1, 2. Hadia zinangea taʼila sanandrösa khö Zatana hegöi ira malaʼikania?

 AHÖLI-HÖLI dödöda na auri ita ba gulidanö si bohou niʼasogö Yehowa. Ba gafuriata, auri ita simane ohitö dödö Lowalangi. Hizaʼi, iadaʼa so ita ba gulidanö nifatörö Zatana hegöi ira malaʼikania. (2 Korindro 4:4) Sindruhu-ndruhu so ira ba abölö sibai hewaʼae lö taʼila tafaigi.

² Ba faza daʼa tatutunö hewisa enaʼö lö tebulö ahatö ita khö Yehowa ba talumöʼö ita moroi khö Zatana. Ifabuʼu Yehowa wa hasambalö itolo ita. Hizaʼi, moguna aboto ba dödöda lala niʼogunaʼö Zatana hegöi ira malaʼikania ba wolimo hegöi ba wamaʼala yaʼita.

3. Hadia nifalua Gafökha khöda?

³ Ifobahulu niha Satana wa lafosumange Yehowa börö me so gohitö dödöra safönu fakhögusa, ba taböhöli wamosumange yaʼia na abua khöda wanaögö salua. (Baso Yobi 2:4, 5.) Na so zomasi mamahaʼö yaʼia sanandrösa khö Yehowa, iʼila daʼö Satana hegöi ira malaʼikania, ba latenawa ia. Mofönu ira na so zolulu faʼaurinia khö Yehowa ba tebayagö idanö. Ifagölösi Gafökha andrö Sura Niʼamoniʼö simane  ’singo sindröndrö-ndröndrö, iʼalu-alui haniha niʼania’. (1 Fetero 5:8) Omasi Zatana wamakiko fahuwusada khö Yehowa.​—Zinunö 7:2, 3; 2 Timoteo 3:12.

4, 5. (a) Hadia zi tebai ifalua Satana? (b) Hadia geluahania ”milawa Gafökha”?

⁴ Lö moguna ataʼu ita khö Zatana hegöi ira malaʼikania. No itatugöi khöra Yehowa hezo ndrege zi tola lafalua khöda. Ifabuʼu Yehowa wa ”ngawawa zato sibai” ba gotalua niha Keriso sindruhu, hasambalö teʼorifi ba ”wamakao sabölö-bölö”. (Famaʼeleʼö 7:9, 14) Lö hadöi  si tola ifalua Afökha ba wamöhöli salua, börö me ilumöʼö nono mbanuania Yehowa.

⁵ Na lö tebulö ahatö ita khö Yehowa, tebai ifakiko Satana wahuwusada khönia. Ifaduhuʼö khöda Taromali Lowalangi, ”Itolo ami Yehowa, na lö aefa ami khönia!” (2 Ngaʼötö 15:2; baso 1 Korindro 10:13.) Ato ndra matua hegöi ira alawe si lö faröi me föna simane Habeli, Henokhi, Noakhi, Sara, hegöi Moze, lö tebulö ahatö ira khö Yehowa ba wolawa Afökha. (Heberaiʼo 11:4-40) Tola tafalua göi zimane daʼö. Ifabuʼu Taromali Lowalangi, ”Milawa Gafökha ba iröi ami.”​—Yakobo 4:7.

6. Hewisa wanandraigö Zatana ita?

⁶ Hewaʼae iʼila Satana wa no itatugöi Yehowa hezo ndrege zi tola ifalua khöda, lö tebulö iforege wamalua hadia ia ba wamakiko fahuwusada khö Lowalangi. Iadaʼa, oya lala niʼogunaʼö Zatana ba wanandraigö yaʼita, ba iʼogunaʼö dandrawa si no ifalua ba zi hauga ribu fakhe faʼara. Hadia daʼö?

7. Hana wa itandraigö nono mbanua Yehowa Satana?

⁷ Isura sinenge sotöi Yohane, ”Satana zamatörö ulidanö andre.” (1 Yohane 5:19) Ba danga Zatana so gulidanö si lö sökhi andre ba omasi göi ia ifatörö nono mbanua Yehowa. (Mikha 4:1; Yohane 15:19; Famaʼeleʼö 12:12, 17) Iʼila Afökha wa lö ara tö ginötö nitehegö khönia, andrö iforege sibai wanandraigö yaʼita zamösana enaʼö faröi khö Lowalangi. Itaria iʼogunaʼö dandrawa soroma Afökha ba so göi zi lö oroma.

8. Hadia zinangea laʼila ira niha Keriso?

⁸ Tabaso ba Nefeso 6:12, ’Fasöndratada ba wolawa  malaʼika si lö sökhi ba dalu mbanua.’ Dozi niha Keriso moguna lalawa Gafökha hegöi ira malaʼikania. Moguna aboto ba dödöda wa no tabörögö wasöndratada iʼotarai me talulu waʼaurida khö Yehowa. Me isura zurania Faulo ba mbanua niha Keriso ba Nefeso, tölu kali ifangelama ira enaʼö ’laʼabeʼeʼö’ ira.​—Efeso 6:11, 13, 14.

9. Hadia nifalua Zatana hegöi ira malaʼikania khöda?

⁹ Oya lala niʼogunaʼö Zatana awö malaʼikania ba wolimo yaʼita. Na no tatimbagö sambua dandrawania, tenga daʼö geluahania wa lö saʼae teʼala ita ba dandrawania tanö böʼö. Ihaogö ifaigi hadia zoʼamböta ita Afökha enaʼö tola ifili dandrawa ba wamaʼala yaʼita. Hizaʼi, lö aekhu ita ba daʼö börö me no iʼombakhaʼö khöda Sura Niʼamoniʼö hadia dandrawa Gafökha. (2 Korindro 2:11; faigi Gonönöta 31.) Sambua moroi ba zi hauga ngawalö dandrawania yaʼia daʼö fakelemusa.

10. (a) Hadia wakelemusa andrö? (b) Hewisa dödö Yehowa ba wakelemusa?

¹⁰ Fakelemusa no sambua halöwö soʼamakhaita khö ndra malaʼika si lö sökhi, simane fanahö döfi, faetasa, hazima, mazui fahuhuo ba niha si no mate. Iʼombakhaʼö khöda Sura Niʼamoniʼö wa ’niʼogorofi’ wakelemusa andrö, ba tebai tafosumange Yehowa na tafalua wakelemusa. (5 Moze 18:10-12; Famaʼeleʼö 21:8) Moguna latimbagö ira niha Keriso fefu zoʼamakhaita ba wakelemusa.​—Roma 12:9.

11. Hezo aekhu ita na adöni dödöda ba waʼabölö ndra malaʼika si lö sökhi?

¹¹ Iʼila Satana, na adöni dödöda ba waʼabölö ndra  malaʼika si lö sökhi, aoha khönia wamaʼala yaʼita ba wakelemusa. Oya sibai ngawalö wakelemusa si tola mamakiko fahuwusada khö Yehowa.

12. Hewisa wamaelungu Zatana fangera-ngerada?

¹² Itandraigö Satana wamaelungu fangera-ngera niha. Idaʼi-daʼi wangaʼasogö faʼaombö dödö, irege lamane niha wa ”si sökhi si lö sökhi ba . . . si lö sökhi si sökhi”. (Yesaya 5:20) Ifatumbuʼö ba wangera-ngera niha Afökha wa lö mofozu mene-mene Zura Niʼamoniʼö, ba omuso dödöda na lö taʼoʼö gamakhoita Lowalangi.

13. Hewisa wangaʼasogö Zatana faʼaombö-aombö dödö?

¹³ Fangaʼasogö faʼaombö-aombö dödö no sambua lala sabölö mofozu niʼogunaʼö Zatana. No ara iʼogunaʼö dandrawa daʼa. Ba Kabu Edena, iʼasogö waʼaombö-aombö dödö khö Khawa me isofu, ”Hadia, duhu no iwaʼö Lowalangi: Löʼö manö miʼa mbua geu ba kabu?” (1 Moze 3:1) Aefa daʼö me götö Yobi, manofu Zatana khö Yehowa föna ndra malaʼika, ”Hadia, iʼataʼufi göi Lowalangi Yobi, lö böli gölönia?” (Yobi 1:9) Me no aefa tebayagö Yesu idanö, itandraigö ia Satana me imane, ”Na ono Lowalangi ndraʼugö, hede ba gara andre enaʼö tobali roti.”​—Mataiʼo 4:3.

14. Hewisa wangaʼasogö Zatana faʼaombö-aombö dödö ba niha enaʼö ambö faduhu dödöra hadia fasala ma löʼö wakelemusa andrö?

¹⁴ Iadaʼa, lö iböhöli Satana wangaʼasogö faʼaombö-aombö dödö. Iʼalui lala enaʼö ambö faduhu dödö niha wa sindruhu-ndruhu fasala wakelemusa andrö, iʼalösöini wamaehagö yaʼia ösa. So ösa niha Keriso selungu ba dandrawa daʼa. (2 Korindro 11:3) Börö daʼö,  hadia zinangea tafalua enaʼö telumöʼö ita? Hewisa wamaresoda yaʼita enaʼö lö telimo ba dandrawa Zatana? Datatutunö dombua lala si tola mamaelungu yaʼita: hiburan ba fangogunaʼö dalu-dalu.

15. Hewisa wa tola fao ita khö ndra malaʼika si lö sökhi ba hiburan nifaigida?

¹⁵ Iadaʼa oya film, video, acara TV, game komputer, hegöi situs Internet soʼamakhaita khö ndra malaʼika si lö sökhi, ba gelemu, hegöi faʼabölö si tebai takhalaigö. Ato zangumaʼö wa mufalua daʼa enaʼö maʼiki niha, lö tobali famaʼala, ba lö laʼila hadia lua-luania na latehegö so ba waʼaurira malaʼika si lö sökhi. Fao zi samösa niha ba wakelemusa na ifaigi horoskop, suʼa danga, kartu tarot, hegöi bola kristal. Ibiniʼö deʼala andre Afökha, ba iʼalui lala wamaehagö yaʼia enaʼö adöni dödö niha börö me faböʼö moroi ba danö böʼö, oi sahöli-höli dödö, ba maʼiki zamaigi. So göi zangumaʼö wa lö fasala na mufaigi hadia zoʼamakhaita khö ndra malaʼika si lö sökhi mazui fakelemusa, asala lö ifalua samösa yaʼi. Hana wa möi famaʼala wangera-ngera simane daʼa?​—1 Korindro 10:12.

16. Hana wa moguna tatimbagö hiburan soʼamakhaita ba waʼabölö si tebai takhalaigö?

¹⁶ Tebai ibaso gera-erada Satana hegöi ira malaʼikania. Hizaʼi, laʼila hadia zadöni dödöda hegöi lala wangera-ngerada na lahaogö lanehegö gangetula nihalöda khöda samösa hegöi ba nösi nomoda, simanö göi sanandrösa ba hiburan. Na tafili film, musik, mazui buku sanandrösa ba dohu danga, elemu, malaʼika si lö sökhi, duku, vampir, mazui tanö böʼönia, iʼila Satana  hegöi ira malaʼikania wa adöni dödöda khöra. Laʼalui lala enaʼö itugu adöni dödöda nasa ba gelemu.​—Baso Galatia 6:7.

17. Hewisa wamaʼala Zatana yaʼita na taʼalui lala enaʼö lö mofökhö ita?

¹⁷ Ifaʼala göi ita Satana na taʼalui lala enaʼö lö mofökhö ita. Iadaʼa, ato niha si tefakao börö wökhö. Te so zi no mangogunaʼö ngawalö dalu-dalu, hizaʼi lö manö nasa döhö. (Mareko 5:25, 26) Tola manö afatö dödönia ba iforege wangalui lala tanö böʼö. Hizaʼi, yaʼita niha Keriso moguna taʼangelamaisi wamili dalu-dalu soʼamakhaita ba gelemu.​—Yesaya 1:13.

18. Hadia manö dalu-dalu sinangea latimbagö ira niha Keriso?

 ¹⁸ Ba götö ndraono Gizaraʼeli me föna, so ösa zangogunaʼö elemu. Imane khöra Yehowa, ”Ba na miʼoroʼö dangami, ba ubalugö hörögu khömi, ba he mihöna wangandrö, ba lö ufondrondrongo khömi.” (Yesaya 1:15) Angeragö atö, lö ifondrondrongo Yehowa wangandröra! Lö omasi ita wamalua hadia ia zi möi famakiko fahuwusada khö Yehowa hegöi sanaha yaʼia ba wameʼe fanolo khöda, töra-töra na mofökhö ita. (Zinunö 41:4) Andrö, moguna taʼila hadia so gamakhaita dalu-dalu niʼogunaʼöda andrö ba gelemu mazui ba waʼabölö si tebai takhalaigö. (Mataiʼo 6:13) Moguna tatimbagö dalu-dalu andrö na moʼamakhaita ia ba daʼö!​—Faigi Gonönöta 32.

19. Hewisa wa tola ataʼu niha khö Gafökha?

¹⁹ So ösa niha sangumaʼö wa tenga sindruhu-ndruhu so Gafökha hegöi ira malaʼikania, so göi zangila wa sindruhu-ndruhu so ira börö me no irai larasoi samösa. Ato niha nifakao malaʼika si lö sökhi ba teʼosawuyu ira ba ngawalö nifaduhusi tödö niha me föna. Tanö böʼö, ladunö-dunö ba niha fefu zi hokha mbuda nifalua malaʼika si lö sökhi ba wametaʼu awöra. So zadöni tödö ba nidunö-dunö andre ba terou göi dödöra wanutunö ba niha böʼö. Asese sibai ataʼu niha khö Gafökha ba nidunö-dunö andrö.

20. Hewisa wa tola tatutunö ba niha walimosa Zatana?

²⁰ Angeragö daʼa—Omasi Zatana na ataʼu niha khönia. (2 Tesalonika 2:9, 10) No si falimo ia ba iʼila hewisa lala wamaelungu niha sadöni tödö ba wakelemusa  irege faduhu dödöra ba ngawalö zi lö atulö. Te latutunö hewisa dödöra me no laʼila ba larongo daʼö fefu. Na itugu latutunö daʼö, itugu lanönö-nönö wangombakha. Tatu lö omasi ita tatolo Zatana ba wanutunö salua andrö enaʼö ataʼu niha böʼö.​—Yohane 8:44; 2 Timoteo 2:16.

21. Moroi na tatutunö ndra malaʼika si lö sökhi, hadia zi sökhi si tola tatutunö?

²¹ Na so samösa nono mbanua Yehowa si no irai fao khö ndra malaʼika si lö sökhi, tatu lö omasi ia itutunö ba niha böʼö zalua andre ha enaʼö maʼiki ira. Lö moguna ataʼu nono mbanua Yehowa ba ngawalö nifalua Gafökha hegöi ira malaʼikania. Hizaʼi, moguna taʼosambuaʼö dödöda khö Yesu hegöi ba waʼabölö nibeʼe Yehowa khönia. (Heberaiʼo 12:2) Lö itutunö khö ndra nifahaʼönia Yesu fefu nifalua malaʼika si lö sökhi ha enaʼö maʼiki ira. Iʼosambuaʼö dödönia ba wangombakha turia Wamatörö Lowalangi hegöi fefu ”zahöli-höli dödö nifalua Lowalangi”.​—Halöwö Zinenge 2:11; Luka 8:1; Roma 1:11, 12.

22. Hadia gangetula nihalömö?

²² Böi olifu ita wa ohitö dödö Zatana yaʼia daʼö ba wamakiko fahuwusada khö Yehowa. Ifalua gofu hadia ia enaʼö aʼozu daʼö. Hizaʼi, no aboto ba dödöda lala niʼogunaʼö Gafökha ba tahalö gangetula ba wanimbagö fefu zoʼamakhaita ba wakelemusa. Lö ’tafonaha Gafökha’ irege tawuʼai gangetula si no tahalö. (Baso Efeso 4:27.) Sindruhu sa, na talawa Gafökha hasambalö telumöʼö ita moroi ba dandrawa nibeʼenia ba ahono dödöda me ilumöʼö ita Yehowa.​—Efeso 6:11.