1, 2. Hadia zinangea tafalua enaʼö lö tebulö iʼomasiʼö ita Lowalangi?

 TATU manö omasi ita abölö ba lö mofökhö. Andrö wa taʼa gö si sökhi, asese olahraga ita, ba tarorogö mbotoda. Hewaʼae abua wamalua yaʼia, so sa atö mbuania, andrö böi awuwu ita. Moguna göi abölö ba lö mofökhö ita ba lala tanö böʼö.

² Hewaʼae no ibörögö aboto ba dödöda Yehowa, moguna nasa taforege enaʼö aro wahuwusada khönia. Me ifarou niha Keriso Yuda, ”Enaʼö ba lumö waʼomasi Lowalangi so ami”, itutunö hewisa wamaluara daʼa. Imane khöra, ”Miʼazökhi ba miʼamoniʼö wamatimi.” (Yuda 20, 21) Na simanö, hewisa enaʼö tola aro wamatida?

3-5. (a) Hadia zomasi Zatana örasoi sanandrösa ba gamakhoita Yehowa? (b) Hewisa dödöu sanandrösa ba goroisa hegöi goi-goi Yehowa?

³ Moguna faduhu dödöu wa sökhi lala niʼogunaʼö Yehowa. Omasi Zatana na so ba gera-erau wa abua wamalua amakhoita Lowalangi andrö ba waʼauri, ba ösöndra waʼomuso dödö na yaʼugö samösa zangai angetula sanandrösa ba zatulö hegöi si lö atulö. Ba Kabu  Edena, no irai itandraigö niha Satana enaʼö faduhu dödöra ba daʼö. (1 Moze 3:1-6) Ba lö tebulö ifalua daʼö irugi maʼökhö.

⁴ Hadia atulö Zatana? Hadia iböbö ita amakhoita Yehowa? Löʼö. Duma-dumania, khalaigö na so ndraʼugö ba kabu si sökhi. Öʼila so göli salawa sombaʼa lala weʼamöi ba zi sambua nahia ba kabu andrö. Te manofu dödöu, ’Hana wa ibaʼa ndraʼo öli daʼa?’ Aefa daʼö, örongo li zingo ba zi tambai göli daʼö. Hewisa dödöu iadaʼa me no mufasa göli andrö? Öʼandrö sibai saohagölö börö me ilumöʼö ndraʼugö irege tebai iʼa ndraʼugö singo andrö! Goi-goi Yehowa amaedola göli, ba Afökha amaedola zingo. Ifangelama ita Taromali Lowalangi, ”Mirorogö wangera-ngerami ba mi’angelama! Itöröi sa danö si faʼudu khömi yaʼia Gafökha andrö, hulö zingo sindröndrö-ndröndrö, iʼalu-alui haniha niʼania.”​—1 Fetero 5:8.

⁵ Omasi Yehowa na mofozu waʼaurida. Lö omasi ia na ilimo ita Satana. Andrö wa ibeʼe khöda goroisa hegöi goi-goi solumöʼö ba sangaʼasogö faʼomuso dödö khöda. (Efeso 6:11) Isura Yakobo, ”Niha sangosisiʼö oroisa soʼahonoa soʼamakhaita ba wangefa ba si lö mamöhöli wamalua yaʼia, . . . omuso dödönia börö me ifalua.”​—Yakobo 1:25.

6. Hewisa enaʼö faduhu dödöda wa si sökhi lala niʼogunaʼö Yehowa?

⁶ Na taʼoʼö wanuturu lala nibeʼe Yehowa, itugu sökhi waʼaurida ba aro wahuwusada khönia. Duma-dumania, tatema mbua me iʼandrö khöda enaʼö böi tebulö mangandrö ita khönia. (Mataiʼo 6:5-8; 1 Tesalonika 5:17) Omuso dödöda me taʼoʼö wanuturu lala nibeʼenia enaʼö owulo ita ba wamosumange yaʼia, faoma tafarou  dödö nawöda, ba taforege wanuriaigö ba mamahaʼö. (Mataiʼo 28:19, 20; Galatia 6:2; Heberaiʼo 10:24, 25) Na taʼangeragö hana wa möi fangaro wamatida fefu daʼa, itugu faduhu dödöda wa no si sökhi lala niʼogunaʼö Yehowa.

7, 8. Hadia zanolo yaʼita faböi aombö dödöda ba wanandraigö salua ba zi so miföna?

⁷ Te aombö dödöda wa abua wanandraigö wamati salua khöda ba zi so föna. Na so khöu wangera-ngera simanö, törö tödöu wehede Yehowa, ”Yaʼo, Yehowa, Lowalangiu zamahaʼö yaʼugö ba zoguna khöu, samasao yaʼugö ba lala nitöröu. Enaʼö ötöngöni goroisagu andrö, ba hulö hohou nidanö waʼohahau dödöu ba hulö ndrulu nasi waʼatulömö.”​—Yesaya 48:17, 18.

 ⁸ Na taʼoʼö li Yehowa, hulö nungo nidanö si lö irai oköli waʼohahau dödöda ba faʼatulöda hulö ndrulu nasi si lö tebulö numalö ba zinga gawu. Gofu hadia zalua ba waʼaurida, böi faröi ita. Ifabuʼu Sura Niʼamoniʼö, ”Beʼe noro Yehowa norou andrö, ba iʼorifiʼö, lö ibeʼe mangiwa zatulö tödö, irugi zi lö aetu.”​—Zinunö 55:23.

9, 10. Hadia geluahania moʼahonoa waʼaboto ba dödö?

⁹ Na itugu aro wahuwusau khö Yehowa, ’öʼodödögö enaʼö moʼahonoa waʼaboto ba dödöu’. (Heberaiʼo 6:1) Hadia geluahania moʼahonoa waʼaboto ba dödö?

¹⁰ Tenga börö waʼalawa ndröfi wa tobali ita niha Keriso soʼahonoa faʼaboto ba dödö. Hizaʼi, ha na no tabaliʼö si Fahuwu fondrege zi sökhi khöda Yehowa ba tafaudugö lala wangera-ngerada khönia. (Yohane 4:23) Isura Faulo, ”Niha soloʼö faʼomasi nösi, ha daʼö manö niʼera-erania, hizaʼi niha soloʼö fanuturu lala moroi ba geheha niʼamoniʼö, lö iböhöli woʼangeragö hadia ia zi tefaudu ba geheha andrö.” (Roma 8:5) Niha soʼahonoa faʼaboto ba dödö, lö iʼosambuaʼö dödönia ba gokhöta mazui ba wangomusoiʼö tödönia samösa, hizaʼi ba wamosumange Yehowa ba ihalö gangetula si sökhi ba waʼaurinia. (Gamaedola 27:11; baso Yakobo 1:2, 3.) Lö itehegö tedönisi ia wamalua si lö atulö. Iʼila hadia zatulö ba ihalö gangetula ba wamalua daʼö.

11, 12. (a) Hadia niwaʼö Waulo sanandrösa ba niha sangogunaʼö ”fangera-ngerania”? (b) Hewisa wa hulö zonekhe ba olahraga niha Keriso soʼahonoa faʼaboto ba dödö?

¹¹ Moguna muforege enaʼö moʼahonoa waʼaboto ba dödöda. Isura sinenge sotöi Faulo, ”Ö sabeʼe  moʼamakhaita ba niha si no aro faʼaboto ba dödö, si no toʼölö mangogunaʼö fangera-ngerania irege tefomaha ba wamaehusi satulö ba si lö atulö.” (Heberaiʼo 5:14) Te itörö tödöda niha sonekhe ba olahraga börö ngawua wehede ”tefomaha” andrö.

¹² Na taʼila nifalua niha sonekhe ba olahraga, aboto ba dödöda wa moguna ginötö hegöi famomaha enaʼö tola onekhe ia ba daʼö. Tenga iʼotarai me tumbu onekhe ia ba olahraga. Na tumbu nono sawuyu, lö iʼila sibai hewisa wangogunaʼö tanga hegöi ahenia. Hizaʼi, ba ginötönia tola ifahaʼö ia wololohe hadia ia hegöi ba wowaö-waö. Tola onekhe ia ba olahraga na no ifomaha ia. Simanö göi, moguna khöda ginötö hegöi famomaha enaʼö tobali ita niha Keriso soʼahonoa faʼaboto ba dödö.

13. Hadia zanolo yaʼita enaʼö tafahaʼö ita ba lala wangera-ngera Yehowa?

¹³ Ba publikasi daʼa, no taʼila hewisa wamaudugö fangera-ngerada moloʼö fangera-ngera Yehowa hegöi lala wamaiginia hadia ia. No tafahaʼö ita wangandrö saohagölö hegöi ba wangomasiʼö amakhoita Yehowa. Na tahalö gangetula, tola tasofu khöda samösa, ’Hadia goroisa mazui goi-goi sinangea uʼoʼö ba zalua andre? Hewisa lalagu woloʼö yaʼia? Hadia zomasi Yehowa ufalua?’​—Baso Gamaedola 3:5, 6; Yakobo 1:5.

14. Hadia zinangea tafalua na tadouʼö wamatida?

¹⁴ Böi tebulö tadouʼö wamatida khö Yehowa. Hulö na taʼa gö si sökhi enaʼö abölö ita, simanö göi na tafahaʼö ita sanandrösa khö Yehowa, tola itugu aro wamatida. Me awena tafahaʼö ita ba Zura Niʼamoniʼö, no tafahaʼö ita dane-dane zindruhu sanandrösa khö Yehowa  hegöi ngawalö lalania. Hizaʼi, börö me itugu numalö ginötö moguna aboto ba dödöda zabölö abakha. Daʼa geluaha niwaʼö Waulo me imane, ”Ö sabeʼe moʼamakhaita ba niha si no aro faʼaboto ba dödö.” Na taʼoʼö zi no tafahaʼö ita, tasöndra waʼatua-tua. Imane khöda Sura Niʼamoniʼö, ”Daʼö mböröta waʼatua-tua.”​—Gamaedola 4:5-7; 1 Fetero 2:2.

15. Hana wa moguna taʼomasiʼö Yehowa hegöi ira talifusöda soroi ba dödö?

¹⁵ Hewaʼae abölö ba lö mofökhö zi samösa niha, moguna iʼila wa böi mamalö irorogö mbotonia. Simanö göi, niha soʼahonoa faʼaboto ba dödö iʼila wa moguna iforege wangaʼaroʼö fahuwusania khö Yehowa. Ifasugi ba dödöda Faulo, ”Böi miböhöli wanekhegö tödömi na samati ami. Mitatugöi hewisa zindruhunia ami.” (2 Korindro 13:5) Hizaʼi, so zabölö moguna moroi ba wamati saro. Moguna tedou waʼomasida khö Yehowa hegöi khö ndra talifusöda. Imane Faulo, ”Na so khögu . . . waʼaboto ba dödö andrö fefu, ba so khögu wamati saro irege tola ufawuʼa hili, hizaʼi na lö khögu faʼomasi ba si lö eluaha ndraʼodo.”​—1 Korindro 13:1-3.

16. Hadia zomasi Zatana taʼangeragö?

¹⁶ Omasi Zatana na so ba wangera-ngerada wa tebai taʼomusoiʼö dödö Yehowa. Omasi ia na afatö dödöda ba tumbu ba gera-erada wa lö hadöi lala ba wangasiwai abula dödöda. Lö omasi ia na faduhu dödöda khö ndra talifusöda niha Keriso, ba lö göi omasi ia na omuso dödöda. (Efeso 2:2) Iʼila Satana wa fangera-ngera si lö sökhi zi tola mamakiko faʼaurida hegöi  fahuwusada khö Lowalangi. Hizaʼi, so nibeʼe Yehowa khöda sanolo yaʼita ba wanimbagö fangera-ngera si lö sökhi. No ibeʼe khöda wanötöna.

17. Hawaʼamoguna khöda wanötöna?

¹⁷ Ba 1 Tesalonika 5:8, no ifagölösi wanötönada andrö Sura Niʼamoniʼö ba dakula niʼogunaʼö zaradadu ba wolumöʼö yaʼia ba wasuwöta, yaʼia daʼö takula ”tötönafö ba wangorifi”. Na manötöna ita ba zi no ifabuʼu Yehowa, tola telumöʼö wangera-ngerada, ba daʼa zanolo yaʼita wanimbagö fangera-ngera si lö sökhi.

18, 19. Hewisa wa teʼaroʼö Yesu ba wanötönania?

¹⁸ Fanötöna niʼokhögö Yesu zangaʼaroʼö yaʼia. Ba mbongi afuriata waʼaurinia ba gulidanö, fatete manö zafökhö sinangea itaögö. Iʼa mbölinia si fahuwu khönia. So zangositengagö yaʼia. So göi zondröi yaʼia ba lalau moloi. Laʼuduni ia niha si sambua soi khönia, laʼandrö  enaʼö lafakao ia ba mate. Hadia zanolo yaʼia ba wanaögö famakao andre? ”Börö waʼomuso dödö si no so fönania, itaögö waʼafökhö ba döla geu famakao ba lö aila ia. Iadaʼa, no modadao ia ba gambölö dadaoma Lowalangi.”​—Heberaiʼo 12:2.

¹⁹ Iʼila Yesu wa tefolakhömi Namania na lö faröi ia ba iforomaʼö wa si falimo Zatana. Fanötöna andre zangomusoiʼö tödönia. Iʼila göi wa lö ara tö ifuli orudu ia khö Namania ba zorugo. Daʼa zanolo yaʼia irege anau gölönia. Simane Yesu, moguna taʼosambuaʼö dödöda ba wanötönada. Daʼa zanolo yaʼita wanaögö gofu hadia ia zalua khöda.

20. Hadia zanolo yaʼugö ba wangokhögö fangera-ngera si sökhi?

²⁰ Ifaigi-faigi Yehowa wamatimö ba faʼanau gölöu. (Yesaya 30:18; baso Maleakhi 3:10.) Ifabuʼu wa ”ibeʼe khöu zomasi dödöu”. (Zinunö 37:4) Börö daʼö,  öʼosambuaʼö dödöu ba wanötönau. Omasi Zatana na taya wanötönau ba ömane tödöu wa lö itörö fefu nifabuʼu Yehowa. Hizaʼi, böi so khöu wangera-ngera si lö sökhi! Na ibörögö aombö dödöu ba wanötönau, andrö wanolo khö Yehowa. Törö tödöu wehede nisura ba Wilifi 4:6, 7, ”Böi mibusi tödö hadia ia, mibokai khö Lowalangi ba wangandrö si fao fangalulu na so zabu dödömi ba ngawalö hadia ia, yafao wangandrö saohagölö, irorogö dödömi awö gera-erami faʼohahau dödö andrö khö Lowalangi, sabölö moroi ba gera-era niha fefu ba khö Keriso Yesu.”

21, 22. (a) Hadia gohitö dödö Yehowa ba gulidanö? (b) Hadia zomasiʼö öfalua?

²¹ Aseseʼö beʼe ginötöu ba wokhalaigö ngawalö zadöni dödö salua ba zi so föna. Ba zi lö ara tö, fefu zauri lafosumange Yehowa. (Famaʼeleʼö 7:9, 14) Angeragö waʼauri ba gulidanö si bohou. Daʼa zabölö sökhi moroi ba ngawalö hadia ia nikhalaigöda! Tehori Zatana, malaʼikania, hegöi niha si lö sökhi. Lö saʼae örasoi wökhö ba faʼamate. Na maoso ndraʼugö ero sihulö wongi, afönu waʼabölöu ba faʼomuso dödöu ba waʼauri. Falulu fohalöwö fefu niha ba wombaliʼö ulidanö andre tobali faradaiso. Teʼasogö gö si sökhi hegöi nahia sahono. Lö amuʼi mazui afaito niha, hizaʼi sökhi gamuatara khö nawöra. Ba ginötönia dania, fefu niha ba gulidanö latema ”wangefa solakhömi simane nitema ndraono Lowalangi”.​—Roma 8:21.

²² Omasi Yehowa na öbaliʼö ia si Fahuwu si sökhi khöu. Börö daʼö, forege ba woloʼö li Yehowa ba ondrasi ia ero maʼökhö. Yalötebulö so ita ba lumö waʼomasi Lowalangi irugi zi lö aetu!​—Yuda 21.