1-3. (a) Hadia mbörö wa laʼohe ndra sinenge föna ndra Sangetuʼö Huku, ba hadia zindruhunia zalua? (b) Hana wa omasi sibai ita taʼila gangetula nihalö ndra sinenge?

 MOFÖNU sibai ndra Sangetuʼö Huku! No laʼohe fönara ndra sinenge Yesu. Hadia mbörö? Tola taʼila daʼö moroi ba wehede Yosefo Kayafa, ere sebua hegöi kafalo Sangetuʼö Huku sametaʼu yaʼira me imane: ”No abeʼe wehedema khömi enaʼö böi mifahaʼö niha ba döi daʼö.” Börö me mofönu sibai ia, lö saʼae iʼila itötöi döi Yesu. Itohugö wangumaʼö, ”Hizaʼi no mifönui Yeruzalema famahaʼömi ba mifobahulu ndraʼaga ba waʼamate niha daʼö.” (Hal. 5:28) Aboto ba dödöda niwaʼönia: Miböhöli wanuriaigö mazui lahuku!

² Hadia nifalua ndra sinenge? Halöwö fanuriaigö nifaluara andrö moroi khö Yesu, sanema faʼabölö moroi khö Lowalangi. (Mat. 28:18-20) Hadia laböhöli wamalua halöwöra ira sinenge mazui lalau zi lö hede-hede börö waʼataʼura ba niha? Mazui hadia barani ira ba lahalö gangetula wa lö laböhöli wanuriaigö? Sabölö tohude: Hadia abölö laʼoʼö niwaʼö Lowalangi mazui ba niha? Si fao faʼabarani, isalahini ndra sinenge tanö böʼö Fetero ba wahuhuosa. Abeʼe wehedenia ba lö ibiniʼö wangombakha.

³ Yaʼita niha Keriso sindruhu, omasi ita taʼila hadia nifalua ndra sinenge me lafetaʼu ira. Fao ita wamalua halöwö fanuriaigö, ba börö me tafalua halöwö moroi khö Lowalangi andre, hasambalö göna ita göi folohi. (Mat. 10:22) Te so zanaisi ba laforege enaʼö taböhöli halöwöda. Hadia nifaluada? Tola tatema mbua na tanehegö gangetula nihalö ndra sinenge awö zalua khöra irege laʼohe ira föna ndra Sangetuʼö Huku. a

4, 5. Hana wa ’afökhö sibai dödö’ Gayafa hegöi ira Sadukaiʼo?

⁴ Lamane ira Fetero hegöi Yohane me awena sibai lawaʼö khöra enaʼö laböhöli wanuriaigö, ”Tebai mabato wangombakha sanandrösa ba zi no maʼila hegöi si no marongo.” (Hal. 4:20) Me no aefa manofu-nofu khöra  ndra Sangetuʼö Huku andrö, lö laböhöli wanuriaigö ba gosali ira Fetero, Yohane, hegöi ira sinenge tanö böʼö. Lafalua dandra sahöli-höli dödö ira sinenge, simane ba wamadöhö fökhö hegöi ba wamofanö bekhu. Lafalua daʼö ba ”Newali Nifosagö khö Zelomo”. Daʼö newali sebolo nifosagö tanö ba gatumbukha gosali, nahia waʼowulo ndra niha Yahudi. Lumö-lumö Wetero manö tola tobali famadöhö wökhö! Ato niha si döhö fökhö ba latemaʼö daromali Lowalangi si tobali famadöhö wökhö wamati. Buania, ”itugu monönö waʼato niha si faduhu tödö khö Zoʼaya, he ira alawe he ira matua”.—Hal. 5:12-15.

⁵ ʼAfökhö sibai dödö’ Gayafa ba fefu niha si fao ba agama Zadukaiʼo, lawaʼö enaʼö labeʼe bakha ba gurunga ndra sinenge. (Hal. 5:17, 18) Hadia mbörö wa mofönu sibai ndra Sadukaiʼo? Börö me lafahaʼö ira sinenge wa no tesusugi Yesu, hizaʼi lö faduhu dödö ndra Sadukaiʼo wa so wanusugi. Lafatunö ira sinenge wa tola teʼorifi zi samösa niha na mamati ia khö Yesu, hizaʼi ataʼu ndra Sadukaiʼo na göna ira fanguhuku moroi ba Roma börö me ato nono mbanuara samati khö Yesu tobali Sondröniaʼö yaʼira. (Yoh. 11:48) Lö ahöli dödöda na laforege ba wanaisi ira sinenge!

6. Iadaʼa haniha mbörö wa alua wolohi ba nono mbanua Yehowa, ba hadia mbörö wa lö tokea ita?

⁶ Iadaʼa, ira sondröniaʼö ba agama, daʼö zamobörö folohi ba nono mbanua Yehowa. Ira samadaö andrö, asese laʼogunaʼö waʼafahuwura khö ndra samatörö hegöi media ba wangalui lala enaʼö taböhöli halöwöda. Hadia tokea ita? Löʼö. Turia nifaʼemada zangoromaʼö falimosa agama sofaya. Na latemaʼö zindruhu moroi ba Zura Niʼamoniʼö ira niha satulö tödö, teʼefaʼö ira moroi ba nifaduhusi tödö hegöi si toʼölö mufalua si lö teʼodane-dane ba Zura Niʼamoniʼö. (Yoh. 8:32) Andrö wa lö tokea ita na fatuwu sibai ndra sondröniaʼö agama ba abao dödöra börö duria nifaʼemada.

7, 8. Hadia lua-luania wehede malaʼika khö ndra sinenge, ba hadia zinangea tasofu khöda samösa?

⁷ Gasa-gasa wedadaora ba gurunga fatua lö laʼetuʼö hukumara, te lawaʼö ira sinenge wa lö ara tö mate ira ba danga nudu börö wamatira. (Mat. 24:9) Hizaʼi ba mbongi daʼö alua zi lö mudöna-döna, ”tohare malaʼika Yehowa ibokai mbawandruhö gurunga”. b (Hal. 5:19) Aefa daʼö, imane khöra malaʼika andrö, ”Miʼosindro ba gosali, böi miböhöli wamatunö.” (Hal. 5:20) Fehede malaʼika andrö zamaduhuʼö tödöra wa atulö nifaluara. Tola möi fangabölöʼöra göi wehede andrö enaʼö lö laböhöli wanuriaigö gofu hadia zalua. Si fao famati saro ba faʼabarani, ’möi ira ba gosali sihulö wongi daʼö ba labörögö wamahaʼö’.—Hal. 5:21.

⁸ Moguna tasofu khöda samösa, ’Hadia mamati ndraʼo ba lö khögu faʼataʼu enaʼö lö uböhöli wanuriaigö na alua khögu zimane daʼö?’ Tola tasöndra waʼabölö na taʼila wa latuhini ita ira malaʼika ba labeʼe khöda wanuturu lala si tohude  irege tola ’tahaogö wamaduhuʼö sanandrösa ba Wamatörö Lowalangi’.—Hal. 28:23; Fam. 14:6, 7.

9-11. Hadia nifalua ndra sinenge me iwaʼö Sangetuʼö Huku enaʼö laböhöli wanuriaigö, ba hewisa zalua andrö tobali duma-duma ba niha Keriso sindruhu?

⁹ Kayafa hegöi ira sanguhuku tanö böʼö ba gödo Zangetuʼö Huku, no lafaʼanö ira ba wanguhuku ira sinenge. Börö me lö laʼila hadia zalua ba gurunga, lafatenge ndra sanaro ba wamaondragö ira sinenge. Khalaigö hawaʼatokea dödö ndra sanaro me laʼila wa no moloi niha gurunga hewaʼae no ’lahaogö wokusi bawandruhö ba no mosindro zanaro ba daʼö’. (Hal. 5:23) Ba zi lö ara tö, aboto ba dödö gafalo zanaro osali wa no mangawuli ndra sinenge ba gosali ba lafaduhuʼö sanandrösa khö Yesu Keriso! Börö halöwö daʼa wa labeʼe ira ba gurunga ba zilalö. Iʼanemaiʼö möi ba gosali gafalo zanaro hegöi sohalöwö tanö böʼö ba wondraʼu ira sinenge ba laʼohe ira föna Zangetuʼö Huku.

¹⁰ Simane si no mututunö ba wamobörö faza daʼa, mofönu sibai ndra sondröniaʼö agama ba lawaʼö khö ndra sinenge enaʼö laböhöli wamalua fanuriaigö. Hadia nifalua ndra sinenge? Isalahini Fetero ba wameʼe fanema li si fao faʼabarani imane: ”Abölö sökhi woloʼö khö Lowalangi me yaʼia zamatörö yaʼaga moroi ba woloʼö ba niha.” (Hal. 5:29) Börö daʼö, no labeʼe duma-duma si sökhi ira sinenge ba niha Keriso sindruhu irugi iadaʼa. Lö moguna muʼoʼö niwaʼö ndra samatörö na lasaisi ita wamalua niʼandrö Lowalangi mazui na lafaso ita wamalua si fatuwu ia. Börö daʼö, na lasaisi ita iadaʼa ’ira samatörö’ ba wamalua halöwö fanuriaigö, lö taböhöli wamalua halöwö nibeʼe Lowalangi ba wamaʼema turia somuso dödö. (Rom. 13:1) Taforege göi wangalui lala si fao faʼatua-tua irege lö taböhöli wamaduhuʼö sanandrösa ba Wamatörö Lowalangi.

¹¹ Tatu mofönu sibai ndra sangetuʼö huku sabao tödö andrö ba wanema li nibeʼe ndra sinenge si lö faʼataʼu. Börö daʼö lahalö gangetula ba ’wamunu ira sinenge’. (Hal. 5:33) So ba wangera-ngera ndra sinenge wa si mate ira. Hizaʼi, itolo ira Yehowa ba lala si lö mudöna-döna!

12, 13. (a) Hadia mene-mene nibeʼe Gamalieli khö ndra awönia, ba hadia nifaluara? (b) Hewisa Yehowa wanolo ono mbanuania iadaʼa, ba hadia zi faduhu dödöda na itehegö alua khöda ”wamakao börö wamalua satulö”?

¹² Fahuhuo Gamalieli, ”samahaʼö Oroisa Moze nifosumange niha”. c Lafosumange sibai ia ira sangetuʼö huku. Lafondrondrongo niwaʼönia me ”iʼandrö enaʼö laʼohe baero sabata ndra sinenge”. (Hal. 5:34) Itutunö Gamalieli hewisa wamadaö nifalua ba götö silalö si taya manö me no mate zondröniaʼö yaʼira. Iʼandrö khö ndra sangetuʼö huku enaʼö lataha dödöra ba latehegö khö ndra sinenge andre ba wamalua halöwöra. Lö ara ba zilalö, mate Zondröniaʼö yaʼira sotöi Yesu. Faduhu dödöra ba wehede Gamalieli andre, ”Böi migadu-gadu halöwö ndra niha daʼa. Mitehegö manö khöra. Na moroi ba niha atö halöwö daʼa hegöi niʼera-erara andre, hasambalö adudu. Hizaʼi, na moroi khö Lowalangi, tebai midudugö. Tola manö lafotöi ami solawa Lowalangi.” (Hal. 5:38, 39) Laʼoʼö mene-menenia andre ira sangetuʼö huku. Hewaʼae simanö, lawaʼö enaʼö laleasi ndra sinenge ba ”laʼandrö khöra enaʼö laböhöli wahuhuosa ba döi Yesu”.—Hal. 5:40.

¹³ Simane ba götö föna, tola iʼogunaʼö niha si tehöngö Yehowa simane Gamalieli ba wanolo ono mbanuania. (Amd. 21:1) Tola iʼogunaʼö gehehania ba wamarou ira samatörö, sangetuʼö huku mazui samazökhi amakhoita niʼataʼufi ba wamalua ohitö dödönia. (Neh. 2:4-8) Hewaʼae na itehegö Lowalangi ’tatörö wamakao börö wamalua satulö’, so dombua zi tola tafaduhusi tödö. (1 Fe. 3:14) Si oföna, ibeʼe khöda waʼabölö Lowalangi enaʼö anau gölöda. (1 Ko. 10:13) Si dua, ira samadaö ’tebai ladudugö’ halöwö Lowalangi.—Yes. 54:17.

14, 15. (a) Hewisa dödö ndra sinenge me no aefa laleasi ira, ba hadia mbörö? (b) Tutunö sambua zalua sangoromaʼö wa tola anau gölö nono mbanua Yehowa si fao faʼomuso dödö.

¹⁴ Hadia awuwu mazui afatö dödö ndra sinenge me no aefa laleasi ira? Tatu manö löʼö! ’Mofanö ira föna ndra sangetuʼö huku si fao faʼomuso dödö.’ (Hal. 5:41) Hadia mbörö wa ”omuso dödöra”? Tenga börö me no aefa laleasi ira. Omuso dödöra me laʼila wa tefakao ira börö waʼalöfaröira khö Yehowa, ba börö wanara lahe Yesu si tobali Duma-Duma khöra.—Mat. 5:11, 12.

¹⁵ Simane ira talifusöda me abad si föföna, anau gölöda si fao faʼomuso dödö na tataögö wamakao börö duria somuso dödö. (1 Fe. 4:12-14) Tatu manö, lö omasi ita nifetaʼu, nifakao mazui labeʼe ba gurunga. Hizaʼi, tola tarasoi waʼomuso dödö börö me tarorogö waʼalöfaröida. Nehegö duma-duma dalifusöda Henryk Dornik, sanau ölö ba zi hauga fakhe hewaʼae na lafakao ia ira samatörö samuʼi. Itörö tödönia me baŵa si Walu 1944, lahalö gangetula ira samatörö ba waniboʼö yaʼia hegöi gaʼania ono matua ba kamp konsentrasi. Lamane ira samatörö, ”Lö eluaha na taforege ba wangai tödöra, abölö omasi ira tobali martir.” Imane talifusöda Dornik: ”Hewaʼae na lö omasido tobali martir, omuso dödögu börö me anau gölögu ba wanaögö famakao, ba no sambua töi sebua khögu daʼa börö me lö faröi ndraʼo khö Yehowa.”—Yak. 1:2-4.

16. Hewisa wangoromaʼö ndra sinenge wa no lahalö gangetula ba wamaʼema turia somuso dödö, ba hewisa woloʼöda duma-dumara?

 ¹⁶ Lö laʼalimagösi ginötöra ira sinenge ba lafuli lafalua halöwö fanuriaigö. Si fao faʼabarani, ”ero maʼökhö ira ba gosali hegöi ba nomo-omo misa, lö laböhöli wamahaʼö hegöi ba wanuriaigö turia somuso dödö sanandrösa khö Keriso”. d (Hal. 5:42) Ira sanuriaigö sowölö-ölö andre, lahalö gangetula ba wamaʼema turia somuso dödö. Möi ira manuriaigö ba nomo-omo misa simane fanuturu lala nibeʼe Yesu Keriso. (Mat. 10:7, 11-14) Faduhu dödöda, börö me no laʼoʼö wanuturu lala nibeʼe Yesu, andrö wa tola lafönui Yeruzalema famahaʼöra. Iadaʼa, tehöngö ndra Samaduhuʼö Yehowa börö me no laʼoʼö duma-duma ndra sinenge ba wanuriaigö. Na möi ita ba nomo-omo ba mbanua si toröi yaʼita, ba daʼö oroma wa omasi ita tahaogö wamaduhuʼö turia somuso dödö, ba tabeʼe khöra ginötö ba wamondrondrongo turia somuso dödö. Hadia ifahowuʼö halöwö nifaluada Yehowa weʼamöi manuriaigö misa ba nomo-omo? Tatu manö! Zuta niha si no manema turia somuso dödö ba götöda iadaʼa. Ato niha somondrongo turia somuso dödö siföföna sibai me latoko mbawandruhö nomora ira Samaduhuʼö Yehowa.

17-19. Hadia gabula dödö salua si tola mamoto fahasara dödö, ba hadia wanuturu lala nibeʼe ndra sinenge ba wangasiwai yaʼia?

¹⁷ So gabula dödö salua ba mbanua niha Keriso sawena tefasindro andre. So zamoto fahasara dödöra. Ato nifahaʼö si no tebayagö idanö ba Yeruzalema, sindruhunia yaʼira andrö awena tohare ba omasi ira nasa tedou waʼaboto ba dödöra fatua lö mangawuli ira ba mbanuara. Ira nifahaʼö si toröi ba Yeruzalema, si fao faʼaoha gölö labeʼe dolo-tolo ba wombönökhi soguna ero maʼökhö ba niha si tohare. (Hal. 2:44-46; 4:34-37) Me luo daʼö, so gabula dödö si möi börö wangala. ’Ba wombagi gö sero maʼökhö, laʼositengagö lakha mbanua’ sangogunaʼö li Yunani. (Hal. 6:1) Hizaʼi, laʼameʼegö tödö sibai lakha mbanua sangogunaʼö li Heberaiʼo. Na simanö, salua andre moʼamakhaita ia ba waʼebua dödö zambuana. Abula dödö simane daʼa tola mamoto fahasara dödö.

 ¹⁸ Ira sinenge si tobali boto solohe ba mbanua niha Keriso sawena tedou andre, aboto ba dödöra wa lö sökhi na laböhöli ”wamahaʼö taromali Lowalangi ha börö wombagi gö”. (Hal. 6:2) Börö daʼö, ba wangasiwai abula dödö andre, laʼandrö khö ndra nifahaʼö enaʼö lafili dafitu ndra matua si no ”fahöna eheha niʼamoniʼö hegöi faʼatua-tua” si tola lafataro ira sinenge ba wamalua ”halöwö andre”. (Hal. 6:3) Lafili ndra matua sinangea ba wamalua halöwö daʼa tenga ha ba wombagi gö, hizaʼi ba wololohe kefe, ba wowöli soguna hegöi ba wanura fefu ngawalö niʼogunaʼö. Fefu ndra matua nifili andre, oi moroi ba li Yunani tehalö döira enaʼö aoha khö ndra lakha mbanua safatö tödö andrö ba wanemaʼö yaʼira. Me no lahaogö laʼera-era ba laʼohe daʼö ba wangandrö, lafataro ndra matua si dafitu andre ira sinenge ba wamalua ’halöwö daʼa’. e

¹⁹ Hadia laböhöli wamalua halöwö fanuriaigö turia somuso dödö ira matua si dafitu andrö börö wombagi gö? Tatu manö löʼö! Samösa ba gotalua ndra matua si no mufili andre yaʼia daʼö Sitefano, sangoromaʼö faʼabarani ba satua-tua ba wamaʼema turia somuso dödö. (Hal. 6:8-10) Farahu göi Wilifo, ba mufotöi ia ”sanuriaigö”. (Hal. 21:8) Aboto ba dödöda wa lö laböhöli ira matua si dafitu andre wamalua halöwö fanuriaigö si fao faʼowölö-ölö.

20. Hewisa nono mbanua Lowalangi iadaʼa ba woloʼö duma-duma nifalua ndra sinenge?

²⁰ Ono mbanua Yehowa iadaʼa laʼoʼö duma-duma nifalua ndra sinenge. Ira matua nifili ba wamalua noro dödö ba mbanua niha Keriso, moguna laforomaʼö waʼatua-tua moroi khö Lowalangi ba lafaduhuʼö wa mohalöwö geheha niʼamoniʼö  ba waʼaurira. Barö wanuturu lala nibeʼe ndra Boto Solohe, ira matua si no moloʼö goi-goi Zura Niʼamoniʼö tola lafataro ira tobali satua sokubaloi mazui enoni ba mbanua niha Keriso. f (1 Ti. 3:1-9, 12, 13) Yaʼira sangai halöwö andre, tola mufotöi ira nifataro geheha niʼamoniʼö. Oya halöwö nifalua ndra matua sowölö-ölö andre. Duma-dumania, te no latatugöi ira satua sokubaloi ba wameʼe fanolo khö ndra talifusöda si lö faröi si no alawa döfi sinangea mutolo. (Yak. 1:27) So ösa ndra satua sokubaloi nifataro ba wamazökhi Nahia Gangowuloa, ba woʼorganisasi kebaktian mazui falulu fohalöwö ba Panitia Penghubung Rumah Sakit. Oya göi halöwö si tola lafalua ira enoni si lö moʼamakhaita ba halöwö famahaʼö mazui fokubaloi. Fefu ndra matua si no mufataro andre, moguna lafalua halöwöra ba mbanua niha Keriso hegöi ba organisasi, mendrua manö halöwö moroi khö Lowalangi ba wamaʼema turia somuso dödö.—1 Ko. 9:16.

21, 22. Hadia zangoromaʼö wa ifahowuʼö Yehowa mbanua niha Keriso sawena tefasindro andrö?

²¹ Börö wanolo moroi khö Yehowa, andrö wa mofozu mbanua niha Keriso si bohou andre ba wanaögö folohi moroi khö ndra samatörö hegöi abula dödö salua ba mbanua niha Keriso si tola mamoto fahasara dödö. Sindruhu wa no ifahowuʼö ira Yehowa börö me iwaʼö Sura Niʼamoniʼö, ”Itugu ato zamondrongo taromali Lowalangi, ba tedou-dou manö waʼato nifahaʼö ba Yeruzalema. Aefa daʼö, ibörögö ato ndra ere si faduhu tödö.” (Hal. 6:7) Sambua daʼa nitutunö ba mbuku Halöwö Zinenge sanandrösa ba waʼatedou mbanua niha Keriso. (Hal. 9:31; 12:24; 16:5; 19:20; 28:31) Iadaʼa, hadia lö omuso dödöda ba waʼatedou halöwö fanuriaigö nifalua ba zi sagörö ulidanö?

²² Me abad siföföna M, lö nasa laböhöli ira sondröniaʼö ba agama safökhö tödö andrö wolohi ono mbanua Lowalangi. Famakao ba fanandraigö sabölö-bölö no so ba duduma hörö. Ba zi lö ara tö, göna fanandraigö sabölö-bölö Zitefano simane nitutunöda ba faza aefa daʼa.