1, 2. Hadia mbörö wa moguna so zanuturu lalamö na so ndraʼugö ba nahia si lö irai möiʼö? Hadia wanuturu lala nibeʼe Yehowa khöda?

 KHALAIGÖ atö na ötörö danö si mate sebolo. Faböʼö-böʼö zoroma föna höröu börö me abölö-bölö nangi ba ifohombo misa gawu-gawu. Tola manö elunguʼö. Hewisa enaʼö öʼila hezo ötörö? Moguna so niha mazui fakake sanuturu lalamö, simane kompas, luo hegöi döfi, peta, GPS (fakake fanuturu lala  moloʼö satelit), mazui niha sangila tanö si mate andrö. Moguna so zanuturu lala enaʼö tatu hezo so numalöʼö irege lö teʼala waʼaurimö.

² Oya gabula dödöda ba waʼauri, ba tola manö elungu ita. Hizaʼi, no ibeʼe khöda dödö side-ide Yehowa ba wanuturu lalada. (Yakobo 1:17) Datafaigi hadia dödö side-ide andrö ba hewisa wohalöwönia. Tatutunö dania hewisa wamahaʼöda tödöda side-ide, hana wa moguna taʼosinangegö dödö side-ide niha böʼö, ba hewisa wa tola ohahau dödöda na taʼokhögö dödö side-ide si lö sinegu.

3. Hadia dödö side-ide andrö?

³ Tödö side-ide no buala si sökhi moroi khö Yehowa. Daʼö zotatugöi hezo zatulö ba si lö atulö. Ba Zura Niʼamoniʼö, ”tödö side-ide” ba li Yunani eluahania ”faʼaboto ba dödö si fao khöda”. Na sökhi wohalöwö dödöda side-ide, itolo ita ba wamareso haniha ita sindruhunia ba lö talimo ita sanandrösa ba gera-era hegöi ösi dödöda. Ituturu khöda lala si sökhi ba tatimbagö zi lö sökhi. Itolo ita ba wanöndra faʼomuso dödö na tahalö gangetula si sökhi, ba ihuku ita na no tahalö gangetula si lö sökhi.​—Faigi Gonönöta 5.

4, 5. (a) Hadia zalua khö Gadamo ba Khawa me lö lafondrondrongo niwaʼö dödöra side-ide? (b) Be’e duma-duma moroi ba Zura Niʼamoniʼö sanandrösa ba wohalöwö dödö side-ide.

⁴ Fefu ita tola tafili hadia tafondrondrongo  dödöda side-ide mazui löʼö. Lö lafondrondrongo ira Adamo ba Khawa niwaʼö dödöra side-ide, ba lua-luania aekhu ira ba horö. Maniasa ira ba gafuriata, hizaʼi no numalö saʼae daʼö. Lö laʼoʼö nifakhoi Lowalangi. (1 Moze 3:7, 8) Lö lafondrondrongo dödöra side-ide soʼahonoa, hewaʼae laʼila wa fasala na lö laʼoʼö niwaʼö Lowalangi.

⁵ Ato niha si lö moʼahonoa samondrondrongo niwaʼö dödöra side-ide. Duma-duma si sökhi khöda Yobi. Börö me no ihalö gangetula si sökhi, andrö wa imane, ”Sara luo khögu lö itegudo tödögu.” (Yobi 27:6) Me fahuhuo Yobi sanandrösa ba ’dödönia’, manandrösa daʼa ba dödönia side-ide, sangila hezo zatulö ba si lö atulö. Hizaʼi, no irai itimbagö niwaʼö dödönia side-ide Dawido ba lö iʼoʼö li Yehowa. Ba gafuriata, maniasa ia ba ’manutu dödönia’. (1 Zamueli 24:6) Iʼombakhaʼö khönia tödönia side-ide wa fasala nifaluania andrö. Ifondrondrongo dödönia side-ide, ba lö ifuli saʼae ifalua zala simane daʼö.

6. Hana wa tawaʼö buala Lowalangi dödöda side-ide andrö?

⁶ Niha si lö faʼaboto ba dödö sanandrösa khö Yehowa manö laʼila hezo zatulö ba si lö atulö. Imane Sura Niʼamoniʼö, ”Fangera-ngerara zamatunö khöra na fasala ira mazui löʼö.” (Roma 2:14, 15) Duma-dumania, ato zangila wa fasala na mamunu niha mazui managö. Lafondrondrongo niwaʼö dödöra side-ide, sangila hezo zatulö ba si lö atulö nibeʼe Yehowa, hewaʼae sindruhunia lö aboto ba dödöra daʼö. Laʼoʼö  goi-goi Lowalangi, mazui dane-dane zindruhu nibeʼe Yehowa ba wangai angetula si sökhi ba waʼauri.

7. Hana wa itaria fasala dödöda side-ide?

⁷ Itaria fasala dödöda side-ide. Duma-dumania, tola ifaelungu ia era-erada hegöi tödöda si lö moʼahonoa irege iʼohe ita ba lala si lö sökhi. Lö iʼanemaiʼö taʼokhögö dödö side-ide si lö sinegu. (1 Moze 39:1, 2, 7-12) Moguna tafahaʼö ia. No ibeʼe khöda geheha niʼamoniʼö Yehowa hegöi goi-goi Zura Niʼamoniʼö sanolo yaʼita. (Roma 9:1) Datafaigi hewisa wamahaʼöda tödöda side-ide.

8. (a) Hewisa wa tola molua-lua nösi dödöda ba dödöda side-ide? (b) Hadia zinangea tasofu khöda samösa fatua lö tahalö gangetula?

⁸ So ösa zangumaʼö, na lafondrondrongo dödöra side-ide eluahania laʼoʼö hadia zi tumbu ba dödöra, lafalua fefu zomasi ira asala lö fasala moloʼö yaʼira. Lö moʼahonoa nösi dödöda ba tola ifaelungu ita. Hadia zi tumbu ba dödöda molua-lua ia ba dödöda side-ide. Imane Sura Niʼamoniʼö, ”Si no tefuyu dödö niha, moroi ba danö böʼö fefu, ba si lö sökhi—haniha zangila amuata?” (Yeremia 17:9) Tola manö ibörögö tumbu ba dödöda wa atulö zi sala. Duma-dumania, fatua lö tobali niha Keriso Faulo, lö faʼahakhö dödönia wamakao ono mbanua Lowalangi ba faduhu dödönia wa satulö nifaluania. Moloʼö yaʼia, lö mosinegu dödönia side-ide. Ba gafuriata imane, ”Yehowa zanguhuku yaʼo.” (1 Korindro 4:4; Halöwö Zinenge 23:1; 2 Timoteo 1:3) Me no  ifahaʼö ia hewisa dödö Yehowa ba nifaluania, aboto ba dödönia wa moguna ibulöʼö gamuatania. Andrö, fatua lö tafalua hadia ia, moguna tasofu khöda samösa, ’Hadia zomasi Yehowa ufalua?’

9. Hadia geluahania fangataʼufi Lowalangi?

⁹ Na öʼomasiʼö zi samösa niha, tatu lö öfalua zi fatuwu khönia. Börö me taʼomasiʼö Yehowa, lö tafalua zi fatimba ba dödönia. Ataʼu ita na lö omuso dödö Yehowa, ba böi tebulö daʼö. Tola taʼila daʼa moroi ba duma-duma Nehemia. Me tobali ia gubernur, lö iʼogunaʼö dadaomania andrö ba wangalui faʼakayo. Hadia mbörö? Börö me ’iʼataʼufi Lowalangi’. (Nehemia 5:15) Lö ifalua zi fatuwu khö Yehowa. Simane Nehemia, ataʼu ita göi wamalua si fatuwu khö Yehowa. Na tabaso Zura Niʼamoniʼö, tola taʼila hadia manö zomasi Yehowa.​—Faigi Gonönöta 6.

10, 11. Hadia goi-goi Zura Niʼamoniʼö sanolo yaʼita wangai angetula si sökhi sanandrösa ba wamadu tuo?

¹⁰ Duma-dumania, moguna itatugöi niha Keriso hadia ibadu duo mazui löʼö. Hadia goi-goi sanolo yaʼia wangai angetula si sökhi? Siföföna sibai: Lö niʼelifi Zura Niʼamoniʼö wamadu tuo. Iʼombakhaʼö khöda wa agu andrö buala Lowalangi. (Zinunö 104:14, 15) Hizaʼi, ifangelama zoloʼö khönia Yesu enaʼö lö laduhugö ’wamadu-madu’. (Luka 21:34) No iwaʼö Faulo ba niha Keriso enaʼö latimbagö ’gowasa si lö sökhi mazui femabu-mabu’. (Roma 13:13) Imane wa ”tebai tefaʼamöi ba Wamatörö Lowalangi” niha si mabu-mabu.​—1 Korindro 6:9, 10.

¹¹ Moguna manofu niha Keriso, ’Hawaʼamoguna  khögu duo andrö? Hadia ubadu duo enaʼö ohahau dödögu? Enaʼö barani ndraʼo? Hadia tola utatugöi hawaʼoya ba hawaʼasese ubadu duo? * Hadia tola owulo ndraʼo khö ndra awögu na lö hadöi tuo?’ Tola taʼandrö wanolo khö Yehowa ba wangai angetula si tefaudu. (Baso Zinunö 139:23, 24.) Na tafalua daʼö, no tafahaʼö dödöda side-ide enaʼö iʼameʼegö tödö goi-goi Zura Niʼamoniʼö. Hizaʼi, tenga ha daʼö niʼameʼegöda tödö, datafaigi atö.

12, 13. Hana wa faböʼö-böʼö dödö side-ide niʼokhögöda zamösana? Hewisa dödöda ba daʼö?

¹² No faböʼö-böʼö dödö side-ide niʼokhögöda zamösana. Tola manö itehegö khöu tödöu side-ide wamalua hadia ia, hizaʼi lö fatema daʼö ba niha böʼö börö dödönia side-ide. Duma-dumania, omasiʼö wamadu tuo. Tanö bö’ö, lö omasi ira labadu duo andrö. Hana wa faböʼö gera-era zi darua andre?

¹³ Sasesenia, börö me faböʼö-böʼö mbanua si tumbu ita, faböʼö gera-era nösi nomoda, salua ba waʼaurida, ba tanö böʼönia. Sanandrösa ba duo, te so zamorege ba wamöhöli famadu tuo ba zilalö irege lö ibadu saʼae iadaʼa. (1 Razo 8:38, 39) Na öbeʼe duo ba niha, hewisa dödöu na lö ibadu? Hadia abao dödöu? Hadia öfaso ia wamadu? Hadia omasiʼö sibai  öʼila hana wa lö ibadu? Tatu manö löʼö, börö me öʼosinangegö dödönia side-ide.

14, 15. Hadia zalua me götö Waulo? Hadia mene-mene si sökhi nibeʼenia?

¹⁴ Me götö Waulo, so zalua sangoromaʼö wa no faböʼö-böʼö dödö side-ide niʼokhögö niha. So ösa nagole niʼamawa ba fasa si no irai laʼogunaʼö tobali sumange ba nadu. (1 Korindro 10:25) Moloʼö Faulo, lö fasala na laʼöli ba laʼa nagole andrö börö me moroi khö Yehowa ngawalö gö. Hizaʼi tebai daʼö moloʼö ira talifusö si no irai mamosumange adu. Moloʼö yaʼira, fasala na laʼa nagole andrö. Hadia imane Faulo, ’Lö itegu ndraʼo tödögu side-ide ba sinangea uʼa’?

¹⁵ Lö ba dödö Waulo zimane daʼö. Abölö iʼameʼegö tödö nirasoi ndra talifusönia moroi na iʼofönaiʼö wamalua somasi ia hewaʼae na sinangea ifalua daʼö. Imane Faulo wa böi ”taʼomusoiʼö dödöda samösa”. Iwaʼö nasa, ”Keriso manö lö iʼomusoiʼö dödönia samösa.” (Roma 15:1, 3) Simane Yesu, iʼameʼegö tödö niha böʼö Faulo moroi khönia samösa.​—Baso 1 Korindro 8:13; 10:23, 24, 31-33.

16. Hana wa tebai tahuku dalifusöda na so nifaluania si lö fatimba ba dödönia side-ide?

¹⁶ Hewisa na so zamalua hadia ia si lö fatimba ba dödönia side-ide, hizaʼi fasala moloʼö yaʼita? Moguna mangelama ita enaʼö lö tahuku nawöda, böi fatandro ita wangumaʼö wa fasala nifaluania ba atulö nifaluada. (Baso Roma 14:10.) Wa ibeʼe khöda dödö side-ide Yehowa tenga ba wanguhuku awöda, hizaʼi ba wanguhuku yaʼita samösa. (Mataiʼo 7:1) Lö omasi  ita na fabali dödö mbanua niha Keriso ha börö gangetulada. Sökhi na taforomaʼö waʼomasi ba fahasara dödö.​—Roma 14:19.

17. Hadia zi tola alua ba dödöda side-ide?

¹⁷ No isura sinenge sotöi Fetero, ”Mirorogö dödömi side-ide faböi taʼunö.” (1 Fetero 3:16) Na so zi lö tebulö manimbagö goi-goi Yehowa, lö saʼae ifangelama ira tödöra side-ide. Imane Faulo, hulö zi  no ”göna siʼöli saukhu” tödö side-ide simane daʼö. (1 Timoteo 4:2, nisura ba gahe zura) Hadia no irai akhozi ndraʼugö? Na noa, tatu akuba gulimö irege lö örasoi saʼae hadia ia ba gamaudu zakhozi andrö. Na lö iböhöli wamalua si lö sökhi si samösa niha, tola afuru ba lö mohalöwö saʼae dödönia side-ide.

18, 19. (a) Hadia zaboto ba dödöda na so khöda waniasa mazui faʼaila? (b) Hadia nifaluada na itahi-tahigö manö ita tödöda side-ide ba zala si no tafalua hewaʼae no tafalalini gera-erada?

¹⁸ Na maniasa ita, te imane tödöda side-ide wa fasala nifaluada. Iʼombakhaʼö khöda zi no tafalua ba moguna taböhöli ia. Tafahaʼö ita ba zala nifaluada andrö enaʼö lö tafalua saʼae. Duma-dumania, me ifalua horö Razo Dawido, iʼoʼou ia tödönia side-ide  ba wamalalini era-erania. Iʼogorofi zi no ifalua ba ihalö gangetula wa iʼoʼö niwaʼö Yehowa ba zi so föna. Moroi ba zalua khönia, tola imane Dawido wa Yehowa andrö ’si sökhi tödö ba sebolo tödö’.​—Zinunö 51:1-19; 86:5; faigi Gonönöta 7.

¹⁹ Hizaʼi so ösa niha, itahi-tahigö manö ia tödönia ba zala si no ifalua ba zilalö hewaʼae no ara ifalalini gera-erania. Tola tefakao ia irege hulö lö eluaha waʼaurinia saʼae. Na daʼa nirasoimö, törö tödöu wa tebai öbulöʼö zi no irai alua. Hewaʼae öʼila mazui löʼö wa atulö ma fasala nifaluamö andrö me luo da’ö, sindruhu-ndruhu no iʼefaʼö zalamö Yehowa ba lö itörö tödönia saʼae. Lö raʼiö ndraʼugö fönania ba iʼila wa no öfalua zi sökhi iadaʼa. Tola manö  itahi-tahigö ndraʼugö tödöu, hizaʼi imane Sura Niʼamoniʼö, ”Abölö ebua Lowalangi moroi ba dödöda.” (Baso 1 Yohane 3:19, 20.) Eluahania, abölö ebua waʼomasi hegöi fangefaʼönia salamö moroi ba waniasa mazui faʼaila nirasoimö. Tola faduhu dödömö wa no iʼefaʼö zalamö Yehowa. Na itema wangefaʼö sala moroi khö Yehowa si samösa niha, ohahau dödönia side-ide ba omuso dödönia wamosumange Lowalangi.​—1 Korindro 6:11; Heberaiʼo 10:22.

20, 21. (a) Hadia mbörö wa tefazökhi mbuku daʼa? (b) Hadia nitehegö Yehowa enaʼö tafili? Hewisa wangogunaʼöda daʼö?

²⁰ Tefazökhi mbuku daʼa ba wanolo yaʼugö enaʼö öfahaʼö dödöu side-ide irege daʼa zamangelama ba solumöʼö yaʼugö ba götö safuria andre. Itolo göi ndraʼugö woloʼö goi-goi Zura Niʼamoniʼö ba ngawalö zalua ba waʼauriu. Tatu manö, lö nizara-zara buku daʼa wanutunö hadia manö zinangea öfalua. Barö ”goroisa Keriso” so ita si teʼodane-dane ba goi-goi Lowalangi. (Galatia 6:2) Hewaʼae lö nizara-zarania wameʼe oroisa, böi tabaliʼö daʼö tani ba wamalua si lö atulö. (2 Korindro 4:1, 2; Heberaiʼo 4:13; 1 Fetero 2:16) Hewaʼae tola tafili hadia zinangea tafalua, dataʼogunaʼö ia ba wangoromaʼö faʼomasida khö Yehowa.

²¹ Na taʼangerönusi ba tafalua goi-goi Zura Niʼamoniʼö, tafahaʼö ita wangogunaʼö ’fangera-ngerada’ ba tafaudugö ia ba gera-era Yehowa. (Heberaiʼo 5:14) Buania, no tefahaʼö dödöda side-ide sanuturu lalada ba waʼauri ba sanolo yaʼita enaʼö lö tebulö so ita ba lumö waʼomasi Lowalangi.