Yaʼami Sanuriaigö Niʼomasiʼöma:

Khalaigö na samösa sinenge ndraʼugö si zizio ba Hili Zaitu. Iforomaʼö ia Yesu fönau. Fatua lö mangawuli ia ba zorugo imane, ”Mitema dania waʼabölö geheha niʼamoniʼö si möi khömi, ba tobali ami samaduhuʼö khögu iʼotarai Yeruzalema, Yudea ba Samaria maʼasagörö, irugi wondrege danö.” (Hal. 1:8) Hadia nifaluamö?

Te öwaʼö tödöu wa abua sibai halöwö daʼö. Te manofu-nofu ndraʼugö, ’Hewisa ndraʼaga, yaʼaga si sambua ngawawa side-ide, tola tobali ndraʼaga samaduhuʼö ”irugi wondrege danö”?’ Tola manö itörö tödömö wamangelama nibeʼe Yesu ba mbongi fatua lö mate ia, imane, ”Lö abölö ebua zawuyu moroi khö zokhö yaʼia. Na lafakao ndraʼo, ba lafakao göi ami dania. Na laʼoʼö niwaʼögu, ba laʼoʼö göi niwaʼömi dania. Hizaʼi lafalua dania khömi fefu daʼa börö döigu, börö me lö aboto ba dödöra zamatenge yaʼo.” (Yoh. 15:20, 21) Ba woʼangera-ngeragömö fehede daʼö, te manofu ndraʼugö, ’Hewisa wa tola uhaogö wamaduhuʼö na göna ndraʼo folohi mazui fanandraigö?’

Tatu manofu-nofu göi ita simane daʼö iadaʼa. Halöwöda yaʼita Samaduhuʼö Yehowa yaʼia daʼö ba wamaduhuʼö ”irugi wondrege danö” ba ”ngawalö soi”. (Mat. 28:19, 20) Hewisa wa tola alua halöwö daʼa, hewaʼae so wolohi simane si no tefaʼeleʼö?

Ba mbuku Halöwö Zinenge itutunö khöda hewisa ndra sinenge hegöi ira talifusö tanö böʼö me abad siföföna tola mofozu ira wamalua halöwöra börö wanolo moroi khö Yehowa. Buku nibasomö andre, mufazökhi ia ba wanolo yaʼugö enaʼö öʼila waö-waönia ba örasoi zalua sahöli-höli dödö nisura ba daʼö. Hasambalö ahöli-höli dödömö börö me oya waʼafagölö salua ba nono mbanua Lowalangi me abad siföföna faoma ba nono mbanuania iadaʼa. Öʼila dania waʼafagölö andrö tenga ha moʼamakhaita ba halöwö nifaluada, hizaʼi lala ba woʼorganisasi ba wamalua halöwö daʼö. Na öʼangerönusi waʼafagölö daʼö fefu, tatu manö itugu faduhu dödöu wa lö iböhöli Lowalangi Yehowa ba wameʼe fanuturu lala ba organisasinia si so ba gulidanö.

Manötöna ndraʼaga ba maʼohe ami ba wangandrö, na mifareso mbuku Halöwö Zinenge, yaʼitugu teʼaroʼö waʼafaduhu dödömi wa hasambalö itolo ami Yehowa ba ituhini ami faoma eheha niʼamoniʼö. Yatefarou dödömi enaʼö ’mihaogö wamaduhuʼö sanandrösa ba Wamatörö Lowalangi’, ba mitolo niha böʼö ba wanörö lala saekhu ba waʼauri.—Hal. 28:23; 1 Ti. 4:16.