1-3. (a) Hadia mbuala si sökhi nibeʼe Yehowa khöda? Hewisa wa tola fasala wangogunaʼöda yaʼia? (b) Hewisa wangogunaʼöda buala ba wahuhuosa andrö?

 SO SAMÖSA nama sameʼe kureta khö nononia ono matua. Omuso dödönia wameʼe buala si sökhi andrö. Hizaʼi, hewisa na lö iʼangenanöi wolohe kureta andrö ono daʼö irege itandru niha ba mesokho? Hewisa dödö namania?

² Yehowa Zameʼe ”fefu mbuala si sökhi ba soʼahonoa”. (Yakobo 1:17) Sambua buala si sökhi nibeʼenia yaʼia daʼö faʼonekheda ba wahuhuosa. Börö mbuala andrö wa tola tafaʼema mbua gera-era hegöi ösi dödöda. Tola tawaʼö wehede si möi fanolo ba fondrara dödö niha. Hizaʼi, tola göi tetutu ba afökhö dödöra börö wehededa.

³ Mofaʼabölö sibai huhuo nifaʼemada, ba ifahaʼö ita Yehowa lala wangogunaʼö buala andrö ba zi sökhi. Imane khöda, ”Böi alua ba mbewemi wehede si lö sökhi. Tobali, mibeʼe wehede si sökhi si möi famarou dödö na moguna, enaʼö ohahau dödö zamondrongo.” (Efeso 4:29) Datatutunö hewisa wangogunaʼöda buala  Lowalangi andre ba lala somasi ia ba si möi famarou dödö niha böʼö.

4, 5. Hadia wamahaʼö nihalöda ba Gamaedola Zura Niʼamoniʼö börö me mofaʼabölö wehededa?

⁴ Mofaʼabölö wehededa, andrö moguna taʼangenanöi hadia niwaʼöda ba hewisa wangumaʼö yaʼia. Imane ba Gamaedola 15:4, ”Faʼehao lela andrö, ba no eu sowua fangorifi; ba faʼatefuyunia, ba mesokho bakha dödö ibeʼe.” Hulö geu sowua si sökhi si tobali fangokafu dödö ba fangorifi, simane daʼö göi wehededa si sökhi, tola möi fangokafu dödö zamondrongo. Hizaʼi, na lö sökhi wehededa, tola tetutu ba afatö dödö zamondrongo.​—Gamaedola 18:21.

⁵ Imane ba Gamaedola 12:18, ”So ösa si falela-lela manö, ba hulö nikhu gari.” Fehede si lö sökhi tola iʼasogö waʼafökhö dödö ba tekiko wahuwusada ba niha. Te lö olifu ndraʼugö me so zangumaʼö khöu fehede si lö sökhi irege afökhö sibai dödöu. Hizaʼi, itohugö ba Gamaedola, ”Lela zatua-tua, ba no dalu-dalu.” Na tahaogö taʼangeragö wehededa, tola alö waʼafökhö dödö nawöda ba teʼaroʼö mangawuli wahuwusada khönia. (Baso Gamaedola 16:24.) Na itörö tödöda wa so lua-lua wehededa ba niha, tahaogö taʼangenanöi na mohede ita.

6. Hana wa abua khöda wotatugöi hadia zinangea tawaʼö?

⁶ Wa moguna taʼangenanöi nasa wehededa börö me lö moʼahonoa ita. ’Si lö sökhi gera-era niha’, ba moroi ba wehededa oroma hadia nösi dödöda. (1 Moze 8:21; Luka 6:45) Tola manö abua khöda wotatugöi hadia zinangea  tawaʼö. (Baso Yakobo 3:2-4.) Hizaʼi, moguna taforege woʼangenanöi fehededa ba niha.

7, 8. Hewisa lua-lua wehededa ba wahuwusada khö Yehowa?

⁷ Taʼangenanöi göi wehededa börö me tabuʼa dania föna Yehowa fefu zi no tawaʼö hegöi lalada wangumaʼö yaʼia. Imane Yakobo 1:26, ”Na so zangumaʼö tödönia samosumange Lowalangi ia, ba na lö itaha lelania, no ilimo ia ba zaya-zaya gölö wamosumangenia Lowalangi.” Böröta ngawua wehede ”zaya-zaya gölö” andrö eluahania göi lö moguna. (1 Korindro 15:17) Na lö taʼangenanöi wehededa, tola tekiko ba aetu wahuwusada khö Yehowa.​—Yakobo 3:8-10.

⁸ Aboto ba dödöda wa so dane-dane saro hana wa taʼangenanöi wehededa hegöi lala wangumaʼö yaʼia. Na omasi ita taʼila lala wangogunaʼö buala ba wahuhuosa andrö simane somasi Yehowa, moguna taʼila hadia manö wehede sinangea tatimbagö.

9, 10. (a) Hadia wehede si no toʼölö lawaʼö niha iadaʼa? (b) Hana wa moguna tatimbagö wehede hokha?

⁹ Ba ginötö daʼa, toʼölö niha wangumaʼö fehede hokha mazui falelesa. Lamane tödöra wa moguna möi ira ba hölu ba laʼogunaʼö wehede sogoro ita ba wangabakhaiʼö hadia niwaʼöra. Niha somasi farisa, asese laʼogunaʼö wehede hokha awö zogoro ita enaʼö maʼiki niha. Hizaʼi, no iwaʼö Faulo, ”Miböhöli fefu daʼö simane fönu, faʼabao dödö, faʼalösökhi, mazui fangoʼaya, ba böi kalua ba mbawami mbude-bude hokha soʼamakhaita ba wamalua horö.” (Kolose 3:8) Imane nasa wa ”böi mifadunö-dunö” ba gotalua niha Keriso sindruhu ’mbude-bude hokha’.​—Efeso 5:3, 4.

¹⁰ Iʼogorofi wehede hokha andrö Yehowa hegöi niha sangomasiʼö yaʼia. Daʼö wehede si raʼiö. Ba Zura Niʼamoniʼö, farahu ’waʼaraʼiö’ andrö ba ”mbua-bua nösi”. (Galatia 5:19-21) Oya ngawalö horö soʼamakhaita ba ’waʼaraʼiö’, ba na no toʼölö mufalua sambua gamuata si raʼiö, tola molua-lua ia ba gamuata tanö böʼö. Na so zasese mangumaʼö fehede si raʼiö sogoro ita, safönu hokha ba lö iböhöli, tola manö muʼefasi ia ba mbanua niha Keriso.​—2 Korindro 12:21; Efeso 4:19; faigi Gonönöta 23.

11, 12. (a) Hadia geluahania wamato-matou niha ba zi lö sökhi? (b) Hadia mbörö wa tebai taböbögö zi lö duhu ba niha?

¹¹ Böi tafatou-tou niha ba zi lö sökhi. No si toʼölö na adöni dödöda ba niha böʼö ba omasi ita tatutunö duria sanandrösa ba zi fahuwu hegöi ösi nomo. Me abad siföföna, omasi niha Keriso me föna wangiʼila turia ndra talifusöra awö wanolo si tola labeʼe khö  nawöra. (Efeso 6:21, 22; Kolose 4:8, 9) Hizaʼi, na tadunö-dunö niha böʼö, aoha sibai khöda wamato-matou yaʼira ba zi lö sökhi. Ba na tatohugö wamaʼema ba niha, tola manö tatutunö zi lö duhu mazui si tebai laʼila niha böʼö. Na lö mangelama ita, huhuo si lö sökhi andrö tola tobali famobahulu mazui famöbögö si lö duhu. Laböbögö zi lö duhu khö Yesu ira niha Farizaiʼo me lafobahulu ia wamalua si lö nifaluania. (Mataiʼo 9:32-34; 12:22-24) Tola obou döi niha na taböbögö khöra zi lö duhu, alua wasosota, faʼafökhö dödö, ba aetu wahuwusada.​—Gamaedola 26:20.

¹² Omasi Yehowa na taʼogunaʼö wehededa ba wanolo hegöi ba wamarou tödö niha böʼö, tenga ba wamaʼudu si fahuwu. Fatuwu Yehowa ba niha ”samobörö fagua-guasa ba zi fatalifusö”. (Gamaedola 6:16-19) Satana Afökha zi oföna mamöbögö si lö duhu khö Lowalangi. (Famaʼeleʼö 12:9, 10) Ba gulidanö götö daʼa, no toʼölö niha wolimo awöra. Böi menaʼö alua daʼö ba mbanua niha Keriso. (Galatia 5:19-21) Börö daʼö, moguna taʼangenanöi wehededa ba taʼangeragö ua hadia zedöna tawaʼö. Fatua lö öfaʼema misa zi no lafatou-tou niha, sofu khöu samösa, ’Hadia atulö duria sedöna ufaʼema andre? Hadia sökhi daʼö? Hadia tobali fanolo? Hadia omasido na irongo niwaʼögu andrö niha nifatou-tougu? Hewisa dödögu na so zamato-matou yaʼo?’​—Baso 1 Tesalonika 4:11.

13, 14. (a) Hadia lua-luania na talele niha böʼö? (b) Hadia nifotöi falelesa andrö? Hana wa tebai lalele niha böʼö ira niha Keriso?

¹³ Itaria maniasa ita ba gafuriata na no tawaʼö hadia ia. Hizaʼi, lö omasi ita na tatahi-tahigö manö niha  böʼö mazui tawaʼö wehede safökhö ba si lö sökhi. Böi so ba gotaluada zi falele-lele. Imane Faulo, ”Miheta khömi waʼafökhö dödö, faʼabao dödö, fönu, feʼira-ira, falelesa.” (Efeso 4:31) Ba Zura Niʼamoniʼö tanö böʼö, ngawua wehede ”falelesa” mufoʼeluaha tobali ”fehede si lö sökhi”, ”fehede fangafökhö dödö” ba ”fehede fangoʼaya”. Na talele niha, tola aila ira ba hulö zi lö eluaha waʼaurira, töra-töra na talele ndraono, alio sibai tetutu dödöra. Andrö, moguna taʼangenanöi wehededa faböi afökhö dödö zamondrongo.​—Kolose 3:21.

¹⁴ Ifangelama ita Sura Niʼamoniʼö wa fangoʼaya sabölö-bölö yaʼia daʼö falelesa. Eluahania, lö aetu tahöndrögö niha böʼö irege afökhö dödöra. Alimagö sibai na tafalua daʼö khö woʼomoda mazui iraonoda! Sindruhunia, na so zi lö mamöhöli wolele awönia, laʼefasi ia ba mbanua niha Keriso. (1 Korindro 5:11-13; 6:9, 10) Simane si no tafahaʼö ita, na tawaʼö wehede hokha, si lö atulö, mazui si lö sökhi, tola tekiko wahuwusada khö Yehowa hegöi ba niha böʼö.

15. Hadia wehede si tola mangaʼaroʼö fahuwusa?

¹⁵ Hewisa wangogunaʼöda buala ba wahuhuosa andrö ba zomasi Yehowa? Hewaʼae lö nizara-zara Zura Niʼamoniʼö wanutunö hadia zi tola ba si tebai tawaʼö, imane khöda wa moguna tawaʼö ”wehede si sökhi si möi famarou dödö”. (Efeso 4:29) Fehede famarou dödö andrö yaʼia daʼö fehede si sökhi, si lö raʼiö, ba sindruhu. Omasi Yehowa na taʼogunaʼö wehededa ba wamarou tödö hegöi ba wanolo niha böʼö. Tola manö so daha-tahada wamalua daʼö. Moguna taforege wangumaʼö  fehede si sökhi börö me aoha khöda wangumaʼö si lö sökhi ba si lö karua. (Tito 2:8) Datatutunö ösa hewisa lala wamarou tödö nawöda ba wehede.

16, 17. (a) Hadia mbörö wa tasuno niha böʼö? (b) Haniha manö zi tola tasuno?

¹⁶ Lö atali Yehowa hegöi Yesu ba wameʼe fanuno. Omasi ita na taʼoʼö ira. (Mataiʼo 3:17; 25:19-23; Yohane 1:47) Enaʼö tola tefarou dödö niha na tasuno ira, moguna taʼangeragö ba taʼameʼegö tödö ira. Imane ba Gamaedola 15:23, ”Taromali ba ginötö, ba ha lö asökhi!” Terou dödöda na so zanuno yaʼita soroi ba dödö börö waʼerege dödöda ba halöwö mazui laʼandrö saohagölö ba zi no tafalua.​—Baso Mataiʼo 7:12; faigi Gonönöta 27.

¹⁷ Na toʼölö ndraʼugö wamaigi amuata si sökhi ba niha, aoha khöu wanuno yaʼira soroi ba dödö. Duma-dumania, te so niʼilamö ba mbanua niha Keriso si no mamaʼanö yaʼia ba wamaʼema huhuo sebua mazui ba wameʼe bua gera-era ba gangowuloa. Te so zi bohou ebua samaduhuʼö famatinia ba zekola, mazui so zi no alawa döfi sowölö-ölö ba wanuriaigö. Tola manö moguna khöra wehede fangandrö saohagölö moroi khöu. Simanö göi woʼomo ira matua, moguna sibai iwaʼö khö woʼomonia wa iʼomasiʼö ba iʼandrö saohagölö waʼerege dödönia. (Gamaedola 31:10, 28) Moguna haga zino hegöi idanö ba zinanö, simanö göi niha, moguna laʼandrö khöra saohagölö. Mendrua manö na iraono, sökhi na taʼalui ginötö ba wanuno yaʼira börö halöwö hegöi amuatara si sökhi. Na tasuno ira, tola terou dödöra, faduhu dödöra, ba laforege nasa wamalua satulö.

18, 19. Hana wa taforege sibai ba wamarou hegöi ba wondrara tödö niha böʼö? Hewisa wamalua yaʼia?

 ¹⁸ Na tafarou ba tarara dödö niha böʼö, no taʼoʼö duma-duma Yehowa. Sindruhu-ndruhu iʼameʼegö tödö niha ”si lö fayawasa dödö” ba ”si no arasa tödö”. (Yesaya 57:15) Omasi ia na lö ’taböhöli wangaʼaroʼö’ awöda ba ’tarara dödö niha sabu tödö’. (1 Tesalonika 5:11, 14) Na tafalua daʼa, iʼameʼegö tödö zi no taforege andrö ba iʼandrö saohagölö.

¹⁹ Te so zide-ide tödö mazui sabu tödö niʼilau ba mbanua niha Keriso. Hadia zi tola öwaʼö ba wanolo yaʼia? Te tebai öʼasiwai gabula dödönia, hizaʼi tola  öforomaʼö khönia wa öʼameʼegö tödö ia. Duma-dumania, tola öbeʼe ginötöu khönia. Tola öbaso ayati Zura Niʼamoniʼö si tola mamarou tödönia ba waʼö khönia wa omasiʼö öʼohe ia ba wangandrö. (Zinunö 34:19; Mataiʼo 10:29-31) Faduhuʼö ba dödönia wa laʼomasiʼö ia ira talifusöda ba mbanua niha Keriso. (1 Korindro 12:12-26; Yakobo 5:14, 15) Na fahuhuoʼö khönia, foromaʼö wa sindruhu-ndruhu niwaʼöu ba öfaduhusi tödö.​—Baso Gamaedola 12:25.

20, 21. Hana wa tola aoha ba niha wanemaʼö mene-mene?

²⁰ Tola tafarou dödö niha böʼö na tabeʼe khöra mene-mene si sökhi. Moguna khöda mene-mene  andrö ero inötö börö me lö moʼahonoa ita. Imane ba Gamaedola 19:20, ”Fondrondrongo wamolala tödö, ba tema wanegu, enaʼö atua-tuaʼö saʼae.” Tenga ha satua sokubaloi zi tola mameʼe mene-mene mazui famolala tödö. Moguna labeʼe wanuturu lala ira satua ba ndraonora. (Efeso 6:4) Ba tola göi laʼamenesi niha böʼö ira talifusöda ira alawe. (Tito 2:3-5) Börö me taʼomasiʼö ndra talifusöda, tafaigi enaʼö lö tetutu dödöra ba lala wameʼeda mene-mene khöra. Hadia zanolo yaʼita?  

²¹ Te lö olifuʼö me so zameʼe khöu mene-mene si sökhi salio fatema ba dödöu. Hana wa aoha khöu wanemaʼö yaʼia? Te ömane tödöu wa sindruhu-ndruhu iʼameʼegö tödö ndraʼugö. Mazui, sökhi lagunia wahuhuosa ba afönu faʼomasi. (Kolose 4:6) Mendrua manö me teʼodane-dane mene-mene andrö ba Zura Niʼamoniʼö. (2 Timoteo 3:16) He na iʼanemaiʼö tatötöi ayati Zura Niʼamoniʼö hegöi na löʼö, sökhi na teʼodane-dane mene-meneda andrö ba Mbuku Niʼamoniʼö. Böi tafaso niha böʼö wanema bua gera-erada mazui taʼogunaʼö ayati ba zi fasala ba wotuhini fehededa. Na ötörö tödöu hewisa me labeʼe khöu mene-mene, tola tobali fanolou daʼö na öbeʼe mene-mene ba niha böʼö.

22. Hewisa wangogunaʼöda buala ba wahuhuosa?

²² Faʼonekheda ba wahuhuosa no buala moroi khö Lowalangi. Na taʼomasiʼö ia, taʼogunaʼö daʼö ba zi tefaudu. Böi olifuʼö, tola afökhö dödö niha ba wehededa mazui tobali famarou dödöra. Börö daʼö, dataforege wangogunaʼö fehededa ba wangaʼaroʼö hegöi ba wamarou tödö niha böʼö.