1, 2. Hewisa wamaʼala Mbileamo ono mbanua Yehowa?

 MÖI zogai iʼa ba nahia somasi ia ba wangalui iʼa sedöna igaini. Ifili lakhönia ba itiboʼö gainia ba nidanö. Ibaloi si fao faʼebolo dödö, aefa daʼö idou gainia iʼa irege tokhai ba gai, awena isöbi yawa.

² Simanö göi na mufaʼala niha. Duma-dumania, arakhagö larugi Danö Gamabuʼula iraono Gizaraʼeli me molombase ira ba Danö Saloʼo Moabi. Fawuʼu li razo Moabi khö ndra matua sotöi Bileamo wa hasambalö ebua gefe nibeʼenia na iʼelifi ndraono Gizaraʼeli. No isöndra lala Bileamo enaʼö laʼelifi samösa ira iraono Gizaraʼeli. Sindruhu-ndruhu ifili lakhö si tefaudu. Ifatenge ndraono alawe Moabi ba nose ndraono Gizaraʼeli ba wangakali yaʼira.​—4 Moze 22:1-7; 31:15, 16; Famaʼeleʼö 2:14.

3. Hewisa waʼaekhu ndraono Gizaraʼeli ba lakhö Mbileamo?

³ Hadia mofozu lakhö nibeʼe Mbileamo? Mofozu. Mato hauga ribu ndra matua Gizaraʼeli ’zohorö-horöni nono alawe ndraono Moabi’. Ibörötaigö göi lafosumange  lowalangi faya, simane lowalangi sogoro ita sohorö-horö sotöi Mbaʼali-Weoro. Lua-luania, so 24.000 ndraono Gizaraʼeli si mate ba nola Danö Gamabuʼula.​—4 Moze 25:1-9.

4. Hana wa mohorö ndraono Gizaraʼeli si hauga ribu faʼato?

⁴ Hana wa ato ndraono Gizaraʼeli saekhu ba lakhö Mbileamo? Börö me ha isö-isö dödöra safönu fakhögusa niʼera-erara, ba olifu ira fefu zi no ifalua Yehowa khöra. Sindruhunia, oya dani khöra ba wangoromaʼö faʼalöfaröira khö Lowalangi. No iʼefaʼö ira ba wangosawuyu ndrawa Miserai, ibeʼe mbalazora ba danö si mate, ba ilumöʼö ira öfeta ba nola Danö Gamabuʼula. (Heberaiʼo 3:12) Hizaʼi, tedönisi dödöra ba wamalua amuata wohorö. Isura sinenge sotöi Faulo, ’Böi tafalua gamuata wohorö simane nifaluara ösa irege mate ira.’​—1 Korindro 10:8.

5, 6. Hadia wamahaʼö nihalöda ba zalua ba Danö Saloʼo Moabi?

⁵ Lö ara tö tohare gulidanö si bohou. Andrö, itaria simane iraono Gizaraʼeli ita si so ba nola Danö Gamabuʼula. (1 Korindro 10:11) Abölö ebua nasa gisö-isö dödö niha gulidanö ba götö daʼa ba wohorö moroi ba götö niha Moabi. Alio molua-lua gisö-isö dödö andre ba nono mbanua Yehowa. Lakhö si tefaudu sibai niʼogunaʼö Gafökha yaʼia daʼö amuata wohorö.​—4 Moze 25:6, 14; 2 Korindro 2:11; Yuda 4.

⁶ Sofu khöu samösa, ’Hadia uʼofönaiʼö gisö-isö dödögu safönu fakhögusa salio taya, mazui abölö omasido auri sagötö faʼara ba gulidanö si bohou safönu faʼomuso dödö?’ Hadia so gunania na uforege woloʼö amakhoita Yehowa, ”Miʼaliokö wanimba amuata wohorö”?​—1 Korindro 6:18.

7, 8. Hadia gamuata wohorö andrö? Hana wa no abula dödö sebua daʼa?

⁷ Iadaʼa, ato niha sangokhögö amuata sogoro ita ba laforomaʼö wa lö laʼoʼö goroisa Lowalangi sanandrösa ba waʼorudu. Ba Zura Niʼamoniʼö, amuata wohorö manandrösa ia ba waʼorudu zi darua niha si lö sangowalu moloʼö Sura Niʼamoniʼö. Farahu ba daʼö waʼorudu ndra matua khö nawönia ira matua, ira alawe khö nawönia ira alawe, hegöi faʼorudu niha ba gurifö. Nifotöi amuata wohorö andrö, simane faʼorudu, seks oral, seks anal, mazui fombambaya zaila nawöra.​—Faigi Gonönöta 23.

⁸ Ihaogö wanutunö Sura Niʼamoniʼö, na so zi lö mamöhöli wamalua amuata wohorö, laʼefasi ia ba mbanua niha Keriso. (1 Korindro 6:9; Famaʼeleʼö 22:15) Aefa daʼö, lö laʼosinangegö ia ba lö lafaduhusi tödö saʼae. Oya iʼasogö gabula dödö amuata wohorö andrö, itahi-tahigö manö ia tödönia side-ide, asese so zabeto, alua gabula dödö ba wongambatö, fökhö, mazui faʼamate. (Baso Galatia 6:7, 8.) Na sindruhu-ndruhu ibato ba iʼangeragö hadia lua-lua gamuata wohorö andrö, tola manö lö ifalua daʼö saʼae. Hizaʼi sasesenia, ha isö-isö dödöra samösa niʼera-erara irege ibörögö lafalua gamuata wohorö. Lala si oföna nifaluara yaʼia daʼö famaigi pornografi.

9. Hana wa möi famaʼala pornografi andrö?

⁹ Lafazökhi pornografi ba wamatumbuʼö isö-isö dödö niha ba wohorö. Iadaʼa, no lafaʼanö pornografi  ba majalah, buku, musik, acara TV, hegöi ba Internet. Ato zangumaʼö wa lö fasala wamaigi pornografi, sindruhunia sa ifaʼala ita. Tola iʼasogö gisö-isö dödö selungu hegöi famalua amuata wohorö si lö aetu-aetu. Na no ibörögö zi samösa niha wamaigi pornografi, daʼö zondrönisi yaʼia ba wamalua masturbasi, alua gabula dödö ba wongambatö, ba fabali auri.​—Roma 1:24-27; Efeso 4:19; faigi Gonönöta 24.

10. Hewisa goi-goi ba Yakobo 1:14, 15 möi fanoloda ba wanimbagö amuata wohorö?

¹⁰ Moguna aboto ba dödöda hewisa wa tola adöni dödöda ba wamalua amuata wohorö. Nehegö atö wamangelama si so ba Yakobo 1:14, 15, ”Dozi niha tetandraigö na tedönisi ba teböbö ia ba gisö-isö dödönia samösa. Aefa daʼö, na no abölö wangisönia andrö, ifalua horö, ba na no ifalua horö, lua-luania faʼamate.” Andrö, na no ibörögö tumbu ba dödöu wangera-ngera si fasala, anemaiʼö timbagö ia. Na öʼila gambara zohorö-horö ba zi lö ödöna-döna, anemaiʼö erogö! Bunu komputer, mazui tukari numero TV. Böi tehegö so gisö-isö dödö si fasala ba waʼauriu. Na löʼö, tola tedou gisö-isö dödöu si fasala andrö ba abua khöu wanimbagö yaʼia.​—Baso Mataiʼo 5:29, 30.

11. Hewisa wanolo Yehowa yaʼita na so khöda wangera-ngera si fasala?

¹¹ Abölö aboto ba dödö Yehowa ita moroi na yaʼita samösa. Iʼila wa lö moʼahonoa ita. Iʼila göi wa tola tatimbagö gisö-isö dödö si fasala. Imane khöda Yehowa, ”Mibunu ndroto-ndroto andrö enaʼö böi aekhu ami ba wohorö, faʼaraʼiö, lö fanaha tödö ba wohorö, fangisö si lö sökhi, mazui fakhögusa, si fagölö ba  wamosumange adu.” (Kolose 3:5) Hewaʼae abua wamalua yaʼia, ebolo dödö Yehowa khöda ba hasambalö itolo ita. (Zinunö 68:20) So samösa nono matua si bohou ebua sasese mamaigi pornografi ba samalua masturbasi. Lamane ira awönia ba zekola wa no si toʼölö alua daʼö börö me tedou waʼebua-buania, hizaʼi imane, ”Daʼa zamakiko tödögu side-ide, ba no tedönisi ndraʼo ba gamuata wohorö.” Aboto ba dödönia wa moguna itimbagö gisö-isö dödönia, ba börö wanolo Yehowa, tola iröi gamuata si toʼölö ifalua andrö. Na so khöu wangera-ngera ba wohorö, andrö khö Yehowa ’waʼabölö sahöli-höli dödö’ enaʼö so khöu wangera-ngera si sökhi.​—2 Korindro 4:7; 1 Korindro 9:27.

12. Hana wa moguna ’tafaigi-faigi dödöda’?

¹² Isura Selomo, ”Ba siaʼania, ba faigi-faigi dödöu;  khönia iʼotarai faʼauri.” (Gamaedola 4:23) ’Tödöda’ andre yaʼia daʼö niha bakha, daʼö nifaigi-faigi Yehowa. Molua-lua sibai khöda fefu zi no tafaigi. Imane ira matua si lö faröi sotöi Yobi, ”No uʼabeʼeʼö nifakhoigu ba hörögu andre ba hana wa ulekeʼö menaʼö nono alawe!” (Yobi 31:1) Simane Yobi, moguna taʼangenanöi hadia nifaigida hegöi niʼera-erada. Ba simane sanura Sinunö, tola mangandrö ita, ”Holeʼö hörögu, faböi ifaigi waya-faya.”​—Zinunö 119:37.

13. Haʼökhö fahuwu Dina?

¹³ Tola ladönisi ita ba zi lö sökhi mazui ba zi sökhi ira si fahuwu khöda. Na öfili zi fahuwu khöu soloʼö amakhoita Lowalangi, tola latolo ndraʼugö wamalua yaʼia. (Gamaedola 13:20; baso 1 Korindro 15:33.) Tola taʼila hana wa moguna atua-tua ita wamili si fahuwu khöda moroi ba zalua khö Dina. Yaʼia andre ono Yakobo, ba laʼebuaʼö ia ira ösi nomo samosumange Yehowa. Tenga ira alawe sohorö-horö Dina, hizaʼi fahuwu ia khö ndra alawe Ganaʼana si lö mamosumange Yehowa. Faböʼö lala wangera-ngera niha Ganaʼana moroi ba nono mbanua Lowalangi sanandrösa ba waʼorudu, ba tehöngö ira ba wamalua amuata wohorö. (3 Moze 18:6-25) Me fao Dina khö ndra awönia, falukha ia khö nono matua si siga-siga sotöi Sikhema. Ono matua ”sebua töi” Zikhema andrö ba nösi nomonia, hizaʼi tenga sangomasiʼö Yehowa.​—1 Moze 34:18, 19.

14. Hadia zalua khö Dina?

¹⁴ Ifalua Zikhema hadia zi toʼölö hegöi si lö fatimba  ba wamaiginia. Börö me omasi ia khö Dina, ”iraʼu” ba ”ihoröni”. (Baso 1 Moze 34:1-4.) Faʼalösökhi daʼa zangaʼasogö abula dödö sebua khö Dina hegöi ba nösi nomonia.​—1 Moze 34:7, 25-31; Galatia 6:7, 8.

15, 16. Hewisa enaʼö taʼokhögö waʼatua-tua?

¹⁵ Lö moguna tatörö lala Dina andrö awena tafahaʼö ita wa si sökhi khöda gamakhoita nibeʼe Yehowa sanandrösa ba gamuata. ”Si fao-fao ba zatua-tua, ba atua-tua dania; ba si möi awö zi lö tödö, ba falukha wamunu.” (Gamaedola 13:20) Yatobali ohitö dödöu wangiʼila ”fefu zinörö si sökhi”, ba tola ötimbagö waʼafökhö hegöi abula dödö.​—Gamaedola 2:6-9; Zinunö 1:1-3.

¹⁶ Tasöndra waʼatua-tua na tafahaʼö ita ba Daromali Lowalangi, mangandrö ita fatua lö tahalö gangetula, ba taʼoʼö mene-mene si sökhi nibeʼe zawuyu si lö faröi ba satua-tua. (Mataiʼo 24:45; Yakobo 1:5) Tatu manö aboto ba dödöu wa yaʼita andre niha sambö faʼabölö ba lö moʼahonoa. (Yeremia 17:9) Hizaʼi, hadia nifaluau na so zamangelama yaʼugö wa möi famaʼalau gamuata wohorö andrö? Hadia ötimbagö wanolo andrö, mazui ötema ia si fao fangide-ngideʼö?​—2 Razo 22:18, 19.

17. Beʼe duma-duma hewisa mene-mene moroi khö ndra talifusöda niha Keriso möi fanoloda.

¹⁷ Duma-dumania, khalaigö zalua andre. Samösa dalifusöda ira alawe si so ba nahia wohalöwö. So nono matua somasi khönia ba edöna iʼohe dalifusöda andrö weʼamöi manörö. Tenga samosumange Yehowa nono matua andrö, hizaʼi siga-siga ia ba sökhi gamuatania. So dalifusöda ira alawe sangila yaʼira, ba  ifangelama dalifusöda andrö. Hadia zi oföna ifalua dalifusöda andrö me no mufangelama ia? Hadia fabuʼa ia, mazui iʼila wa si sökhi khönia wamangelama andrö? Te iʼomasiʼö Yehowa ba omasi ia ifalua zi sökhi. Hizaʼi, na lö iböhöli wefao khö nono matua andrö, hadia no ’iʼaliokö wanimba amuata wohorö’ mazui ’manötöna ia ba dödönia’?​—Gamaedola 22:3; 28:26; Mataiʼo 6:13; 26:41.

18, 19. Tutunö hewisa wanimbagö Yosefo amuata wohorö.

¹⁸ Me ono matua Yosefo, tobali ia sawuyu ba danö Miserai. Ero maʼökhö, iʼandrö khönia foʼomo zokhö yaʼia enaʼö orudu ira, hizaʼi iʼila Yosefo wa fasala daʼö. Iʼomasiʼö Yehowa Yosefo ba omasi ia na omuso dödö Yehowa khönia. Ero idönisi ia ira alawe andrö,  iʼanemaiʼö itimbagö. Hizaʼi, börö me no tobali ia sawuyu, tebai iröi manö zokhö yaʼia. Samuza inötö, me ifaso ia foʼomo zokhö yaʼia ba wohorö, ”ilau moloi, isawa baero”.​—Baso 1 Moze 39:7b-12.

¹⁹ Tola manö faböʼö zalua khö Yosefo na itehegö so ba wangera-ngerania gamuata wohorö mazui na ikhala-khalaigö ndra alawe andrö. Hizaʼi, abölö iʼofönaiʼö wahuwusania khö Yehowa moroi ba danö böʼö. Imane khö ndra alawe andrö, ’Sokhö yaʼodo ba lö hadia ia zi lö ibeʼe ba dangagu, hatö yaʼugö, me no foʼomonia ndraʼugö. Ba hadia, ulau zi lö atulö andrö sabölö-bölö sibai, wamazökhi horö khö Lowalangi?’​—1 Moze 39:8, 9.

20. Hezo taʼila wa omuso dödö Yehowa khö Yosefo?

²⁰ Hewaʼae fandröndröu Yosefo moroi ba nomo hegöi ösi nomonia, lö faröi ia khö Lowalangi, ba ifahowuʼö ia Yehowa. (1 Moze 41:39-49) Omuso dödö Yehowa ba waʼalöfaröinia. (Gamaedola 27:11) Abua wanimbagö amuata wohorö. Hizaʼi, törö tödöu wehede daʼa, ”Miʼogorofi zi lö sökhi, yaʼami sangomasiʼö Yehowa! Yaʼia zondrorogö noso zatulö tödö andrö khönia; iʼefaʼö ira ba danga zebua horö andrö.”​—Zinunö 97:10.

21. Hewisa dalifusöda ono matua woloʼönia Yosefo?

²¹ Ero maʼökhö, lö faʼataʼu ba nono mbanua Yehowa wangoromaʼö wa ’laʼogorofi zi lö sökhi’ ba ’laʼomasiʼö zi sökhi’. (Gamosi 5:15) Gofu hauga ndröfiu, tola lö faröi ndraʼugö khö Yehowa. So samösa nono matua samati si göna fanandraigö ba zekola. Iwaʼö khönia awönia ono alawe wa tola mohorö ira asala itolo ia ba ujian matematika. Hadia nifalua dalifusöda  ono matua andrö? Iʼoʼö nifalua Yosefo. Imane, ”Uʼalioʼö wanimbagö niwaʼönia. Börö me urorogö waʼalöfaröigu, lö obou döigu ba ufosumange mbotogu.” Sasesenia, ato zanaögö abula dödö hegöi faʼafatö dödö börö ’waʼomuso dödö si lö arara’ ba wohorö. (Heberaiʼo 11:25) Lö tebulö tasöndra waʼohahau dödö sagötö faʼara na taʼoʼö li Yehowa.​—Gamaedola 10:22.

22, 23. Hewisa wanolo Yehowa yaʼita hewaʼae no tafalua horö sebua?

²² Itandraigö Satana wangogunaʼö amuata wohorö ba wamaʼala yaʼita, ba lö tobini khöda dandrawania andre. Te so khöda wangera-ngera si fasala ero inötö. (Roma 7:21-25) Aboto ba dödö Yehowa daʼö ba itörö tödönia ”wa no gawu-gawu ita”. (Zinunö 103:14) Hizaʼi, hewisa na so niha Keriso samalua amuata wohorö? Hadia taya wanötönania saʼae? Löʼö. Na sindruhu-ndruhu ifalalini gera-erania, itolo ia Yehowa. No ”sebolo tödö” Lowalangi.​—Zinunö 86:5; Yakobo 5:16; baso Gamaedola 28:13.

²³ Ibeʼe göi khöda Yehowa ’mbuala ba niha’, yaʼia daʼö ira satua sokubaloi safönu faʼomasi soʼameʼegö tödö yaʼita. (Efeso 4:8, 12; Yakobo 5:14, 15) No ifataro ndra satua sokubaloi ba wanolo yaʼita wangaʼazökhi mangawuli fahuwusada khönia.​—Gamaedola 15:32.

24, 25. Na ’taʼila wetahögö’, hewisa wa möi fanoloda ia ba wanimbagö amuata wohorö?

²⁴ Ba wangai angetula si sökhi, moguna aboto ba dödöda hadia guna goroisa Yehowa andrö khöda.  Lö omasi ita tobali simane ono matua nitutunö ba Gamaedola 7:6-23. Lö ”mangila wetahögö” ia irege alau ba lakhö, yaʼia daʼö famalua amuata wohorö. Tenga ha faʼonekhe geluaha wangila wetahögö. Na taʼila wetahögö, tafahaʼö ita enaʼö aboto ba dödöda lala wangera-ngera Lowalangi ba tafalua ia ba waʼaurida. Törö tödöu wehede si sökhi andre, ”Sangalui faʼaboto ba dödö, ba iʼomasiʼö nosonia, ba samaigi era-era dödö, ba isöndra waʼohahau dödö.”​—Gamaedola 19:8.

²⁵ Hadia sindruhu-ndruhu faduhu dödöu wa atulö gamakhoita Lowalangi andrö, ba ösöndra waʼohahau dödö na öʼoʼö ia? (Zinunö 19:8-11; Yesaya 48:17, 18) Na lö faduhu dödöu, böi olifuʼö fefu zi sökhi nifalua Yehowa khöu. ”Mitandra ba mifaigi, wa no sebua tödö Yehowa.” (Zinunö 34:9) Na itugu öfalua daʼö, tola aboto ba dödöu wa itugu öʼomasiʼö Lowalangi. Öʼomasiʼö zomasi ia, ba öʼogorofi zogoro ia. Foʼösi gera-erau ngawalö zi sökhi, yaʼia daʼö gofu hadia ia zi duhu, satulö, sohau-hau, sondrouʼö faʼomasi, hegöi bua-bua si sökhi. (Filifi 4:8, 9) Simane Yosefo, tola tatema mbua ba waʼatua-tua Yehowa.​—Yesaya 64:8.

26. Hadia nitutunöda ba faza aefa daʼa?

²⁶ He no mangowalu ndraʼugö mazui löʼö, omasi Yehowa na ohahau dödöu ba ösöndra waʼomuso dödö ba waʼauri. Ba zi dombua faza aefa daʼa, oya wanuturu lala sanolo yaʼita enaʼö mofozu ba wongambatö.