1, 2. Hadia mbuala sebua böli nibeʼe Yehowa khöda?

 SO MBUALA sahöli-höli dödö nibeʼe Yehowa khöda, yaʼia daʼö faʼauri. (1 Moze 1:27) Omasi ia na sökhi lua-lua waʼaurida. Andrö, iʼasogö goi-goi samahaʼö yaʼita ba wangai angetula si sökhi. Lö tola löʼö taʼogunaʼö goi-goi andrö ba wanolo yaʼita ”wamaehusi” hadia ’zatulö ba si lö atulö’. (Heberaiʼo 5:14) Na tafalua daʼö, no tatehegö khö Yehowa wamahaʼö yaʼita ba wangokhögö fangera-ngera si sökhi. Na tafaudugö waʼaurida ba goi-goi Lowalangi ba taʼila wa sökhi lua-luania khöda, itugu aboto ba dödöda wa moguna sibai goi-goi andrö khöda.

² Abua sibai zalua ba waʼauri. So zi lö iʼanemaiʼö moʼamakhaita ba goroisa Zura Niʼamoniʼö. Duma-dumania, te moguna tahalö gangetula sanandrösa ba wamadöhö fökhö sangogunaʼö do. Hewisa enaʼö omuso dödö Yehowa ba gangetulada? So goi-goi Zura Niʼamoniʼö samahaʼö yaʼita hewisa wamaigi Yehowa faʼauri hegöi do. Na aboto ba dödöda goi-goi daʼa, tola tahalö gangetula si tefaudu ba taʼokhögö dödö  side-ide si lö sinegu. (Gamaedola 2:6-11) Datafareso ösa goi-goi andrö.

3, 4. (a) Hewisa wamaigi Lowalangi do? (b) Amaedola hadia ndro andrö?

³ Ifahaʼö ita Sura Niʼamoniʼö wa niʼamoniʼö ndro andrö, börö me amaedola waʼauri ia, ba ebua mböli waʼauri andrö föna Yehowa. Me ibunu dalifusönia Kaʼino, imane khönia Yehowa, ”Muʼao khögu ndro nakhiu andrö moroi ba danö tou.” (1 Moze 4:10) Do Habeli andrö no amaedola waʼaurinia. Me ibunu Habeli Kaʼino, taya waʼaurinia saʼae.

⁴ Me no aefa Molö Sabölö-bölö ba götö Noakhi, itehegö ba niha Lowalangi wemanga nagole gurifö. Hizaʼi imane, ”Ha nagole si so noso na bakha, si so donia na, ba lö tola miʼa.” (1 Moze 9:4) Moguna goroisa andre ba ngaʼötö Noakhi, simanö göi khöda. Sindruhu-ndruhu, do andrö no amaedola waʼauri ba wamaigi Yehowa. Andrö, datafaudugö wamaigida do simane famaiginia.​—Zinunö 36:10.

5, 6. Hadia niwaʼö Goroisa Moze sanandrösa ba wamaigi Yehowa faʼauri hegöi do?

⁵ Ba Goroisa nibeʼe Yehowa khö Moze, imane, ”Ba dozi . . . na so zi manga ndro, ba si faʼudu ndraʼo ba niha simanö, ba useʼe ba niwara. Noso nösi sa zi so ba ndro.”​—3 Moze 17:10, 11.

⁶ Imane ba Goroisa Moze, na so zanaba urifö enaʼö muʼa, lö tola löʼö iduwagö ndro gurifö andrö ba danö. Daʼa zangoromaʼö wa lafuli waʼauri gurifö andrö khö Zomböi yaʼia sotöi Yehowa. (5 Moze 12:16; Hezekieli  18:4) Hizaʼi, lö iʼandrö Yehowa enaʼö laforege sibai iraono Gizaraʼeli wondruwagö do gurifö irege lö mowöi saʼae. Na no laʼodödögö wondruwagö do gurifö, tola laʼa nagolenia si fao tödö side-ide si lö sinegu. Na laʼosinangegö ndro gurifö, no laforomaʼö wa lafosumange Zameʼe faʼauri, Yehowa. Ba Goroisa Moze, muʼandrö ba ndraono Gizaraʼeli wameʼe urifö tobali sumange fameta horö.​—Faigi Gonönöta 19 hegöi 20.

7. Hewisa wangoromaʼö Dawido wa iʼameʼegö tödö ndro?

⁷ Tola taʼila wa ebua sibai mböli ndro andrö me möi fasuwö Dawido ba ndrawa Wilisiti. Laʼila ira saradadunia wa owökhi sibai dödö Dawido, andrö wa möi ira ba nahia nudu si tola mamaʼala yaʼira ba latehegö waʼaurira ha ba wangai idanö khönia. Hizaʼi, me laʼohe nidanö andrö khö Dawido, lö ibadu ba ”iduwagö khö Yehowa”. Imane Dawido, ”Yamutimba khögu Yehowa wolau simanö! Do zabölö andrö, si lö ba dödö nosora weʼamöi!” Aboto ba dödö Dawido wa ebua sibai mböli waʼauri hegöi do ba wamaigi Lowalangi.​—2 Zamueli 23:15-17.

8, 9. Hewisa zinangeania wamaigi niha Keriso do?

⁸ Iʼotarai me götö niha Keriso siföföna, lö saʼae labeʼe zumange urifö ono mbanua Lowalangi. Hizaʼi, moguna nasa laʼatulöʼö lala wangera-ngerara sanandrösa ba ndro. ”Miʼaröuʼö ami moroi ba . . . ndro” no sambua moroi ba zi hauga ngawua Goroisa niʼandrö Yehowa ba niha Keriso enaʼö latörö-törö tödöra. Fagölö daʼa simane fanimbagö amuata wohorö mazui fanömba adu.​—Halöwö Zinenge 15:28, 29.

⁹ Simanö göi ba ginötö andre. Yaʼita niha Keriso  aboto ba dödöda wa Yehowa andrö Umbu waʼauri ba tana khönia fefu zauri. Aboto göi ba dödöda wa niʼamoniʼö ndro andrö ba no amaedola waʼauri ia. Börö daʼö, moguna tahaogö tafatimbaisi goi-goi Zura Niʼamoniʼö na tahalö gangetula sanandrösa ba wamadöhö fökhö simane fangogunaʼö do.

10, 11. (a) Hewisa wamaigi ndra Samaduhuʼö Yehowa do mazui si öfa faosatö ndro? (b) Hadia gangetula sinangea lahalö ero samösa niha Keriso?

¹⁰ Aboto ba dödö ndra Samaduhuʼö Yehowa wa fehede ”miʼaröuʼö ami moroi ba . . . ndro”, tenga ha ba niʼa manandrösa ia mazui ba nibadu. Eluahania, böi tatema transfusi darah, böi tabeʼe ndroda, ba böi ta’irö’ö ndroda ba wamalua transfusi. Ba böi tatema göi zi öfa faosatö ndro: sel darah merah, sel darah putih, trombosit, hegöi plasma.

¹¹ No labagi-bagi zi öfa faosatö ndro andrö tobali faosatö si gide-ide nifotöi fraksi darah. Dozi niha Keriso, moguna latatugöi hadia laʼogunaʼö fraksi-fraksi darah andrö mazui löʼö. Moguna daʼa ba lala halöwö medis sangogunaʼö do zofökhö andrö. Ero samösa niha, moguna itatugöi hadia zinangea mufalua ba ndronia andrö sagötö muʼoperasi ia, mufalua tes medis, mazui terapi.​—Faigi Gonönöta 21.

12. (a) Hana wa moguna khö Yehowa gangetulada si teʼodane-dane ba dödö side-ide? (b) Hewisa enaʼö tefaudu gangetulada sanandrösa ba lala wamadöhö fökhö?

¹² Hadia sindruhu-ndruhu iʼameʼegö tödö Yehowa gangetulada si teʼodane-dane ba dödö side-ide? Tatu  manö. Adöni dödönia ba niʼera-erada hegöi ohitö dödöda. (Baso Gamaedola 17:3; 24:12.) Börö daʼö, na tahalö gangetula sanandrösa ba wamadöhö fökhö, moguna taʼandrö wanuturu lala moroi khö Yehowa ba taʼalui dalu-dalu si tefaudu. Aefa daʼö, taʼogunaʼö dödöda side-ide si no tefahaʼö ba Zura Niʼamoniʼö ba wangai angetula. Böi tasofu ba niha böʼö hadia nifaluara na alua khöra zalua khöda mazui lafangiwa dödöda ba gangetula nihalöda. Dozi niha Keriso, ”iluʼi-luʼi sa noronia zamösana”.​—Galatia 6:5; Roma 14:12.

13. Hadia wamahaʼö nihalöda khö Yehowa moroi ba goroisa hegöi goi-goinia sanandrösa ba ndro?

¹³ Fefu niʼandrö Yehowa enaʼö tafalua, no si sökhi khöda daʼö, ba daʼa dandra wa iʼomasiʼö ita. (Zinunö 19:8-12) Taʼoʼö linia tenga ha börö me moguna khöda goroisa andrö, hizaʼi börö me taʼomasiʼö ia. Faʼomasida khö Yehowa andrö zamarou tödöda wanimbagö transfusi darah. (Halöwö Zinenge 15:20) Daʼa göi zolumöʼö yaʼita faböi mofökhö. Ato niha iadaʼa sangila ösa deʼalania na mutema transfusi darah, ba ato doto sangumaʼö wa abölö sökhi lö muʼogunaʼö ndro na lafalua operasi enaʼö alio döhö zofökhö. Ba daʼa taʼila wa tefaudu lala niʼogunaʼö Yehowa ba safönu faʼomasi.​—Baso Yesaya 55:9; Yohane 14:21, 23.

14, 15. (a) Hadia goroisa nibeʼe Yehowa ba nono mbanuania enaʼö telumöʼö ira? (b) Hewisa enaʼö tola öfalua goi-goi si tesöndra ba goroisa?

¹⁴ Oroisa nibeʼe Lowalangi andrö no si sökhi ba  nono mbanuania. Ibeʼe goroisania Yehowa ba ndraono Gizaraʼeli me föna enaʼö telumöʼö ira moroi ba deʼala. Duma-dumania, so sambua goroisa sangumaʼö wa lö tola löʼö lafotarafali zagö nomora, faböi aekhu niha. (5 Moze 22:8) So göi goroisa sanandrösa ba gurifö. Na so zangokhögö sawi, moguna irorogö zawi andrö faböi ifesokho mazui ifaʼala niha. (2 Moze 21:28, 29) Na lö laʼoʼö goroisa andre iraono Gizaraʼeli irege so zi mate, no fasala ira.

¹⁵ Moroi ba goroisa andrö taʼila wa ebua sibai mböli waʼauri föna Yehowa. Hadia lua-luania khöda me no taʼila daʼa? Taʼameʼegö tödö waʼauri na tarorogö nomoda hegöi hondra mazui motoda, taʼangenanöi wolohe yaʼia, simanö göi na tafili rekreasi. So ösa niha, mendrua manö ndra si bohou ebua, lawaʼö tödöra wa lö alua khöra zi lö sökhi, andrö wa lafalua zomasi-masi dödöra ba lö laʼangeragö hadia lua-luania. Hizaʼi, lö iʼandrö khöda Yehowa enaʼö tafalua zimane daʼö. Omasi ia na taʼameʼegö tödö waʼaurida hegöi faʼauri niha böʼö.​—Zangombakha 11:9, 10.

16. Hewisa dödö Yehowa sanandrösa ba wanudugö ono si so ba dalu?

¹⁶ Moguna sibai khö Yehowa waʼauri niha. Ono si so ba dalu manö, ebua mböli ba wamaiginia. Moloʼö Oroisa Moze, na mosikho ndra alawe sanabina börö zi samösa niha ba lö iʼodödögö wamalua daʼö irege mate ndra alawe andrö mazui ononia, ba wamaigi Yehowa no fasala ia. Hewaʼae lö iʼodödögö wamalua daʼö, lafotöi niha andrö samunu ba moguna ibuʼa daʼö faoma faʼaurinia. (Baso 2 Moze 21:22, 23.) Ba wamaigi Lowalangi, ono si so ba dalu andrö no niha sauri.  Me öʼila daʼa, hewisa moloʼö yaʼugö na iʼila Lowalangi niha sanudugö ono ba dalu? Hewisa moloʼö yaʼugö na iʼila so hauga zuta nono si so ba dalu nibunu ero röfi?

17. Hadia zondrara tödö ndra alawe si no irai manudugö ono fatua lö saboto ba dödönia Yehowa?

¹⁷ Hewisa na so ndra alawe sanudugö ono fatua lö iʼila hewisa dödö Yehowa ba daʼö? Moguna faduhu dödönia wa tola iʼefaʼö zalania Yehowa si teʼodane-dane ba höli Yesu. (Luka 5:32; Efeso 1:7) Ira alawe samalua sala ba zilalö, lö moguna itahigö ia tödönia na no ifalalini gera-erania soroi ba dödö. ”Sahakhö tödö Yehowa ba sebua tödö . . . Simane otaluara gatumbukha gaekhula, simanö waʼebua gotaluada lalöda ibeʼe.”​—Zinunö 103:8-14.

18. Hana wa moguna taforege enaʼö lö fatiu dödöda ba niha?

¹⁸ Moroi ba dödöda oroma na taʼameʼegö tödö mbuala waʼauri nibeʼe Lowalangi khöda. Farahu ba daʼö lala wamaigida niha böʼö. Isura sinenge sotöi Yohane, ”Dozi si fatiu tödö khö dalifusönia no samunu niha daʼö.” (1 Yohane 3:15) Ba zi lö tadöna-döna, tola manö fatiu dödöda ba zi samösa niha na so zi lö omasi ita khönia. Daʼa mbörö wa lö tafosumange ia, taböbögö khönia zi lö duhu, mazui tatötöna enaʼö mate ia. Iʼila Yehowa hewisa dödöda ba niha böʼö. (3 Moze 19:16; 5 Moze 19:18-21; Mataiʼo 5:22) Na taʼila wa fatiu dödöda ba zi samösa niha, moguna taforege wanayaigö era-era simane daʼö.​—Yakobo 1:14, 15; 4:1-3.

19. Hewisa dödöda ba lala wamaigi Yehowa faʼalösökhi?

¹⁹ So lala böʼö si tola tafalua ba wangoromaʼö wa  taʼameʼegö tödö waʼauri. Tafahaʼö ita ba Zinunö 11:5 wa ’iʼogorofi Yehowa zomasi mamakao awönia’. Na tafili hiburan si lö sökhi, tola manö taforomaʼö wa taʼomasiʼö zi lö sökhi. Abölö sökhi na tatimbagö wehede, bua gera-era, hegöi gambara si lö sökhi ba dödöda. Tafoʼösi gera-erada ngawalö zohau-hau ba satulö.​—Baso Filifi 4:8, 9.

20-22. (a) Hewisa wamaigi Yehowa ulidanö nifatörö Zatana? (b) Hewisa wangoromaʼö ono mbanua Lowalangi wa ”tenga tana khö niha gulidanö” ira?

²⁰ Ulidanö nifatörö Zatana andre lö laʼameʼegö tödö waʼauri, ba moloʼö Yehowa no soluʼi do ira andrö, eluahania samunu. Ba zi hauga abad, zuta niha si mate börö zamatörö ba politik, alua daʼö göi ba nono mbanua Yehowa. Ba Zura Niʼamoniʼö, laʼamaedolagö ndra samatörö mazui si so kuaso andre simane urifö samuʼi ba safaito. (Danieli 8:3, 4, 20-22; Famaʼeleʼö 13:1, 2, 7, 8) Ba götö andre, no fanöndra kefe sebua wamawa fakake ba wasuwöta. Ato zanöndra hare sebua ba wamawa fakake ba wasuwöta. Sindruhu-ndruhu, ”Satana zamatörö ulidanö andre”.​—1 Yohane 5:19.

²¹ Hizaʼi, ”tenga tana khö niha gulidanö” niha Keriso sindruhu. Lö faʼawö nono mbanua Yehowa ba politik hegöi ba wasuwöta. Börö me lö omasi ira mamunu niha, andrö wa lö latuhini organisasi samunu niha. (Yohane 15:19; 17:16) Me tefakao niha Keriso, lö lafangaha wolau balö. Ifahaʼö ita Yesu wa moguna taʼomasiʼö nududa.​—Mataiʼo 5:44; Roma 12:17-21.

²² Börö agama wa mate niha si hauga zuta faʼato.  Imane Sura Niʼamoniʼö sanandrösa ba Mbabilona Sebua, angorudua agama sofaya ba zi sagörö ulidanö, ”No musöndra ba daʼö ndro niha niʼamoniʼö hegöi ira samaʼeleʼö, ba fefu niha nibubunu ba gulidanö.” Hadia aboto ba dödöu hana wa iʼandrö khöda Yehowa, ”Miheta ami khönia yaʼami banuagu”? Niha samosumange Yehowa, lö faböbö ira ba agama sofaya.​—Famaʼeleʼö 17:6; 18:2, 4, 24.

23. Hadia manö zi farahu na ’taheta ita’ moroi ba Mbabilona Sebua?

²³ Na ’taheta ita’ moroi ba Mbabilona Sebua, taforomaʼö wa sindruhu-ndruhu lö saʼae faböbö ita ba agama sofaya. Duma-dumania, moguna taʼila hadia sindruhu-ndruhu no laheta döida ba agama daʼö. Hizaʼi, so zabölö moguna. Lö tola löʼö taʼogorofi ba tatimbagö wamalua amuata si lö sökhi si toʼölö lafalua ba agama sofaya. Agama sofaya ituhini gamuata wohorö, politik, hegöi fakhögusa. (Baso Zinunö 97:10; Famaʼeleʼö 18:7, 9, 11-17) Lua-luania, ba zi hauga fakhe zuta niha si mate.

24, 25. Hewisa waʼaboto ba dödö sanandrösa khö Yehowa tola iʼasogö waʼahono dödö hegöi tödö side-ide si lö sinegu?

²⁴ Fatua lö aboto ba dödöda Yehowa, te no tatuhini ngawalö zi lö sökhi nifalua ba gulidanö nifatörö Zatana. Hizaʼi, iadaʼa no tabulöʼö wangera-ngerada. No tatema höli ba talulu waʼaurida khö Lowalangi. No ’ohahau dödöda ibeʼe Yehowa’. So khöda waʼahono dödö hegöi tödö side-ide si lö sinegu börö me taʼila wa no taʼomusoiʼö dödö Lowalangi.​—Halöwö Zinenge 3:19; Yesaya 1:18.

²⁵ Hewaʼae no irai faböbö ita ba organisasi si lö  moʼameʼegö tödö faʼauri, tola iʼefaʼö zalada Yehowa si teʼodane-dane ba höli. Sindruhu-ndruhu taʼandrö saohagölö khö Yehowa ba mbuala faʼauri nibeʼenia. Taforomaʼö wa taʼandrö saohagölö khönia na taforege wanolo niha böʼö enaʼö lafahaʼö ira sanandrösa khö Yehowa, laröi gulidanö nifatörö Zatana, ba owua-wua dödöra börö me aro wahuwusara khö Lowalangi.​—2 Korindro 6:1, 2.

26-28. (a) Hadia halöwö si tohude nibeʼe Yehowa khö Hezekieli? (b) Hadia niʼandrö Yehowa khöda iadaʼa enaʼö tafalua?

²⁶ Ba götö ndraono Gizaraʼeli me föna, iʼombakhaʼö Yehowa khö zamaʼeleʼö sotöi Hezekieli enaʼö ifangelama niha wa lö ara tö tehori Yeruzalema ba ifahaʼö ira hadia zinangea lafalua enaʼö teʼorifi. Na lö ifangelama ira Hezekieli, khönia dania isofu Yehowa. (Hezekieli 33:7-9) Iforomaʼö Hezekieli wa iʼameʼegö tödö waʼauri me iʼodödögö wangombakha turia saösö andrö.

²⁷ No ibeʼe khöda halöwö Yehowa ba wamangelama niha wa lö ara tö tedudugö gulidanö nifatörö Zatana andre, ba tatolo ira enaʼö aboto ba dödöra Yehowa irege teʼorifi ira ba gulidanö si bohou. (Yesaya 61:2; Mataiʼo 24:14) Taforege sibai wanuriaigö daʼa ba niha. Tatötöna wa tola tawaʼö wehede Waulo andre, ”Lö horögu ba ndro niha fefu. Börö me lö nitahagu wangombakha khömi fefu gohitö dödö Lowalangi.”​—Halöwö Zinenge 20:26, 27.

²⁸ So danö böʼö zinangea tarorogö ba waʼauri faböi taʼunö. Datatunö ösa ba duho aefa daʼa.