1, 2. Hewisa dödö Yehowa na iʼila taforege wanörö sindruhu?

 SAMUZA inötö, so nono matua sangawuli moroi ba zekola. Me idölö ia ba nomo, isöndra kofe-kofe safönu kefe ba lala. Hadia nifaluania? Tola manö ihalö khönia kofe-kofe daʼö, hizaʼi ifuli khö zokhö yaʼia. Omuso sibai dödö mamania me no irongo nifaluania andrö.

² Ato zatua somuso tödö na latörö zindruhu iraonora. ”Lowalangi si lö faröi” Namada ba zorugo andrö sotöi Yehowa, ba omuso dödönia na tatörö zindruhu. (Zinunö 31:6) Omasi ita na omuso dödönia ba ’tatörö zindruhu ba ngawalö hadia ia’. (Heberaiʼo 13:18) Datatutunö öfa ngawalö lala ba waʼaurida andre si tola manaisi yaʼita ba wanörö sindruhu. Aefa daʼö, tatutunö hadia manö mbuania na tatörö zindruhu.

3-5. (a) Hana wa tola manö talimo samösa ita? (b) Hadia zanolo yaʼita enaʼö tatörö zindruhu ba khöda samösa?

³ Moguna ua tatörö zindruhu ba khöda samösa awena dania ba niha böʼö. Tola manö abua wamalua daʼa. Me abad siföföna, ira talifusöda ba mbanua niha  Keriso ba Laodikia lalimo samösa ira, lamane wa no laʼomusoiʼö dödö Lowalangi, sindruhunia sa löʼö. (Famaʼeleʼö 3:17) Tola manö talimo samösa ita ba wotatugöi haniha ita zindruhunia.

⁴ Itutunö nifahaʼö sotöi Yakobo, ”Na so zangumaʼö tödönia samosumange Lowalangi ia, ba na lö itaha lelania, no ilimo ia ba zaya-zaya gölö wamosumangenia Lowalangi.” (Yakobo 1:26) Tola manö talimo ita na tamane, asala no tafalua ösa zi sökhi, lö saʼae ba dödö Lowalangi na lö sökhi wehededa, na taʼafökhöiʼö dödö niha böʼö mazui tatutunö waya. Hadia zanolo yaʼita enaʼö lö talimo samösa ita?

⁵ Na tafaigi zörömi, taʼila hewisa zikhalada. Na tabaso Zura Niʼamoniʼö, taʼila hewisa nösi dödöda. Tola itolo ita Sura Niʼamoniʼö enaʼö taʼila hadia zi tola ba soʼamböta ita. Taʼila hadia zinangea tabulöʼö ba lala wangera-ngerada, nifaluada, hegöi fehededa. (Baso Yakobo 1:23-25.) Hizaʼi, na tamane tödöda wa lö hadöi si sala khöda, tebai tabulöʼö gamuatada. Moguna khöda Zura Niʼamoniʼö enaʼö tola tatörö zindruhu ba wamareso tödöda. (Ngenu-Ngenu Yeremia 3:40; Hagaʼi 1:5) Fangandrö göi zanolo yaʼita enaʼö taʼila haniha ita zindruhunia. Tola taʼandrö khö Yehowa enaʼö isekhegö ba itolo ita wamaigi si fasala sinangea tabulöʼö. (Zinunö 139:23, 24) Böi olifu ita wa ”niʼogorofi Yehowa saʼae zanörö lala elungua; ba si fahuwu ia ba zadölö tödö”.​—Gamaedola 3:32.

6. Hana wa moguna latörö zindruhu khö nawöra zamösana foʼomo ira matua hegöi foʼomo ira alawe?

⁶ Moguna sibai tatörö zindruhu yomo ba nomo.  Na lö labiniʼö zi so ba dödöra ira foʼomo ira matua hegöi ira alawe, tola lasöndra waʼahono dödö ba faoma lafaduhusi tödö nawöra. Oya ngawalö lala walömanörö sindruhu ba wongambatö. Duma-dumania, ihokhaini zi tenga foʼomonia, ifaigi pornografi, mazui fakawa ia ba niha böʼö. Faigi hadia niwaʼö zanura Sinunö andre, ”Lö si dadaodo awö niha sofaya ba lö si fao-fao ndraʼo ba zi falimo.” (Zinunö 26:4) Na ibörögö tumbu ba gera-erau walömanörö sindruhu khö woʼomou, tola teʼala wongambatöu.

7, 8. Hewisa wangogunaʼöu Sura Niʼamoniʼö ba wamahaʼö iraonomö wa moguna latörö zindruhu?

⁷ Moguna lafahaʼö ira göi iraono wa lö tola löʼö  latörö zindruhu. Tola laʼogunaʼö Zura Niʼamoniʼö ira satua ba wamahaʼö iraonora. Oya duma-duma si lö sökhi ba Zura Niʼamoniʼö sanandrösa ba niha si lö manörö sindruhu: Akhano, me managö ia; Gehazi, me falimo ia ba wangakali kefe; ba Yuda, sanagö kefe ba si manga mböli Yesu 30 loga firö.​—Yosua 6:17-19; 7:11-25; 2 Razo 5:14-16, 20-27; Mataiʼo 26:14, 15; Yohane 12:6.

⁸ Oya göi duma-duma si sökhi ba Zura Niʼamoniʼö sanandrösa ba niha sanörö sindruhu: Yakobo, me ifaso nononia wamuli kefe nisöndrara; Yefita ba ononia alawe, me lafalua zi no lafabuʼu khö Lowalangi; ba Yesu, itörö zindruhu hewaʼae ba ginötö si basaki. (1 Moze 43:12; Zanguhuku 11:30-40; Yohane 18:3-11) Duma-duma andre zanolo iraono enaʼö aboto ba dödöra wa moguna latörö zindruhu.

9. Hewisa wa tola möi fanolo ba ndraono na latörö zindruhu ira satuara?

⁹ Tola lahalö wamahaʼö ira satua ba goi-goi soguna andre moroi ba Zura Niʼamoniʼö, ”Mifahaʼö sa niha böʼö, ba hana wa lö mifahaʼö ami samösa? Miwaʼö, ’Böi anagö,’ hizaʼi hana wa managö ami?” (Roma 2:21) Laʼila iraono na faböʼö nifalua zatuara moroi ba zi no lawaʼö. Na taʼoʼou ndraonoda ba wanörö sindruhu ba lö tafalua, tola manö abu dödöra. Na laʼila iraono wa falimo zatuara hewaʼae ba wondrege zide-ide, tola göi lafalua zimane daʼö. (Baso Luka 16:10.) Hizaʼi, na laʼila iraono wa latörö zindruhu ira satuara, daʼö zanolo yaʼira enaʼö tobali satua si tola mufaduhusi tödö na so nonora dania.​—Gamaedola 22:6; Efeso 6:4.

10. Hewisa enaʼö tola tatörö zindruhu na fahuhuo ita khö ndra talifusöda niha Keriso?

¹⁰ Moguna göi tatörö zindruhu khö ndra talifusöda ba mbanua niha Keriso. Ba huhuo sero maʼökhö, aoha sibai khöda wamato-matou niha awö wamöbögö khöra si lö duhu. Na tafuli tafatou-tou hadia ia ba lö taʼila na atulö ma löʼö, tola manö tatutunö waya. Abölö sökhi na ’tataha mbeweda’. (Gamaedola 10:19) Na tatörö zindruhu tenga daʼö geluahania wa moguna tawaʼö fefu niʼera-erada, niʼilada, mazui nirongoda. Hewaʼae na atulö niwaʼöda andrö, tola manö tenga urusada daʼö, mazui lö moguna ba lö sökhi na tafuli tatutunö ia. (1 Tesalonika 4:11) So ösa zangalui tahi ba wamalua si lö sökhi, lamane, ”Fokonia, no utörö zindruhu.” Hizaʼi, börö me ono mbanua Yehowa ita, omasi ita na sökhi ba taʼehaogö wehededa.​—Baso Kolose 4:6.

11, 12. (a) Hewisa wa tola itugu ebua horö nifalua zi samösa niha na lö itörö zindruhu sanandrösa ba horö nifaluania? (b) Hadia zinangea tasofu khöda? (c) Hewisa enaʼö lö talimo organisasi Yehowa?

¹¹ No ifataro ndra satua sokubaloi Yehowa ba wanolo banua niha Keriso. Aoha khö ndra satua sokubaloi wanolo yaʼita na tatörö zindruhu. Hadia mbörö? Na mofökhö ndraʼugö ba möiʼö khö doto, hadia öbiniʼö khönia wökhöu? Na öfalua daʼö, hewisa wa tola itolo ndraʼugö? Simanö göi na tafalua horö sebua, böi falimo ita. Sökhi na taʼondrasi ndra satua sokubaloi ba tatörö zindruhu wangombakha khöra. (Zinunö 12:3; Halöwö Zinenge 5:1-11) Iadaʼa, khalaigö zalua andre: Hewisa na öʼila no ifalua horö sebua si fahuwu  khöu? (3 Moze 5:1) Hadia ömane, ”Na sindruhu-ndruhu si fahuwu khönia ndraʼo, hasambalö ubiniʼö nifaluania andrö”? Mazui, hadia itörö tödöu wa so ndra satua sokubaloi si tola manolo yaʼia ba wangaʼazökhi hegöi ba wangaʼaroʼö fahuwusania khö Yehowa?​—Heberaiʼo 13:17; Yakobo 5:14, 15.

¹² Tebai talimo organisasi Yehowa na tafoʼösi zura-sura, simane na taʼombakhaʼö halöwöda ba wanuriaigö. Ba lö falimo ita na tobali perintis mazui na tafalua halöwö böʼö khö Lowalangi.​—Baso Gamaedola 6:16-19.

13. Hewisa wanöröda sindruhu na fao khöda ndra talifusöda ba wangalui kefe?

¹³ Na inötö lafosumange Lowalangi, tebai lafalua halöwöra ira niha Keriso ba wangalui kefe. Duma-dumania, lö mangalui kefe ita na so ba Balai Mbanua Lowalangi mazui na manuriaigö. Ba lö taʼakali ndra talifusöda ba wanöndra hare. Na mohalöwö khöu zi samösa Samaduhuʼö, buʼa gazira ba ginötönia, beʼe khöra zi no öfabuʼu, ba henaigö hadia zinangea latema moloʼö huku. Te simane asuransi kesehatan mazui na töra ginötö wohalöwöra moroi ba ginötö si no mutatugöi. (1 Timoteo 5:18; Yakobo 5:1-4) Na mohalöwöʼö khö zi samösa Samaduhuʼö, böi tötöna wa tohude ndraʼugö ba danö böʼö. (Efeso 6:5-8) Böi zi lö öfalua halöwöu moloʼö inötö hegöi gazi si no mutatugöi khöu.​—2 Tesalonika 3:10.

14. Hadia zinangea lafalua ira niha Keriso fatua lö falulu fohalöwö ira khö ndra talifusöra ba wangalui kefe?

¹⁴ Hewisa na falulu fohalöwö ita khö ndra talifusöda ba wangalui kefe? Te simane fananö modal usaha  mazui famiza kefe? Na alua zimane daʼö, so goi-goi Zura Niʼamoniʼö sinangea taʼameʼegö tödö: Mifazökhi zura! Me so mbenua niʼöli zamaʼeleʼö sotöi Yeremia, ifazökhi dombua zura wowöli nifotandro, lateka ira sasi, ba iʼiröʼö zura andrö tobali weʼe-weʼe dödönia ba zi so föna. (Yeremia 32:9-12; faigi göi I Moze 23:16-20) So ösa zangumaʼö, na lafazökhi zura hulö na lö lafaduhusi tödö ndra talifusöra. Sindruhunia, daʼö zanolo yaʼira enaʼö lö manahö-nahö dödöra khö nawöra, lö faʼafatö dödö hegöi fatötöisa. Böi olifu ita, abölö moguna tagohi waʼatulö ba mbanua niha Keriso moroi ba wangalui kefe.​—1 Korindro 6:1-8; faigi Gonönöta 30.

15. Hewisa dödö Yehowa na lö mutörö zindruhu ba wangalui kefe?

¹⁵ Moguna tatörö zindruhu ba niha fefu, hewaʼae na tenga Samaduhuʼö Yehowa ira. Moguna khö Yehowa na tatörö zindruhu. ”Faliʼera si lö atulö, ba no niʼogorofi Yehowa; ba saga si lö ambö, ba omasi ia.” (Gamaedola 11:1; 20:10, 23) Me götö Zura Niʼamoniʼö, asese laʼogunaʼö waliʼera ba wogale. Hizaʼi, so ösa zogale solimo laganara, laʼalösi wameʼe bara moroi ba zi no laʼosaraʼö, mazui laʼalui lala enaʼö labuʼa khöra gefe töra moroi ba zinangeania. No toʼölö göi mufalua daʼö ba ginötö daʼa na mogale niha simane me götö Zura Niʼamoniʼö. Iʼotarai me föna irugi iadaʼa, fatuwu khö Yehowa gamuata daʼö.

16, 17. Hadia zi toʼölö alua sinangea tatimbagö ba walömanörö sindruhu?

¹⁶ Tola manö lö tatörö zindruhu ba ngawalö zalua,  simane ba wangalui halöwö, famoʼösi sura-sura moroi khö ndra samatörö, mazui na ujian ba zekola. Ato zi faduhu tödö wa lö fasala na falimo, na tasura zi tenga yaʼia, mazui na tabeʼe wanema li si lö atulö. Lö ahöli dödöda ba daʼö. No ifaʼeleʼö Sura Niʼamoniʼö wa amuata niha ba ngaluo safuria andre ”ha tana khöra laʼalui, sangomasiʼö anaʼa, . . . si lö mangomasiʼö si sökhi”.​—2 Timoteo 3:1-5.

¹⁷ Itaria, hulö mofozu waʼauri niha si lö manörö sindruhu ba gulidanö daʼa. (Zinunö 73:1-8) Te so niha Keriso niʼefasi ba halöwö, lalimo ia ba gefe, mazui lafalua khönia zi lö atulö börö me itörö zindruhu. Hizaʼi, tenga zaya-zaya gölö fefu daʼö na tatörö zindruhu. Hadia mbörö?

18. Hadia mbörö wa sebua böli döi si sökhi andrö?

¹⁸ Taʼokhögö döi si sökhi na tatörö zindruhu, na lafaduhusi tödö ba laʼodaligö ita. Ha fawaraö na so zimane daʼö ba gulidanö andre. No tebeʼe khöda ginötö enaʼö tahaogö döi si sökhi. (Mikha 7:2) Atulö sa wa so manö zangoʼaya yaʼugö börö me ötörö zindruhu, ba lafotöi ndraʼugö si lö tödö. Hizaʼi tanö böʼö, laʼandrö saohagölö na ötörö zindruhu ba lafaduhusi tödö ndraʼugö. Ba zi sagörö ulidanö, tehöngö ndra Samaduhuʼö Yehowa börö wanöröra sindruhu. So ösa gafalo ba halöwö, abölö omasi ira lafohalöwö ndra Samaduhuʼö börö me laʼila wa latörö zindruhu. Hewaʼae na so niʼefasi ba halöwö börö me lö latörö zindruhu, lö laʼefasi ndra Samaduhuʼö.

19. Na ötörö zindruhu, hadia lua-luania ba wahuwusau khö Yehowa?

 ¹⁹ Na ötörö zindruhu ba ngawalö hadia ia, tola öʼokhögö dödö side-ide sohau-hau ba lö fawuka gera-erau. Tola tobali ita simane Faulo me isura, ”Faduhu dödöma lö itegu ndraʼaga tödöma side-ide.” (Heberaiʼo 13:18) Sabölö moguna, itöngöni nifaluamö andrö Lowalangi sebua faʼomasi sotöi Yehowa, ba iʼandrö saohagölö na öforege wanörö sindruhu ba ngawalö hadia ia.​—Baso Zinunö 15:1, 2; Gamaedola 22:1.