1. Hadia zaombö dödö Yesu ba mbongi fatua lö mate ia?

 DAʼÖ mbongi fatua lö mate Yesu. Iʼila wa lö ara tö iröi ndra nifahaʼönia, ba aombö dödönia waʼaurira ba zi so föna. Imane khöra, ”Tenga tana khö niha gulidanö ami.” (Yohane 15:19) Aefa daʼö, iʼohe ira ba wangandrö. Imane khö Namania, ”Tenga tana khö niha gulidanö ira, simane yaʼo si tenga tana khö niha gulidanö.” (Yohane 17:15, 16) Hadia geluaha niwaʼönia andrö?

2. Hadia geluaha ”gulidanö” niwaʼö Yesu?

² Ngawua wehede ”gulidanö” manandrösa ba niha si lö faʼaboto ba dödö khö Lowalangi ba nifatörö Zatana ira. (Yohane 14:30; Efeso 2:2; Yakobo 4:4; 1 Yohane 5:19) Hewisa lala enaʼö ”tenga tana khö niha gulidanö” ita? Ba faza daʼa, tatutunö hauga ngawua lalania: Böi tebulö waʼalöfaröida ba Wamatörö Lowalangi ba böi faʼawö ita ba gulidanö, eluahania lö fao ba politik. Tatimbagö geheha gulidanö. Lö fayawa ba wonukha, ba wangehao, ba atulö gera-erada sanandrösa ba gefe. Taʼogunaʼö ”wangöna ba wasuwöta” nihenaigö Lowalangi khöda.​—Faigi Gonönöta 16.

3. Hewisa wamaigi Yesu politik?

³ Me so Yesu ba gulidanö, iʼila wa oya gabula dödö salua ba niha ba basaki waʼaurira. Sindruhu-ndruhu so so dödönia ira ba omasi ia itolo. Hadia tobali ia sondröniaʼö politik? Löʼö. Iʼila wa moguna ba niha Wamatörö Lowalangi. Yaʼia dania Razo ba Wamatörö daʼö, ba Famatörö andrö duho siföföna ba wanuriaigönia. (Danieli 7:13, 14; Luka 4:43; 17:20, 21) Lö fao Yesu ba politik, ba lö tebulö iforomaʼö wa lö faʼawö ia ba gulidanö. Imane me so ia föna gubernur Romawi sotöi Fondrio Filato, ”Tenga moroi ba gulidanö andre Wamatörögu.” (Yohane 18:36) Lö faʼawö göi ndra nifahaʼönia ba gulidanö. Imane buku On the Road to Civilization wa ”lö lahalö dadaoma ba politik” ira niha Keriso siföföna. Simanö göi niha Keriso sindruhu ba ginötö daʼa. Lö faröi ita wotuhini Famatörö Lowalangi ba lö faʼawö ita ba politik gulidanö daʼa.​—Mataiʼo 24:14.

4. Hewisa niha Keriso sindruhu wotuhini Famatörö Lowalangi?

⁴ Na so nifataro tobali tenge-tenge soira, yaʼira zosalahini famatöröra ba soi böʼö, ba lö fao ira ba politik soi daʼö. Simanö göi niha nibayoini samatörö awö Keriso ba zorugo. Imane Faulo ba niha Keriso nibayoini, ”Yaʼaga andre tenge-tenge si möi salahi Keriso.” (2 Korindro 5:20) Niha nibayoini zosalahini famatörö Lowalangi. Lö fao ira ba politik hegöi ba ngawalö nidunö-dunö soʼamakhaita ba wamatörö gulidanö. (Filifi 3:20) Latolo niha si hauga zuta faʼato enaʼö lafahaʼö ira ba wamatörö Lowalangi. Latuhini niha nibayoini ira ’biri-biri tanö böʼö’ si so fanötöna  auri sagötö faʼara ba gulidanö si bohou nihenaigö Lowalangi. Lö tebulö göi laforomaʼö wa lö faʼawö ira ba gulidanö. (Yohane 10:16; Mataiʼo 25:31-40) Lö hadöi niha Keriso sindruhu si faʼawö ba politik gulidanö daʼa.​—Baso Yesaya 2:2-4.

5. Hadia dane-dane siföföna wa tebai fasuwö niha Keriso?

⁵ Na ba wamaigi niha Keriso sindruhu, hulö nösi nomora ndra talifusö si sara lala wamati khöra, ba teʼosambuaʼö ira hewaʼae faböʼö soira mazui waö-waö waʼaurira ba zilalö. (1 Korindro 1:10) Na fasuwö ita, ösi nomoda nisuwöda hegöi talifusö si sara lala wamati khöda. Sindruhunia, iʼoʼou ita Yesu wangomasiʼö yaʼira. (Yohane 13:34, 35; 1 Yohane 3:10-12) Iʼandrö khö ndra nifahaʼönia enaʼö laʼomasiʼö fefu zi faʼudu khöra.​—Mataiʼo 5:44; 26:52.

6. Hewisa dödö nono mbanua Yehowa khö ndra samatörö?

 ⁶ Hewaʼae lö faʼawö niha Keriso ba gulidanö, taforege enaʼö tobali ita ono mbanua si sökhi. Duma-dumania, tafosumange zamatörö na taʼoʼö gamakhoitara ba tabuʼa pajak. Hizaʼi, böi olifu ita wameʼe ”khö Lowalangi tana khö Lowalangi”. (Mareko 12:17; Roma 13:1-7; 1 Korindro 6:19, 20) Ba ’dana khö Lowalangi’ andrö farahu waʼomasida khönia, foloʼöda ba famosumangeda yaʼia. Tatehegö teʼala waʼaurida moroi na lö taʼoʼö li Yehowa.​—Luka 4:8; 10:27; baso Halöwö Zinenge 5:29; Roma 14:8.

7, 8. Hadia geluahania ”eheha gulidanö”, ba hewisa wa molua-lua da’ö ba niha?

⁷ Eluaha lö faböbö ba gulidanö nifatörö Zatana yaʼia daʼö lö tatehegö ifatörö ita ”eheha gulidanö”. Eheha andrö lala wangera-ngera hegöi amuata si otarai khö Zatana, ba daʼö zamatörö niha si lö mamosumange Yehowa. Hizaʼi, latimbagö gamuata daʼa ira niha Keriso. Simane niwaʼö Waulo ”tenga eheha gulidanö andre zameʼe fanuturu lala khöda, hizaʼi eheha niʼamoniʼö moroi khö Lowalangi”.​—1 Korindro 2:12; Efeso 2:2, 3; faigi Gonönöta 17.

⁸ Börö geheha gulidanö andre wa so ba niha gamuata fakhögusa, fayawasa, ba famadaö, irege lamane tödöra wa lö moguna laʼoʼö li Lowalangi. Omasi Zatana na lafalua zomasi-masi dödöra niha, ba lö saʼae laʼangeragö lua-luania. Omasi ia na faduhu dödöra wa ”faʼomasi nösi, faʼomasi hörö” zabölö moguna ba waʼaurira. (1 Yohane 2:16; 1 Timoteo 6:9, 10) Iforege Afökha wanandraigö ono mbanua Yehowa  ba ilimo ita ba lala wangera-ngerania.​—Yohane 8:44; Halöwö Zinenge 13:10; 1 Yohane 3:8.

9. Hewisa geheha gulidanö andre wondrönisinia yaʼita?

⁹ Simane angi nihofoda, no ifasui göi ita eheha gulidanö andre. So lua-luania khöda na lö taforege wanimbagö yaʼia. (Baso Gamaedola 4:23.) Tola manö ibörögö ifaʼala ita ba zi lö oroma, simane na tatehegö tedönisi dödöda ba lala wangera-ngera hegöi amuata niha si lö mamosumange Yehowa. (Gamaedola 13:20; 1 Korindro 15:33) Mazui tola te’ala ita ba ngawalö hadia ia simane pornografi, fondröi sindruhu, mazui fatandrisa ba olahraga.​—Faigi Gonönöta 18.

10. Hewisa lalada wanimbagö eheha gulidanö?

¹⁰ Hewisa enaʼö lö ifatörö ita eheha gulidanö? Böi tebulö ahatö ita khö Yehowa ba tatehegö enaʼö faʼatua-tuania andrö zanuturu lalada. Böi taböhöli wangandrö eheha niʼamoniʼö ba owölö-ölö ita wangai halöwö khönia. Yehowa no fondrege zabölö ba mbanua si yawa awö danö. Faduhu dödöda wa itolo ita wanimbagö eheha gulidanö andre.​—1 Yohane 4:4.

11. Hewisa lua-lua geheha gulidanö andre ba lala wonukha niha?

¹¹ Tola taforomaʼö wa lö faböbö ita ba gulidanö ba lagu wonukhada ba fangehao boto. Ato niha sonukha ba gulidanö andre ha enaʼö lafaigi-faigi ira niha, enaʼö tumbu ba gera-era niha wamalua amuata wohorö, ba wangoromaʼö famadaö wolawa niha sato, mazui ba wangoromaʼö hawaʼebua gefera. Tanö böʼö, lö ibeʼe dödöra wangehao yaʼira. Te so zomasi na taʼunö  nukhara mazui fawuka. Tebai taʼoʼö gamuata simane daʼö na tahalö gangetula sanandrösa ba wonukha hegöi fangehao boto.

12, 13. Hadia goi-goi sanolo yaʼita wotatugöi nukha niʼogunaʼöda?

¹² Börö me ono mbanua Yehowa ita, andrö wa omasi ita na moadu lagu wonukhada, lö taʼunö, ohahau dödöda ba wamaigi, ba tefaudu ginötönia. Lagu wonukha si ’lö fayawa ba taʼila tafatimbaisi’ zangoromaʼö wa ”sangataʼufi Lowalangi” ita.​—1 Timoteo 2:9, 10; Yuda 21.

 ¹³ So lua-lua lagu wonukhada ba gera-era niha sanandrösa khö Yehowa hegöi ono mbanuania. Omasi ita wamalua hadia ia ”ba wamolakhömi Lowalangi”. (1 Korindro 10:31) Lö fayawa ba wonukha eluahania lö taʼaohasi ba dödö mbua gera-era niha hegöi ösi dödöra. Andrö, na tafili nukha mazui tatatugöi hewisa zinangeania ita ba wamaigi niha, moguna itörö tödöda wa so lua-luania ba niha böʼö.​—1 Korindro 4:9; 2 Korindro 6:3, 4; 7:1.

14. Hadia zinangea taʼangeragö na tafili nukha niʼogunaʼöda ba halöwö niha Keriso?

¹⁴ Hewisa zinangeania lagu wonukhada ba gangowuloa mazui ba wanuriaigö? Hadia lö tebulö lafaigi-faigi manö ita? Hadia aila ira börö wonukhada? Hadia imane tödöda, gofu hewisa wonukhada, lö urusa niha böʼö ba daʼö? (Filifi 4:5; 1 Fetero 5:6) Si toʼölönia, omasi ita sökhi ba duduma hörö niha. Hizaʼi, börö mbua-bua niha Keriso wa tola adöni dödöra khöda. Daʼa mbua-bua nifaigi Yehowa khöda. Ba daʼö oroma hewisa ita zindruhunia, ”waʼasökhi si tobini bakha ba dödö . . . daʼö zi sökhi ba wamaigi Lowalangi”.​—1 Fetero 3:3, 4.

15. Hana wa lö izara-zara Yehowa wanutunö hewisa zinangeania lagu wonukhada hegöi fangehaoda yaʼita?

¹⁵ Lö izara-zara Yehowa wameʼe khöda amakhoita sanandrösa ba nukha si tola hegöi si tebai taʼogunaʼö. Hizaʼi, ibeʼe goi-goi Zura Niʼamoniʼö sanolo yaʼita wangai angetula si sökhi. (Heberaiʼo 5:14) Hewa’ae ebua mazui ide-ide gangetula nihalöda, omasi ia na teʼodane-dane da’ö ba waʼomasida khönia hegöi niha böʼö. (Baso Mareko 12:30, 31.) Ba zi sagörö ulidanö,  faböʼö-böʼö lagu wonukha nono mbanua Yehowa moloʼö si toʼölö lafalua hegöi somasi ira zamösana. Sökhi waʼafaböʼö-böʼö andrö ba möi fangohahau dödöda.

16. Hewisa wa faehu wamahaʼö Yesu moroi ba lala wamaigi niha gulidanö sanandrösa ba gefe? Hadia zinangea tasofu khöda samösa?

¹⁶ Omasi Zatana na so ba wangera-ngera niha wa awena lasöndra waʼowua-wua dödö na so gefera hegöi okhötara, hizaʼi laʼila ono mbanua Yehowa wa fasala daʼö. Faduhu dödöda ba wehede Yesu, ”Hewaʼae  oya harato zi samösa niha, tebai möi fangorifinia daʼö.” (Luka 12:15) Tenga börö gefe wa tasöndra waʼowua-wua dödö sindruhu. Tebai ibeʼe khöda zi fahuwu sindruhu, faʼohahau dödö sindruhu, mazui faʼauri si lö aetu. Tatu manö, moguna khöda gokhöta, ba omasi ita na owua-wua dödöda ba waʼauri. Hizaʼi, ifahaʼö ita Yesu wa taʼokhögö waʼowua-wua dödö na sökhi wahuwusada khö Lowalangi ba na taʼofönaiʼö wamosumange yaʼia ba waʼaurida. (Mataiʼo 5:3; 6:22, nisura ba gahe zura) Sofu khöu samösa, ’Hadia so lua-luania khögu lala wangera-ngera niha gulidanö sanandrösa ba gefe? Hadia ha kefe manö niʼera-eragu mazui nidunö-dunögu?’​—Luka 6:45; 21:34-36; 2 Yohane 6.

17. Hewisa wa tola sökhi waʼauriu na ötimbagö wangera-ngera gulidanö sanandrösa ba gefe?

¹⁷ Sökhi lua-lua waʼaurida na taʼofönaiʼö wamosumange Yehowa ba tatimbagö wangera-ngera gulidanö sanandrösa ba gefe. (Mataiʼo 11:29, 30) Ahono dödöda ba zi no so ba lö fawuka dödöda hegöi fangera-ngerada. (Mataiʼo 6:31, 32; Roma 15:13) Lö taʼabusi tödö sibai gokhöta. (Baso 1 Timoteo 6:9, 10.) Ohahau dödöda ba wameʼe. (Halöwö Zinenge 20:35) Ba oya ginötöda wefao ba niha niʼomasiʼöda. Taʼila göi mörö.​—Zangombakha 5:11.

18. Hadia nifalua Zatana khöda?

¹⁸ Itandraigö Satana wamakiko fahuwusada khö Yehowa, andrö taʼodödögö ba wolumöʼö daʼö. Taforege ”wolawa malaʼika si lö sökhi”. (Efeso 6:12) Lö  omasi Zatana hegöi malaʼikania na owua-wua dödöda mazui na tasöndra waʼauri si lö aetu. (1 Fetero 5:8) Udu sabölö andre laforege wolawa yaʼita, hizaʼi itolo ita Yehowa enaʼö möna ba wolawa yaʼira!

19. Hewisa wanutunö Efeso 6:14-18 sanandrösa ba ”wangöna ba wasuwöta” niʼogunaʼö niha Keriso?

¹⁹ Me föna, laʼogunaʼö wangöna ba wasuwöta ira saradadu enaʼö telumöʼö ira. Simanö göi, lö tola löʼö taʼogunaʼö ”wangöna ba wasuwöta” si no ibeʼe Yehowa. (Efeso 6:13) Daʼö zolumöʼö yaʼita. Tabaso wangöna andre ba Efeso 6:14-18, ”Ba miʼabeʼeʼö ami, miʼogunaʼö mböbö löwi zindruhu andrö, ba baru siʼöli waʼatulö dödö, ba miʼogunaʼö mbadagahe tandra wa no mifaʼanö ami ba wanuriaigö turia somuso dödö sanandrösa ba waʼatulö. Baero daʼö, mihalö mbaluse sebua yaʼia daʼö famati enaʼö tola mitaha nono wana soʼalitö andrö khö Zatana. Mitema dakula siʼöli fangorifi, ba föda eheha, yaʼia daʼö taromali Lowalangi. Fefu ngawalö wangandrö ba foʼangaröfili, böi miböhöli wamalua yaʼia ero inötö si fao fanuturu lala moroi ba geheha niʼamoniʼö.”

20. Hadia nifaluada enaʼö möi fanoloda ”wangöna ba wasuwöta” andrö?

²⁰ Na olifu zaradadu wangogunaʼö fazambua wangönania irege lö telumöʼö mbotonia, daʼö ziföföna isuwö udunia. Na omasi ita telumöʼö, böi olifu ita wangogunaʼö fefu ’wangönada’. Taʼogunaʼö ia ero inötö ba tarorogö faböi tekiko. Lö tebulö fasuwö ita irugi tefakiko gulidanö nifatörö Zatana ba tehori Zatana hegöi malaʼikania ba gulidanö andre. (Famaʼeleʼö 12:17; 20:1-3) Andrö, na taforege wolawa isö-isö  dödö si fasala mazui falömoʼahonoada, böi awuwu ita!​—1 Korindro 9:27.

21. Hewisa enaʼö möna ita ba wasuwöta?

²¹ Na dali waʼabölöda, tebai talawa Gafökha. Hizaʼi, tola takalaisi ia börö wanolo Yehowa! Enaʼö lö tebulö waʼalöfaröida, böi taböhöli wangandrö khö Yehowa, tafahaʼö ita ba Daromalinia, ba fariawö ita khö ndra talifusöda. (Heberaiʼo 10:24, 25) Daʼa zanolo yaʼita wondrorogö faʼalöfaröida khö Lowalangi ba tefaʼanö ita wamaduhuʼö famatida.

22, 23. (a) Hana wa böi taböhöli wamaʼanö yaʼita ba wamaduhuʼö famatida? (b) Hadia nitutunöda ba faza aefa daʼa?

²² Moguna tafaduhuʼö wamatida ero inötö. (Yohane 15:19) Faböʼö sibai nifaduhusi tödö ndra Samaduhuʼö Yehowa moroi ba niha sato na so hadia ia zalua. Sofu khöu samösa, ’Hadia aboto ba dödögu hana wa ufaduhusi tödö daʼö? Hadia faduhu dödögu niwaʼö Zura Niʼamoniʼö hegöi sawuyu si lö faröi ba satua-tua? Hadia omuso dödögu me tobali ndraʼo Samaduhuʼö Yehowa? (Zinunö 34:3; Mataiʼo 10:32, 33) Hadia tola ututunö nifaduhusigu tödö ba niha böʼö?’​—Mataiʼo 24:45; Yohane 17:17; baso 1 Fetero 3:15.

²³ Ba ngawalö zalua, no aboto ba dödöda hadia zinangea tafalua enaʼö lö faböbö ita ba gulidanö. Hizaʼi, itaria so zambö aboto ba dödöda. Oya lala niʼogunaʼö Zatana ba wanandraigö yaʼita. Sambua lala niʼogunaʼönia yaʼia daʼö hiburan. Hewisa enaʼö tola tafili hiburan si fao faʼatua-tua? Datatutunö daʼö ba faza aefa daʼa.