1, 2. Hadia mbörö wa öʼomasiʼö Lowalangi Yehowa?

 HADIA öʼomasiʼö Lowalangi? Na no ölulu waʼaurimö khönia, daʼö dandra wa öʼomasiʼö sibai ia. Te örasoi wa si Fahuwu si sökhi ia khöu. Hizaʼi, fatua lö öʼomasiʼö Yehowa, no oföna iʼomasiʼö ndraʼugö. Imane Sura Niʼamoniʼö, ”Taʼomasiʼö Lowalangi börö me no oföna iʼomasiʼö ita.”​—1 Yohane 4:19.

² Angeragö ngawalö lala niʼogunaʼö Yehowa ba wangoromaʼö faʼomasinia. Ibeʼe khöda gulidanö si tobali omo si sökhi hegöi ngawalö zoguna enaʼö owua-wua dödöda. (Mataiʼo 5:43-48; Famaʼeleʼö 4:11) Omasi ia na sökhi wahuwusada khönia, ba itehegö tafahaʼö ita sanandrösa khönia. Na tabaso Zura Niʼamoniʼö, tafondrondrongo li Yehowa. Ba na mangandrö ita, ifondrondrongo khöda. (Zinunö 65:3) Iʼogunaʼö geheha niʼamoniʼö ba wanuturu lalada hegöi ba wangabölöʼö yaʼita. (Luka 11:13) Ifatenge göi ba gulidanö Nono niʼomasiʼönia ba wangefaʼö yaʼita ba horö ba faʼamate.​—Baso Yohane 3:16; Roma 5:8.

3. Hewisa enaʼö sökhi wahuwusada khö Yehowa?

 ³ Angeragö atö samösa zi fahuwu khöu si lö faröi ba ginötö waʼomuso dödö hegöi faʼabu dödö. Moguna miforege enaʼö aro wahuwusami. Simanö göi wahuwusada khö Yehowa, si Fahuwu fondrege zi sökhi si tola taʼokhögö. Aro wahuwusada khönia lö tebulö sagötö faʼara. Imane Sura Niʼamoniʼö, ”Enaʼö ba lumö waʼomasi Lowalangi so ami.” (Yuda 21) Hewisa wamaluada daʼa? Ibeʼe wanema li Sura Niʼamoniʼö, ”Daʼa dandra wa taʼomasiʼö Lowalangi na taʼoʼö goroisania, ba tenga safökhö woloʼö oroisania.”​—1 Yohane 5:3

4, 5. (a) Hadia geluahania ”taʼomasiʼö Lowalangi”? (b) Hewisa wa tola tumbu waʼomasiu khö Yehowa?

⁴ Hadia geluahania me imane Sura Niʼamoniʼö ”taʼomasiʼö Lowalangi”? Eluahania tenga manandrösa ba waʼomasi Lowalangi khöda, hizaʼi faʼomasida khönia. Hadia lö olifuʼö me ibörögö tumbu waʼomasiu khö Yehowa?

⁵ Törö tödöu me awena öʼila wa omasi Yehowa na auri ndraʼugö sagötö faʼara ba gulidanö si bohou. Öfahaʼö ndraʼugö fefu nifaluania ba wangoʼozui ohitö dödönia, ba aboto ba dödöu wa no ibeʼe khöda mbuala sebua böli me ifatenge Nononia si ha samösa ba gulidanö. (Mataiʼo 20:28; Yohane 8:29; Roma 5:12, 18) Me öfahaʼö ndraʼugö hawaʼebua waʼomasi Yehowa khöu, tatu terou dödöu, ba tumbu waʼomasiu khönia.​—Baso 1 Yohane 4:9, 10.

6. Hadia zi farahu na taʼomasiʼö niha? Hadia zi no öfalua börö me öʼomasiʼö Lowalangi?

⁶ Hizaʼi, faʼomasiu khö Lowalangi andrö awena  famobörö. Duma-dumania, na taʼomasiʼö zi samösa niha, tenga ha asala tamane ”omasido khöu”. Faʼomasi zamarou tödöda wamalua hadia ia si tola mangomusoiʼö tödönia. Simanö göi na öʼomasiʼö Yehowa, terou dödöu ba wamaudugö faʼauriu ba lala somasi ia. Na no tumbu waʼomasiu khönia, öhalö gangetula ba wolulu faʼaurimö ba tebayagö ndraʼugö idanö. Na öfalua daʼö, no öfabuʼu wa öfosumange Yehowa sagötö faʼara. (Baso Roma 14:7, 8.) Hewisa enaʼö tola öfalua zi no öfabuʼu andrö?

7. Hadia nifaluada na taʼomasiʼö Yehowa? Hadia manö goroisania andrö?

⁷ Börö me taʼomasiʼö Yehowa, ”taʼoʼö goroisania”. Hewisa wamaluada daʼö? Tafondrondrongo niwaʼönia. Ba Zura Niʼamoniʼö, taʼila hadia zomasi Yehowa enaʼö tafalua ba waʼaurida. Duma-dumania, iʼombakhaʼö khöda wa fasala na mabu ita, managö, falimo, na tafalua waʼorudu fatua lö sangowalu ita, mazui na tafosumange niha ba tanö böʼönia töra moroi ba wamosumangeda yaʼia.​—1 Korindro 5:11; 6:18; 10:14; Efeso 4:28; Kolose 3:9.

8, 9. Na lö nitatugöi Zura Niʼamoniʼö hadia goroisa si tefaudu ba zalua khöda, hewisa wa taʼila hadia zomasi Yehowa tafalua? Beʼe duma-duma.

⁸ Ba wangomusoiʼö tödö Yehowa, lö ibönö na ha asala taʼoʼö fefu goroisania. Lö ibeʼe khöda goroisa soya sibai si tola taʼogunaʼö ba ngawalö zalua ba waʼaurida. Tola manö lö nizara-zara Zura Niʼamoniʼö hadia sibai zinangea tafalua. Hewisa enaʼö tahalö gangetula si sökhi? (Efeso 5:17) Tasöndra goi-goinia  ba Zura Niʼamoniʼö, yaʼia daʼö dane-dane zindruhu si tola mamahaʼö yaʼita hewisa wamaigi Yehowa ngawalö hadia ia. Na tabaso Zura Niʼamoniʼö, aboto ba dödöda haniha Yehowa. Tafahaʼö ita lala wangera-ngerania, he somasi ia, hegöi si fatuwu khönia.​—Baso Zinunö 97:10; Gamaedola 6:16-19; faigi Gonönöta 1.

⁹ Duma-dumania, hewisa wotatugöida hadia zinangea tafaigi ba TV mazui ba Internet? Lö nifatunö Yehowa hadia sibai zinangea tafalua. Hizaʼi, goi-goi nibeʼenia andrö zanolo yaʼita ba wangai angetula si sökhi. Iadaʼa, oya sibai hiburan safönu faʼalösökhi ba fohorö. Iʼombakhaʼö khöda Yehowa ba Zura Niʼamoniʼö wa ’iʼogorofi tödönia zomasi mamakao awönia’ ba yaʼia ”zanguhuku niha sohorö”. (Zinunö 11:5; Heberaiʼo 13:4) Hewisa goi-goi andre möi fanoloda ba wangai angetula si sökhi? Na no aboto ba dödöda hadia manö niʼogorofi Yehowa mazui imane tödönia wa amuata wohorö daʼö, lö tola löʼö tatimbagö.

10, 11. Hadia mbörö wa taʼoʼö li Yehowa?

¹⁰ Hana wa taʼoʼö li Yehowa? Tenga ha enaʼö lö tehuku ita mazui faböi göna ita abula dödö börö gangetula si fasala. (Galatia 6:7) Hizaʼi, taʼoʼö li Yehowa börö me taʼomasiʼö ia. Hulö simane iraono somasi mangomusoiʼö tödö namara, simanö göi ita, omasi ita taʼomusoiʼö dödö Namada si so ba zorugo. Lö hadöi sabölö sökhi baero na taʼila wa omuso dödö Yehowa ba nifaluada!​—Zinunö 5:13; Gamaedola 12:2; faigi Gonönöta 2.

¹¹ Taʼoʼö li Yehowa tenga ha ba ginötö aoha  wamalua yaʼia mazui na lö hadöi saʼae tanö böʼö si tola tafili. Ba lö tafili-fili hadia goroisa awö goi-goinia somasi ita taʼoʼö ba si lö omasi ita. (5 Moze 13:1) Hizaʼi, soroi ba dödöda woloʼö yaʼia simane niwaʼö sanura buku Zinunö, ”Ubeʼe faʼomuso dödögu goroisamö andrö, somasi ndraʼo saʼae.” (Zinunö 119:47; Roma 6:17) Omasi ita taʼoʼö duma-duma Noakhi sangoromaʼö faʼomasinia khö Yehowa me ifalua fefu goroisa Yehowa. Imane Sura Niʼamoniʼö wa ”iʼoʼö sibai” Noakhi. (1 Moze 6:22) Hadia omasi ndraʼugö na iwaʼö göi zimane daʼö khöu Yehowa?

12. Hewisa enaʼö tola taʼomusoiʼö dödö Yehowa?

¹² Hewisa dödö Yehowa na taʼoʼö ia? ’Omuso dödönia.’ (Gamaedola 11:20; 27:11) Angeragö atö! No taʼomusoiʼö dödö Zamazökhi banua si yawa awö danö na taʼoʼö linia. Hizaʼi, lö irai ifaso ita wamalua daʼö. Itehegö khöda tafili hadia zomasi ita tafalua. Eluahania, tola tafili wamalua satulö mazui si lö atulö. Itötöna Yehowa enaʼö faʼomasida khönia andrö zamarou tödöda wangai angetula si sökhi irege mofozu waʼaurida.​—5 Moze 30:15, 16, 19, 20; faigi Gonönöta 3.

13, 14. Hezo taʼila wa lö abua woloʼö oroisa Yehowa? Beʼe duma-duma.

¹³ Hewisa na imane tödöda wa abua sibai woloʼö oroisa Yehowa andrö, mazui tebai saʼae tafili hadia zomasi ita tafalua börö goroisania andrö? No ihaogö itutunö Sura Niʼamoniʼö, ”Tenga safökhö woloʼö oroisania.” (1 Yohane 5:3) Ngawua wehede ”safökhö” ba li Yunani eluahania ”abua”. Ba ayati tanö böʼö, muʼogunaʼö  ngawua wehede daʼa ba wanutunö amakhoita si lö fatema ba dödö zamondrongo, mazui niha somasi mamatörö ba mamakao awönia. (Mataiʼo 23:4; Halöwö Zinenge 20:29, 30) Imane New English Translation, ”Lö ifakao ita oroisania andrö.” Lö ”abua” goroisa Yehowa, eluahania aoha khöda woloʼö yaʼia. Lö irai iʼandrö khöda zi tebai tafalua.

¹⁴ Duma-dumania, khalaigö atö na ötolo zi fahuwu khöu ba ginötö findra ia ba nomonia si bohou. No ifaʼanö fefu gama-gamania ba karton. So gama-gama sabua ba wonoro ba so göi zaoha. Tanö böʼönia, abua sibai irege moguna so darua zamazawa gama-gama andrö. Hadia iʼandrö khöu wamazawa daʼö ha yaʼugö? Tatu löʼö! Hadia mbörö? Lö omasi ia na mesokho ndraʼugö. Simanö göi Yehowa, lö irai iʼandrö khöda wamalua hadia ia si lö ikhamö faʼabölöda. (5 Moze 30:11-14) Aboto ba dödö Yehowa haniha ita. ”Itörö tödönia wa no gawu-gawu ita.”​—Zinunö 103:14.

15. Hana wa faduhu dödöda wa si sökhi khöda goroisa Yehowa andrö?

¹⁵ Iʼombakhaʼö ba ndraono Gizaraʼeli Moze wa oroisa Yehowa andrö zangaʼasogö ’faʼohahau dödö’ khöra, ba tola ’teʼorifi’ ira na laʼoʼö. (5 Moze 5:25-30; 6:24) Simanö göi iadaʼa. Itugu sökhi waʼaurida na tafalua fefu niʼandrö Yehowa. (Baso Yesaya 48:17.) Iʼila hadia zi sökhi khöda Amada Yehowa. (Roma 11:33) Imane Sura Niʼamoniʼö, ”Lowalangi andrö no faʼomasi.” (1 Yohane 4:8) Eluahania, faʼomasi andrö zamarou tödö Yehowa ba wangumaʼö hegöi ba wamalua hadia ia.

16. Hana wa tola taʼoʼö li Lowalangi hewaʼae lö moʼahonoa ita ba toröi ba gulidanö safönu faʼalösökhi?

 ¹⁶ Itaria abua woloʼö li Lowalangi. Toröi ita ba gulidanö si lö sökhi nifatörö Gafökha. Idönisi dödö niha wamalua si lö sökhi. (1 Yohane 5:19) Moguna göi taforege wolawa falömoʼahonoa wangera-ngerada hegöi tödöda börö me daʼö zondrönisi yaʼita enaʼö lö taʼoʼö li Lowalangi. (Roma 7:21-25) Hizaʼi, faʼomasida khö Yehowa zameʼe khöda faʼabölö ba wamalua satulö. Iʼila hewisa me taforege woloʼö yaʼia, ba ibeʼe geheha niʼamoniʼö ba wanolo yaʼita. (1 Zamueli 15:22, 23; Halöwö Zinenge 5:32) Börö geheha niʼamoniʼö andrö wa tola tadouʼö gamuata si sökhi irege aoha khöda woloʼö li Lowalangi.​—Galatia 5:22, 23.

17, 18. (a) Hadia wamahaʼö nitemada dania ba mbuku daʼa? (b) Hadia nitutunöda ba faza aefa daʼa?

¹⁷ Ba mbuku daʼa, tafahaʼö ita hewisa wamaudugö faʼaurida ba zomasi Yehowa. Tafahaʼö ita dania hewisa wamalua goi-goinia ba waʼaurida hegöi amakhoitania sanandrösa ba gamuata. Böi olifu ita, lö irai ifaso ita Yehowa woloʼö yaʼia. Na tafili ba woloʼö yaʼia, itugu sökhi waʼaurida ba taʼokhögö wanötöna sahöli-höli dödö ba zi so föna. Sabölö moguna, moroi ba woloʼöda li Lowalangi andrö oroma hawaʼebua waʼomasida khönia.​—Faigi Gonönöta 4.

¹⁸ Enaʼö taʼila hadia manö zatulö ba si lö atulö, no ibeʼe khöda dödö side-ide Yehowa ba wanolo yaʼita. Na tafahaʼö dödöda side-ide, daʼö zanolo yaʼita ba ’woloʼö oroisania’. Na simanö, hadia dödö side-ide andrö, ba hewisa wamahaʼöda yaʼia? Datafaigi.