FAZA 10
”Itugu Ato Zamondrongo Taromali Yehowa”
Teʼefaʼö Wetero, ba lö tebato wanuriaigö turia somuso dödö hewaʼae so wolohi
Teʼodane-dane ba Halöwö Zinenge 12:1-25
1-4. Hadia gabula dödö salua khö Wetero, ba hewisa na alua khömö zimane daʼö?
MOʼUGU mbawandruhö siʼöli si teduhö furi Wetero. No larate dangania ba no lafakhai daʼö khö zi darua saradadu Romawi samatambai yaʼia weʼamöi ba gurunga. Aefa daʼö, te ba zi hauga hari, ibalo-baloi hadia dania zalua khönia. Lö hadöi si tola iʼila baero dowa, siʼöli mbawandruhö gurunga, rate hegöi ira sanaro.
2 Sindruhu-ndruhu lö sökhi hukuma niʼetuʼö khö Wetero. Omasi Razo Herode Agerifa I na mate Wetero. a No iʼera-era ba wamaʼeleʼö Fetero föna niha sato na no aefa mufalua Gowasa Fasa, ba hukuma faʼamate nitema Wetero no buala ba wangomusoiʼö tödö niha sato. Tenga ha fametaʼu daʼö. So samösa zinenge tanö böʼö sotöi Yakobo sawena ibunu Razo Herode.
3 Irugi inötö ba mbongi waʼamatenia. Hadia niʼangeragö Wetero ba waʼogömi-gömi gurunga si so yaʼia? Hadia itörö tödönia wehede Yesu ba zi hauga fakhe silalö me ifatunö khönia wa samuza inötö dania muböbö ba muʼohe ia baero ofeta waʼamatenia? (Yoh. 21:18, 19) Te iwaʼö tödönia Fetero daʼa ginötönia.
4 Na alua khömö zimane nitaögö Wetero andre, hewisa dödömö? Ato niha safatö tödö, lawaʼö wa lö hadöi saʼae tötönaföra. Hizaʼi, ba wamaigi niha Keriso sindruhu soloʼö khö Yesu, hadia so zalua sangetuʼö tötönaföra? Hadia wamahaʼö nihalöda moroi ba nifalua Wetero hegöi ira awönia ba wanaögö folohi salua khöra? Datatutunö.
’Lö Laböhöli Wangandrö Ira Talifusö Soroi ba Dödö’ (Hal. 12:1-5)
5, 6. (a) Hadia nifalua Razo Agerifa I ba wamakao banua niha Keriso, ba hadia mbörö? (b) Hana wa tobali fanandraigö ba mbanua niha Keriso waʼamate Yakobo?
5 Simane nitutunöda ba faza silalö, famalalini era-era nifalua Gonelio hegöi ösi nomonia si tenga niha Yahudi, no faʼatedou sahöli-höli dödö ba mbanua niha Keriso. Hizaʼi, niha Yahudi si lö faduhu tödö hasambalö tokea ira me laʼila wa ato niha Keriso Yahudi si fao ba niha si tenga Yahudi ba wamosumange Lowalangi.
6 Ba wamaigi Herode, samösa samatörö sonekhe, daʼa ginötö ba wangai tödö niha Yahudi. Andrö wa ibörögö wamakao niha Keriso. Te no irai irongo wa fahuwu sibai zinenge sotöi Yakobo khö Yesu Keriso. Börö daʼö, ”ibunu dalifusö Yohane sotöi Yakobo faoma föda”. (Hal. 12:2) Sindruhu-ndruhu fanandraigö sabua daʼa ba mbanua niha Keriso! Yakobo andre samösa moroi ba zi datölu niha sangila me tebulö zikhala Yesu hegöi tandra sahöli-höli dödö tanö böʼö si lö muforomaʼö khö ndra sinenge tanö böʼö. (Mat. 17:1, 2; Mrk. 5:37-42) Ifotöi Yakobo andre Yesu hegöi talifusönia Yohane, ”Ono Weʼugu-ugu Mbanua” börö waʼaterou dödöra. (Mrk. 3:17) Andrö wa laʼamalösi sibai ira talifusö ba mbanua niha Keriso zamaduhuʼö si lö faʼataʼu andre, si lö faröi, hegöi sinenge niʼomasiʼö.
7, 8. Hadia nifalua mbanua niha Keriso me labeʼe ba gurunga Wetero?
7 Omuso dödö niha Yahudi me no mate Yakobo, simane nitötöna Agerifa. Itugu barani ia, ba iadaʼa iʼalui lala ba wamunu Fetero. Simane nitutunö ba wamobörö no mege, iraʼu Wetero. Hizaʼi, te itörö tödö Agerifa wa lö ero-ero mofozu na muʼogunaʼö gurunga ba wanaha ira sinenge, simane si no tatutunö ba Faza 5 mbuku daʼa. Börö me lö omasi Herode na alua zimane daʼö, andrö wa iwaʼö enaʼö larate Wetero ba gotalua zi darua saradadu ba so 16 zaradadu si fagati-gati bongi maʼökhö ba wamaigi-maigi enaʼö lö moloi zinenge andrö. Na moloi Wetero, ira saradadu andrö zi göna hukuma nitema Wetero. Ba ginötö si möi famangiwa dödö andre, hadia nifalua ndra talifusö si sara lala wamati?
8 Aboto ba dödö mbanua niha Keriso hadia zinangea lafalua. Imane ba Halöwö Zinenge 12:5, ”Sagötö feʼaso Wetero ba gurunga, lö laböhöli wangandrö salahinia ira talifusö ba mbanua niha Keriso soroi ba dödö.” Sindruhu, fangandrö salahi dalifusö niʼomasiʼöra andrö, no angandröwa soroi ba dödö. Lö aetu dötönaföra hewaʼae no mate Yakobo, ba lö lawaʼö tödöra wa zaya-zaya gölö na mangandrö ira. Sindruhu-ndruhu iʼameʼegö tödö Yehowa wangandrö. Na tefaudu daʼö ba gohitö dödönia, hasambalö ibeʼe wanema li. (Heb. 13:18, 19; Yak. 5:16) Daʼa wamahaʼö sinangea latanögö ba dödöra ira niha Keriso iadaʼa.
9. Hadia wamahaʼönia khöda duma-duma ndra talifusö si sara lala wamati khö Wetero sanandrösa ba wangandrö?
9 Hadia so niʼilamö ndra talifusöda si sara lala wamati si göna abula dödö soya sibai? Te göna ira folohi, fanaisi moroi khö ndra samatörö mazui bencana alam. Hadia tola ötötöi döira ba wangandrömö soroi ba dödö? Te so göi niʼilamö ndra talifusöda sanaögö abula dödö si lö oroma, duma-dumania abula dödö ba zi sambua omo, faʼide-ide dödö mazui so wanandraigö wamatira. Na öhaogö öʼangerönusi fatua lö mangandröʼö, tola ötörö tödömö döi-töi ndra talifusöda somasiʼö öʼohe ba wangandrö na fahuhuo ndraʼugö khö Yehowa, ’Samondrondrongo fangandrö’. (Si. 65:2) Tatu omasiʼö na lafalua göi zimane daʼö ira talifusöda na göna ndraʼugö abula dödö.
Mangandrö ita salahi ndra talifusöda nibeʼe ba gurunga börö wamatira
”Oʼö Ndraʼo” (Hal. 12:6-11)
10, 11. Tutunö hadia nifalua malaʼika Yehowa ba wangefaʼö Fetero moroi ba gurunga.
10 Hadia aombö dödö Wetero ba zi lö ara tö alua khönia? Lö taʼila sibai, hizaʼi ba mbongi safuria weʼasonia ba gurunga, abölö-bölö sibai wemörönia ba gotalua zi darua sozago kurunga. Hasambalö iʼila ira matua samati andre wa fao khönia Yehowa gofu hadia zalua khönia mahemolu. (Rom. 14:7, 8) Lö irai itötöna Fetero wa so zalua sahöli-höli dödö ba zi lö ara tö. Ba zi lö mudöna-döna so zohagaini kurunga si so yaʼia. No mozizio ba daʼö malaʼika, ba lö laʼila ia ira sozago gurunga, ifangaösö Wetero enaʼö maoso ia. Aefa daʼö, rate samöbö tangania si tebai muʼetuʼö, atoru manö ba zi lö mudöna-döna!
”Larugi mbawa göli siʼöli si numalö ba mbanua sebua, ba teboka manö mbawa göli andrö.”—Halöwö Zinenge 12:10
11 Imane malaʼika andrö khö Wetero, ”Aliokö faoso! . . . Fake mböbö löwimö ba sandralamö. . . . Fake mbarumö tanö baero.” Iʼanemaiʼö ifalua daʼö Fetero. Ba gafuriata imane khönia malaʼika daʼö, ”Oʼö ndraʼo,” ba iʼoʼö ia Fetero. Me laröi gurunga, latörö manö föna ndra sanaro kurunga si so tanö baero, lö nini-nini numalö ba mbawa göli siʼöli. Hewisa dania wa tola latörö daʼö? Na so ba wangera-ngera Wetero wanofu daʼö, iʼanemaiʼö iʼila wanema linia. Me arakhagö larugi, ”teboka manö mbawa göli andrö”. Me no lataluʼi mbawa göli ba so ira ba lala, taya manö malaʼika andrö. Iröi Wetero ba daʼö, ba awena aboto ba dödö Wetero wa sindruhu-ndruhu alua daʼa, tenga angilata. No teʼefaʼö ia!—Hal. 12:7-11.
12. Hana wa terara dödöda na taʼangerönusi nifalua Yehowa ba wangefaʼö Fetero?
12 Hadia lö terara dödöda na taʼangerönusi waʼabölö Yehowa si lö ola ba wangefaʼö ono mbanuania? Razo samakuruʼö Fetero, ituhini ia famatörö fondrege zabölö me luo daʼö. Hewaʼae simanö, tola möi baero Wetero ba gurunga lö taha-taha! Sindruhu sa wa lö ifalua dandra sahöli-höli dödö simane daʼö Yehowa ba nono mbanuania maʼafefu. Lö ifalua zimane daʼö khö Yakobo, ba lö saʼae ifalua zimane daʼö khö Wetero ba ginötö alua wehede Yesu sanandrösa khö zinenge andrö. Niha Keriso iadaʼa, lö ladöna-döna dandra sahöli-höli dödö ba wangefaʼö yaʼira. Hizaʼi, datatörö tödöda wa lö si tebulö Yehowa. (Mal. 3:6) Ba zi lö ara tö, iʼogunaʼö Nononia ba wangefaʼö zuta niha moroi ba gurunga fondrege zebua, yaʼia daʼö faʼamate. (Yoh. 5:28, 29) Buʼusa li simane daʼö zangaʼaroʼö tödöda ba ginötö göna ita abula dödö iadaʼa.
”Tokea Ira Me Laʼila Ia” (Hal. 12:12-17)
13-15. (a) Hadia nifalua ndra talifusö si no owulo ba nomo Maria me tohare Wetero? (b) Hadia nitutunö mbuku Halöwö Zinenge aefa daʼa, hizaʼi moroi ba nifalua Wetero hadia lua-luania daʼö khö ndra talifusö si sara lala wamati?
13 No mozizio Wetero ba lala sogömi-gömi ba mangera-ngera ia. Aefa daʼö, ihalö gangetula hezo ilau ia. Lö aröu moroi ba daʼö so samösa ndra alawe niha Keriso sotöi Maria. Maria andre te lakha mbanua soʼokhöta, börö me ebua nomonia irege tola owulo ba daʼö mbanua niha Keriso. Yaʼia andre ina Yohane Mareko, nitötöi ba mbuku Halöwö Zinenge si oföna sibai ba daʼa, ba si hulö nono khö Wetero ba gafuriata. (1 Fe. 5:13) Ba mbongi daʼö, ato nasa mbanua niha Keriso si so ba nomo Maria hewaʼae no talu mbongi, lalau mangandrö soroi ba dödö. Tatu, mangandrö ira enaʼö teʼefaʼö Wetero, hizaʼi lö ladöna-döna wa iʼanemaiʼö ibeʼe wanema li Yehowa ba wangandröra andrö!
14 Itoko mbawa göli Fetero sangotahögö newali nomo daʼö. So samösa zawuyu ira alawe sotöi Rode, töi sasese laʼogunaʼö ira niha Yunani eluahania ”Mawar”, möi ia ibokai mbawa göli. Hawaʼatokeania me irongo li ba zi tambai mbawa göli andrö. Li Wetero daʼö! Börö waʼomuso dödönia, lö iʼanemaiʼö ibokai mbawa göli, hizaʼi ilau fagohi numalö ba nomo ba ifaduhuʼö khö ndra talifusö wa no tohare Wetero. Lawaʼö khönia wa owöhö ia, hizaʼi lö iböhöli wamaduhuʼö khöra wa atulö niwaʼönia. So ösa zi lö faduhu tödö ba lawaʼö wa malaʼika daʼö si hulö Wetero. (Hal. 12:12-15) Gasa-gasa daʼö, itoko-toko manö mbawa göli andrö Fetero irege tohare ira ba wamokai.
15 Me labokai mbawa göli, ”tokea ira me laʼila ia”! (Hal. 12:16) Iforege Fetero ba wamahono niha sato somuso tödö andrö enaʼö tola itutunö hadia zalua, ba iʼandrö enaʼö lafatunö daʼö khö nifahaʼö sotöi Yakobo hegöi ira talifusö tanö böʼö, aefa daʼö mofanö ia fatua lö laʼila ia ira saradadu Herode. Mofanö ia ba lö faröi ia wanohugö halöwönia ba nahia tanö böʼö si lö taha-taha. Baero wamorege nifaluania ba wangasiwai amadöniwa sanandrösa ba wosuna simane nitutunö ba Halöwö Zinenge faza 15, lö saʼae latöi-töi ia. Iadaʼa, nitutunö mbuku Halöwö Zinenge yaʼia daʼö fanuriaigö hegöi fofanö nifalua zinenge sotöi Faulo. Hizaʼi, faduhu dödöda wa gofu hezo möi Wetero hasambalö ifarou dödö ndra talifusö si sara lala wamati. Me iröi nomo Maria, so waʼomuso dödö nirasoi niha si so ba daʼö.
16. Hadia mbörö wa oya ginötö waʼomuso dödö ba zi so miföna?
16 Itaria iʼamualagö ba nono mbanuania Yehowa zabölö ebua moroi ba nitötönara, irege börö waʼomuso dödöra, abua khöra wamaduhusi tödö. Daʼö nirasoi ndra talifusö Wetero si sara lala wamati ba mbongi daʼö. Itaria tarasoi göi zimane daʼö ba ginötö fahöna howu-howu nitemada moroi khö Yehowa. (Amd. 10:22) Ba zi so miföna, taʼila dania hewisa waʼalua mbuʼusa li Yehowa ba zi sagörö ulidanö. Faʼaluania abölö ebua moroi ba zi tola takhalaigö iadaʼa. Börö daʼö, na lö faröi ita, hasambalö fahöna waʼomuso dödö nirasoida ba zi so miföna.
”Ibözi Ia Malaʼika Yehowa” (Hal. 12:18-25)
17, 18. Hana wa lahöni-höni Herode?
17 Tokea Herode me irongo wa no moloi Wetero, hizaʼi lö möi fangomuso dödönia daʼa. Ibeʼe fareta enaʼö lahaogö wangalui Fetero, ba iʼandrö enaʼö lasekhegö wanofu khö ndra saradadu sozago Fetero. ”Iʼandrö enaʼö lahuku ira”, te hukuma faʼamate. (Hal. 12:19) Herode Agerifa andre tenga niha sahakhö tödö mazui sebua faʼomasi. Hawaʼara dania tehuku niha si lö sökhi andre?
18 Tola manö teʼailasi Agerifa börö me lö aʼozu ibunu Wetero, hizaʼi ba zi lö ara tö ifuli teʼalawaʼö döinia. So sambua gangowuloa nifalua ndra udunia somasi atulö, ba no idöna-döna sibai ginötö wahuhuosa föna niha sato. Itutunö Luka wa no ihenaigö ia Herode irege ”ifake nukhania ba waʼarazo”. Itutunö göi sejarawan Yahudi sotöi Yosefus wa nukha niʼogunaʼö Herode mufazökhi moroi ba wirö, irege na göna ia haga, takile ba afönu ia faʼamolakhömi. Aefa daʼö, ibörögö fahuhuo zamatörö safönu faʼasiliyawa andre. Lahöni-höni sibai ia niha sato ba muʼao ira, ”Fehede Lowalangi daʼa, tenga fehede niha!”—Hal. 12:20-22.
19, 20. (a) Hana wa ihuku Herode andrö Yehowa? (b) Hadia wondrara dödö nitemada moroi ba zalua khö Herode Agerifa si mate ba zi lö mudöna-döna?
19 Ha Lowalangi zinangea manema lakhömi simane daʼö, ba inehegö daʼö Lowalangi! Sindruhunia, so menaʼö ginötö khö Herode ba wanimbagö abula dödö andrö. Tola itegu niha sato, mazui si löʼö-löʼönia lö fao dödönia ba nifaluara. Hizaʼi, tobali ia duma-duma ba gamaedola andre: ”Lua-lua waʼasiliyawa ba faʼatekiko.” (Amd. 16:18) ”Ba ginötö daʼö, iʼanemaiʼö ibözi ia malaʼika Yehowa,” irege si hokha mbu waʼamate zamatörö sasiliyawa ba safönu fakhögusa andre. ”Iʼa ia kuö-kuö ba mate.” (Hal. 12:23) Baero daʼö moloʼö Yosefus, mofökhö Agerifa ba zi lö mudöna-döna. Ba wamaigi razo, göna ia fökhö andrö börö me itema wanuno moroi ba niha sato. Isura göi Yosefus, auri nasa Agerifa 5 hari tö fatua lö aetu nosonia. b
20 Itaria, niha si lö sökhi tola manö lafalua ngawalö waʼalösökhi ba lö göna ira hukuma. Lö tokea ita ba daʼö, börö me ”Satana zamatörö ulidanö andre maʼasagörö”. (1 Yo. 5:19) Hizaʼi, itaria göi abu dödö nono mbanua Lowalangi si lö faröi börö me lö iʼanemaiʼö göna hukuma niha si lö sökhi. Tobali, waö-waö simane daʼa zameʼe khöda fondrara dödö. No amaedola taʼila samösa wanolo moroi khö Yehowa, samasugi ba dödö nono mbanuania maʼafefu wa iʼomasiʼö waʼatulö. (Si. 33:5) Alio ara, hasambalö möna waʼatulönia.
21. Hadia wamahaʼö siföföna nisöndrada ba Halöwö Zinenge faza 12, ba hana wa möi fondrara dödöda daʼö iadaʼa?
21 Teʼasiwai waö-waö andre faoma famahaʼö si möi famarou dödö, ”Itugu ato zamondrongo taromali Yehowa ba monönö waʼato nifahaʼö.” (Hal. 12:24) Angombakhata sanandrösa ba waʼatedou halöwö fanuriaigö andre, daʼö zamasugi ba dödöda howu-howu Yehowa ba halöwö fanuriaigö nifaluada iadaʼa. Tobali, waö-waö nisura ba Halöwö Zinenge faza 12, tenga ha sanandrösa ba waʼamate zi samösa sinenge hegöi fangefaʼö sinenge tanö böʼö. Daʼö waö-waö sanutunö hadia nifalua Yehowa ba wanaisi nifalua Zatana ba wanudugö banua niha Keriso hegöi ba wombatogö halöwö fanuriaigö. Lö mofozu fefu niʼera-era Zatana hegöi tandrawa niʼasogönia. (Yes. 54:17) Hizaʼi, niha si faʼawö khö Yehowa hegöi khö Yesu Keriso, hasambalö mofozu halöwö nifaluara. Hadia lö möi fondrara dödöda daʼa? Sindruhu wa no töi sebua khöda me tola fao ita ba wamazaewe ”taromali Yehowa” iadaʼa!
a Faigi kotak ” Razo Herode Agerifa I.”
b So samösa doto hegöi samazökhi buku sanura wa fökhö nitutunö Yosefus hegöi Luka, alua daʼö börö guö-kuö sigide-ide si no mangowulo bakha ba mbetuʼa solohe faʼamate. Itaria muʼutaʼö guö-kuö andrö, mazui möi baero ba mboto niha si no mate. Imane sambua karya referensi, ”Faʼatefaudu nisura Luka si no tobali doto, daʼö zangoromaʼö wa si hokha mbu niha waʼamate [Herode].”