1-3. (a) Hadia mbörö wa lö omasi zi samösa ina na taʼunö nononia? (b) Hana wa lö omasi Yehowa na taʼunö nono mbanuania?

 KHALAIGÖ atö samösa nina sebua faʼomasi, ifaʼanö nononia weʼamöi ba zekola. Ifaigi na no mondri ba ihaogö nukha enaʼö moadu ba lö taʼunö. Moguna ifalua daʼa enaʼö lö mofökhö nononia ba enaʼö laʼila niha wa so zatuania soʼameʼegö tödö yaʼia.

² Omasi Namada Yehowa na lö taʼunö ita ba ohau-hau. (Zinunö 18:27) Iʼila wa si sökhi khöda daʼö. Ba na  lö taʼunö ita, tefolakhömi döinia.​—Hezekieli 36:22; baso 1 Fetero 2:12.

³ Hadia geluahania lö taʼunö? Ba hana wa sökhi lua-luania khöda na lö taʼunö ita? Na tatutunö wanofu-nofu andrö, tola taʼila hadia manö zinangea tabulöʼö ba waʼaurida.

4, 5. (a) Hana wa tebai taʼunö ita? (b) Hadia wamahaʼö moroi ba gomböila danga Yehowa irege taʼila hewisa dödönia sanandrösa ba walötaʼunö?

⁴ Moroi ba duma-duma Yehowa taʼila wa tebai taʼunö ita ba moguna ohau-hau. (3 Moze 11:44, 45) Wa tebai taʼunö ita siföföna sibai börö me omasi ita ’taʼoʼö khö Lowalangi’.​—Efeso 5:1.

⁵ Ba gomböila danga Yehowa taʼila hewisa dödönia sanandrösa ba walötaʼunö. Ifazökhi siklus alam enaʼö lö taʼunö nangi hegöi idanö. (Yeremia 10:12) Angeragö atö hawaʼoya lala niʼogunaʼö gulidanö andre ba wangehaogö yaʼia faböi taʼunö, hewaʼae itaʼunöisi ia niha. Duma-dumania, omböila danga Yehowa side-ide sibai nifotöi tungö, ha ba mikroskop tola taʼila ia. Tola iʼehaogö zasao si tola mamakiko ulidanö andre irege lö tobali famaʼala. No sahöli-höli dödöda halöwö daʼö. Laʼogunaʼö ösa dungö andrö ira ilmuwan enaʼö alö waʼataʼunö gulidanö.​—Roma 1:20.

6, 7. Hewisa Goroisa Moze wanutunö wa tebai taʼunö dozi samosumange Yehowa?

⁶ Moroi ba Goroisa nibeʼe Yehowa ba ndraono Gizaraʼeli nifaʼemania khö Moze, tola taʼila wa tebai taʼunö ita. Duma-dumania, laʼodödögö niha faböi taʼunö mbotora enaʼö itema zumangera Yehowa. Ba Luo  Wangatulö, dua kali mondri ndra ere sebua. (3 Moze 16:4, 23, 24) Ba fatua lö labeʼe zumange nitunu ira ere tanö böʼö, moguna lasasai danga awö gahera. (2 Moze 30:17-21; 2 Ngaʼötö 4:6) Itaria manö hukuma ba niha sanawö oroisa sanandrösa ba walötaʼunö andrö yaʼia daʼö faʼamate.​—3 Moze 15:31; 4 Moze 19:17-20.

⁷ Hewisa göi iadaʼa? Tola tafahaʼö ita ba Goroisa sanandrösa ba gamakhoita Yehowa. (Maleakhi 3:6) Ba daʼö oroma wa tebai taʼunö niha samosumange Yehowa. Lö si tebulö goi-goinia. Ba ginötö andre, itötöna enaʼö ohau-hau ba lö taʼunö niha samosumange yaʼia.​—Yakobo 1:27.

8. Hezo manö taforomaʼö wa lö taʼunö ita?

⁸ Moloʼö Yehowa, falötaʼunö andrö tenga ha asala taʼehaogö mbotoda, nukha awö nomoda. Moʼamakhaita ia ba waʼaurida maʼafefu. Farahu ba daʼö wamosumangeda Lowalangi, amuata hegöi era-erada. Börö daʼö, faböi taʼunö ita moloʼö Yehowa moguna ohau-hau ngawalö lala waʼaurida ba böi tataʼunöisi.

9, 10. Hadia geluahania lö taʼunö wamosumangeda Lowalangi?

⁹ Famosumange satulö. Tebai farahu ita ba agama sofaya gofu hewisa lalania. Me lataha ndraono Gizaraʼeli ba Mbabilona, no lafasui ira niha si faböbö ba agama sofaya samalua amuata wohorö. No ifaʼeleʼö Yesaya wa mangawuli ndraono Gizaraʼeli ba mbanuara ba laʼehaogö wamosumange satulö. Imane khöra Yehowa, ”Miheta ami ba daʼö! Böi mibabaya hadia ia zi taʼunö! Miheta ami khöra! Mihaogö ami.” Famosumangera Lowalangi tebai lafaruka ba wamahaʼö agama  sofaya ba Mbabilona, ba gamuata, mazui si toʼölö lafalua.​—Yesaya 52:11.

¹⁰ Niha Keriso sindruhu ba ginötö andre latimbagö agama sofaya. (Baso 1 Korindro 10:21.) Ba zi sagörö ulidanö, oya hada si tehöngö, si toʼölö lafalua, hegöi nifaduhusi tödö niha si teʼodane-dane ba wamahaʼö agama sofaya. Duma-dumania, oya soi si faduhu tödö wa auri nasa noso niha si no mate, ba oya zi toʼölö lafalua si teʼodane-dane ba nifaduhusira tödö andre. (Zangombakha 9:5, 6, 10) Latimbagö fefu daʼö ira niha Keriso. Te lafaso ita ira ösi nomoda wefao ba zi toʼölö lafalua andrö. Hizaʼi, tatimbagö daʼö börö me lö omasi ita taʼunö ba wamaigi Yehowa.​—Halöwö Zinenge 5:29.

11. Hadia geluahania lö taʼunö gamuatada?

¹¹ Amuata satulö. Enaʼö atulö ita föna Yehowa, moguna tatimbagö gamuata wohorö gofu hewisa lalania. (Baso Efeso 5:5.) Iʼoʼou ita Yehowa ba Zura Niʼamoniʼö enaʼö ’taʼaliokö wanimba amuata wohorö’. Iʼabakhaʼö wangumaʼö daʼa me imane wa ”tebai tefaʼamöi ba Wamatörö Lowalangi” niha samalua amuata wohorö ba si lö mamalalini era-erara.​—1 Korindro 6:9, 10, 18; faigi Gonönöta 22.

12, 13. Hadia mbörö wa tebai taʼunö gera-erada?

¹² Era-era satulö. Oroma ba gamuatada zi no taʼera-era. (Mataiʼo 5:28; 15:18, 19) Na satulö niʼera-erada, satulö göi nifaluada. Sindruhu sa wa lö soʼahonoa ita, andrö wa asese taʼera-era zi lö atulö. Na alua khöda daʼö, taʼanemaiʼö wanimbagö ya’ia. Na löʼö, lö saʼae atulö dödöda. Tola manö ibörögö omasi ita tafalua zi no taʼera-era. Andrö, sökhi na sohau-hau  manö niʼera-erada. (Baso Filifi 4:8.) Tatimbagö gamuata wohorö mazui hiburan si lö sökhi. Taʼangenanöi wamili nibasoda, nifaigida hegöi nidunö-dunöda.​—Zinunö 19:9, 10.

¹³ Moguna atulö lala wamosumangeda Lowalangi, amuatada, awö niʼera-erada enaʼö lö tebulö so ita ba lumö waʼomasinia. Hizaʼi, omasi göi Yehowa na lö taʼunö ita.

14. Hadia mbörö wa tebai taʼunö ita?

¹⁴ Na lö taʼunö mbotoda awö nahia si fasuida, sökhi lua-luania khöda hegöi ba niha böʼö. Ohahau dödöda ba lö fandröndröu niha khöda. Hizaʼi, so dane-dane saro hana wa tebai taʼunö ita, yaʼia daʼö enaʼö tefolakhömi Yehowa. Angeragö atö daʼa: Na asese öʼila nono side-ide si no taʼunö, te manahö-nahö dödöu khö zatuania. Simanö göi na lö ibeʼe dödöda wondrorogö botoda faböi taʼunö, tola manahö-nahö dödö niha khö Yehowa. Imane Faulo, ”Ba ngawalö hadia ia, lö omasiga mafobörö wangala ba niha, enaʼö lö teʼoʼaya halöwö nifaluama khö Lowalangi. Hizaʼi, ba ngawalö hadia ia, omasiga maforomaʼö wa sangai halöwö ndraʼaga khö Lowalangi.”​—2 Korindro 6:3, 4.

15, 16. Hadia zinangea tafalua faböi taʼunö ita?

¹⁵ Boto hegöi nukhada. Sökhi na toʼölö ita wondrorogö botoda ero maʼökhö faböi taʼunö. Duma-dumania, ero inötönia mondri ita, na tola ero maʼökhö. Tasasai dangada faoma sabu hegöi idanö, mendrua manö na edöna mondrino ita mazui manga, ba tatu manö na no aefa möi ita ba WC mazui  na no tababaya zi taʼunö. Fanasai tanga andrö hulö no taʼaohasi ba dödö, hizaʼi moguna tafalua ia enaʼö lö göna ita tungö ba monönö wökhö. Tola göi telumöʼö waʼaurida. Na lö hadöi khöda WC mazui nahia waniboʼö si taʼunö, so lala böʼö si tefaudu ba waniboʼö si taʼunö. Lö hadöi nahia wanibo’ö si ta’unö ba ndraono Gizaraʼeli me föna. Andrö lakoʼo zi taʼunöra barö danö, fandröndröu moroi ba nomo niha hegöi umbu nidanö.​—5 Moze 23:13, 14.

¹⁶ Lö moguna ebua mböli nukhada, ahöli-höli dödö zamaigi, mazui taʼoʼö mode si bohou. Sökhi na tasasai nukhada faböi taʼunö ba tatarika. (Baso 1 Timoteo 2:9, 10.) Omasi ita na tefolakhömi Yehowa ba lagu wonukhada.​—Tito 2:10.

17. Hana wa taʼehaogö nomoda awö zi fasuida faböi taʼunö?

 ¹⁷ Omo hegöi si fasuida. Gofu hezo toröi ita, taʼehaogö nomoda faböi taʼunö. Tafaigi göi faböi taʼunö motoda, hondra, kureta, awö lalada tanö böʼö, mendrua manö na taʼogunaʼö ia ba gangowuloa mazui ba wanuriaigö. Na möi ita manuriaigö, tatutunö ba niha sanandrösa ba waradaiso si lö taʼunö ba gulidanö. (Luka 23:43; Famaʼeleʼö 11:18) Na taʼehaogö nomoda awö nahia si fasuida, ba daʼö oroma wa tafaʼanö ita iʼotarai iadaʼa weʼaso ba gulidanö si bohou dania, si lö taʼunö.

18. Hana wa lö omasi ita ta’unö nahia wamosumangeda Lowalangi?

¹⁸ Nahia wamosumangeda Lowalangi. Taforomaʼö wa taʼameʼegö tödö walötaʼunö na ta’ehaogö nahia gangowuloa, he Balai Mbanua Lowalangi mazui nahia böʼö niʼogunaʼöda na kebaktian. Na so zawena möi ba Balai Mbanua Lowalangi, si toʼölönia lafaigi-faigi hadia lö taʼunö nahia andrö. Tobali famolakhömi döi Yehowa daʼa. Dozi ita si farahu ba mbanua niha Keriso, tebeʼe khöda ginötö ba wangehaogö Balai Mbanua Lowalangi ba tarorogö enaʼö lö alio tekiko.​—2 Ngaʼötö 34:10.

19. Hadia zinangea tatimbagö?

¹⁹ Hewaʼae lö nizara-zara Zura Niʼamoniʼö wanutunö hadia manö zi lö sökhi si toʼölö lafalua niha sinangea tatimbagö, no ibeʼe khöda goi-goi enaʼö taʼila hewisa dödö Yehowa. Lö omasi ia na moroko ita, taʼogunaʼö narkoba mazui taduhugö wamadu tuo. Tatimbagö  fefu daʼö na si fahuwu khö Lowalangi ita. Hadia mbörö? Börö me taʼosinangegö sibai mbuala faʼauri nibeʼenia. Na toʼölö ita wamalua daʼö, tekiko waʼaurida, göna ita fökhö, ba teʼala niha ba zi fasuida. Ato zi no mamöhöli amuata daʼö enaʼö lö göna ira fökhö sabölö-bölö. Hizaʼi, börö me si fahuwu khö Yehowa ita, so dani siföföna wa taböhöli fefu daʼö, yaʼia daʼö faʼomasida khö Lowalangi. So samösa ndra alawe si bohou ebua sangumaʼö, ”Börö wanolo moroi khö Yehowa, uʼehaogö waʼaurigu enaʼö lö raʼiö ba ubato zi toʼölö ufalua. . . . Na dali zindruhunia, tebai ubulöʼö waʼaurigu andre börö waʼabölögu samösa.” Datatutunö lima ngawua goi-goi Zura Niʼamoniʼö sanolo si samösa niha ba wamöhöli amuata si möi famaʼala andrö.

20, 21. Hadia manö gamuata sinangea taröi moloʼö somasi Yehowa?

²⁰ ”Börö me no tatema mbuʼusa li andrö, dataʼehaogö ita moroi ba ngawalö zi tola manaʼunöisi botoda hegöi fangera-ngerada, enaʼö itugu moʼahonoa ita ba wangataʼufi Lowalangi.” (2 Korindro 7:1) Omasi Yehowa na taheta ita ba ngawalö zi raʼiö si toʼölö lafalua niha faböi tekiko gera-erada mazui botoda.

²¹ Dane-dane saro wa ’taʼehaogö ita moroi ba ngawalö zi tola manaʼunöisi’ no tesura ba 2 Korindro 6:17, 18. Imane khöda Yehowa, ”Böi mibabaya saʼae zi raʼiö.” Ba ifabuʼu, ”Awena dania utema ami. Tobali ndraʼo Amami, ba onogu matua ami ba onogu alawe.” Hasambalö iʼomasiʼö ita Yehowa simane ama sangomasiʼö ononia. Börö daʼö, tatimbagö gofu hadia ia zi möi börö wa raʼiö ita mazui lö ohahau fönania.

22-25. Hadia goi-goi Zura Niʼamoniʼö sanolo yaʼita ba wanimbagö amuata si raʼiö?

 ²² ”Omasiʼö Yehowa Lowalangiu moroi siʼaikö ba dödöu, nosou maʼasambua, ba era-erau maʼafefu.” (Mataiʼo 22:37) Daʼa goroisa sabölö ebua moroi ba danö böʼö. (Mataiʼo 22:38) Sinangea itema fefu waʼomasida andrö Yehowa. Tebai taʼomasiʼö ia simane daʼö na tafalua hadia zi tola mamaʼala faʼaurida mazui mamakiko fangera-ngerada. Andrö, taforege wangoromaʼö wa taʼosinangegö waʼauri nibeʼenia khöda.

²³ ”[Yehowa] zameʼe faʼauri ba niha, hanu-hanu, hegöi ngawalö hadia ia.” (Halöwö Zinenge 17:24, 25) Na ibeʼe khöu mbuala sabölö sökhi si fahuwu khöu, hadia ötiboʼö mazui öfakiko mbuala andrö? Faʼauri andre buala sahöli-höli dödö moroi khö Yehowa. Sindruhu-ndruhu taʼandrö saohagölö ba mbuala andrö. Omasi ita taʼogunaʼö waʼaurida ba lala si möi famolakhömi döinia.​—Zinunö 36:10.

²⁴ ”Omasiʼö nawöu simane faʼomasiu ndraʼugö.” (Mataiʼo 22:39) Tenga ha yaʼita zi teʼala na toʼölö ita wamalua si raʼiö. Teʼala göi niha ba zi fasuida, sasesenia niha niʼomasiʼöda. Duma-dumania, tola manö mofökhö niha si sambua omo ba zoroko, börö me ihofo göi zimbo roko andrö. Hizaʼi, na taböhöli wamalua daʼö, taforomaʼö ba niha si fasuida wa taʼomasiʼö ira.​—1 Yohane 4:20, 21.

²⁵ ”Böi böhöli wamasugi ba dödöra enaʼö laʼoʼö ba lafondrondrongo li ndra samatörö hegöi sondröniaʼö.” (Tito 3:1) Ba soi böʼö misa, no sambua fanawö huku na muʼokhögö mazui muʼogunaʼö narkoba. Taʼoʼö huku simane daʼö börö me iʼoʼou ita Yehowa  ba wangosinangegö ira samatörö.​—Roma 13:1.

26. (a) Hadia zinangea tafalua enaʼö itema zumange nibeʼeda Yehowa? (b) Hana wa tobali lala waʼauri si sökhi na lö raʼiö ita ba wamaigi Lowalangi?

²⁶ Na omasi ita tobali si fahuwu khö Yehowa, te so zinangea tabulöʼö ba waʼaurida. Na simanö, tafalua daʼö iʼotarai iadaʼa. Hewaʼae abua wamöhöli amuata si raʼiö andrö, hasambalö tola tafalua! Ifabuʼu Yehowa wa itolo ita. Imane, ”Yaʼo, Yehowa, Lowalangiu zamahaʼö yaʼugö ba zoguna khöu, samasao yaʼugö ba lala nitöröu.” (Yesaya 48:17) Na taforege enaʼö lö raʼiö ita ba ohau-hau, tola faduhu dödöda wa no tafolakhömi Lowalangida.