1-3. (a) Hadia manö nirasoi niha sato sanandrösa ba halöwöra? (b) Hadia manö wanofu nitutunöda ba faza daʼa?

 NIHA ba gulidanö andre laforege wombönökhi soguna khöra samösa hegöi ösi nomora. Ato zi lö mangomasiʼö halöwöra, ba so zataʼu weʼamöi mohalöwö ero maʼökhö. Na daʼö nirasoimö, hadia nifaluau enaʼö owua-wua dödöu ba halöwöu? Hewisa enaʼö terou dödöu ba halöwöu?

² Imane Yehowa, ”Ba he na manga-manga niha ba na ibadu-badu hadia ia, na iʼabusoiʼö ia si sökhi ba waʼerege dödönia andrö fefu, ba no buala Lowalangi khönia.” (Zangombakha 3:13) Me ifazökhi ita Yehowa, iʼasogö ba dödöda wa moguna khöda wohalöwö hegöi faʼedöna wamalua yaʼia. Omasi ia na omuso dödöda ba nifaluada.​—Baso Zangombakha 2:24; 5:17.

³ Na simanö, hadia zanolo yaʼita enaʼö owua-wua dödöda ba halöwöda? Hadia halöwö sinangea latimbagö ira niha Keriso? Hewisa enaʼö tola tabagi ginötöda ba halöwö hegöi ba wamosumange Yehowa? Ba hadia halöwö sabölö tohude si lö tola löʼö tafalua?

4, 5. Hewisa dödö Yehowa ba halöwönia?

⁴ Omasi mohalöwö Yehowa. Imane ba 1 Moze 1:1, ”Ba mböröta ifazökhi Lowalangi mbanua si yawa, awö danö.” Me no awai ifazökhi gulidanö andre Lowalangi hegöi ngawalö hadia ia, imane wa ”sökhi sibai” nifazökhinia. (1 Moze 1:31) Omuso dödö Zomböi yaʼita ba zi no ifazökhi.​—1 Timoteo 1:11.

⁵ Lö irai iböhöli wohalöwö Yehowa. Imane Yesu, ”Lö aetu mohalöwö Namagu irugi maʼökhö.” (Yohane 5:17) Hewaʼae lö ahori taʼila fefu zahöli-höli dödö nifalua Yehowa, hizaʼi so ösa zaboto ba dödöda. No itatugöi haniha zi fao mamatörö awö Nononia Yesu Keriso ba Wamatörönia. (2 Korindro 5:17) Iʼameʼegö tödö niha gulidanö Yehowa ba ituturu lalara. Börö halöwö fanuriaigö ba zi sagörö ulidanö, zuta niha sangokhögö faʼaboto ba dödö sanandrösa khö Yehowa ba latema wanötöna faʼauri si lö aetu ba gulidanö faradaiso.​—Yohane 6:44; Roma 6:23.

6, 7. Hewisa Yesu ba halöwönia?

⁶ Simane Amania, omasi göi Yesu wohalöwö. Fatua lö möi ia ba gulidanö, tobali ia ʼtukaʼ khö Lowalangi, falulu fohalöwö ira ba wamazökhi fefu zi so ba mbanua si yawa awö danö. (Gamaedola 8:22-31; Kolose 1:15-17) Me so Yesu ba gulidanö, lö iböhöli wohalöwö. Me ono matua ia, ifahaʼö ia tobali tuka geu, simane famazökhi gama-gama hegöi omo. Onekhe Yesu ba halöwönia ba laʼila niha wa ”tuka geu” ia.​—Mareko 6:3.

⁷ Hizaʼi, halöwö sabölö iʼofönaiʼö Yesu ba gulidanö yaʼia daʼö fanuriaigö turia somuso dödö ba ifahaʼö  niha sanandrösa khö Yehowa. No iʼasiwai halöwö fanuriaigö nifaluania ba zi tölu a matonga fakhe faʼara, ba iforege wamalua daʼö iʼotarai si hulö wongi irugi ba zi bongi. (Luka 21:37, 38; Yohane 3:2) Ngaotu kilometer lala sogawu-gawu nitörö Yesu ba wangombakha turia somuso dödö ba niha sato.​—Luka 8:1.

8, 9. Hana wa omuso dödö Yesu ba halöwönia?

⁸ Moloʼö Yesu, halöwö khö Lowalangi no amaedola gö. Halöwö andre zangabölöʼö ba sangaʼaroʼö yaʼia. No hauga kali iforege sibai wohalöwö Yesu, irege lö inötönia wemanga. (Yohane 4:31-38) Iʼogunaʼö fefu ginötö ba wanolo niha böʼö enaʼö lafahaʼö ira sanandrösa khö Namania. Daʼa mbörö wa imane khö Yehowa, ”No ufolakhömi ndraʼugö ba gulidanö me uʼasiwai halöwö nibeʼeu khögu.”​—Yohane 17:4.

⁹ Ba daʼa taʼila wa iforege sibai wohalöwö Yehowa hegöi Yesu, owua-wua dödöra ba laʼomasiʼö halöwöra. Omasi ita ’taʼoʼö khö Lowalangi’ ba ’tahaogö wanara lahe Yesu’. (Efeso 5:1; 1 Fetero 2:21) Daʼa mbörö wa taforege ba taʼodödögö wamalua halöwöda.

10, 11. Hadia zanolo yaʼita wangokhögö fangera-ngera si tefaudu sanandrösa ba halöwöda?

¹⁰ Yaʼita ono mbanua Yehowa, taforege wombönökhi soguna khöda samösa hegöi ösi nomoda. Omasi ita na terou dödöda ba halöwöda, hizaʼi lö aoha wamalua daʼö. Na simanö, hadia nifaluada na lö owua-wua dödöda ba halöwöda?

¹¹ Okhögö wangera-ngera si sökhi. Te tebai tabulöʼö hezo mohalöwö ita mazui hawaʼoya ginötö  niʼogunaʼöda, hizaʼi tola tabulöʼö gera-erada. Tetolo ita na taʼila hadia niʼandrö Yehowa khöda. Duma-dumania: Iʼandrö Yehowa khö ndra matua si tobali högö yomo ba nomo enaʼö iʼodödögö wangaʼasogö soguna ba nösi nomonia. Imane Sura Niʼamoniʼö, niha si lö mangaʼasogö soguna ba nösi nomonia ”abölö waʼalösökhinia moroi ba niha si lö mamati”. (1 Timoteo 5:8) Na yaʼugö högö yomo ba nomo, forege ba wangaʼasogö soguna ba nösi nomou. He na omasiʼö halöwö andrö hegöi na löʼö, öʼila wa no öʼomusoiʼö dödö Yehowa na öʼasogö zoguna ba nösi nomou.

12. Hadia mbua nitemada na taforege wohalöwö ba na lö falimo ita?

¹² Forege wohalöwö ba böi falimo. Möi fanolou daʼa enaʼö owua-wua dödöu ba halöwöu. (Gamaedola 12:24; 22:29) Hasambalö faduhu dödö gafalou khöu. Dozi kafalo, laʼomasiʼö zohalöwö si lö falimo, börö me lö latagö gefe, gama-gama, mazui inötö. (Efeso 4:28) Sabölö moguna, iʼila Yehowa na öforege wohalöwö ba na lö falimoʼö. Lö ’itegu ndraʼugö tödöu side-ide’ börö me öʼila wa no öʼomusoiʼö dödö Lowalangi niʼomasiʼöu.​—Heberaiʼo 13:18; Kolose 3:22-24.

13. Hadia nasa mbua nitemada na lö falimo ita ba wohalöwö?

¹³ Yaʼaboto ba dödöu wa tola möi famolakhömi Yehowa gamuatau ba halöwöu. Daʼa lala tanö böʼö enaʼö terou dödöda ba halöwöda. (Tito 2:9, 10) Tola manö so ba gotalua ndra awöu wohalöwö somasi mamahaʼö yaʼira ba Zura Niʼamoniʼö börö me tobali ndraʼugö duma-duma si sökhi.​—Baso Gamaedola 27:11; 1 Fetero 2:12.

14-16. Hadia zinangea taʼangeragö na tafili halöwö?

¹⁴ Lö nizara-zara Zura Niʼamoniʼö wanutunö hadia manö halöwö si tola hegöi si tebai ifalua niha Keriso. Hizaʼi, so goi-goi sanolo yaʼita ba wangai angetula si sökhi. (Gamaedola 2:6) Na taʼogunaʼö goi-goi Zura Niʼamoniʼö, tola taʼangeragö wanofu-nofu andre.

¹⁵ Hadia iʼoʼou ndraʼo halöwö andre ba wamalua si fasala föna Yehowa? No tafahaʼö ita sanandrösa ba  niʼogorofi Yehowa, simane fanagö hegöi falimosa. (2 Moze 20:4; Halöwö Zinenge 15:29; Efeso 4:28; Famaʼeleʼö 21:8) Andrö, moguna taʼangenanöi wanimbagö halöwö si fatimba ba gamakhoita Yehowa.​—Baso 1 Yohane 5:3.

¹⁶ Hadia ituhini mazui ihöni-höni ngawalö niʼelifi Yehowa halöwö andre? Duma-dumania, hewisa na laʼandrö khöu wohalöwö tobali resepsionis ba ruma saki sanudugö ono ba dalu? Tatu lö fasala na tobali ndraʼugö resepsionis. Hizaʼi, öʼila hewisa dödö Yehowa sanandrösa ba wanudugö ono. Hewaʼae lö ölului wanudugö ono ba daʼö, hizaʼi hadia lö öʼila wa no fao ndraʼugö ba horö andrö moloʼö famaigi Yehowa?​—2 Moze 21:22-24.

17. Hadia zanolo yaʼita ba wangai angetula sangomusoiʼö tödö Lowalangi?

¹⁷ Na taʼogunaʼö goi-goi Lowalangi, tola tobali ita simane niha nitutunö ba Heberaiʼo 5:14, si ”no toʼölö mangogunaʼö fangera-ngerania irege tefomaha ba wamaehusi satulö ba si lö atulö”. Sofu khöu samösa, ’Na utema halöwö daʼa, hadia lö tetutu dödö side-ide niʼokhögö niha böʼö? Hadia laʼandrö khögu ba halöwö andre weʼamöi ba soi böʼö ba uröi woʼomogu hegöi iraonogu? Hadia lua-luania khöra?’

18. Hana wa tola abua khöda wangofönaiʼö famosumange Lowalangi?

¹⁸ Abua khöda wangofönaiʼö famosumange Yehowa ba ”mbaŵa si lö sökhi” andre. (2 Timoteo 3:1) Tola manö abua khöda wangalui halöwö hegöi enaʼö lö aefa ita ba halöwö. Moguna tabönökhi zoguna ba nösi nomoda, hizaʼi sinangea na taʼofönaiʼö wamosumange  Lowalangi. Böi taʼofönaiʼö ba waʼaurida wangalui okhöta. (1 Timoteo 6:9, 10) Na simanö, hewisa enaʼö tola ’tatatugöi hadia zabölö moguna’ ba tola göi tabönökhi zoguna ba nösi nomoda?​—Filifi 1:10.

19. Na tafaduhusi tödö Yehowa, hewisa wa tola tobali fanoloda daʼö ba wombagi inötöda ba halöwö?

¹⁹ Yasindruhu-ndruhu öfaduhusi tödö Yehowa. (Baso Gamaedola 3:5, 6.) Aboto ba dödöda wa iʼila Yehowa hadia zoguna khöda ba iʼameʼegö tödö sibai ita. (Zinunö 37:25; 1 Fetero 5:7) Imane Taromalinia khöda, ”Böi miʼomasiʼö gefe ba mihonogö dödömi ba zi no so, börö me no iwaʼö Lowalangi, ’Lö manö uröi ndraʼugö ba lö uʼositengagö ndraʼugö.’” (Heberaiʼo 13:5) Lö omasi Yehowa na taʼabusi tödö sibai wangalui soguna ba nösi nomoda. No hauga kali iforoma’ö wa tola iʼasogö zoguna ba nono mbanuania. (Mataiʼo 6:25-32) Gofu hadia zalua ba halöwöda, böi taböhöli wamahaʼö yaʼita ba Daromali Lowalangi, taturiaigö duria somuso dödö, ba möi ita ba gangowuloa niha Keriso.​—Mataiʼo 24:14; Heberaiʼo 10:24, 25.

20. Hewisa enaʼö ahono dödöda ba zi no so?

²⁰ Osambalöʼö höröu. (Baso Mataiʼo 6:22, 23.) Eluahania öna-önaiʼö waʼauriu irege tola öʼosambuaʼö dödöu ba wamosumange Yehowa. Aboto ba dödöda wa no faʼabodo na taʼofönaiʼö wangalui kefe ba waʼaurida, na taʼomuso-musoiʼö manö dödöda, mazui taʼalui ngawalö fakake elektronik si bohou moroi na tobali ita si fahuwu khö Lowalangi. Na simanö, hadia zanolo yaʼita ba wangofönaiʼö sabölö moguna? Taforege enaʼö böi moʼömö ita. Na so woʼömöu, alui lala hewisa wangalösi mazui ba wamuʼa yaʼia fefu. Na lö mangelama ita, tola ahori fefu ginötö hegöi faʼabölöda ba wolohi  okhöta andrö irege lö inötöda saʼae ba wangandrö, ba wamahaʼö yaʼita, mazui ba wanuriaigö. Moroi na fawuka waʼaurida börö gokhöta, sökhi na tafahaʼö ita enaʼö ahono dödöda ba zabölö moguna simane ’balazo, nukha’. (1 Timoteo 6:8) Gofu hadia zalua khöda, datafareso ita ero inötö enaʼö taʼila hewisa wamosumangeda Yehowa soroi ba dödö.

21. Hana wa moguna tatatugöi hadia niʼofönaiʼöda ba waʼauri?

²¹ Tatugöi zabölö moguna. Moguna atua-tua ita wangogunaʼö inötö, faʼabölö, hegöi okhötada. Na lö  mangelama ita, tola ahori ginötöda si sökhi ba zi lö moguna, simane ba wolohi sekola mazui kefe. Imane Yesu, ”Andrö, miʼofönaiʼö wangalui Famatörö Lowalangi.” (Mataiʼo 6:33) Moroi ba gangetula nihalöda, si toʼölö tafalua, halöwöda sero maʼökhö, hegöi ohitö dödöda, ba daʼö oroma hadia niʼofönaiʼöda ba dödöda.

22, 23. (a) Hadia halöwö sabölö moguna niʼokhögöda yaʼita niha Keriso? (b) Hadia zanolo yaʼita enaʼö terou dödöda ba halöwöda?

²² Halöwö sabölö moguna niʼokhögöda yaʼia daʼö famosumange Yehowa ba fanuriaigö turia somuso dödö ba niha böʼö. (Mataiʼo 24:14; 28:19, 20) Simane Yesu, taforege sibai wamalua halöwö daʼa. Sö ösa zi findra ba mbanua sabölö ato moguna sanuriaigö. Tanö böʼö, lafahaʼö ira ba li böʼö irege tola manuriaigö ira ba niha sangogunaʼö li daʼö. Tola fahuo-huo ndraʼugö ba niha si no mamalua daʼa, ba anofu-nofu khöra. Hasambalö lawaʼö khöu wa lasöndra waʼowua-wua dödö ba mofozu waʼaurira.​—Baso Gamaedola 10:22.

²³ Iadaʼa, ato ba gotaluada zanemaʼö sambua halöwö mazui hauga ngawua halöwö ba wombönökhi soguna ba nösi nomoda, ba oya ginötö niʼogunaʼöda ba daʼö. Iʼila daʼa Yehowa, ba iʼandrö khöda saohagölö me no tafalua hadia ia ba wangaʼasogö soguna ba nösi nomoda. Yalötebulö taʼoʼö waʼowölö-ölö Yehowa hegöi Yesu, gofu hadia halöwöda. Ba moguna tatörö tödöda wa halöwö sabölö taʼofönaiʼö yaʼia daʼö famosumange Yehowa ba fanuriaigö turia somuso dödö sanandrösa ba Wamatörö Lowalangi. Daʼa zangaʼasogö faʼowua-wua dödö sindruhu.