʼira andrö ”niha si toʼölö manö ba si lö sekola”. (Hal. 4:13) Na muʼadogoiʼö ia, sura si no teʼehehaini andre ifatunö khöda hewisa me tefasindro mbanua niha Keriso hegöi faʼatedounia. Ifatunö göi khöda hadia nifalua ba hewisa ndra niha Keriso me abad siföföna ba wanuriaigö. (Hal. 4:31; 5:42) Itutunö hadia nifalua geheha niʼamoniʼö ba wamazaewe turia somuso dödö. (Hal. 8:29, 39, 40; 13:1-3; 16:6; 18:24, 25) Buku Halöwö Zinenge andre, iʼabakhaiʼö wanutunö tuho Zura Niʼamoniʼö, soʼamakhaita ba wangamoniʼö töi Lowalangi barö Wamatörö Keriso, ba ifatunö khöda hewisa waʼamofozu wanuriaigö turia Wamatörö Lowalangi hewaʼae alua wolohi sabölö-bölö.—Hal. 8:12; 19:8; 28:30, 31.
15. Hadia manö mbuania khöda na tafareso mbuku Halöwö Zinenge?
15 Na tahaogö wamareso buku Halöwö Zinenge, sindruhu wa tefarou dödöda ba teʼaroʼö wamatida. Na taʼangerönusi duma-duma ndra nifahaʼö Keriso me abad siföföna si lö faʼataʼu ba sowölö-ölö, sindruhu-ndruhu wa taʼandrö saohagölö ba nifaluara. Tobali famarou dödöda daʼö ba woloʼö famatira. Na tafalua daʼö, no tefaʼanö ita ba wamalua halöwöda ba ’weʼamöi wombaliʼö nifahaʼö fefu niha’. Buku nibasomö andre, tefazökhi ia si tobali fanolomö enaʼö öhaogö wamahaʼö yaʼugö ba mbuku Halöwö Zinenge.
Fakake si Tobali Fanolo ba Wamahaʼö Yaʼita ba Zura Niʼamoniʼö
16. Hadia zi tölu ngawalö gohitö dödö wa mufazökhi mbuku daʼa?
16 Hadia gohitö dödö wa mufazökhi mbuku daʼa? So tölu, yaʼia daʼö: (1) ba wangaʼaroʼö faʼafaduhu dödöda khö Yehowa wa iʼogunaʼö geheha niʼamoniʼö ba wotuhini halöwö fanuriaigö hegöi fombaliʼö nifahaʼö, (2) ba wamarou yaʼita wamalua halöwö fanuriaigö, tafahaʼö ita ba duma-duma nibeʼe ndra nifahaʼö Keriso me abad siföföna, ba (3) enaʼö itugu taʼameʼegö tödö organisasi Yehowa ba tafosumange ndra talifusö sondröniaʼö halöwö fanuriaigö hegöi sondrorogö banua niha Keriso.
17, 18. Hewisa wamaʼanö buku daʼa, ba hadia manö zi no muhenaigö sanolo yaʼita ba ginötö tafalua wamahaʼö samösa?
17 Hewisa wamaʼanö buku daʼa? Buku daʼa, no mubagi ia walu faosatö, ba ero sambua faosatö, itutunö sambua duho moroi ba mbuku Halöwö Zinenge. Ba faza aefa daʼö, lö itutunö ero sambua ayati, hizaʼi itolo ita enaʼö so zi tobali famahaʼö khöda moroi ba waö-waö nitutunönia ba enaʼö aboto ba dödöda hewisa wamaluada si no tafahaʼö yaʼita andrö. Ero sambua faza, tebörögö ia faoma fehede si tobali rahu-rahu moroi ba faza daʼö hegöi ayati sangoromaʼö faosatö nitutunö moroi ba mbuku Halöwö Zinenge.
18 So nasa danö böʼö ba mbuku daʼa sanolo yaʼita ba ginötö tafalua wamahaʼö samösa. No muhenaigö gambara si sökhi sanutunö waö-waö sadöni dödöda ba mbuku Halöwö Zinenge, sanolo yaʼita ba wokhalaigö hadia zalua na taʼangerönusi waö-waönia. Ba zi hauga faza, no muhenaigö kotak sanutunö onönöta si tola öʼogunaʼö. So kotak sanutunö waö-waö zi samösa niha nitutunö ba Zura Niʼamoniʼö saro famati ba sinangea taʼoʼö. So göi kotak tanö böʼö sanutunö nahia, waö-waö salua, si toʼölö, mazui niha tanö böʼö nitutunö ba mbuku Halöwö Zinenge.
Yamangaösö dödöu wamalua fanuriaigö ba mbanua nifataro yaʼugö
19. Hadia wanofu-nofu sinangea tasofu khöda ero-ero inötö?
19 Buku daʼa, tola itolo ndraʼugö ba wamareso yaʼugö samösa. Hewaʼae no ara tobali ndraʼugö samösa sanuriaigö, hizaʼi moguna öʼangerönusi ero-ero inötö ba öfareso samösa hadia gohitö dödöu ba hewisa ndraʼugö wamalua halöwö fanuriaigö. (2 Ko. 13:5) Sofu khöu samösa, ’Hadia lö tebulö so khögu dödö faʼasö-aösö ba wamalua halöwö fanuriaigö? (1 Ko. 7:29-31) Hadia ufalua halöwö fanuriaigö si fao faʼowölö-ölö ba faʼafaduhu dödö? (1 Te. 1:5, 6) Hadia oya ubeʼe ginötögu ba weʼamöi manuriaigö hegöi ba wombaliʼö nifahaʼö?’—Kol. 3:23.
20, 21. Hadia mbörö wa mangaösö sibai halöwö nibeʼe khöda, ba hadia zi tobali angetulada?
20 Böi olifu ita wa no tebeʼe khöda halöwö sebua sibai, yaʼia daʼö ba wanuriaigö hegöi ba wombaliʼö nifahaʼö. Börö me itugu numalö ginötö, itugu mangaösö göi halöwö daʼa. No göi itugu ahatö gamozua götö danö andre. Börö daʼö, töra moroi ba zilalö, moguna larongo niha hadia zinangea lafalua enaʼö teʼorifi ira. Lö taʼila hawaʼato tö niha sangokhögö tödö satulö sanemaʼö turia nifaʼemada. (Hal. 13:48) Hizaʼi, moʼömö ita ba wanolo niha simane daʼö fatua so ginötö.—1 Ti. 4:16.
21 Börö daʼö, moguna sibai taʼoʼö duma-duma ndra sanuriaigö sowölö-ölö me abad siföföna. Na öfahaʼö ndraʼugö ba mbuku daʼa, yaʼitugu tefarou dödöu ba wanuriaigö ba owölö-ölö ndraʼugö si fao faʼabarani. Yaʼitugu aro gangetulamö ba itugu ’öhaogö wanuriaigö sanandrösa ba Wamatörö Lowalangi’.—Hal. 28:23.