1-3. (a) Hadia wamahaʼö moroi ba Gamaedola 13:20? (b) Hadia mbörö wa moguna atua-tua ita wamili si fahuwu khöda?

 HADIA no irai önehegö nono sawuyu samaigi-maigi satuania? Fatua lö iʼila fahuhuo, itöngöni hadia niʼila ba nirongonia. Me no ebua-bua ia, iʼoʼö nifalua ndra satuania hewaʼae lö iʼodödögö. Lö ahöli dödöda daʼö, niha satua manö tola ibörögö laʼangeragö ba laʼoʼö nifalua niha sasese fariawö khöra.

² Itutunö ba Gamaedola 13:20, ”Si fao-fao ba zatua-tua, ba atua-tua dania.” Ngawua wehede ”fao-fao ba” zi samösa niha, eluahania fariawö ia ba niha daʼö, tenga ha asala so ia ba zi so awönia. Imane samösa pakar Zura Niʼamoniʼö, na fao-fao ba zi samösa niha eluahania iʼomasiʼö ba ahatö ia ba niha daʼö. So lua-luania khöda na oya ginötöda fariawö ba niha böʼö, mendrua manö na ahatö sibai ita khöra.

³ Si fahuwu khöda andrö tola ladönisi ita ba zi sökhi mazui ba zi lö sökhi. Itohugö wangumaʼö ba Gamaedola 13:20, ”Si möi awö zi lö tödö, ba falukha wamunu.” Ba li Heberaiʼo, ngawua wehede ”si  möi awö” zi samösa niha eluahania lö tebulö ’fariawö’ ia ba niha daʼö, ba fahuwu ira. (Gamaedola 22:24; Zanguhuku 14:20) Si fahuwu khöda sangomasiʼö Lowalangi, lafarou ita enaʼö lö tebulö mamati khönia. Enaʼö atua-tua ita ba wamili si fahuwu khöda, datatutunö haniha nifili Yehowa tobali si fahuwu khönia.

4. Hana wa no töi sebua na tobali ita si fahuwu khö Lowalangi? Hadia mbörö wa ikaoni Gaberahamo Yehowa ’si fahuwu khögu’?

⁴ Yehowa, Fondrege Zalawa ba Mbanua si Yawa Awö Danö, itehegö fahuwu ita khönia. No sambua töi sebua daʼa. Ihaogö sibai Yehowa wamili si fahuwu khönia, yaʼia daʼö sangomasiʼö ba samati khönia. Duma-dumania Aberahamo. No ifaʼanö ia wamalua hadia niʼandrö Lowalangi. Asese iforomaʼö wa mamati ia ba moloʼö, töra-töra me itehegö nononia Izaʼaki tobali sumange. Mamati Gaberahamo wa ”tola isusugi Lowalangi nononia andrö moroi ba gotalua zi mate”. (Heberaiʼo 11:17-19; 1 Moze 22:1, 2, 9-13) Börö me moloʼö ba mamati Gaberahamo, ikaoni ia Yehowa ’si fahuwu khögu’.​—Yesaya 41:8; Yakobo 2:21-23.

5. Hewisa dödö Yehowa ba niha si lö faröi khönia?

⁵ Si fahuwu khö Yehowa andrö, no sebua böli ba dödönia. Abölö laʼameʼegö tödö waʼalöfaröira khönia moroi ba danö böʼö. (Baso 2 Zamueli 22:26.) Lö faröi ira ba moloʼö khö Lowalangi börö me laʼomasiʼö ia. Imane Sura Niʼamoniʼö wa ”fahuwu ia ba  zadölö tödö”, yaʼia daʼö soloʼö khönia. (Gamaedola 3:32) Ikaoni zi fahuwu khönia Yehowa enaʼö fatome ira ba ’nosenia’, lafosumange ia, ba mangandrö khönia gofu hawaʼara manö.​—Zinunö 15:1-5.

6. Hadia dandra wa taʼomasiʼö Yesu?

⁶ Imane Yesu, ”Niha sangomasiʼö yaʼo, iʼoʼö wehedegu. Iʼomasiʼö ia Amagu.” (Yohane 14:23) Enaʼö tobali ita si fahuwu khö Yehowa, moguna taʼomasiʼö Yesu ba tafalua zi no ifahaʼö khöda. Duma-dumania, taʼoʼö goroisa Yesu ba wanuriaigö turia somuso dödö hegöi ba wombaliʼö nifahaʼö fefu niha. (Mataiʼo 28:19, 20; Yohane 14:15, 21) Börö me taʼomasiʼö Yesu, ’tahaogö tatara lahenia’. (1 Fetero 2:21) Omuso dödö Yehowa na taforege woloʼö Ononia ba wehede hegöi ba nifaluada.

7. Hana wa moguna tatatugöi wa si fahuwu khöda andrö no si fahuwu khö Yehowa?

⁷ Si fahuwu khö Yehowa andrö niha samati, si lö faröi, soloʼö, ba sangomasiʼö Ononia. Hadia simane daʼö göi zi fahuwu khöda? Na laʼoʼö Yesu ba oya labeʼe ginötöra ba wamahaʼö niha sanandrösa ba Wamatörö Lowalangi, tola latolo ndraʼugö enaʼö itugu sökhi mbua-buau ba lö öbulöʼö waʼalöfaröimö khö Yehowa.

8. Hadia zadöni dödöu ba wahuwusa Ruti khö Naʼemi?

⁸ Ato zi fahuwu nitutunö ba Zura Niʼamoniʼö, simane Ruti khö ninania matuania sotöi Naʼemi. Faböʼö mbanua si tumbu ira hegöi waö-waö waʼaurira  ba zilalö, ba atua Naʼemi moroi khö Ruti. Hizaʼi, aro wahuwusara börö me faoma laʼomasiʼö Yehowa. Me edöna iröi mbanua Moabi Naʼemi ba mangawuli ia ba danö Gizaraʼeli, ”Ruti andrö, ba iʼolembai ia”. Imane khö Naʼemi, ”Iwau niwagu, ba Lowalangiu Lowalangigu.” (Ruti 1:14, 16) Sökhi sibai gamuata Ruti khö Naʼemi. Me larugi danö Gizaraʼeli, iforege wohalöwö Ruti ba wanolo si fahuwu khönia andrö. Simanö göi Naʼemi, iʼomasiʼö sibai Ruti ba ibeʼe mene-mene si sökhi. Iʼameʼegö tödö daʼö Ruti irege oya latema howu-howu.​—Ruti 3:6.

9. Hadia zadöni dödöu ba wahuwusa Dawido hegöi Yonata?

⁹ Duma-duma tanö böʼö yaʼia daʼö Dawido ba Yonata, sökhi wahuwusara ba lö faröi ira khö Yehowa. Mato 30 fakhe waʼalawa ndröfi Yonata moroi khö Dawido ba yaʼia göi zanohugö dadaoma waʼarazo ba ndraono Gizaraʼeli. (1 Zamueli 17:33; 31:2; 2 Zamueli 5:4) Me irongo Yonata wa Dawido nifili Yehowa tobali razo, lö fahulö ia mazui afökhö dödönia. Hizaʼi, iforege wotuhini Dawido. Duma-dumania, me teʼala Dawido, itolo ia Yonata ba ’wangabeʼeʼö dödönia khö Yehowa’. Itehegö nosonia ba wanolo Dawido. (1 Zamueli 23:16, 17) Si fahuwu si lö faröi göi Dawido. Ifabuʼu wa hasambalö ilumöʼö nösi nomo Yonata, ba ifalua daʼö hewaʼae no mate Yonata.​—1 Zamueli 18:1; 20:15-17, 30-34; 2 Zamueli 9:1-7.

10. Hadia wamahaʼö nihalöu moroi ba wahuwusa niha Heberaiʼo si datölu?

¹⁰ So datölu nono matua Heberaiʼo si fahuwu sotöi  Saderakhi, Mezakhi, ba Abedo-Nego, no muʼoloiʼö ira moroi ba nomora iʼotarai me ide-ide. Hewaʼae fandröndröu ira ba nösi nomora, faoma latolo nawöra enaʼö lö tebulö waʼalöfaröira khö Yehowa. Me ebua-ebua ira, tetandraigö wamatira me ifaretakö ira Razo Nebukanesa ba wamosumange adu anaʼa khönia. Lö lafalua daʼö ira Saderakhi, Mezakhi, ba Abedo-Nego ba lamane khö razo, ”Löʼö zui mafosumange lowalangimö, ba löʼö göi mangalulu ndraʼaga ba wamaedo niha andrö anaʼa, nifalauʼömö.” Me tetandraigö wamatira, lö faröi ira khö Lowalangira.​—Danieli 1:1-17; 3:12, 16-28.

11. Hezo taʼila wa sökhi wahuwusa Waulo hegöi Timoteo?

¹¹ Me falukha Waulo khö nono matua sotöi Timoteo, iʼila wa sangomasiʼö Yehowa Dimoteo ba iʼameʼegö tödö mbanua niha Keriso. Ifahaʼö Dimoteo andrö Faulo ba wanolo ira talifusö ba mbanua si faböʼö-böʼö. (Halöwö Zinenge 16:1-8; 17:10-14) Iforege wohalöwö Timoteo irege imane Faulo, ”Fao ndraʼaga wanuriaigö turia somuso dödö.” Iʼila Faulo wa ’soroi ba dödö Dimoteo woʼameʼegö tödö’ ira talifusö. Sökhi wahuwusara börö me falulu fohalöwö ira wangai halöwö khö Yehowa.​—Filifi 2:20-22; 1 Korindro 4:17.

12, 13. (a) Hana wa moguna taʼangenanöi wamili si fahuwu khöda, hewaʼae ba mbanua niha Keriso? (b) Hana wa ibeʼe wamangelama Faulo simane nisura ba 1 Korindro 15:33?

¹² Ba mbanua niha Keriso, tola tafahaʼö ita khö ndra talifusöda ba faoma tatolo nawöda enaʼö  lö faröi. (Baso Roma 1:11, 12.) Hizaʼi, moguna taʼangenanöi wamili si fahuwu khöda ba mbanua niha Keriso. Ahöli-höli dödöda börö me faböʼö-böʼö zi toʼölö lafalua ira talifusöda hegöi waö-waö waʼaurira ba zilalö. So zawena faböbö ba mbanua niha Keriso, ba so göi zi no ara mamosumange Yehowa. Moguna ginötö ba zi samösa niha enaʼö aro wahuwusania khö Yehowa, simane bua zinanö, lö i’anemai’ö asoso. Börö daʼö, moguna so khöda waʼebolo dödö, faoma taʼomasiʼö nawöda ba atua-tua ita wamili  si fahuwu khöda.​—Roma 14:1; 15:1; Heberaiʼo 5:12–6:3.

¹³ Itaria, so zalua ba mbanua niha Keriso si tebai taʼaohasi ba dödö, ba moguna taʼangenanöi. Duma-dumania, so ndra talifusöda samalua si fasala moloʼö Sura Niʼamoniʼö. Mazui, so zikökö-kökö irege fawuka mbanua niha Keriso. Lö tokea ita ba zimane daʼö börö me no irai alua daʼa ba mbanua niha Keriso me abad siföföna. Ifangelama niha Keriso andrö Faulo, ”Böi telimo ami. Ifakiko mbua-bua si sökhi fariawösa si lö sökhi.” (1 Korindro 15:12, 33) Ifangelama göi Dimoteo enaʼö iʼangenanöi haʼökhö fahuwu ia. Simanö göi ita ba ginötö andre.​—Baso 2 Timoteo 2:20-22.

14. Na tafili zi fahuwu khöda, hewisa wa molua-lua ia ba wahuwusada khö Yehowa?

¹⁴ Moguna tarorogö wahuwusada khö Yehowa börö me daʼa zabölö tohude niʼokhögöda. Andrö böi fariawö ita ba niha sowuwu famatida ba samakiko fahuwusada khönia. Hulö simane busa, na no muʼungugö ba nidanö si no ta’unö, tatu tebai tatötöna wa idanö sohahau nisisiönia. Simanö göi na fahuwu ita ba niha samalua sala, tebai tatötöna wa aoha khöda wamalua si sökhi. Moguna tahaogö tafili zi fahuwu khöda.​—1 Korindro 5:6; 2 Tesalonika 3:6, 7, 14.

15. Hadia nifaluau enaʼö ösöndra zi fahuwu khöu ba mbanua niha Keriso?

¹⁵ Ba mbanua niha Keriso, tola ösöndra niha sangomasiʼö Yehowa soroi ba dödö. Tola tobali ira si  fahuwu khöu. (Zinunö 133:1) Böi ha ba zi fagölö döfi khöu fahuwu ndraʼugö mazui ba zi fagölö waö-waö waʼauri khöu ba zilalö. Törö tödöu, alawa ndröfi Yonata moroi khö Dawido, ba awuyu-wuyu Ruti moroi khö Naʼemi. Omasi ita taʼoʼö mene-mene Zura Niʼamoniʼö, ”Miʼeboloʼö göi wamokai tödömi.” (2 Korindro 6:13; baso 1 Fetero 2:17.) Na öʼoʼö Yehowa, ato zomasi ahatö ba fahuwu khöu.

16, 17. Na so zangafökhöiʼö tödöda ba mbanua niha Keriso, hadia zi tebai tafalua?

¹⁶ Ba zi sambua omo, no faböʼö-böʼö gamuata, bua gera-era, hegöi lala wamalua hadia ia. Simanö göi ba mbanua niha Keriso. Adöni dödöda waʼafaböʼö-böʼö andre, ba tola tafahaʼö ita khö nawöda zamösana. Hizaʼi, tola manö faböʼö lala wangera-ngerada khö ndra talifusöda irege fatiti ita khöra. Lua-luania, abao dödöda mazui afökhö dödöda khöra. (Gamaedola 12:18) Hadia awuwu ita börö gabula dödö andrö mazui taröi mbanua niha Keriso?

¹⁷ Löʼö. Na so zangafökhöiʼö tödöda, lö taröi mbanua niha Keriso. Tenga Yehowa zangafökhöiʼö tödöda. Ibeʼe khöda waʼauri awö fefu hadia ia. Sinangea na taʼomasiʼö ia ba lö faröi khönia. (Famaʼeleʼö 4:11) Banua niha Keriso andrö buala moroi khö Yehowa, sanolo yaʼita enaʼö aro ba wamati. (Heberaiʼo 13:17) Lö tatimbagö mbualania andre ha börö me so zangafökhöiʼö tödöda.​—Baso Zinunö 119:165.

18. (a) Hadia zanolo yaʼita enaʼö sökhi wahuwusada khö ndra talifusöda? (b) Hadia mbörö wa moguna taʼefaʼö zala niha böʼö?

 ¹⁸ Taʼomasiʼö ndra talifusöda ba omasi ita na sökhi wahuwusada khöra. Lö itötöna ba niha Yehowa enaʼö moʼahonoa ira, ba simanö göi ita. (Gamaedola 17:9; 1 Fetero 4:8) Fefu ita tafalua zala, hizaʼi faʼomasi zanolo yaʼita ba ’wangefaʼö sala nawöda soroi ba dödö’. (Kolose 3:13) Faʼomasi zanaha yaʼita enaʼö lö taʼebuaʼö gabula dödö side-ide. Sindruhu sa, na so zangafökhöiʼö tödöda, abua khöda ba wangolifugö yaʼia. Tola manö alio mofönu ita ba fahöʼö khönia. Hizaʼi, alangu dödöda ba lö tasöndra waʼowua-wua dödö. Na taʼefaʼö zala niha sangafökhöiʼö tödöda, ohahau dödöda ba so wahasara dödö ba mbanua niha Keriso. Ba sabölö moguna, sökhi wahuwusada khö Yehowa.​—Mataiʼo 6:14, 15; Luka 17:3, 4; Roma 14:19.

19. Hawaʼara tabato fariawö ba zi samösa niha ba mbanua niha Keriso?

¹⁹ Ba nösi nomo safönu faʼomasi, lafalua gofu hadia manö ba wangomusoiʼö tödö nawöra zamösana. Ba hewisa na so zamadaö? Laforege ira ösi nomonia ba wanolo yaʼia, hizaʼi itimbagö wanolo andrö. Te ihalö gangetula ba wondröi omo, mazui högö yomo ba nomo andrö zamofanö yaʼia. Tola alua zimane daʼö ba mbanua niha Keriso. Te so zamalua si fatuwu khö Yehowa ba samakiko banua niha Keriso. Itimbagö wanolo ba iforomaʼö ba gamuatania wa lö omasi ia saʼae faböbö ba mbanua niha Keriso.  Te ihalö gangetula ba wondröi banua niha Keriso, mazui hasambalö muʼefasi ia. Na alua zimane daʼö, iʼoʼou ita Sura Niʼamoniʼö enaʼö ”lö fariawö” khönia. (Baso 1 Korindro 5:11-13; 2 Yohane 9-11) Abua wamalua daʼa, mendrua manö na si fahuwu khöda ia mazui ösi nomoda. Hizaʼi, abölö moguna na taʼaroʼö waʼalöfaröida khö Yehowa moroi ba waʼalöfaröida ba niha andrö.​—Faigi Gonönöta 8.

20, 21. (a) Hana wa no sambua tandra faʼomasi na so niʼefasi ba mbanua niha Keriso? (b) Hana wa moguna atua-tua ita wamili si fahuwu khöda?

²⁰ Na so niʼefasi ba mbanua niha Keriso, no sambua amakhoita safönu faʼomasi daʼö moroi khö Yehowa. Telumöʼö mbanua niha Keriso moroi ba niha si lö moloʼö goi-goi Yehowa. (1 Korindro 5:7; Heberaiʼo 12:15, 16) Daʼa zanolo yaʼita wangoromaʼö faʼomasida ba döi Yehowa niʼamoniʼö, ba goi-goinia salawa, hegöi faʼomasida khönia. (1 Fetero 1:15, 16) No sambua tandra faʼomasi daʼa ba niha si no laʼefasi ba mbanua niha Keriso. Fotu sabeʼe andre zanolo yaʼia enaʼö aboto ba dödönia wa fasala nifaluania irege terou dödönia wamalalini era-erania. Ato zi no laʼefasi ba mbanua niha Keriso, ba gafuriatania mangawuli ira khö Yehowa ba latema ira si fao faʼomuso dödö.​—Heberaiʼo 12:11.

²¹ Gofu hewisa lalania, so lua-luania khöda na fahuwu ita ba niha böʼö. Andrö wa moguna tahaogö wamili si fahuwu khöda. Na taʼomasiʼö niha sangomasiʼö Yehowa, so ita ba gotalua niha sanolo yaʼita enaʼö lö faröi khönia sagötö faʼara.