Teʼodane-dane goroisa Lowalangi ba goi-goinia. Goi-goi andrö dane-dane zindruhu si tesöndra ba Zura Niʼamoniʼö. Daʼö zanolo yaʼita enaʼö aboto ba dödöda gera-era hegöi ösi dödö Lowalangi ba ngawalö hadia ia. Tola göi tahalö gangetula si sökhi ba waʼaurida ba tafalua zatulö. Mendrua manö na lö hadöi nizara-zara ba goroisa Lowalangi hadia zinangea tafalua, goi-goi andrö zanolo yaʼita.

▸ Faza 1, ngenoli si-8

Foloʼö li Yehowa eluahania faʼaoha gölö ba wamalua fefu niʼandrönia khöda. Omasi Yehowa na taʼoʼö niwaʼönia börö waʼomasida khönia. (1 Yohane 5:3) Na taʼomasiʼö ba faduhu dödöda khö Lowalangi, tatu taʼoʼö mene-menenia ba ngawalö zalua. Hewaʼae abua, hasambalö tafalua. Sökhi lua-luania khöda na taʼoʼö li Yehowa börö me ifahaʼö ita lala enaʼö mofozu waʼaurida iadaʼa, ba ifabuʼu wa oya howu-howu nitemada dania ba zi so föna.​—Yesaya 48:17.

▸ Faza 1, ngenoli si-10

No itehegö khöda Yehowa wamili hadia zomasi ita tafalua, mazui ba wangai angetula samösa. Lö ifazökhi ita simane robot. (5 Moze 30:19; Yosua 24:15) Börö me no mutehegö khöda wamalua somasi ita, tola tahalö gangetula si sökhi. Hizaʼi, na lö mangelama ita, tola manö tahalö gangetula si lö tefaudu. Tafili hadia zomasi ita tafalua, eluahania moguna tahalö gangetula ba wangoromaʼö faʼalöfaröi khö Yehowa ba taforomaʼö wa sindruhu-ndruhu taʼomasiʼö ia.

▸ Faza 1, ngenoli si-12

No ibeʼe Yehowa gamakhoita mazui fanuturu lala sanandrösa ba gamuata hegöi nifaluada. Ba Zura Niʼamoniʼö, tola taʼila gamakhoita  andrö hegöi lala wanolonia yaʼita enaʼö sökhi waʼaurida. (Gamaedola 6:16-19; 1 Korindro 6:9-11) Fanuturu lala andre zanolo yaʼita ba wangiʼila hezo zatulö mazui si sala moloʼö famaigi Lowalangi. Daʼö zamahaʼö yaʼita ba waʼomasi, ba wangai angetula si tefaudu, hegöi lala enaʼö sökhi gamuatada ba niha. Hewaʼae na itugu tekiko gamakhoita niha gulidanö sanandrösa ba gamuata, lö tebulö gamakhoita Yehowa. (5 Moze 32:4-6; Maleakhi 3:6) Na taʼoʼö daʼö, telumöʼö ita moroi ba waʼatekiko mboto hegöi era-era.

▸ Faza 1, ngenoli si-17

Tödöda side-ide zotatugöi hezo zatulö ba si lö atulö. No ibeʼe khöda Yehowa dödö side-ide ero samö-samösa. (Roma 2:14, 15) Enaʼö tola sökhi wohalöwö dödöda side-ide, moguna tafahaʼö ia moloʼö gamakhoita Yehowa sanandrösa ba gamuata. Daʼö dania zanolo yaʼita ba wangai angetula si tefaudu ba zomasi Lowalangi. (1 Fetero 3:16) Ifangelama ita na edöna tahalö gangetula si fasala, mazui ihuku ita na no tafalua zi lö sökhi. Tola manö itahi-tahigö ita tödöda side-ide, hizaʼi tola teʼaroʼö ia mangawuli börö wanolo Yehowa. Tödö side-ide si lö sinegu iʼasogö waʼohahau dödö ba tefosumange waʼaurida.

▸ Faza 2, ngenoli si-3

Fangataʼufi Lowalangi eluahania taʼomasiʼö ba tafosumange ia soroi ba dödö, lö tafalua hadia zi lö omasi ia. Daʼö zanolo yaʼita wamalua si sökhi ba tatimbagö zi lö sökhi. (Zinunö 111:10) Ifarou ita enaʼö tahaogö tafondrondrongo fefu niwaʼö Yehowa. Itolo ita wamalua fefu nifabuʼuda khönia börö me tafosumange sibai ia. Fangataʼufi Lowalangi andrö molua-lua ia ba lala wangera-ngerada, amuatada ba niha böʼö, hegöi angetula nihalöda ero maʼökhö.

▸ Faza 2, ngenoli si-9

Famalalini era-era eluahania faniasa soroi ba dödö börö me no tafalua zi lö sökhi. Abu sibai dödö niha sangomasiʼö Lowalangi na laʼila no lafalua zi fatimba ba goi-goinia. Na tafalua zi lö sökhi, moguna taʼandrö khö Yehowa enaʼö iʼefaʼö zalada moloʼö höli nibeʼe Yesu. (Mataiʼo 26:28; 1 Yohane 2:1, 2) Na tafalalini gera-erada soroi ba dödö ba taböhöli wamalua si lö sökhi, tola faduhu dödöda wa iʼefaʼö zalada Yehowa. Lö moguna tatörö-törö tödöda saʼae zala si no tafalua ba zilalö. (Zinunö 103:10-14; 1 Yohane 1:9; 3:19-22) Moguna taforege wamahaʼö yaʼita moroi ba zala nifaluada, tabulöʼö gera-erada si fasala, ba tafaudugö waʼaurida moloʼö gamakhoita Yehowa.

▸ Faza 2, ngenoli si-18

Na so zamalua horö sebua, lö ifalalini gera-erania, ba lö iʼoʼö gamakhoita Yehowa, tebai saʼae faböbö ia ba mbanua niha Keriso. Moguna laʼefasi ia. Na so niʼefasi ba mbanua niha Keriso, tebai fariawö ba fahuhuo ita khönia. (1 Korindro 5:11; 2 Yohane 9-11) Amakhoita andre möi folumöʼö döi Yehowa hegöi banua niha Keriso. (1 Korindro 5:6) Daʼa göi no sambua fotu ba niha samalua horö, sanolo yaʼia ba wamalalini era-era irege ifuli ia khö Yehowa.​—Luka 15:17.

▸ Faza 3, ngenoli si-19

Iʼomasiʼö ba itolo ita Yehowa. Andrö wa iʼogunaʼö Zura Niʼamoniʼö hegöi niha sangomasiʼö Lowalangi ba wololohe tangada, ba wameʼe fanuturu lala awö mene-mene. Börö me lö moʼahonoa ita, andrö wa moguna sibai khöda wanolo andre. (Yeremia 17:9) Na tahaogö tafondrondrongo niha niʼogunaʼö Yehowa ba wololohe tangada, daʼö dandra wa tafosumange ba taʼoʼö linia.​—Heberaiʼo 13:7.

▸ Faza 4, ngenoli si-2

Börö me lö moʼahonoa ita, aoha khöda wangoromaʼö fakhögusa ba fayawasa. Hizaʼi, itötöna khöda Yehowa enaʼö taforomaʼö wangide-ngideʼö. Sasesenia, tafahaʼö ita wangoromaʼö fangide-ngideʼö na tafaedogö ita khö Yehowa ba taʼila hawaʼide-ide ita fönania. (Yobi 38:1-4) Sabölö moguna tanö böʼö, tafahaʼö ita ba woʼameʼegö tödö niha böʼö ba taʼangeragö zi sökhi khöra moroi na khöda samösa. Na so zi fayawa, faduhu dödönia wa abölö sökhi ia moroi khö nawönia. Na so wangide-ngideʼö ba niha, lö ilimo ia ba wamareso tödönia ba iʼila hadia zi tola hegöi soʼamböta ia. Lö ataʼu ia wamaduhuʼö salania, iʼandrö waʼebolo dödö, ba itema mene-mene hegöi fotu. Iʼodaligö Yehowa ba iʼoʼö wanuturu lala nibeʼenia.​—1 Fetero 5:5.

▸ Faza 4, ngenoli si-4

Kuaso andrö faʼasinangea ba wameʼe oroisa hegöi ba wangai angetula. Ha Yehowa zabölö ebua kuaso ba zorugo hegöi ba gulidanö. Börö me yaʼia zamazökhi fefu hadia ia, yaʼia wondrege zabölö ba mbanua si yawa awö danö. Lö tebulö iʼogunaʼö kuasonia andrö ba wanolo niha. No ibeʼe noro dödö ba zi hadauga niha ba wondrorogö yaʼita. Duma-dumania, no tebeʼe ösa kuaso khö ndra satua, satua sokubaloi, hegöi ira samatörö, ba itötöna khöda Yehowa enaʼö falulu fohalöwö ita khöra. (Roma 13:1-5; 1 Timoteo 5:17) Hizaʼi, na fatimba huku nifazökhi niha ba goroisa Lowalangi, taʼoʼö khö Lowalangi moroi na taʼoʼö niha gulidanö. (Halöwö Zinenge 5:29) No tafosumange gangetula nihalö Yehowa na taʼosinangegö kuaso nibeʼenia khö ndra sondröniaʼö.

▸ Faza 4, ngenoli si-7

Iʼogunaʼö ndra satua sokubaloi Yehowa yaʼia daʼö ira talifusöda si no toʼölö, ba wondrorogö banua niha Keriso. (5 Moze 1:13; Halöwö Zinenge 20:28) Yaʼira zanolo yaʼita enaʼö lö tebulö aro wahuwusada khö Yehowa, ba tafosumange ia si fao faʼahono dödö ba faʼatoföfö.  (1 Korindro 14:33, 40) Tefataro ndra satua sokubaloi andrö faoma eheha niʼamoniʼö na lafalua gamakhoita nihonogöi khöra ba Zura Niʼamoniʼö. (1 Timoteo 3:1-7; Tito 1:5-9; 1 Fetero 5:2, 3) Faduhu dödöda ba organisasi Lowalangi ba tatuhini ia enaʼö tola falulu fohalöwö ita khö ndra satua sokubaloi si fao faʼomuso dödö.​—Zinunö 138:6; Heberaiʼo 13:17.

▸ Faza 4, ngenoli si-8

No ibeʼe halöwö khö ndra satua Yehowa ba wondrorogö iraonora hegöi ösi nomo. Hizaʼi, itutunö Sura Niʼamoniʼö wa foʼomo ira matua si tobali högö yomo ba nomo. Na lö hadöi ama, ina zi tobali högö yomo ba nomo. Halöwö högö yomo ba nomo yaʼia daʼö wangaʼasogö soguna, nukha, hegöi nahiara. Moguna iʼameʼegö tödö wondröniaʼö ösi nomonia ba wamosumange Yehowa. Duma-dumania, lö zi lö ifaigi enaʼö lö laböhöli weʼamöi ba gangowuloa, ba wanuriaigö, ba faoma lafahaʼö ira ba Zura Niʼamoniʼö. Yaʼia göi zangai angetula yomo ba nomo. Lö tebulö iʼoʼö duma-duma Yesu, sökhi gamuatania, lö fatandro, lö ibözi mazui ifakao nösi nomonia. Buania, teʼasogö nahia safönu faʼomasi ba nomo, ba fefu nösi nomo larasoi waʼahono dödö ba teʼaroʼö wahuwusara khö Yehowa.

▸ Faza 4, ngenoli si-12

Boto Solohe andre ngawawa niha si so fanötöna auri ba zorugo, niʼogunaʼö Lowalangi ba wondröniaʼö halöwö nono mbanuania. Me abad siföföna, iʼogunaʼö mboto solohe Yehowa ba wondröniaʼö banua niha Keriso ba wamosumange Lowalangi hegöi ba halöwö fanuriaigö. (Halöwö Zinenge 15:2) Ba ginötö daʼa, ngawawa ndra talifusöda si farahu ba Mboto Solohe andre labeʼe wanuturu lala ba nono mbanua Lowalangi, yaʼira zolohe tanga ba solumöʼö. Ero lahalö gangetula ira talifusöda andre, laʼodaligö Daromali Lowalangi hegöi eheha niʼamoniʼö. Ngawawa niha nibayoini andre ifotöi ira Yesu ’sawuyu si lö faröi ba satua-tua’.​—Mataiʼo 24:45-47.

▸ Faza 4, ngenoli si-15

Tola manö laʼandrö khö dalifusöda ira alawe wangai halöwö si toʼölö ifalua talifusöda ira matua ba mbanua niha Keriso. Na ifalua halöwö daʼa, moguna ifake mbalu-balu högö si tobali tandra wa ifosumange gamakhoita Yehowa. Hizaʼi, lö ero inötö manö ifake mbalu-balu högö. Duma-dumania, ifake mbalu-balu högö talifusöda ira alawe na so woʼomonia mazui talifusöda ira matua si no tebayagö idanö na inötö idöniaʼö wamahaʼö ba Zura Niʼamoniʼö.​—1 Korindro 11:11-15.

▸ Faza 4, ngenoli si-17

Na lö faʼawö ita ba gulidanö, tatimbagö wefao ba politik. (Yohane 17:16) Ono mbanua Yehowa, latuhini Wamatörö Lowalangi. Lö faʼawö ita ba gulidanö andre simane nifalua Yesu.

Iʼandrö khöda Yehowa enaʼö ’tafondrondrongo li ndra samatörö hegöi sondröniaʼö’. (Tito 3:1, 2; Roma 13:1-7) Hizaʼi, imane göi ba goroisa Lowalangi wa tebai tabunu niha. Andrö, lö fao zi samösa niha Keriso ba wasuwöta börö dödönia side-ide. Na tebeʼe ginötö ba niha Keriso wangai halöwö khö ndra famareta börö me itimbagö halöwö tobali saradadu, moguna iʼangeragö hadia itehegö khönia tödönia side-ide wamalua daʼö.

Ha Yehowa nifosumangeda, börö me yaʼia Zomböi yaʼita. Hewaʼae taʼosinangegö ngawalö gambara mazui famaedo niʼogunaʼö ero sambu-sambua soi, lö tabeʼe yawa dangada ba mandrera mazui taʼanunöisi zinunö famosumange soi. (Yesaya 43:11; Danieli 3:1-30; 1 Korindro 10:14) Baero daʼö, ero samösa ono mbanua Yehowa, lahalö gangetula lö fao ba kampanye politik mazui lö tafili niha sedöna tobali samatörö, börö me no tobali ita ono mbanua barö wamatörö Lowalangi.​—Mataiʼo 22:21; Yohane 15:19; 18:36.

▸ Faza 5, ngenoli si-2

Ulidanö andre ifaehagö lala wangera-ngera Zatana. No si toʼölö lala wangera-ngera daʼa ba niha si lö mangomasiʼö ba si lö moloʼö Yehowa  mazui niha sanawö amakhoitania. (1 Yohane 5:19) Fangera-ngera hegöi amuata simane daʼö zangoromaʼö wa laʼokhögö geheha gulidanö. (Efeso 2:2) Lafaduhuʼö ono mbanua Yehowa wa tenga eheha gulidanö andre zamatörö yaʼira. (Efeso 6:10-18) Taʼomasiʼö lala Yehowa ba taforege wangodaligö lala wangera-ngerania.

▸ Faza 5, ngenoli si-7

Fondröi sindruhu yaʼia daʼö folawa sindruhu sanandrösa ba Zura Niʼamoniʼö. Niha sondröi sindruhu lalawa Yehowa hegöi Yesu si no mufataro tobali Razo ba Wamatörö Lowalangi, ba ladönisi göi dödö niha böʼö wefao khöra. (Roma 1:25) Laʼalui lala enaʼö so waʼaombö dödö ba niha samosumange Yehowa. So ösa niha Keriso me föna si no mondröi sindruhu, simanö göi ba ginötöda andre. (2 Tesalonika 2:3) Niha si lö faröi khö Yehowa lö fariawö ira ba niha si no mondröi sindruhu. Böi tatehegö adöni dödöda mazui lafaso ita ba wombaso mazui ba wamondrondrongo bua gera-era niha sondröi sindruhu. Lö faröi ita khö Yehowa ba ha yaʼia nifosumangeda.

▸ Faza 5, ngenoli si-9

Barö Goroisa Moze, laʼandrö iraono Gizaraʼeli enaʼö iʼefaʼö horöra Yehowa. Laʼohe zumange fangatulö ba gosali, simane gandru, fanikha, hegöi urifö. Daʼa zamasugi ba dödöra wa hasambalö iʼefaʼö horöra Yehowa, he horö soira, hegöi horöra samösa. Hizaʼi, me no ibeʼe waʼaurinia Yesu tobali höli ba horöda, lö saʼae tabeʼe zumange fangatulö andre. No ibeʼe Yesu zumange soʼahonoa ”sakali ba zi sagötö faʼara”.​—Heberaiʼo 10:1, 4, 10.

▸ Faza 7, ngenoli si-6

Barö Goroisa Moze, latehegö ba niha wemanga nagole gurifö. Laʼandrö göi khöra enaʼö labeʼe zumange urifö. (3 Moze 1:5, 6) Hizaʼi, lö  irai itehegö ba nono mbanuania Yehowa ba wamakao urifö. (Gamaedola 12:10) Ba Goroisa Moze, so gamakhoita ba wolumöʼö urifö moroi ba waʼateʼala. Muʼandrö ba ndraono Gizaraʼeli enaʼö lahaogö wondrorogö uriföra.​—5 Moze 22:6, 7.

▸ Faza 7, ngenoli si-6

Fraksi-fraksi darah. Tefazökhi ndro moroi ba zi öfa faosatö ndro—sel darah merah, sel darah putih, trombosit, hegöi plasma. Si öfa faosatö daʼa tola tobali ia faosatö si gide-ide, mufotöi ia fraksi-fraksi darah. *

Latimbagö ira niha Keriso transfusi moroi ba ndro maʼafefu mazui si öfa faosatönia. Hizaʼi, hadia tola tatema fraksi-fraksi darah? Lö nizara-zara Zura Niʼamoniʼö wanutunö khöda. Andrö, dozi niha Keriso moguna lahalö gangetula si teʼodane-dane ba dödöra side-ide si no tefahaʼö ba Zura Niʼamoniʼö.

So ösa niha Keriso sanimbagö fefu fraksi-fraksi darah. Tola manö lawaʼö wa ba Goroisa Lowalangi, no muʼandrö ba ndraono Gizaraʼeli wanuwagö ”ba danö” fefu ndro gurifö.​—5 Moze 12:22-24.

Faböʼö gangetula nihalö niha böʼö. Itehegö khöra tödöra side-ide ba wanemaʼö ösa fraksi-fraksi darah. Tola manö lawaʼö wa fraksi-fraksi si gide-ide andre tenga faʼauri niha si no muhalö do.

Fatimbaisi wanofu-nofu andre na öhalö gangetula sanandrösa ba fraksi-fraksi darah:

• Hadia aboto ba dödögu wa fanimbagö fraksi-fraksi darah andrö eluahania lö utema ösa dalu-dalu sanenawa fökhö mazui sanolo yaʼo enaʼö tebato waʼaduwa ndrogu?

•   Hewisa wanutunögu khö doto na utimbagö mazui utema fazambua mazui fefu fraksi-fraksi darah?

Lala wameʼe dalu-dalu. Yaʼita niha Keriso, lö tabeʼe mazui taʼiröʼö ndroda mato hauga migu fatua lö mufalua operasi. Hizaʼi, so ösa lala wamadöhö fökhö sangogunaʼö doda samösa. Ero samösa niha Keriso, moguna ihalö gangetula hadia zinangea mufalua ba ndronia sagötö muʼoperasi ia, na ifafaresoʼö ia khö ndra doto, mazui na itema dalu-dalu. Na no mufalua daʼö, tola manö muheta fefu ndronia andrö moroi ba mbotonia.​—Enaʼö öʼila danö böʼönia nasa, faigi Menara Pengawal, 15 mbaŵa si Fulu 2000, ngaʼörö 30-31.

Duma-dumania, so sambua lala wameʼe dalu-dalu nifotöi hemodilusi, yaʼia daʼö fangai do niha sofökhö moroi ba mbotonia fatua lö mufalua operasi, ba labeʼe khönia dalu-dalu enaʼö ifuli mangali ndro si no muhalö andrö ba mbotonia. Na no aefa operasi, mufuli ndro daʼö ba mbotonia.

 Lala tanö böʼö yaʼia daʼö fangorifi sel. Sagötö muʼoperasi niha sofökhö, muʼowuloi ndro saheta moroi ba mbotonia, lasasai ba lafangawuli zui ba mbotonia sagötö muʼoperasi mazui lö ara me no aefa laʼoperasi.

Tola manö faböʼö-böʼö lala nifalua ndra doto ba wamadöhö fökhö. Andrö, moguna aboto ba dödö zi samösa niha Keriso hadia nifalua ba ndronia fatua lö laʼoperasi ia, mufalua tes medis, mazui na itema dalu-dalu.

Na öhalö gangetula sanandrösa ba lala wamadöhö fökhö sangogunaʼö domö samösa, angeragö wanofu-nofu daʼa:

• Na laheta ösa ndrogu moroi ba mbotogu ba tebato wofanönia ba zi sabata, hadia itehegö khögu tödögu side-ide na umane, do daʼö no faʼaurigu samösa irege lö moguna mufaduwa ia ”ba danö”?​—5 Moze 12:23, 24.

• Sagötö utema dalu-dalu, hadia lö itegudo tödögu side-ide si no tefahaʼö ba Zura Niʼamoniʼö na muhalö ösa ndrogu, muʼehaogö, ba mufangawuli zui ba mbotogu?

• Hadia aboto ba dödögu, na utimbagö fefu lala wameʼe dalu-dalu sangogunaʼö dogu eluahania utimbagö wamareso do, hemodialisis, mazui fangogunaʼö mesin pengganti fungsi jantung dan paru (heart-lung bypass machine)?

Fatua lö tahalö gangetula sanandrösa ba fraksi-fraksi darah hegöi lala ba wamadöhö fökhö sangogunaʼö doda samösa, moguna mangandrö ita khö Yehowa ba taʼalui wanuturu lala ba publikasi. (Yakobo 1:5, 6) Aefa daʼö, taʼogunaʼö dödöda side-ide si no tefahaʼö ba  Zura Niʼamoniʼö ba wangai angetula. Böi tasofu ba niha böʼö hadia nifaluara na alua khöra zalua khöda. Ba böi tatehegö na yaʼira zangai angetula khöda.​—Roma 14:12; Galatia 6:5.

▸ Faza 7, ngenoli si-11

Enaʼö taʼokhögö gamuata sohau-hau, moguna tafalua zi sökhi ba taforomaʼö mbua-bua satulö föna Lowalangi. Oroma daʼa ba niʼera-erada, fehede, hegöi nifaluada. Iʼandrö khöda Yehowa enaʼö tatimbagö gamuata wohorö mazui ngawalö zogoro ita. (Gamaedola 1:10; 3:1) Moguna tahalö gangetula ba woloʼö amakhoita Yehowa sohau-hau, hewaʼae lö si tetandraigö ita wamalua hadia ia zi fasala. Böi tebulö taʼandrö wanolo moroi khö Lowalangi enaʼö so khöda wangera-ngera sohau-hau ba moguna tahalö gangetula wanimbagö amuata wohorö.​—1 Korindro 6:9, 10, 18; Efeso 5:5.

▸ Faza 8, ngenoli si-11

Si farahu ba gamuata si lö faʼaila yaʼia daʼö fehede mazui famalua hadia ia zi fatuwu ba gamakhoita Lowalangi ba sangoromaʼö amuata si lö mangila wetahögö. Niha samalua daʼa lö ifosumange goroisa Lowalangi. Na so zi fasala börö wamalua amuata si lö faʼaila andre, lafatunöisi daʼa ira panitia pengadilan. Faʼaraʼiö yaʼia daʼö ngawalö gamuata saekhu ba horö. So ösa gamuata si raʼiö si tebai muʼaohasi ba dödö irege tola manö mufasindro panitia pengadilan ba mbanua niha Keriso.​—Galatia 5:19-21; Efeso 4:19; enaʼö öʼila nasa danö böʼö, faigi ”Pertanyaan Pembaca” ba Menara Pengawal 15 mbaŵa si Fitu 2006.

▸ Faza 9, ngenoli si-7; Faza 12, ngenoli si-10

Itehegö Yehowa na orudu woʼomo ira matua khö woʼomonia ira alawe, daʼö dandra waʼomasira si lö raʼiö khö nawöra. Hizaʼi, na ifalua  masturbasi zi samösa niha, mazui ibaya-baya zaila ia enaʼö ahono dödönia, no iʼogunaʼö waʼorudu andrö ba zi raʼiö. Tola möi famakiko fahuwusania daʼa khö Yehowa. Iʼasogö gisö-isö dödö selungu hegöi fangera-ngera si fasala sanandrösa ba waʼorudu. (Kolose 3:5) Na so zi toʼölö mamalua amuata si raʼiö andre ba omasi ia wamöhöli yaʼia, böi irai awuwu ia hewaʼae abua. (Zinunö 86:5; 1 Yohane 3:20) Na alua khöu daʼa, andrö wanolo khö Yehowa soroi ba dödö. Timbagö wamaigi pornografi, börö me daʼa zondrönisi yaʼugö ba wangera-ngera si raʼiö. Tutunö daʼa khö ndra satuamö si no tobali niha Keriso, mazui si fahuwu khöu si no aro ba wamati ba samosumange oroisa Yehowa. (Gamaedola 1:8, 9; 1 Tesalonika 5:14; Tito 2:3-5) Yafaduhu dödöu wa ifaigi-faigi wamorege nifaluamö andrö Yehowa enaʼö lö tebulö öʼokhögö gamuata sohau-hau ba iʼandrö khöu saohagölö.​—Zinunö 51:19; Yesaya 1:18.

▸ Faza 9, ngenoli si-9

Na töra samösa woʼomo zi samösa niha, lafotöi daʼö si fakaerua. Ifasindro wongambatö Yehowa ba gotalua zi samösa ira matua hegöi si samösa ira alawe. Me götö ndraono Gizaraʼeli me föna, itehegö Lowalangi ba ndra matua na töra samösa woʼomora, hizaʼi tenga daʼa zindruhu ohitö dödönia. Iadaʼa, lö itehegö ba nono mbanuania Yehowa na fakaerua ira. Ha samösa woʼomo ndra matua, simanö göi ndra alawe, ha samösa woʼomonia.​—Mataiʼo 19:9; 1 Timoteo 3:2.

▸ Faza 10, ngenoli si-12

Omasi Yehowa na lö faröi zi no mongambatö khö woʼomora sandrohu faʼauri. (1 Moze 2:24; Maleakhi 2:15, 16; Mataiʼo 19:3-6; 1 Korindro 7:39) Itehegö fabali ira ha na no ifalua gamuata wohorö foʼomonia ba niha böʼö. Na alua daʼö, itehegö khö woʼomo si lö fasala Yehowa ba wangai angetula hadia omasi ia fabali auri mazui löʼö.​—Mataiʼo 19:9.

Itaria so niha Keriso sangai angetula fasambua ia khö woʼomonia hewaʼae lö nifaluara gamuata wohorö ba niha böʼö. (1 Korindro 7:11)  Ba nitutunö andre dania, tola iʼangeragö hadia omasi ia fasambua mazui löʼö.

• Iʼodödögö lö iʼasogö zoguna ba nomo: Lö omasi woʼomo ira matua wangaʼasogö soguna ba nösi nomonia, lö ibeʼe khöra gefe mazui balazo.​—1 Timoteo 5:8.

• Lö ahakhö dödönia wamözi foʼomonia: Eluahania, irasoi woʼomonia ira matua mazui ira alawe wa tola manö mofökhö ia mazui teʼala waʼaurinia.​—Galatia 5:19-21.

• Sindruhu-ndruhu teʼala wahuwusa zi samösa niha khö Yehowa: Tola manö ifalua daʼö foʼomo ira matua mazui ira alawe enaʼö lö ifosumange Yehowa foʼomonia.​—Halöwö Zinenge 5:29.

▸ Faza 11, ngenoli si-19

Fefu ita moguna lasuno ba lafarou dödö. (Gamaedola 12:25; 16:24) Tola taʼaroʼö ba tarara dödö niha böʼö moroi ba wehededa si sökhi ba safönu faʼomasi. Fehede simane daʼa möi fanolo ndra talifusöda enaʼö anau gölöra ba lö laböhöli wamosumange Yehowa hewaʼae ebua gabula dödöra. (Gamaedola 12:18; Filifi 2:1-4) Na afatö sibai dödö zi samösa niha, moguna tahaogö wamondrondrongo yaʼia ba tabotokhi ba dödöda nirasoinia. Daʼa zanolo yaʼita enaʼö taʼila hadia zinangea tawaʼö mazui tafalua ba wanolo yaʼia. (Yakobo 1:19) Sökhi na sindruhu-ndruhu aboto ba dödöu zalua khö ndra talifusöu enaʼö öʼila hadia zinangea moguna khöra, baliʼö daʼö gohitö dödöu. Aefa daʼö, tola ötolo ira enaʼö laʼondrasi Gumbu wondrara dödö ba famarou dödö andrö, börö me ba daʼö lasöndra waʼohahau dödö sindruhu.​—2 Korindro 1:3, 4; 1 Tesalonika 5:11.

▸ Faza 12, ngenoli si-16

Lö nizara-zara Zura Niʼamoniʼö wameʼe amakhoita sanandrösa ba walöwa. No faböʼö-böʼö zi toʼölö mufalua hegöi huku ba zi  sambu-sambua banua. (1 Moze 24:67; Mataiʼo 1:24; 25:10; Luka 14:8) Sabölö moguna na falöwa yaʼia daʼö buʼusa li nifazökhira föna Yehowa. Na latötöi mbuʼusa lira andrö, ato zangowalu somasi na so nösi nomora ba daʼö hegöi si fahuwu khöra, ba lakaoni samösa zatua sokubaloi ba wamaʼema huhuo si teʼodane-dane ba Zura Niʼamoniʼö. Dali niha sangowalu andrö hewisa wamaluara resepsi na no awai walöwara, na omasi ira. (Luka 14:28; Yohane 2:1-11) Gofu hadia gangetulara ba wamaʼanö falöwara, moguna lafaduhuʼö enaʼö tefolakhömi Yehowa. (1 Moze 2:18-24; Mataiʼo 19:5, 6) Goi-goi Zura Niʼamoniʼö sanolo yaʼira wangai angetula si sökhi. (1 Yohane 2:16, 17) Na omasi ira wameʼe tuo na inötö resepsi, moguna laʼangenanöi wangogunaʼö yaʼia irege lö alua hadia ia. (Gamaedola 20:1; Efeso 5:18) Na omasi ira so musik mazui hiburan, sökhi na latatugöi sakali hadia möi famolakhömi Yehowa daʼö ma löʼö. Niha Keriso sangowalu moguna laʼosambuaʼö dödöra ba wahuwusara khö Lowalangi hegöi khö nawöra zamösana, tenga ha ba wamalua falöwara manö.​—Gamaedola 18:22; faigi wanuturu lala tanö böʼö ba Menara Pengawal 15 mbaŵa si Fulu 2006, ngaʼörö 18-31.

▸ Faza 13, ngenoli si-18

Omasi ita wangai angetula si sökhi si teʼodane-dane ba goi-goi Daromali Lowalangi. Duma-dumania, te so samösa niha Keriso, ikaoni ia foʼomonia si tenga Samaduhuʼö Yehowa enaʼö falulu manga ira khö zi tenga böʼöra, sagötö ngaluo sebua niʼowasaini niha. Hewisa ndraʼugö na khöu alua zimane daʼö? Na itehegö khöu tödöu side-ide weʼamöi ba daʼö, tola ötutunö khö woʼomou wa lö faoʼö khöra na lafalua hadia ia zoʼamakhaita ba wamahaʼö niha baero. Moguna göi öʼangeragö hadia tetutu dödö ndra talifusöda na möiʼö ba daʼö.​—1 Korindro 8:9; 10:23, 24.

Mazui, ibeʼe khöu bonus kafalou sagötö ngaluo sebua. Hadia lö ötema bonus daʼö? Löʼö zui. Angetulamö ba wangai yaʼia mazui löʼö, teʼodane-dane ba lala wamaigi gafalou bonus daʼö. Hadia ibeʼe  bonus daʼö ba wangowasaini ngaluo andrö? Mazui, daʼö lalania wangandrö saohagölö khöu? Na öʼangeragö daʼa hegöi tanö böʼönia, tola öhalö gangetula hadia ötema bonus andrö ma löʼö.

Salua tanö böʼö, te so zameʼe khöu buala sagötö ngaluo sebua ba imane, ”Uʼila wö sa wa lö öʼowasaini ngaluo sebua, hizaʼi omasido ubeʼe khöu daʼa.” Tola manö daʼö dandra waʼasökhi dödönia. Hizaʼi, hadia no öʼangeragö ua sakali, hazangila na itandraigö wamatiu mazui ifaogö ndraʼugö ba wangowasaini ngaluo sebua andrö? Na no öfatimbaisi daʼö, dali ndraʼugö hadia ötema mbualania ma löʼö. Na tahalö gangetula, omasi ita taʼokhögö dödö side-ide si lö sinegu ba lö faröi ita khö Yehowa.​—Halöwö Zinenge 23:1.

▸ Faza 13, ngenoli si-22

Na lahaogö wangasiwai falöfahasara dödö si fao faʼatulö, lö moguna labaliʼö daʼö abula dödö sebua. (Mataiʼo 5:23-26) Si oföna laʼameʼegö tödö ira niha Keriso yaʼia daʼö famolakhömi Yehowa ba fondrorogö banua niha Keriso enaʼö lö tebulö teʼosambuaʼö.​—Yohane 13:34, 35; 1 Korindro 13:4, 5.

Na lö fahasara dödö niha Keriso ba halöwöra ba wangalui kefe, tola laʼasiwai samösa daʼö ba lö moguna laʼohe föna zanguhuku. No musura ba 1 Korindro 6:1-8 mene-mene zinenge sotöi Faulo na so gamadöniwa niha Keriso niʼohe föna zanguhuku. Na taʼohe dalifusöda föna zanguhuku, lö sökhi lua-luania khö Yehowa hegöi ba mbanua niha Keriso. Ba Mataiʼo 18:15-17, so tölu lala sinangea laʼoʼö ira niha Keriso na alua watötöisa simane fangobousi döi mazui falimosa. (1) Yaʼira ziföföna mangasiwai abula dödö andrö ba gotaluara. (2) Na lö mofozu daʼö, tola laʼandrö wanolo moroi khö ndra talifusöda soʼahonoa faʼaboto ba dödö ba mbanua niha Keriso. (3) Aefa daʼö na moguna, tola laʼandrö wanolo moroi khö ndra satua sokubaloi. Na simane daʼö saʼae zalua, laʼogunaʼö goi-goi Zura Niʼamoniʼö ira satua sokubaloi ba wanolo yaʼira enaʼö atulö ba  hasara dödöra. Na so zi lö omasi manemaʼö amakhoita Zura Niʼamoniʼö, tola manö laʼetuʼö ira satua sokubaloi hadia zinangea lafalua khönia.

Tola manö göi so zalua si tola muʼohe föna zanguhuku, simane na fabali zi no mongambatö moloʼö huku, na muʼetuʼö haniha zangebuaʼö iraono, hawaʼebua gefe nibeʼe khö woʼomora me no fabali, famuʼa asuransi, na lö sagu wamuʼa foʼömö, mazui na muhaogö zura wasiat. Na iʼohe zalua andre niha Keriso föna zanguhuku enaʼö lö alua waʼudusa, lö isawö mene-mene Waulo.

Na alua zi lö sökhi, simane na so zohoröni niha, samakao iraono, samözi awönia, sanagö okhöta, mazui samunu niha, tola ifatunö zalua andre si samösa niha Keriso khö ndra samatörö, ba lö fatimba daʼa ba mene-mene Waulo.

▸ Faza 14, ngenoli si-14

Lö iböhöli Satana wolimo niha gulidanö iʼotarai ba Kabu Edena. (1 Moze 3:1-6; Famaʼeleʼö 12:9) Iʼila wa tola idönisi dödöda wamalua si lö sökhi na no ifaelungu gera-erada. (2 Korindro 4:4; Yakobo 1:14, 15) Iʼogunaʼö politik, agama, fogale, hiburan, folohi sekola, ba oya danö böʼönia nasa ba wangoromaʼö lala wangera-ngerania, ba iʼalui lala enaʼö fatema ba dödöda.​—Yohane 14:30; 1 Yohane 5:19.

Iʼila Satana wa lö ara tö ginötö nitehe khönia ba wolimo niha. Andrö iforege wamaelungu niha, gofu hawaʼato, töra-töra ba wamaelungu ono mbanua Yehowa. (Famaʼeleʼö 12:12) Na lö mangelama ita, idaʼi-daʼi wamakiko fangera-ngerada Afökha. (1 Korindro 10:12) Duma-dumania, omasi Yehowa na aro wongambatöda. (Mataiʼo 19:5, 6, 9) Hizaʼi, ato zangumaʼö ba ginötö andre wa fongambatö andrö ha fahasara dödö ba zi sabata, si tola tekiko ba waʼalio. Oya film hegöi acara TV samaehagö bua gera-era daʼa. Moguna tafaduhuʼö enaʼö lö tatehegö tedönisi dödöda ba gera-era niha gulidanö andre sanandrösa ba wongambatö.

 Lala tanö böʼö nifalua Zatana ba wolimo yaʼita yaʼia daʼö iʼombakhaʼö ba niha wa lö moguna lataha dödöra ba wamalua somasi-masi ira. (2 Timoteo 3:4) Na lö mangelama ita, lö tafosumange saʼae niha nifataro Yehowa. Duma-dumania, tola manö so samösa dalifusöda ira matua sanimbagö fanuturu lala moroi khö ndra satua sokubaloi ba mbanua niha Keriso. (Heberaiʼo 12:5) Mazui, te ibörögö ambö faduhu dödö dalifusöda ira alawe ba gamakhoita Yehowa me itatugöi haniha högö yomo ba nomo.​—1 Korindro 11:3.

Moguna tahalö gangetula enaʼö lö tatehegö idönisi gera-erada Afökha. Omasi ita taʼoʼö gera-era Yehowa ba ’taʼosambuaʼö dödöda ba zi so si yawa’.​—Kolose 3:2; 2 Korindro 2:11.

▸ Faza 16, ngenoli si-9

Lö omasi ita na mofökhö, ba taforege wondrorogö yaʼita na ibörögö tebai mbotoda. (Yesaya 38:21; Mareko 5:25, 26; Luka 10:34) Ba ginötö daʼa, oya lala wamadöhö fökhö hegöi fangaʼasogö dalu-dalu moroi khö ndra doto hegöi niha böʼö. Na tahalö gangetula sanandrösa ba dalu-dalu nitemada, moguna taʼoʼö goi-goi Zura Niʼamoniʼö. Böi olifu ita, ha Famatörö Lowalangi zi tola mamadöhö yaʼita sagötö faʼara. Lö omasi ita na taʼosambuaʼö sibai dödöda ba wökhöda irege olifu ita wamosumange Yehowa.​—Yesaya 33:24; 1 Timoteo 4:16.

Moguna mangelama ita enaʼö lö tatema dalu-dalu moroi ba waʼabölö malaʼika si lö sökhi. (5 Moze 18:10-12; Yesaya 1:13) Andrö, fatua lö tatema lala wamadöhö fökhö hegöi dalu-dalu, taʼalui ua sakali hezo moroi ia ba hadia lala wangera-ngera nifaehagönia. (Gamaedola 14:15) Tebai olifu ita wa omasi Zatana wamaʼala yaʼita enaʼö fao ba halöwö ndra malaʼika si lö sökhi. Na moʼamakhaita atö dalu-dalu andrö khö ndra malaʼika si lö sökhi moloʼö famaigida, sökhi na lö tatema ia.​—1 Fetero 5:8.

▸ Faza 16, ngenoli si-18