1, 2. Na so gabula dödö ba wongambatö, hadia daʼö geluahania wa lö mofozu wongambatö andrö? Tutunö.

 FONGAMBATÖ andrö buala moroi khö Yehowa. Tola iʼasogö waʼomuso dödö ba zi samösa niha. Hizaʼi, dozi fongambatö oi so gabula dödö ba tola manö lö aetu-aetu gabula dödö andrö irege larasoi wa ambö laʼomasiʼö nawöra simane ba zilalö.

² Böi tokea ita na ero inötö tarasoi gabula dödö ba wongambatö. Hizaʼi, tenga daʼö geluahania wa lö mofozu wongambatöda. Niha sanaögö abula dödö fondrege zebua manö ba wongambatö, tola lasöndra lala enaʼö ifuli sökhi ba aro wongambatöra. Hana wa tola?

3, 4. Hadia manö zi tola alua ba wongambatö?

³ Fongambatö zangosambuaʼö si darua niha si faböʼö. Oi faböʼö-böʼö zomasi ba si lö omasi ira, bua gera-erara, hegöi lalara wamalua hadia ia. Tola manö faböʼö-böʼö waö-waö waʼaurira mazui si toʼölö lafalua. Moguna ginötö hegöi famorege ba zi darua niha enaʼö laʼila ba aboto ba dödöra nawöra.

⁴ Itugu numalö ginötö, tola manö faoma arörö ira  ba halöwöra zamösana irege ambö laʼameʼegö tödö nawöra. Tola manö hulö zi no fasambua ira. Hadia zanolo yaʼira enaʼö itugu ahatö khö nawöra?

5. (a) Hadia zanolo niha Keriso enaʼö itugu ahatö ia khö woʼomonia? (b) Moloʼö Heberaiʼo 13:4, hewisa zinangeania wamaigida fongambatö?

⁵ No ibeʼe Yehowa mene-mene si sökhi sanolo yaʼugö ba foʼomou enaʼö itugu ahatö ami khönia hegöi khö nawömi zamösana. (Zinunö 25:4; Yesaya 48:17, 18) Imane khöda, ”Dozi niha enaʼö laʼosinangegö wangowalu.” (Heberaiʼo 13:4) Na so menaʼö gama-gama niʼame’egöda tödö, tatu öʼomasiʼö sibai ba ebua mbölinia ba wamaigimö. Ölumöʼö ba lö öʼamualagö ia ba niha böʼö. Omasi Yehowa na simanö göi dödöda ba wongambatö.

6. Hadia niwaʼö Mataiʼo 19:4-6 sanandrösa ba wamaigi Yehowa fongambatö?

⁶ Yehowa zamasindro fongambatö siföföna. Imane Ononia, Yesu, ”Hadia lö irai mibaso wa Lowalangi zamazökhi niha, he ira matua hegöi ira alawe iʼotarai mböröta? Imane Lowalangi, ’Andrö iröi dania namania niha awö ninania, ba falemba dödönia khö ngambatönia ba ha sambua boto ira.’ Andrö, tenga saʼae darua ira, hizaʼi ha sambua boto. Börö daʼö, hadia niʼosambuaʼö Lowalangi tebai ifabali niha.” (Mataiʼo 19:4-6) Iʼotarai ba wamobörö, no ohitö dödö Yehowa na aro wongambatö. Omasi ia na ahatö zi sambua ösi nomo, omuso dödöra ba ohahau dödöra ba waʼauri.

7. Hewisa enaʼö tola laʼaroʼö wongambatöra foʼomo ira matua hegöi ira alawe?

⁷ Iadaʼa, itugu oya gabula dödö ba fanandraigö ba wongambatö moroi ba zilalö. Itaria, na abua sibai wanandraigö salua, lamane tödöra wa tebai laʼoʼozui wongambatöra irege awuwu ira. Hizaʼi, tetolo ita na taʼila lala wangera-ngera Yehowa sanandrösa ba wongambatö.​—1 Yohane 5:3.

8, 9. (a) Hawaʼara zinangeania taʼoʼö wanuturu lala nibeʼe Yehowa sanandrösa ba wongambatö? (b) Hewisa wangoromaʼöda wa taʼosinangegö sibai wongambatöda?

⁸ Si sökhi khöda wanuturu lala nibeʼe Yehowa. Simane niʼilada, iʼamenesi ita, ’Enaʼö taʼosinangegö wangowalu.’ (Heberaiʼo 13:4; Zangombakha 5:3) Na taʼoʼö wanuturu lala nibeʼe Yehowa hewaʼae abua wamalua yaʼia, hasambalö tatema mbua.​—1 Tesalonika 1:3; Heberaiʼo 6:10.

 ⁹ Börö me taʼosinangegö sibai wongambatöda, tatimbagö gamuata mazui fehede si tola mamakiko yaʼia. Dataforege enaʼö aro gamakhaitada khö woʼomoda. Hewisa lalania?

10, 11. (a) Hadia gabula dödö sebua salua ba zi hauga fongambatö? (b) Hana wa moguna tatatugöi lagu wahuhuosada khö woʼomoda?

¹⁰ Oya lala nifalua zi samösa niha ba wangafökhöiʼö tödö woʼomonia. Taʼila wa dozi niha Keriso tebai ibözi mazui ifakao woʼomonia. Hizaʼi, tola manö taʼafökhöiʼö dödönia ba wehededa. Tola tobali föda wehededa. Imane samösa ira alawe, ”Ibözi ndraʼo foʼomogu faoma fehede safökhö. Hewaʼae lö oroma zesokho ba mbotogu, hizaʼi afökhö sibai dödögu me asese ibeʼe wehede sagafökhö, simane ’Samusi tödögu ndraʼugö!’ ba ’Lö gunau!’” Itutunö samösa ira matua wa asese lö iʼosinangegö ia foʼomonia ba wehede ba ifatörö-törö döinia foʼomonia. Imane, ”Lö uʼila uhaogö wanutunö mangawuli fehedenia khögu. Daʼa mbörö wa lö omasido fahuhuo khönia ba uradö ndraʼo ba naha wohalöwö. Ahono dödögu ba daʼa moroi na so ndraʼo ba nomo.” Falelesa, fehede si lö sökhi, hegöi si lö tefaudu, daʼö zangaʼasogö faʼafökhö dödö ba no asese alua iadaʼa.

¹¹ Na faoma lawaʼö wehede si lö sökhi khö nawöra, daʼa zangaʼasogö faʼafökhö dödö irege abua wanayaigö yaʼia. Sindruhu-ndruhu wa tenga daʼa nitötöna Yehowa khö woʼomo ira matua hegöi ira alawe. Hizaʼi, itaria lö öʼodödögö wangafökhöiʼö tödö woʼomou. Te ömane  tödöu wa sökhi gamuatau khö woʼomou, hizaʼi hadia nirasoinia? Na afökhö dödönia ba wehedemö, hadia öbulöʼö daʼö?​—Galatia 5:15; baso Efeso 4:31.

12. Hadia zi tola mamakiko fahuwusa niha si no mongambatö khö Yehowa?

¹² Iʼila-ila Yehowa hewisa lagu wahuhuosada khö woʼomoda gofu hezo so ita, he ba nahia sato niha, mazui na ha daru-darua ita. (Baso 1 Fetero 3:7.) Ifasugi ba dödöda Yakobo 1:26, ”Na so zangumaʼö tödönia samosumange Lowalangi ia, ba na lö itaha lelania, no ilimo ia ba zaya-zaya gölö wamosumangenia Lowalangi.”

13. Hadia nasa mbörö wa tola iʼafökhöiʼö dödö woʼomonia niha?

¹³ So lala tanö böʼö ba zi no mongambatö enaʼö itugu  laʼameʼegö tödö nawöra. Duma-dumania, hewisa dödö woʼomou na abölö oya ginötöu ba niha böʼö? Hewaʼae sökhi gohitö dödöu, duma-dumania na fao ndraʼugö ba wanuriaigö mazui ba wanolo niha böʼö, hadia lö afökhö dödö woʼomou ba daʼö? Imane samösa foʼomo ira alawe niha Keriso, ”Afökhö dödögu me iʼameʼegö tödö dalifusöda ira alawe ba mbanua niha Keriso foʼomogu ba oya ginötönia ba daʼö. Hulö zi lö eluaha saʼae ndraʼo.”

14. (a) Hadia zindruhu sinangea tafahaʼö ita ba 1 Moze 2:24? (b) Hadia zinangea tasofu khöda samösa?

¹⁴ Yaʼita niha Keriso, so noro dödöda khö zatuada hegöi khö ndra talifusöda ba mbanua niha Keriso si so yaʼita. Hizaʼi, na no mangowalu ita, si oföna sibai taʼonorogö tödö yaʼia daʼö foʼomoda. Imane Yehowa wa falemba dödö woʼomo ira matua khö ngambatönia. (1 Moze 2:24) Abölö taʼameʼegö tödö nirasoi woʼomoda. Sofu khöu samösa, ’Hadia no uʼameʼegö tödö woʼomogu, ubeʼe ginötögu awö waʼomasigu sinangea itema?’

15. Na no mongambatö zi samösa niha Keriso, hana wa böi talafo ahatö ia ba niha böʼö moroi na khö woʼomonia samösa?

¹⁵ Na abölö ahatö ita ba niha böʼö moroi khö woʼomoda, tola fawuka wongambatöda. Tola manö tumbu ba dödöda wangisö ba faʼomasi ba niha böʼö. (Mataiʼo 5:28) Tola tedou waʼomasi andrö ba öfalua hadia ia irege lö öfosumange wongambatöu.

16. Hadia goroisa nibeʼe Zura Niʼamoniʼö sanandrösa ba wongambatö?

¹⁶ Me no aefa iwaʼö Sura Niʼamoniʼö, ”Dozi niha enaʼö laʼosinangegö wangowalu”, imane nasa, ”Böi taʼunö  waʼorudu andrö, börö me Lowalangi zanguhuku niha sohorö hegöi sohoröni donga zodonga.” (Heberaiʼo 13:4) Ngawua wehede ”waʼorudu”, manandrösa daʼö ba zi toʼölö lafalua niha si no mangowalu. (Gamaedola 5:18) Hewisa wangoromaʼöda wa lö taʼosiwawöi daʼö ba lö tataʼunöisi?

17. (a) Hewisa wamaigi niha gulidanö iadaʼa fohoröni donga zodonga? (b) Hewisa zinangeania famaigi niha Keriso fohoröni donga zodonga?

¹⁷ Ba ginötö andre, so ösa niha sangumaʼö wa lö fasala na faröi ira khö woʼomora. Böi tatehegö ifaelungu ita wangera-ngera simane daʼö. Iforomaʼö Yehowa wa sindruhu-ndruhu iʼogorofi gamuata wohorö hegöi fohoröni donga zodonga. (Baso Roma 12:9; Heberaiʼo 10:31; 12:29) Na orudu ita ba zi tenga foʼomoda, no tataʼunöisi wongambatöda. No taforomaʼö wa lö tafosumange nifakhoi Yehowa, ba tafakiko wahuwusada khönia. Andrö, dataʼanemaiʼö tatimbagö gamuata daʼö awö ngawalö zi tola mondrönisi yaʼita ba wohoröni donga zodonga. Moguna göi tatimbagö wangera-ngera si lö faudu sanandrösa ba niha böʼö.​—Yobi 31:1.

18. (a) Hana wa fagölö ira wohoröni donga zodonga ba wamosumange lowalangi faya? (b) Hewisa wamaigi Yehowa fohoröni donga zodonga?

¹⁸ Moloʼö Oroisa Moze ba ndraono Gizaraʼeli me föna, no horö sebua na so zohoröni donga zodonga, ba fagölö daʼö na mufosumange lowalangi faya. Lahuku mate niha samalua daʼö. (3 Moze 20:2, 10) Hana wa fagölö ira wohoröni donga zodonga ba wamosumange lowalangi faya? Na so ndraono Gizaraʼeli samosumange lowalangi faya, no ifakiko mbuʼusa linia sanandrösa ba waʼalöfaröi khö Yehowa. Na so zohoröni  donga zodonga, no ifakiko mbuʼusa linia sanandrösa ba waʼalöfaröi khö woʼomonia. (2 Moze 19:5, 6; 5 Moze 5:9; baso Maleakhi 2:14.) Ba daʼa taʼila wa iʼotarai me föna, no horö sebua föna Lowalangi na so zohoröni donga zodonga.

19. Hadia zanolo yaʼita enaʼö lö tahoröni ndronga zodonga?

¹⁹ Hewisa göi ba ginötö andre? Lö tebulö wamaigi Yehowa fohoröni donga zodonga hewaʼae tenga barö Goroisa Moze so ita. Börö me lö omasi ita tafosumange lowalangi faya, andrö göi lö faröi ita khö woʼomoda. (Zinunö 51:3, 6; Kolose 3:5) Na faröi ita, lö tafosumange wongambatöda hegöi Lowalangida Yehowa.​—Faigi Gonönöta 26.

20. Hadia mbuania na so waʼatua-tua ba wongambatö?

²⁰ Hewisa enaʼö tola öʼaroʼö wongambatöu? Imane Taromali Lowalangi, ”Faʼatua-tua wangotomosi nomo, ba era-era ba dödö wangaronia.” (Gamaedola 24:3) Tola manö lö nini-nini yomo ba nomo, hulö zi lö niha-niha, tola göi so waʼomasi, faʼohahau dödö, ba faʼahono dödö. Simanö göi ba wongambatö. Niha satua-tua hasambalö iforege enaʼö so waʼahono dödö ba nösi nomonia, ohahau ba owua-wua dödöra.

21. Hewisa waʼaboto ba dödö möi fangaroʼö fongambatö?

²¹ Sanandrösa ba nomo, imane Sura Niʼamoniʼö, ”Ba faʼaboto ba dödö wamoʼösi naha girö-girö, girö-girö sebua böli ba girö-girö omasiö.” (Gamaedola 24:4) Fefu wamahaʼö nitemau ba Daromali Lowalangi tola tobali fanolo enaʼö itugu sökhi wongambatöu. (Roma 12:2; Filifi 1:9) Na fao ami woʼomou wombaso Sura Niʼamoniʼö  hegöi publikasida, mitutunö hadia manö zinangea mifalua ba zi no mifahaʼö ami andrö. Miʼalui lala ba wangoromaʼö faʼomasi, famosumangemi awömi, faʼasökhi dödö hegöi fangera-ngera satulö. Andrö wanolo moroi khö Yehowa enaʼö tola ödouʼö gamuata sangaʼaroʼö fongambatöu ba sanolo yaʼugö ba wondrouʼö faʼomasi khö woʼomou.​—Gamaedola 15:16, 17; 1 Fetero 1:7.

22. Hana wa moguna taʼomasiʼö, taʼameʼegö tödö, ba tafosumange woʼomoda?

²² Moguna taforege wamalua hadia ia khö woʼomoda si fao faʼomasi, foʼameʼegö tödö, hegöi famosumange. Ba hasambalö sökhi ba aro wongambatöda. Ba sabölö moguna, taʼomusoiʼö dödö Yehowa.​—Zinunö 147:11; Roma 12:10.