1. Hadia nifaluada enaʼö taʼila wa fatema khö Yehowa wamosumange nibeʼeda, ba hadia mbörö?

 IMANE Yesu, ”Dozi samosumange sindruhu lafosumange Nama moloʼö fanuturu lala geheha niʼamoniʼö ba tefaudu ba zindruhu, börö me iʼalui Ama niha samosumange yaʼia simane daʼö.” (Yohane 4:23; 6:44) Dozi ita moguna ʼtatimba tödöda hadia zomasi Zoʼayaʼ. (Efeso 5:10) Lö aoha-aoha manö daʼa. Itandraigö Satana wamaelungu yaʼita irege tafalua hadia ia zi lö fatema khö Yehowa.​—Famaʼeleʼö 12:9.

2. Tutunö zalua ahatö ba Hili Zinaʼi.

² Hewisa wamaelungu Satana ita? Sambua lala yaʼia daʼö ibusi dödöda ba wamili hezo zatulö hegöi si lö atulö. Nehegö zalua ba ndraono Gizaraʼeli me molombase ira ahatö ba Hili Zinaʼi. No möi Moze ba hili, ba labalo-baloi wangawulinia. Hizaʼi, aföli ira wombaloi ba laʼandrö khö Gaʼaroni enaʼö ifazökhi khöra lowalangi. Ihaogö Aʼaroni nadu anaʼa famaedo nono zawi. Aefa daʼö, lafalua gowasa. Lafasui nono zawi andrö wanari ba latuhi danö fönania. Faduhu dödöra wa no lafalua wamosumange sindruhu khö Yehowa me latuhi danö föna nono zawi andrö. Hewaʼae lawaʼö iraono Gizaraʼeli wa daʼa ”gowasa khö Yehowa”, lö atulö nifaluara.  No famosumange adu nifaluara andrö moloʼö Yehowa, irege ato ba gotaluara zi mate. (2 Moze 32:1-6, 10, 28) Hadia wamahaʼönia? Böi tehegö telimo ndraʼugö. ʼBöi babaya hadia ia zi taʼunöʼ, ba tehegö khö Yehowa wamahaʼö yaʼugö sanandrösa ba zatulö hegöi si lö atulö.​—Yesaya 52:11; Hezekieli 44:23; Galatia 5:9.

3, 4. Hana wa sökhi na tafareso hezo iʼotarai gowasa si tehöngö sasese lafalua niha?

³ Me so Yesu ba gulidanö, ifahaʼö ndra sinengenia enaʼö tobali ira duma-duma ba wamalua famosumange sohau-hau. Me no mate ia, lö laböhöli ira sinenge wamahaʼö goi-goi Yehowa ba niha sawena tefahaʼö. Hizaʼi, me no mate ndra sinenge, ibörögö so zamahaʼö sofaya ba mbanua niha Keriso sameʼe bua gera-era si fasala, famahaʼö niha baero, hegöi ngawalö gowasa. Lafaböʼöni ösa döi gowasa niha baero andrö enaʼö hulö gowasa niha Keriso. (2 Tesalonika 2:7, 10; 2 Yohane 6, 7) Oya gowasa andre si lö tebulö lafalua irugi mane maʼökhö, ba latutunö wamahaʼö faya, töra-töra zoʼamakhaita ba mbekhu. *—Famaʼeleʼö 18:2-4, 23.

⁴ Ba zi sagörö ulidanö iadaʼa, moguna sibai ba niha wamalua owasa hegöi ngaluo sebua. Hizaʼi, na öfahaʼö ndraʼugö hewisa lala wamaigi Yehowa, te öʼila wa moguna öbulöʼö gera-eramö sanandrösa ba zi hauga ngawalö gowasa. Tola manö abua daʼa, hizaʼi moguna faduhu dödömö wa hasambalö itoloʼö Yehowa. Datafareso hezo moroi mböröta gowasa si tehöngö lafalua niha andrö enaʼö aboto ba dödöda lala wamaigi Yehowa.

5. Hadia dandra wa tenga me 25 mbaŵa si Felendrua tumbu Yesu?

⁵ Ba zi sagörö ulidanö, mufalua Wanunu Fandru ero 25 mbaŵa si Felendrua, börö me ato zangumaʼö wa daʼö mbaŵa waʼatumbu Yesu. Lö niʼombakhaʼö Zura Niʼamoniʼö khöda hari hadia mazui baŵa si hauga tumbu Yesu, hizaʼi so sambua dandra niforomaʼönia sanandrösa ba zalua ero röfi. Isura Luka wa ”so ndra kubalo si toröi ba mbenua” sanarogö ngawawa mbiri-birira me tumbu Yesu ba Mbetilekhema. (Luka 2:8-11) Baŵa si Felendrua andrö baŵa deu ba Mbetilekhema, okafu, ba afönu salju, ba tebai latarogö ba mbenua ngawawa mbiri-birira ira kubalo na ba zi bongi. Hadia wamahaʼönia khöda? Tumbu Yesu me baŵa lökhö, tenga me baŵa si Felendrua. Moloʼö Sura Niʼamoniʼö hegöi waö-waö salua, tumbu ia talu mbaŵa si Siwa ba si Fulu niʼilada iadaʼa.

6, 7. (a) Hezo iʼotarai zi toʼölö mufalua ba Wanunu Fandru? (b) Hana wa mamuala ita?

⁶ Na simanö, hezo iʼotarai Wanunu Fandru? Yaʼia daʼö ba gowasa nifalua niha baero, simane owasa Saturnalia, nifalua niha Romawi khö Saturnus, dewa pertanian. Imane The Encyclopedia Americana, ”Saturnalia andre owasa nifalua niha Romawi ba dalu mbaŵa si Felendrua, si tobali duma-duma ba wangowasaini Fanunu Fandru. Duma-dumania, oya manö lala halöwö ba gowasa andrö, mamuala niha, ba latunu lili.” Baero daʼö, laʼowasaini göi mbaŵa waʼatumbu dewa matahari Mitra moroi ba Persia na 25 mbaŵa si Felendrua.

⁷ Hewaʼae simanö, ato zi lö mangila iadaʼa wa Fanunu  Fandru andrö owasa niha baero. Moloʼö yaʼira, daʼö ginötö wefao ba nösi nomo, femanga gö sami, hegöi fameʼe buala. Tatu manö, taʼomasiʼö nösi nomoda hegöi si fahuwu khöda, ba omasi Yehowa na faoma mamuala nono mbanuania. Imane 2 Korindro 9:7, ”Sameʼe si fao faʼomuso dödö, daʼö sa zomasi Lowalangi.” Lö omasi Yehowa na mamuala ita ba niha böʼö ha na ba mbaŵa si sökhi. Owua-wua dödö nono mbanua Yehowa wefao ba nösi nomora awö zi fahuwu khöra gofu hawaʼara manö, ba omasi ira mamuala, lö  latötöna zulö. Mamuala ira börö me laʼomasiʼö niha böʼö.​—Luka 14:12-14.

8. Hadia no labeʼe mbuala me awena tumbu Yesu ira sanahö döfi? Tutunö.

⁸ Enaʼö aro mbua gera-erara sanandrösa ba wameʼe buala na Fanunu Fandru, ato zangumaʼö wa so datölu ndra matua satua-tua samuala khö Yesu me tumbu ia ba luha. Sindruhu sa wa so ndra matua si möi mamaigi Yesu ba sameʼe buala. Me götö Zura Niʼamoniʼö, no si toʼölö na labeʼe mbuala ba niha si tohude. (1 Razo 10:1, 2, 10, 13) Hizaʼi, hadia öʼila wa ira matua andrö sanahö döfi, si fakelemu ba si lö mamosumange Yehowa simane nitutunö Zura Niʼamoniʼö? Baero daʼö, lö si möi ira mamaigi Yesu me awena tumbu ia ba luha. Awena sa möi ira me ’ono side-ide ia’, me no toröi ia ba nomo.​—Mataiʼo 2:1, 2, 11.

9. Hadia niʼilada ba wangowasaini baŵa waʼatumbu nisura ba Zura Niʼamoniʼö?

⁹ No sambua faʼomuso dödö na no tumbu nono sawuyu. (Zinunö 127:3) Hizaʼi, tenga daʼö geluahania wa moguna taʼowasaini mbaŵa waʼatumbu. Angeragö atö daʼa: Ba Zura Niʼamoniʼö, ha darua zangowasaini baŵa waʼatumbu. Si oföna, niha Miserai sotöi Faraʼo, ba si dua Razo Herode Atifasi. (Baso 1 Moze 40:20-22; Mareko 6:21-29.) Tenga ono mbanua Yehowa ndra samatörö andre. Lö irai tabaso ba Zura Niʼamoniʼö wa so nono mbanua Yehowa sangowasaini baŵa waʼatumbu.

10. Hewisa wamaigi niha Keriso siföföna fangowasaini baŵa waʼatumbu?

¹⁰ Imane The World Book Encyclopedia wa moloʼö  niha Keriso siföföna, ”fangowasaini baŵa waʼatumbu si samösa niha andrö no si toʼölö lafalua niha baero”. Teʼodane-dane zi toʼölö lafalua andrö ba agama sofaya. Duma-dumania, faduhu dödö niha Yunani me föna wa so malaʼika solumöʼö si samösa niha si fao khönia iʼotarai me tumbu. Ba moloʼö yaʼira, so gamakhaita malaʼika andrö khö lowalangi böʼö si fagölö baŵa waʼatumbu ba niha andrö. Baero daʼö, fangowasaini baŵa waʼatumbu andrö moʼamakhaita ia ba wanahö döfi hegöi horoskop.

11. Hewisa dödö Yehowa na oböwö ita?

¹¹ Moloʼö niha sato, baŵa waʼatumbura andrö no ngaluo sabölö sökhi, ba sinangea na laʼameʼegö tödö ba laʼomasiʼö ira. Hizaʼi, tola taforomaʼö waʼomasida ba nösi nomo hegöi si fahuwu khöda ero inötö, tenga dali so ngaluo nitatugöi. Omasi Yehowa na sökhi gamuatada ba oböwö ita sandrohu faʼara. (Baso Halöwö Zinenge 20:35.) Tola taʼandrö saohagölö khönia ero maʼökhö ba mbuala faʼauri sahöli-höli dödö nibeʼenia, tenga ha na inötö baŵa waʼatumbu.​—Zinunö 8:4, 5; 36:10.

12. Hana wa abölö sökhi mbaŵa waʼamate moroi ba mbaŵa waʼatumbuda?

¹² Imane Zangombakha 7:1, ”Sökhi döi si sökhi, moroi ba wanikha [famayoini] si sökhi, ba sökhi mbaŵa waʼamate, moroi ba mbaŵa waʼatumbu.” Hana wa abölö sökhi mbaŵa waʼamate moroi ba mbaŵa waʼatumbuda? Me tumbu ita, lö hadöi si tola tafalua, he si sökhi mazui si lö sökhi. Hizaʼi, me no taʼogunaʼö waʼaurida ba wamosumange Yehowa ba tafalua zi sökhi ba niha böʼö, no tafazökhi ”döi si sökhi”, ba lö olifu Yehowa khöda hewaʼae no mate ita. (Yobi 14:14, 15) Lö laʼowasaini mbaŵa waʼatumbura ono mbanua Yehowa  mazui baŵa waʼatumbu Yesu. Hizaʼi, no iʼandrö khöda Yesu ba wamalua Fanörö Tödö faʼamatenia.​—Luka 22:17-20; Heberaiʼo 1:3, 4.

13, 14. Hezo moʼamakhaita Gowasa Fasa?

¹³ Ato zi faduhu tödö wa no laʼowasaini wanusugi Yesu me lafalua Gowasa Fasa. Sindruhunia, moʼamakhaita  Gowasa Fasa andre khö Eostre, dewi fajar hegöi dewi musim semi ba niha Anglo-Saxon. Itutunö The Dictionary of Mythology wa lafotöi göi ia dewi kesuburan. So ösa zi toʼölö mufalua ba Gowasa Fasa soʼamakhaita ba daʼa. Duma-dumania, sanandrösa ba gadulo, ”laʼamaedolagö daʼö faʼauri si bohou hegöi fanusugi”, iwaʼö Encyclopædia Britannica. Baero daʼö, no ara laʼogunaʼö kelinci ba woʼamaedolagö faʼatabö ba agama niha baero. Moroi ba daʼa taʼila wa lö moʼamakhaita Gowasa Fasa ba wanusugi Yesu.

¹⁴ Hadia fatema ba dödö Yehowa na mufalua zi toʼölö ba agama sofaya andrö ba wanörö tödö fanusugi Nononia? Tatu manö löʼö. (2 Korindro 6:17, 18) Sindruhunia, lö niʼandrö Yehowa khöda ba wangowasaini fanusugi Yesu.

15. Hezo moroi mböröta wangowasaini Bongi Wabalisa Ndröfi hegöi Döfi si Bohou?

¹⁵ Hewaʼae faböʼö-böʼö nifalua ba ngawalö soi, no si toʼölö ba mbanua misa na lö mörö niha irugi talu mbongi ero 31 mbaŵa si Felendrua ba ”wamaigi fabalisa ndröfi”. Sasesenia na bongi daʼö, owulo niha, laduhugö wamadu tuo, mohorö ira, mamuala, ba lafabuʼu wamohouni yaʼira ba ndröfi si bohou. Si toʼölö lafalua ba ginötö andre moʼamakhaita ba gowasa niha baero. Ba ngaluo daʼö, latunu kembang api ba wamofanö bekhu. Imane buku World Book Encyclopedia 1966, Jilid 14, ngaʼörö 237, ”Ba mbanua Roma me föna, laʼogunaʼö ngaluo siföföna ba ndröfi daʼö ba wamosumange Yanus, lowalangi bawa göli hegöi bawandruhö, ba famobörö awö gafuriata. . . . Laʼamoniʼö  Ndröfi si Bohou ba Gereja Kristen me döfi 487 M, me labaliʼö daʼö Gowasa Fosuna. Ba wamobörö, lö latehegö laʼowasaini ngaluo daʼa börö me no laʼoʼö zi toʼölö andrö ira niha baero. Hizaʼi, tebulö daʼö ba gafuriata ba tola laʼowasaini mangawuli.”

16, 17. Hadia zinangea taʼangeragö na edöna mangowalu ita?

¹⁶ Inötö walöwa no ngaluo si sökhi. Faböʼö-böʼö wamalua yaʼia ba zi sagörö ulidanö. Sasesenia, lö laʼangeragö niha hezo moroi zi toʼölö mufalua ba walöwa, andrö wa lö aboto ba dödöra wa so ösa zi otarai ba agama niha baero. Hizaʼi, niha Keriso sedöna mamalua falöwa, omasi ira na tefaudu ba zomasi Yehowa nifaluara. Na laʼila hezo iʼotarai zi toʼölö mufalua ba walöwa, tola lahalö gangetula si sökhi sanandrösa ba daʼö.​—Mareko 10:6-9.

¹⁷ Faduhu dödö niha wa so ösa zi toʼölö mufalua ba walöwa solohe harazaki ba zi bohou mangowalu. (Yesaya 65:11) Duma-dumania, ba mbanua böʼö misa, so zamazawili böra mazui si fakhili-khili ba daʼö khö niʼowalu hegöi marafule. Na lafalua daʼö, faduhu dödöra wa mongaʼötö ira dania, omuso dödöra, anau nosora, ba telumöʼö ira moroi ba zi lö sökhi. Hizaʼi, moguna mangelama niha Keriso enaʼö latimbagö zi toʼölö lafalua ba agama sofaya andrö.​—Baso 2 Korindro 6:14-18.

18. Hadia goi-goi tanö böʼö ba Zura Niʼamoniʼö sinangea muʼoʼö na mufalua walöwa?

¹⁸ Niha Keriso sedöna mangowalu, omasi ira na owua-wua dödöra, moadu walöwara, ba omuso dödö zangondrasi. Si möi ba walöwa andrö, tebai ibeʼe wehede  sambö tefaudu, soʼamakhaita ba waʼorudu, mazui fehede sangailasi marafule hegöi niʼowalu mazui niha böʼö. (Gamaedola 26:18, 19; Luka 6:31; 10:27) Lö lafalua walöwa ira niha Keriso ha ba ’wohöni-höni okhöta’. (1 Yohane 2:16) Na edöna mangowalu ndraʼugö, moguna öʼangeragö enaʼö tobali ngaluo faʼomuso dödö daʼö me sauli itörö tödöu dania.​—Faigi Gonönöta 28.

19, 20. Hezo moroi mböröta wamatiti galasi?

¹⁹ Sasese sibai lafalua ba walöwa mazui ba gowasa böʼö yaʼia daʼö famatiti galasi. Na lafatiti galasira niha, so samösa zanutunö wa itötöna zi sökhi ba tanö böʼö lafazawa galasira. Hewisa zinangeania wamaigi niha Keriso daʼa?

²⁰ Itutunö International Handbook on Alcohol and Culture wa böröta wamatiti galasi andre te moroi ba zi toʼölö lafalua ira niha baero me föna ”ba wameʼe idanö niʼamoniʼö khö lowalangira”. Lafalua daʼa ”ba wamulöʼö fanötönara, fangandrö simane ’yaʼanau nosou!’ mazui ʼyalömofökhöʼö!ʼ” Me götö föna, lafazawa galasira niha ba wangandrö howu-howu khö lowalangira. Hizaʼi, tenga simane daʼö wameʼe Yehowa howu-howu.​—Yohane 14:6; 16:23.

21. Hadia manö gowasa sinangea latimbagö ira niha Keriso?

²¹ Na öhalö gangetula hadia faoʼö ba ngawalö gowasa mazui löʼö, angeragö gamuata hegöi bua-bua sasese laforomaʼö. Duma-dumania, so wanari samatumbuʼö  isö-isö dödö ba wohorö, famadu-madu tuo, hegöi fohorö-horö ba zi hauga ngawalö gowasa hegöi karnaval. So göi gowasa sohöni-höni faʼauri ndra matua sorudu ba ndra matua hegöi ira alawe sorudu ba ndra alawe, mazui sohöni-höni soira. Na fao ita ba gowasa simane daʼa, hadia sindruhu-ndruhu no taʼogorofi niʼogorofi Yehowa?​—Zinunö 1:1, 2; 97:10; 119:37.

22. Na so niha Keriso sedöna fao ba zi sambua owasa, hadia zanolo yaʼia ba wangai angetula?

²² Moguna mangelama niha Keriso enaʼö latimbagö ngawalö gowasa si lö mamosumange Lowalangi. Isura sinenge sotöi Faulo, ”He si manga ami mazui samadu ba gofu hadia nifaluami, mifalua ia ba wamolakhömi Lowalangi.” (1 Korindro 10:31; faigi Gonönöta 29.) Tatu manö, lö fefu gowasa moʼamakhaita ba gamuata wohorö, agama sofaya, mazui fohöni-höni soi. Na so gowasa si lö fatimba ba goi-goi Zura Niʼamoniʼö, moguna tahalö samösa gangetula hadia fao ita ba gowasa andrö mazui löʼö. Taʼangeragö hadia lua-lua gangetula nihalöda ba niha böʼö.

23, 24. Hewisa lalada wanutunö angetulada ba nösi nomoda si tenga Samaduhuʼö sanandrösa ba ngawalö gowasa?

²³ Tola manö öböhöli wefao ba ngawalö gowasa si lö mamosumange Yehowa. Hizaʼi, te so ösa ba gotalua nösi nomou si tenga Samaduhuʼö Yehowa sangumaʼö wa lö öʼomasiʼö ira mazui no öbato wefao khöra. Tola manö lamane tödöra wa ngaluo sebua andrö no inötö wefao ba nösi nomo. Na simanö, hadia nifaluau? Oya  lala si tola öfalua ba wamaduhuʼö khöra wa öʼomasiʼö ira ba moguna sibai ira khöu. (Gamaedola 11:25; Zangombakha 3:12, 13) Tola fao ndraʼugö khöra ba ngaluo böʼö.

²⁴ Na so zi fahatö khöu somasi mangila hana wa lö faoʼö khöra na so ngaluo sebua niʼowasainira, tola öforomaʼö wanema li moroi ba publikasida hegöi jw.org sanolo yaʼugö ba wanutunö khöra. Angenanöi faböi tumbu ba dödöra wangumaʼö wa öforege enaʼö möna ndraʼugö fadaʼawa mazui öfaso ira enaʼö lafagölösi gera-erara khöu. Tolo nösi nomou enaʼö aboto ba dödöra wa oya nifatimbaisiu ba yaʼugö samösa zangai angetula. Haogö gamuatau, ba ”böi tebulö khömi wangehaogö fehedemi nilau asio, enaʼö sökhi wamondrongo”.​—Kolose 4:6.

25, 26. Hewisa zatua wanolo iraonora ba wangomasiʼö amakhoita Yehowa?

²⁵ Moguna aboto ba dödöda hadia mbörö wa tebai fao ita ba ngawalö gowasa. (Heberaiʼo 5:14) Ohitö dödöda yaʼia daʼö ba wangomusoiʼö tödö Yehowa. Na satua ita, moguna tabeʼe ginötöda ba wanolo iraonoda enaʼö aboto ba dödöra ba laʼomasiʼö goi-goi Zura Niʼamoniʼö. Na sindruhu-ndruhu faduhu dödöra wa so Yehowa, hasambalö laʼomusoiʼö göi dödönia.​—Yesaya 48:17, 18; 1 Fetero 3:15.

²⁶ Omuso dödö Yehowa me iʼila taforege wamosumange yaʼia ba lala sohau-hau ba tatörö zindruhu. (Yohane 4:23) Hizaʼi, ato zangumaʼö wa lö hadöi niha sanörö sindruhu soroi ba dödö ba gulidanö safönu falimosa andre. Hadia atulö daʼö? Datatutunö ia ba faza aefa daʼa.