1, 2. Haniha zofanö moroi ba Wilifi numalö ba Desalonika, hadia manö zi tola tumbu ba wangera-ngerara?

 LALA sebolo sato niha andrö nifazökhi niha sogonekhe ba Romawi, itörö manö hili-hili. Itaria, oya li si fendronga terongo, simane li galide, ugu-ugu gaolo-gaolo gureta sanörö tete gara, hegöi li niha sato, ira saradadu, sogale, ba li ndra sohalöwö. Faulo, Sila hegöi Timoteo latörö lala moroi ba Wilifi numalö ba Desalonika, faʼaröunia töra 130 kilometer. Tenga fofanö saoha daʼö, töra-töra khö Waulo ba Sila, börö me larasoi nasa waʼafökhö zokho ba mbotora me laböbözi ira ba Wilifi.—Hal. 16:22, 23.

² Hewisa enaʼö lö marase ira wanörö lala saröu andrö? Fahuhuosara ba lala zanolo yaʼira. Tatu lö olifu ira zalua si möi fangomuso dödö sanandrösa khö zanaro kurunga hegöi ösi nomonia si tobali niha Keriso ba Wilifi. Daʼö zangaʼaroʼö tödöra irege lö laböhöli wanuriaigö Taromali Lowalangi. Hizaʼi, me arakhagö larugi mbanua si so ba ngai nasi Desalonika, te manofu-nofu dödöra hewisa dania wanemaʼö niha Yahudi si so ba mbanua daʼö waʼatoharera. Hadia lafakao mazui laböbözi ira simane salua ba Wilifi?

3. Hewisa wa tobali duma-duma khöda Waulo ba wangoromaʼö faʼabarani ba wanuriaigö?

³ Ba gafuriata, ifatunö hadia nirasoinia Faulo ba zura nifaʼoheʼönia ba niha Keriso si so ba Desalonika, ”No matörö wamakao ba fangoʼaya ba Wilifi simane si no miʼila, hizaʼi no ibeʼe khöma waʼabarani Lowalangi ba wamaʼema turia somuso dödö khömi hewaʼae oya wanandraigö.” (1 Te. 2:2) Ba daʼa taʼila wa so waʼaombö dödö khö Waulo me larugi mbanua Desalonika, mendrua manö me no laböbözi ira ba Wilifi. Hadia tola örasoi hewisa dödö Waulo? Hadia no irai abua khöu wanuriaigö turia somuso dödö? Tola barani ba abölö Waulo börö me iʼodaligö Yehowa ba wanolo yaʼia. Na tafahaʼö ita ba duma-duma Waulo, tola göi tafalua zimane daʼö.—1 Ko. 4:16.

4. Hana wa tola manö töra tölu migu toröi Waulo ba Desalonika?

⁴ Moloʼö si no tesura, sagötö feʼaso Waulo ba Desalonika, lö iböhöli wanuriaigö ba nahia waʼowulo ba zi tölu kali Sabato. Hadia daʼö geluahania ha tölu migu toröi ia ba daʼö? Lö tatu. Lö taʼila hauga hari no irugi mbanua daʼö fatua lö ibörögö weʼamöi ba nahia waʼowulo. Baero daʼö, moroi ba zurania taʼila wa sagötö feʼasonia ba Desalonika, Faulo hegöi ira awönia mohalöwö ira ba wangalui soguna khöra. (1 Te. 2:9; 2 Te. 3:7, 8) Sagötö feʼasonia göi ba daʼö, dua kali itema mbuala moroi khö ndra talifusö ba Wilifi. (Fil. 4:16) Tobali, tola manö töra tölu migu toröi ia ba Desalonika.

5. Hewisa na fahuhuo Waulo ba niha?

⁵ Me no iforege wangoromaʼö faʼabarani ba wanuriaigö, fahuhuo Waulo ba niha sato si so ba nahia waʼowulo. Simane si toʼölö, ”ihaogö wamatunö enaʼö aboto ba dödöra hewisa moloʼö Buku Niʼamoniʼö, itutunö ba ifaduhuʼö moloʼö ayati zura wa hasambalö itörö wamakao Keriso ba tesusugi ia moroi ba gotalua zi mate. Imane, ’Yesu nituriaigögu khömi yaʼia daʼö Kerisoʼ”. (Hal. 17:2, 3) Nehegö wa lö iforege Faulo enaʼö ahöli-höli dödö niha khönia; idöniaʼö ira enaʼö mangera-ngera. Iʼila wa niha sowulo ba daʼö laʼila ba laʼameʼegö tödö nösi Mbuku Niʼamoniʼö. Si lö laʼokhögö yaʼia daʼö faʼaboto ba dödö. Andrö wa ihaogö wanutunö, ifaduhuʼö moloʼö Buku Niʼamoniʼö wa Yesu moroi ba Nazareta, yaʼia andrö Mesia mazui Keriso si no mufabuʼu.

6. Hewisa wangogunaʼö Yesu Buku Niʼamoniʼö na fahuhuo ia, ba hadia mbuania?

⁶ Iʼoʼö Faulo duma-duma nibeʼe Yesu, sangogunaʼö Buku Niʼamoniʼö tobali dane-dane wamahaʼönia. Duma-dumania, sagötö mangai halöwö Yesu, ifatunö khö ndra nifahaʼönia wa moloʼö Buku Niʼamoniʼö, hasambalö tefakao nono niha, mate ba ifuli tesusugi. (Mat. 16:21) Me no aefa tesusugi Yesu, iforomaʼö ia khö ndra nifahaʼönia. Daʼö zangoromaʼö wa sindruhu niwaʼönia. Hizaʼi, tenga ha daʼö. Nehegö hadia nifatunönia khö ndra nifahaʼönia ösa, ”Ifatunö fefu zalua khönia si no tesura ba Mbuku Niʼamoniʼö, iʼotarai nisura Moze hegöi Nisura Ndra Samaʼeleʼö.” Hadia mbuania? Lamane ira nifahaʼö, ”Andrö tefaudu sibai ba dödöda me fahuhuo ia khöda ba lala, me itutunö nösi Mbuku Niʼamoniʼö!”—Luk. 24:13, 27, 32.

7. Hana wa moguna taʼogunaʼö Zura Niʼamoniʼö si tobali dane-dane wamahaʼöda?

⁷ Mofaʼabölö Daromali Lowalangi. (Heb. 4:12) Börö daʼö, niha Keriso iadaʼa laʼogunaʼö Daromali Lowalangi tobali dane-dane wamahaʼöra, simane nifalua Yesu, Faulo hegöi sinenge tanö böʼö. Na fahuo-huo ita ba niha, tahaogö wanutunö khöra geluaha ayati, ba tabokai khöra Zura Niʼamoniʼö ba wamaduhuʼö famahaʼö nifaʼema. Baero daʼö, turia nifaʼemada tenga moroi khöda. Na asese taʼogunaʼö Zura Niʼamoniʼö, tatolo niha enaʼö laʼila wa turia nifaʼemada tenga bua gera-erada samösa, hizaʼi famahaʼö Lowalangi. Moguna göi tatörö tödöda wa fefu duria nifaʼemada teʼodane-dane daʼö ba Daromali Lowalangi.  Sindruhu-ndruhu tola mufaduhusi tödö duria andrö. Hadia tenga daʼö zameʼe khöu faʼabarani ba wamaʼema yaʼia, simane nifalua Waulo?

8-10. (a) Hewisa niha Desalonika me larongo duria somuso dödö? (b) Hana wa so ösa niha Yahudi safökhö tödö khö Waulo? (c) Hadia nifalua niha samadaö?

⁸ No irasoi samösa Faulo wehede Yesu andre, ”Lö abölö ebua zawuyu moroi khö zokhö yaʼia. Na lafakao ndraʼo, ba lafakao göi ami dania. Na laʼoʼö niwaʼögu, ba laʼoʼö göi niwaʼömi dania.” (Yoh. 15:20) Ba Desalonika, no faböʼö-böʼö wanemaʼö niha turia nifaʼema Waulo. So zanemaʼö ba samalua yaʼia, hizaʼi so göi zamadaö. Imane Luka sanandrösa ba niha sanemaʼö, ”So ösa zi faduhu tödö [si tobali niha Keriso] moroi ba gotalua [niha Yahudi], ato niha Yunani samosumange Lowalangi, ba ato ndra alawe si tehöngö si fao khö Waulo hegöi Sila.” (Hal. 17:4) Omuso sibai dödö ndra nifahaʼö si bohou andre börö me no aboto ba dödöra nösi Mbuku Niʼamoniʼö.

⁹ Hewaʼae so zoʼameʼegö tödö turia nifaʼema Waulo, hizaʼi niha tanö böʼö lafatangi-tangi mbohara. So ösa niha Yahudi ba Desalonika safökhö tödö me laʼila waʼamofozu Waulo irege ”ato niha Yunani” zi faduhu tödö. Ohitö dödö ndra niha Yahudi andre enaʼö tobali proselit ndra niha Yunani ba labeʼe wamahaʼö moroi ba Mbuku Niʼamoniʼö Heberaiʼo, ba lawaʼö wa no tana khöra niha si tenga Yahudi andre. Hizaʼi, ba zi lö mudöna-döna tohare Waulo, ba hulö no itagö ndra niha Yunani andrö ba nahia gangowuloara! Daʼö mbörö wa aukhu dödö ndra niha Yahudi.

¹⁰ Itutunö khöda Luka hadia zalua aefa daʼö, ”Börö waʼafökhö dödö niha Yahudi, lakaoni niha si lö sökhi ba fasa, samangörö-ngörö yaʼira ba lala, ba laʼowuloi ira enaʼö kaliru mbanua andrö. Lasuwö nomo Yaso enaʼö laʼohe baero Waulo faoma Sila ba niha si kaliru andrö. Börö me lö lasöndra Waulo faoma Sila, lasöbi baero Yaso ba so ösa ndra talifusö niʼohe föna ndra samatörö ba lamane, ’Ba daʼa so niha samawukaisi ulidanö, no itema ira Yaso tobali tomenia. No lasawö huku Kaisaro börö me lamane so razo tanö böʼö yaʼia daʼö Yesu.’” (Hal. 17:5-7) Hadia lua-lua waʼakaliru andre khö Waulo hegöi ira awönia?

11. Hadia niböbögö khö Waulo hegöi sanuriaigö tanö böʼö, ba hadia gamakhoita niböbögöra nisawö ndra sanuriaigö andrö? (Faigi nisura ba gahe zura.)

¹¹ Sindruhu wa ataʼu ita na alua waʼakaliru. Tohare ira hulö molö sabölö-bölö, lö sökhi nifaluara ba tebai mutaha. Daʼö nifalua niha Yahudi ba wamofanö Faulo hegöi Sila. Me no ’lakalirukö’ mbanua daʼö, laʼalui lala enaʼö faduhu dödö ndra samatörö wa atulö niböbögöra. Niböbögöra si oföna yaʼia daʼö Faulo hegöi ira sanuriaigö tanö böʼö no ’lafawukaisi gulidanö’, hewaʼae na sindruhunia tenga Faulo mazui ira awönia zokalirukö banua Desalonika!  Abölö abeʼe nasa wamöbögö si dua: Ira utusan injil andrö laturiaigö Razo tanö böʼö yaʼia daʼö Yesu, ba eluahania no lasawö gamakhoita nibeʼe Kaisaro. a

12. Hadia zangoromaʼö wa tola tobali famaʼala ba niha Keriso si so ba Desalonika niböbögö khöra andrö?

¹² Törö tödöu wa daʼö göi niböbögö ndra sondröniaʼö agama khö Yesu. Lamane khö Wilato, ”No ifaelungu mbanuama niha daʼa . . . ba ifaduhuʼö wa Keriso ia, samösa razo.” (Luk. 23:2) Te börö me ataʼu Wilato na iwaʼö tödönia kaisaro wa fao dödönia ba daʼö, andrö wa itehegö lahuku mate Yesu. Simanö göi, si lö atulö niböbögö ba niha Desalonika, tola möi famaʼala waʼaurira. Imane sambua karya referensi, ”Famaʼala si so fönara, tenga ha fametaʼu, börö me ’tola mubunu niha nifobahulu andrö hewaʼae na ha tiu-tiu nangi nirongo Kaisaro sanandrösa ba wamadaöra’.” Hadia aʼozu zi lö sökhi niʼera-erara?

13, 14. (a) Hadia mbörö wa lö mofozu niʼera-era niha si kaliru andrö? (b) Hewisa wangoromaʼö Waulo wa mangelama ia simane Keriso, ba hewisa woloʼöda duma-dumania?

¹³ Lö mofozu niʼera-era niha si kaliru andrö ba wombatogö halöwö fanuriaigö ba Desalonika. Hadia mbörö? Börö me lö lasöndra Waulo hegöi Sila. Baero daʼö, te lö faduhu dödö ndra samatörö banua daʼö wa atulö niböbögöra. Me no ”labeʼe gefe si tobali weʼe-weʼe dödö”, laʼefasi Yaso awö ndra talifusö tanö böʼö si no laʼohe tanö fönara. (Hal. 17:8, 9) Tefaudu simane mene-mene Yesu enaʼö ’onekhe simane ulö ba atulö simane marafadi’, si fao faʼatua-tua ibiniʼö ia Faulo moroi ba deʼala irege tola itohugö halöwö fanuriaigö ba nahia böʼö. (Mat. 10:16) Faʼabarani niforomaʼö Waulo tenga si lö fangera-ngera. Hewisa niha Keriso iadaʼa woloʼö duma-dumania?

¹⁴ Asese lafalua zimane daʼö iadaʼa ira sondröniaʼö agama, lafarou niha sato ba wamakao ira Samaduhuʼö Yehowa. Lafaweʼe ndra samatörö ba wamakao ira Samaduhuʼö, lawaʼö wa no mamadaö ba lafalua zi lö sökhi. Simane me abad siföföna, lafalua daʼö börö waʼafökhö dödö. Hewaʼae simanö, lö lafobörö wangala ira niha Keriso sindruhu. Taforege enaʼö lö fabuʼa-buʼa ita ba niha sofönu-fönu ba si lö faduhu tödö. Omasi ita tatohugö wamalua halöwöda si fao faʼahono dödö, ba tafuli ita ba ginötö si tefaudu.

15. Hewisa wanemaʼö niha Mberea duria somuso dödö?

¹⁵ Enaʼö lö teʼala waʼauri Waulo hegöi Sila, laʼandrö khöra enaʼö möi ira ba Mberea, faʼaröunia kira-kira 65 kilometer. Me larugi mbanua daʼö, möi Waulo ba nahia waʼowulo ba fahuhuo ia ba niha sato. Omuso sibai dödö Waulo börö me latemaʼö ia soroi ba dödö! Imane Luka sanandrösa ba niha Yahudi si  so ba Mberea, ”Tenga simane niha Desalonika, abölö omasi niha Mberea na tefahaʼö ira, börö me soroi ba dödöra wanemaʼö taromali Lowalangi. Lafareso Mbuku Niʼamoniʼö ero maʼökhö enaʼö laʼila hezo zindruhu.” (Hal. 17:10, 11) Hadia daʼö geluahania wa ambö baga lagu ndra niha Desalonika sanemaʼö sindruhu? Tatu tenga. Ba gafuriata, isura zurania khöra Faulo, ”Lö maböhöli wangandrö saohagölö khö Lowalangi, börö me mirongo daromali Lowalangi moroi khöma, mitema ia tenga simane fehede niha, hizaʼi sindruhunia fehede Lowalangi zondrönisi tödömi yaʼami soloʼö Soʼaya.” (1 Te. 2:13) Na simanö, hana wa muwaʼö wa abölö omasi niha Mberea na tefahaʼö ira?

16. Hana wa tefaudu na muwaʼö wa ”abölö omasi niha Mberea na tefahaʼö ira”?

¹⁶ Hewaʼae na awena larongo duria somuso dödö, lö manahö-nahö dödö niha Mberea mazui fabuʼa-buʼa ira, ba lö göi asala lafaduhusi tödö. Ba wamobörö, lahaogö lafondrondrongo hadia niwaʼö Waulo. Aefa daʼö, lafareso ba Mbuku Niʼamoniʼö hadia wamahaʼö nitemara. Owölö-ölö göi ira ba wamahaʼö yaʼira ba Daromali Lowalangi, tenga ha ba luo Sabato, hizaʼi ero maʼökhö. Lafalua daʼö ’soroi ba dödö’, laforege wangalui sindruhu ba Zura Niʼamoniʼö sanandrösa ba wamahaʼö si bohou latema. Baero daʼö, so khöra wangide-ngideʼö ba wamalua fombulöʼö ”irege ato zi faduhu tödö ba gotaluara”. (Hal. 17:12) Daʼö mbörö wa iwaʼö Luka, ”Abölö omasi niha Mberea na tefahaʼö ira.”

17. Hana wa no sinangea musuno duma-duma niha Mberea, ba hewisa woloʼöda nifaluara hewaʼae no ara ita ba zindruhu?

¹⁷ Lö irai lakhalaigö ira niha Mberea wa fanemaʼöra turia somuso dödö musura ia  ba Zura Niʼamoniʼö si tobali duma-duma si sökhi irugi iadaʼa. Nifaluara tefaudu ba zomasi Lowalangi Yehowa hegöi ba nitötöna Waulo. Daʼö göi wamarou dödö nifaʼemada ba niha, enaʼö lahaogö wamareso Sura Niʼamoniʼö irege aro wamatira ba teʼodane-dane ba Daromali Lowalangi. Hizaʼi, me no aboto ba dödöda zindruhu, hadia lö omasi saʼae ita tabaso ba tafahaʼö ita? Tatu manö moguna nasa tafahaʼö ita moroi khö Yehowa ba iʼanemaiʼö tafalua wamahaʼö nitemada. Na tafalua daʼö, no tatehegö khö Yehowa ba wangaʼazökhi hegöi ba wamahaʼö yaʼita moloʼö somasi ia. (Yes. 64:8) Tola göi taʼomusoiʼö dödönia ba lö tebulö iʼogunaʼö ita Amada si so ba zorugo.

18, 19. (a) Hana wa mofanö Waulo moroi ba Mberea, ba hewisa woloʼöda famorege nifaluania? (b) Haʼökhö ba hezo manuriaigö Waulo aefa daʼa?

¹⁸ Tebai iradö-radö ia Faulo ba Mberea. Imane Sura Niʼamoniʼö, ”Me larongo niha Yahudi si so ba Desalonika wa no ituriaigö daromali Lowalangi Faulo ba Mberea göi, tohare ira lafaweʼe niha ba lafangiwa dödö zato. Börö daʼö, iʼanemaiʼö lawaʼö khö Waulo ira talifusö enaʼö mofanö ia ba zinga nasi, hizaʼi toröi Zila faoma Timoteo ba daʼö. Ira talifusö si fao khö Waulo lafasao ia irugi Atena, aefa daʼö mofanö ira me no latema goroisa enaʼö alio Zila faoma Timoteo wamalukhaisi Faulo.” (Hal. 17:13-15) Lö atage-tage nudu! Lö ahono nasa dödöra me no lafofanö Waulo moroi ba Desalonika. Möi ira ba Mberea ba laʼalui lala enaʼö alua gabula dödö si fagölö. Hizaʼi, zaya-zaya gölöra daʼö. Iʼila Faulo wa ebolo nasa mbanua sinangea ituriaigö, andrö wa möi ia ba mbanua böʼö. Iadaʼa göi, yataʼokhögö waʼaro dödö ba wamorege enaʼö lö taböhöli wanuriaigö turia somuso dödö hewaʼae so zanaisi!

¹⁹ Me no aefa ihaogö wanuriaigö Faulo ba niha Yahudi si toröi ba Desalonika hegöi Berea, tatu oya wamahaʼö nihalönia sanandrösa ba wangokhögö faʼabarani hegöi faʼatua-tua ba wangogunaʼö Sura Niʼamoniʼö ba wahuhuosa. Simanö göi ita. Hizaʼi iadaʼa, manuriaigö Waulo ba niha si tenga Yahudi ba mbanua Atena, faböʼö moroi ba niha nituriaigönia ba zilalö. Hadia zalua khö Waulo ba mbanua daʼö? Taʼila dania wanema linia ba faza aefa daʼa.