1-3. (a) Hana wa mofönu sibai Waulo ba Atena? (b) Hadia wamahaʼö si tola tahalö moroi ba duma-duma Waulo?

 MOFÖNU sibai Waulo. Ba Atena Yunani so ia me luo daʼö. Ba nahia daʼa, no irai mamahaʼö Sokrates, Plato hegöi Aristoteles. Mamati sibai niha Atena. Gofu hezo ifakhölö ia Faulo, iʼila nadu soya sibai, duma-dumania ba nahia wamosumange, ba golayama hegöi ba zinga lala, börö me oya lowalangi nifosumange niha Atena. Aboto ba dödö Waulo hewisa wamaigi Lowalangi sindruhu sotöi Yehowa sanandrösa ba wanömba adu. (2 Mo. 20:4, 5) Simane Yehowa, anuzu göi dödö Waulo wanömba adu!

² Fefu niʼila Waulo me möi ia ba fasa andrö sindruhu-ndruhu wa sanuzu dödö niha. Oya sibai ba daʼö nadu Heremesi famaedo wamatua ndra matua, no lahaogö wamaʼoli tanö yöu gaekhula sahatö ba lala sebua si numalö ba mbanua daʼö. Fefu nahia ba fasa, ahori so nahia wamosumange. Hewisa wa tola manuriaigö zinenge sowölö-ölö andre ba mbanua safönu famosumange adu? Hadia tola itaha dödönia ba iʼalui lala enaʼö fatema ba dödöra nifaʼemania? Hadia mofozu ia wanolo niha ba wanöndra hegöi ba wamosumange Lowalangi sindruhu?

³ Fehede Waulo föna niha sagalawa sekola ba Atena simane si no tesura ba Halöwö Zinenge 17:22-31, tobali duma-duma khöda ba wahuhuosa, ba woʼangenanöi fehede hegöi ba wonehegö salua ba zi fasuida. Na tafahaʼö ita moroi ba duma-duma Waulo andre, oya zi tola taʼila hewisa lala enaʼö fatema ba dödö niha huhuoda ba tatolo ira ba woʼangeragö daʼö.

4, 5. Hezo manuriaigö Waulo ba Atena, ba haniha zi fahuhuo khönia?

⁴ Möi Waulo ba Atena ba wamalua halöwönia tobali utusan injil si mendrua kira-kira me döfi 50 M. a Gasa-gasa wombaloinia Sila hegöi Timoteo moroi ba Mberea, simane si toʼölö ”ibörögö fahuhuo [Waulo] ba  nahia waʼowulo ba daʼö, ba niha Yahudi”. Möi ia ifalukhaisi niha Atena si tenga Yahudi ”ba fasa” mazui agora. (Hal. 17:17) Agora Atena so ia tanö yöu gaekhula nasi Akropolis, faʼebolonia mato lima hektar. Fasa daʼa tenga ha nahia wamawa, hizaʼi nahia ba wamalua angowuloa göi. Moloʼö sambua karya referensi, ba nahia daʼö owulo ndra sogale, ira samatörö, filsuf mazui sanura. Omasi sibai niha Atena owulo ira ba daʼö ba fahuo-huo ira.

⁵ Ba fasa daʼö, falukha Waulo ba niha sabua mamaduhusi tödö nifaʼemania. Yaʼira andrö si faduhu tödö khö Efikuro hegöi Sitoiko, dombua wamahaʼö si faoma fahindri. b Soloʼö khö Efikuro faduhu dödöra wa so manö waʼauri andre lö börö-börö. Lala wangera-ngerara sanandrösa ba waʼauri tola murahugö ia simane daʼa, ”Lö hadöi sinangea muʼataʼufi khö Lowalangi; Lö hadöi si tola murasoi na no mate; Tola mugohi waʼasökhi dödö; Tola mutaögö waʼalösökhi.” Soloʼö khö Sitoiko göi, faduhu dödöra wa itugu sökhi waʼaurira na laʼogunaʼö waʼatua-tuara ba wangai angetula ba lö faduhu dödöra wa Lowalangi andrö sambua Boto göi ia. Famahaʼö Efikuro hegöi Sitoiko, lö faduhu dödöra wa so wanusugi nitutunö ndra nifahaʼö Keriso. Ba daʼa aboto ba dödöda wa no faböʼö sibai wamahaʼö si dombua andre moroi ba zindruhu nituriaigö Waulo.

6, 7. Hewisa wanemaʼö ndra niha sagatua-tua ba Yunani wamahaʼö nifaʼema Waulo, ba hadia zi fagölö salua khöda ba ginötö andre?

⁶ Hewisa wanemaʼö ndra niha sagatua-tua ba Yunani wamahaʼö nifaʼema Waulo? So zamotöi Faulo andre ”soya bewe”. (Hal. 17:18, nwtsty-IN.) Sanandrösa ba ngawua wehede daʼö ba li Yunani, imane samösa pakar, ”Ba wamobörö, ngawua wehede daʼö eluahania fofo side-ide sihombo ba wangozaragö hunö sagaekhu tou. Ba gafuriata, lafoʼeluaha ia niha sangozaragö akhökhöla gö mazui sasao ba fasa. Aefa daʼö, muʼogunaʼö wehede daʼa ba woʼamaedolagö niha sangozaragö turia, si lö mangila hadia zalua sindruhunia.” Eluaha niwaʼö ndra niha sagalawa sekola andrö yaʼia daʼö labaliʼö niha si bodo Waulo ba ha soloʼö-loʼö fehede nawönia. Hewaʼae simanö, lö awuwu Waulo ba wehedera andrö.

⁷ Simane daʼö göi iadaʼa. Yaʼita Samaduhuʼö Yehowa, asese lafatörö-törö döida börö waʼafaduhu dödöda si teʼodane-dane ba Zura Niʼamoniʼö. Duma-dumania, so ndra guru ba zekola samahaʼö evolusi ba lawaʼö wa hasambalö faduhu dödö niha sonekhe ba daʼö. Eluahania, niha si bodo fefu zi lö faduhu tödö ba evolusi. Ohitö dödö niha sagatua-tua andrö enaʼö lawaʼö niha wa yaʼita niha ”soya bewe” ba ginötö tatutunö niwaʼö Zura Niʼamoniʼö ba taforomaʼö dandra wa so Zomböi. Böi awuwu ita. Si fao faʼabarani taʼoʼawögö waʼafaduhu dödöda wa so Duka sonekhe sotöi Lowalangi Yehowa samazökhi ulidanö.—Fam. 4:11.

8. (a) Hadia nasa niwaʼö niha me larongo wehede Waulo? (b) Hadia geluaha me laʼohe Waulo ba Areofago? (Faigi nisura ba gahe zura ba ngaʼörö 142.)

⁸ So göi danö böʼö niwaʼö niha me larongo wehede Waulo andrö, lamane,  ”Hulö so lowalangi böʼö nidunö-dunönia.” (Hal. 17:18) Hadia sindruhu so lowalangi si bohou nitutunö Waulo khö ndra niha Atena? Tebai muʼaohasi ba dödö daʼa börö me simane daʼö göi niböbögö khö Sokrates irege lahuku mate ia ba zi hauga abad silalö. Börö daʼö, laʼohe Waulo ba Areofago ba laʼandrö khönia wanutunö famahaʼö si faböʼö ba wamondrongo niha Atena. c Hewisa wamaduhuʼö Waulo duria nifaʼemania ba niha si lö mangila nösi Mbuku Niʼamoniʼö?

9-11. (a) Hewisa Waulo wamorege enaʼö fatema ba dödö niha wehedenia? (b) Hewisa woloʼöda duma-duma Waulo ba wanuriaigö?

⁹ Törö tödöu hawaʼaukhu dödö Waulo me iʼila nadu ba mbanua daʼö. Hewaʼae simanö, lö iʼanemaiʼö mofönu ia ba niha sanömba adu andrö. Itaha dödönia ba si fao faʼatua-tua, itutunö duho si faoma fatema ba dödö  zamondrongo. Ibörögö wahuhuosa imane, ”Yaʼami niha Atena, aboto ba dödögu wa miʼataʼufi sibai lowalangimi ba ngawalö hadia ia, töra moroi ba niha böʼö.” (Hal. 17:22) Eluaha niwaʼö Waulo, ’Aboto ba dödögu wa mamati sibai ami.’ Si fao faʼatua-tua, isuno ira Faulo börö wamatira. Aboto ba dödönia wa so niha satulö tödö si no balunö börö wamahaʼö sofaya. Itörö tödö Waulo wa simane daʼö göi ia mböröta, ’ambö famati ba lö khönia faʼaboto ba dödö’.—1 Ti. 1:13.

¹⁰ Itohugö wanutunö khöra Faulo dandra sangoromaʼö wa mamati sibai ira, yaʼia daʼö so khöra naha wanunu sumange nibeʼera ”Khö Lowalangi si Lö Taʼila”. Moloʼö sambua angombakhata, ”niha Yunani hegöi soi tanö böʼö no toʼölö ira wameʼe naha zumange ’khö lowalangi si lö laʼila’, enaʼö lö mofönu gofu haniha manö lowalangi si lö fakhamö lafosumange”. Moroi ba naha wameʼe sumange andrö, ba daʼö oroma wa lafaduhuʼö ira niha Atena wa so Lowalangi si lö laʼila. Iʼodela Faulo naha wameʼe sumange andrö ba wamaʼema turia somuso dödö. Imane, ”Iadaʼa, ufatunö khömi haniha Lowalangi nifosumangemi andrö si lö irai miʼila.” (Hal. 17:23) Idönisi lala wangera-ngerara Faulo, hewaʼae na lö iforomaʼö sibai. Tenga Lowalangi si bohou mazui Lowalangi tanö böʼö nifatunönia khöra simane niböbögö niha khönia. Ihaogö wanutunö khöra Lowalangi si lö laʼila, yaʼia daʼö Lowalangi sindruhu.

¹¹ Hewisa woloʼöda duma-duma Waulo ba wanuriaigö? Na tahaogö tanehegö, tola manö taʼila dandra-tandra wa niha daʼö sangataʼufi Lowalangi. Te so gama-gama nifakenia soʼamakhaita ba agama mazui gambara nifalembania ba dowa hegöi ba golayama. Tola tamane, ’Ba wamaigigu yaʼugö Ama/Ina niha samati khö Lowalangi. Omasido fahuhuo ba niha sadöni tödö sanandrösa ba wamati.’ Na so khöda waʼatua-tua ba tafaduhuʼö wa niha daʼö niha sangataʼufi Lowalangi, tola taʼila ba tatutunö khönia duho si fatema ba dödönia. Törö tödöu, ohitö dödöda tenga ba wanguhuku niha moloʼö nifaduhusira tödö ba agamara. Ba gotalua ndra talifusöda si sara lala wamati, ato göi zi faduhu tödö ba wamahaʼö agama sofaya me mböröta.

12. Hewisa Waulo wamaudugö nifaʼemania ba niha samondrongo huhuonia?

¹² No isöndra Faulo duho si fatema ba dödö niha samondrongo, hizaʼi hadia tola latohugö wahuhuosa? Börö me aboto ba dödönia wa niha si fahuhuo khönia no latema wamahaʼö filsafat Yunani ba lö aboto ba dödöra Mbuku Niʼamoniʼö, andrö wa ifaudugö lala wahuhuosania khöra. Si oföna, na ifatunö hadia nifahaʼö Zura Niʼamoniʼö, lö iʼanemaiʼö ibokai khöra ayatinia. Si dua, ifagölösi ia ba niha si fahuhuo khönia, itaria iʼogunaʼö ngawua wehede ”yaʼita”. Si tölu, itötöi ngawua wehede moroi ba karya sastra Yunani sangoromaʼö wa nitutunönia andrö so ia ba nisurara samösa. Iadaʼa, datanehegö hewisa wamaduhuʼönia famahaʼö Zura Niʼamoniʼö. Hadia zindruhu nifaʼemania sanandrösa khö Lowalangi si lö laʼila ira niha Atena?

13. Hadia nitutunö Waulo sanandrösa ba wamazökhi banua si yawa awö danö, ba hadia manö duho nifaʼema Waulo?

 ¹³ Lowalangi zamazökhi banua si yawa awö danö. Imane Faulo, ”Lowalangi samazökhi ulidanö awö nösinia maʼafefu, Sokhö banua si yawa ba tanö, lö toröi ia ba nahia wamosumange nifazökhi danga niha.” d (Hal. 17:24) Lö so manö mbanua si yawa awö danö ba zi lö börö-börö. Lowalangi sindruhu Zomböi fefu hadia ia. (Si. 146:6) Tenga simane lowalangi Atena mazui lowalangi tanö böʼö solakhömi börö gosali nahia wamosumange, Lowalangi Fondrege Zalawa samatörö banua si yawa awö danö, lö monaha ia ba gosali nifazökhi danga niha. (1 Ra. 8:27) Tuho nifaʼema Waulo: Abölö molakhömi Lowalangi sindruhu moroi ba lowalangi adu si so ba gosali nifazökhi danga niha.—Yes. 40:18-26.

14. Hewisa wanutunö Waulo wa lö iʼodaligö niha gulidanö Lowalangi?

¹⁴ Lowalangi, lö iʼodaligö niha gulidanö. Niha sanömba adu, asese lafake nukha si maha, labeʼe mbuala segebua böli mazui labeʼe nidanö awö gö ba nadu nifazökhira, hulö na daʼö zoguna ba nadu andrö! Hewaʼae simanö, ba gotalua ndra filsuf Yunani samondrongo fehede Waulo, te so zi faduhu tödö wa lö moguna wanolo khö lowalangi moroi ba niha gulidanö. Tatu fao dödöra me iwaʼö Faulo wa Lowalangi andrö ”lö itötöna wanolo moroi ba niha hulö na so zoʼamböta ia”. Sindruhu wa lö hadöi gama-gama si tola labeʼe niha gulidanö khö Zomböi yaʼita! Hizaʼi, yaʼia zameʼe fefu hadia ia zoguna ba niha, ’yaʼia zameʼe faʼauri, hanu-hanu, ba fefu ngawalö hadia ia’ simane luo, teu ba tanö satabö sinanö. (Hal. 17:25; 1 Mo. 2:7) Börö me yaʼia Lowalangi Sameʼe khöda fefu hadia ia, daʼö mbörö wa lö iʼodaligö niha gulidanö.

15. Hewisa wanutunö Waulo nifaduhusi tödö niha Atena wa abölö tohude ira moroi khö ndra niha si tenga Yunani, ba hadia wamahaʼö si tola tahalö moroi ba duma-dumania?

¹⁵ Lowalangi zamazökhi niha gulidanö. Faduhu dödö niha Atena wa abölö  tohude ira moroi ba niha si tenga Yunani. Hizaʼi, fohöni-höni mado hegöi soi lö tefaudu daʼö ba goi-goi Zura Niʼamoniʼö. (5 Mo. 10:17) Ihaogö sibai wanutunö daʼa Faulo si fao faʼatua-tua. Imane, ”Moroi ba zi samösa niha ifazökhi [Lowalangi] fefu soi si toröi ba gulidanö.” Tatu manö, mangera-ngera niha samondrongo ba wehedenia andrö. (Hal. 17:26) Itötöi nisura ba mbuku 1 Moze hewisa me tewöwöi Gadamo, furugö niha gulidanö. (1 Mo. 1:26-28) Börö me ha sambua wurugö niha gulidanö, andrö wa lö hadöi mado mazui soi sabölö tohude moroi ba danö böʼö. Fefu zamondrongo fehede Waulo andrö, aboto ba dödöra geluaha niwaʼönia. Tola tahalö khöda wamahaʼö moroi ba duma-dumania. Hewaʼae mangelama ita ba taʼogunaʼö waʼatua-tua na möi manuriaigö, lö omasi ita taʼosiwawöi zindruhu moroi ba Zura Niʼamoniʼö ha enaʼö latema ita niha.

16. Hadia gohitö dödö Zomböi ba niha gulidanö?

¹⁶ Ohitö dödö Lowalangi enaʼö ahatö niha khönia. Hewaʼae no ara fabuʼa-buʼa ndra filsuf hadia mbörö wa tewöwöi niha ba gulidanö, hizaʼi lö irai labeʼe wanema li si tefaudu sanandrösa ba daʼö. Iadaʼa, ihaogö wanutunö Faulo hadia sibai gohitö dödö Lowalangi ba niha gulidanö, yaʼia daʼö ”enaʼö laʼalui Lowalangi. Na laforege wangalui yaʼia, ba tola lasöndra ia. Sindruhunia lö aröu ia khöda zamösana”. (Hal. 17:27) Lowalangi si lö laʼila ira niha Atena, tenga Lowalangi si tebai laʼila. Sindruhunia lö aröu ia moroi ba niha somasi manöndra ba samahaʼö yaʼira sanandrösa khönia. (Si. 145:18) Nehegö atö, iʼogunaʼö Faulo ngawua wehede ”khöda” ba wotandrösaigö wa ifaogö ia ba niha ’sangalui’ mazui ’samorege wangalui’ Lowalangi.

17, 18. Hana wa sinangea na omasi niha ahatö khö Lowalangi, ba hadia zi tobali famahaʼö khöda moroi ba nifalua Waulo me ifarou dödö niha samondrongo huhuonia?

 ¹⁷ Sinangea ba niha gulidanö na omasi ira ahatö khö Lowalangi. Imane Faulo, ”Börö ia wa auri ita, maliwa-liwa ita ba so ita.” So ösa ndra sagatua-tua sangumaʼö wa no iʼogunaʼö Faulo wehede Epimenides, samösa sanura ba Gereta me abad si önö SM ba ”niha nifosumange sanandrösa ba nifaduhusi tödö agama niha Atena”. Itutunö nasa Faulo hadia mbörö wa no sinangea omasi niha ahatö khö Lowalangi, imane, ”Simane niwaʼö ndra sanura andrö khömi, ’Ononia göi ita.’” (Hal. 17:28) Sindruhunia, moguna ahatö niha khö Lowalangi börö me yaʼia andrö Ama moroi ba niha siföföna si tobali furugö niha gulidanö. Enaʼö adöni dödö niha samondrongo, ihaogö wanötöi Faulo wehede nisura ba li Yunani nifosumangera. e Simane nifalua Waulo, tola göi taʼogunaʼö nisura ba sejarah, ensiklopedia mazui karya referensi si toʼölö laʼogunaʼö niha. Duma-dumania, fehede moroi ba mbuku mazui niha nifosumange si tola mangaʼaroʼö faʼafaduhu dödö niha si tenga Samaduhuʼö hezo iʼotarai gowasa nifalua agama sofaya.

¹⁸ Moroi ba huhuonia, si fao faʼatua-tua ifaʼema Faulo zindruhu sanandrösa khö Lowalangi, ba ifaudugö wehedenia enaʼö fatema ba dödö zamondrongo. Hadia nitötöna Waulo sinangea lafalua ira niha Atena me no ifaʼema khöra zindruhu? Lö itaha-taha ba wangombakha khöra.

19, 20. (a) Hewisa wanutunö Waulo si fao faʼatua-tua wa bodo sibai zamosumange adu nifazökhi danga niha? (b) Hadia zinangea lafalua ira niha samondrongo fehede Waulo?

¹⁹ No ifaʼanö ia Faulo ba wamarou tödö niha si fahuhuo khönia. Ifuli zui itötöi ngawua wehede nisura ba li Yunani imane: ”Börö me ono Lowalangi ita, böi tamane wa Lowalangi andrö amaedola ganaʼa mazui firö mazui kara, simane adu nihaogö zamazökhi yaʼia dali nisöndra dödö niha.” (Hal. 17:29) Atulö, na Lowalangi zomböwöi niha, hewisa wa ifuli ibaliʼö ia adu nifazökhi niha? Fehede Waulo andre zangoromaʼö wa bodo sibai zamosumange adu nifazökhi niha. (Si. 115:4-8; Yes. 44:9-20) Me iwaʼö Faulo ”böi tamane . . . ”, eluahania enaʼö lö lawaʼö tödöra wa talafo abeʼe mene-mene daʼa.

²⁰ Ihaogö wanutunö khöra Faulo wa so zinangea lafalua. Imane, ”So mböröta ginötö nitehegö Lowalangi ba niha wa lö aboto ba dödöra ia [wa omasi Lowalangi ba niha samosumange adu]. Iadaʼa, ifatunö ba niha gofu hezo manö wa moguna lafalalini gera-erara.” (Hal. 17:30) Te so ösa zi tokea me iwaʼö mifalalini gera-erami. Hizaʼi fehede daʼö zangoromaʼö wa moʼömö faʼauri ira khö Lowalangi ba yaʼira dania zameʼe fanema li zamösana. Moguna laʼalui Lowalangi, lafahaʼö ira ba zindruhu sanandrösa khönia ba lafaudugö lala  waʼaurira moloʼö sindruhu andrö. Eluahania, moguna laʼila ira niha Atena ba lafalalini gera-erara moroi ba horö nifaluara börö me lafosumange nadu.

21, 22. Hadia wehede fangasiwai nifaʼema Waulo, ba hadia geluahania khöda iadaʼa?

²¹ Iʼasiwai wehedenia Faulo imane, ”No ihonogöi [Lowalangi] ginötö ba wanguhuku ulidanö si fao faʼatulö, no ituyu samösa niha ba no göi ibeʼe weʼe-weʼe dödö ba niha fefu, yaʼia me isusugi niha andrö moroi ba gotalua zi mate.” (Hal. 17:31) Faʼatohare Luo Wanguhuku zamasugi ba dödöra wa moguna laʼalui Lowalangi sindruhu! Lö itötöi döi Zanguhuku si no mutatugöi andrö. Hizaʼi, itötöi Faulo zahöli-höli dödö sanandrösa khö zanguhuku andrö: No irai tobali ia niha, mate ba aefa daʼö isusugi ia Lowalangi!

²² Ebua sibai gunania khöda iadaʼa wehede fangasiwai andrö. Aboto ba dödöda wa Sanguhuku si no itatugöi Lowalangi, yaʼia daʼö Yesu Keriso si no tesusugi. (Yoh. 5:22) Taʼila göi wa Luo Wanguhuku andrö alua ia sagötö zi saribu fakhe waʼara ba no ahatö sibai daʼö. (Fam. 20:4, 6) Lö ataʼu ita Ngaluo Wanguhuku andrö, börö me aboto ba dödöda wa luo daʼö dania zangaʼasogö howu-howu si tebai mukhalaigö ba niha si lö faröi. Faʼalua dötönafö andrö ba zi so miföna no tefabuʼu daʼö ba dandra sahöli-höli dödö fondrege zebua yaʼia daʼö femaoso Yesu Keriso!

23. Hadia manö nifalua niha me no aefa ifaduhuʼö zindruhu Faulo?

²³ Faböʼö-böʼö nifalua niha me no larongo wehede Waulo andrö. Me larongo sanandrösa ba wanusugi niha si no mate, ”ibörögö so zangoʼaya”. So göi zohaogö-haogö manö ba wanimbagö lamane, ”Luo böʼö manö mafondrondrongo nifaʼemamö andre.” (Hal. 17:32) Hizaʼi, so niha sanemaʼö, ”So niha si fao khönia ba faduhu dödöra. So samösa ba gotaluara zangetuʼö huku moroi ba Areofago sotöi Dionizio, ba samösa ndra alawe sotöi Damaria hegöi niha böʼö.” (Hal. 17:34) Alua göi khöda zimane daʼö ba halöwö fanuriaigö nifaluada. Te so niha sangoʼaya yaʼita, so göi niha no lahaogö-haogö manö hizaʼi lö omasi ira. Hawaʼomuso dödöda na so niha sanemaʼö turia nifaʼemada ba faduhu dödöra ba daʼö.

24. Hadia wamahaʼö si tola tahalö moroi ba wamaduhuʼö nifaʼema Waulo ba Areofago?

²⁴ Na taʼangerönusi wamaduhuʼö nifaʼema Waulo, oya zi tobali famahaʼö khöda sanandrösa ba wahuhuosa enaʼö fatema ba dödö niha samondrongo ba faduhu dödöra wa nifaʼemada andrö sindruhu. Baero daʼö, tafahaʼö ita wa moguna so khöda waʼebolo dödö ba tahaogö-haogö wahuhuosa ba niha si no balunö famati börö wamahaʼö ba agama sofaya. So nasa wamahaʼö tanö böʼö: Tebai taʼosiwawöi zindruhu ba Zura Niʼamoniʼö ha enaʼö omuso dödö zamondrongo. Na taʼoʼö duma-duma nifalua Waulo, tola tobali ita samahaʼö satua-tua ba wanuriaigö. Baero daʼö, ira talifusöda sondröniaʼö ba mbanua niha Keriso, tola göi tobali samahaʼö satua-tua. Daʼö fefu zanolo yaʼita enaʼö tefaʼanö ba wanolo niha böʼö irege ”laʼalui Lowalangi . . . ba tola lasöndra ia”.—Hal. 17:27.