FAMAHAʼÖ 03
Hadia Tola Mufaduhusi Tödö Zura Niʼamoniʼö?
Ba Zura Niʼamoniʼö, oya mbuʼusa li hegöi mene-mene si sökhi. Te omasiʼö öʼila hadia nifahaʼö Zura Niʼamoniʼö, hizaʼi hewisa na aombö dödöu hadia tola mufaduhusi tödö Zura Niʼamoniʼö? Te ömane tödöu, ’Hadia tola mufaduhusi tödö mene-mene hegöi buʼusa li ba mbuku si no atua andre? Hadia so gunania khöda iadaʼa nösi Zura Niʼamoniʼö ba hadia tola tafaduhusi tödö nifabuʼunia sanandrösa ba zi so miföna?’ Zuta niha si faduhu tödö ba Zura Niʼamoniʼö. Tola göi so khöu waʼafaduhu dödö simane daʼö. Datatutunö hadia manö zangaʼaroʼö faʼafaduhu dödöda.
1. Hadia sindruhu no irai alua waö-waö si so ba Zura Niʼamoniʼö?
Sura Niʼamoniʼö zangumaʼö wa fefu nösinia no ’fehede sindruhu si tefaudu’. (Sangombakha 12:10) Fefu waö-waö nitutunö ba Zura Niʼamoniʼö no irai alua. (Baso Luka 1:3; 3:1, 2.) Oya arkeologi hegöi sejarah samaduhuʼö wa tefaudu ginötö nitutunö ba Zura Niʼamoniʼö ba sindruhu-ndruhu no irai so niha hegöi nahia nitutunö ba daʼö.
2. Hadia zangoromaʼö wa tola tafaduhusi tödö nösi Zura Niʼamoniʼö hewaʼae no ara tesura ia?
Asese itutunö Sura Niʼamoniʼö hadia zi lö laʼila niha me mböröta, duma-dumania soʼamakhaita ba ilmu pengetahuan. Me awena musura ia, ato niha ba götö daʼö zi lö faduhu tödö. Hizaʼi, ifaduhuʼö ilmu pengetahuan iadaʼa wa sindruhu fefu nitutunö Zura Niʼamoniʼö. Andrö wa ”tola mufaduhusi tödö [Zura Niʼamoniʼö] . . . sagötö faʼara”.—Sinunö 111:7, 8.
3. Hana wa tola tafaduhusi tödö niwaʼö Zura Niʼamoniʼö sanandrösa ba zi so miföna?
Ba Zura Niʼamoniʼö, oya wamaʼeleʼö a sangombakha khöda ”ngawalö hadia zi lö nasa alua”. (Yesaya 46:10) Alua fefu daʼö simane nifaʼeleʼö Zura Niʼamoniʼö ba oya ba gotalua wamaʼeleʼö andrö zi no alua hewaʼae no ara tefaʼeleʼö daʼö. No göi ihaogö wanutunö Sura Niʼamoniʼö hadia zalua ba gulidanö iadaʼa. Ba wamahaʼö daʼa, tatutunö dania ösa wamaʼeleʼö Zura Niʼamoniʼö si no alua simane si no tefaʼeleʼö!
ODÖDÖGÖ NASA WANGALUI
Tatutunö dania hadia manö zangoromaʼö wa tefaudu nösi Zura Niʼamoniʼö ba ilmu pengetahuan iadaʼa. Tafahaʼö ita göi ba wamaʼeleʼö Zura Niʼamoniʼö sahöli-höli dödö.
4. Tefaudu nösi Zura Niʼamoniʼö ba ilmu pengetahuan iadaʼa
Me mböröta, ato zi faduhu tödö wa so zanuwu ulidanö andre. Futa VIDEO.
Nehegö hadia nisura ba mbuku Yobi te mato 3.500 fakhe silalö. Baso Yobi 26:7, ba beʼe wanema li ba wanofu daʼa:
-
Hadia mbörö wa sahöli-höli dödö me iwaʼö ba ayati daʼö no manawa-nawa gulidanö ”yawa zi löʼö”?
Awena sindruhu-ndruhu aboto ba dödö niha sanandrösa ba siklus nidanö te mato 200 fakhe silalö. Hizaʼi, nehegö hadia niwaʼö Zura Niʼamoniʼö te mato 3.500 fakhe silalö. Baso Yobi 36:27, 28, ba beʼe wanema li ba wanofu-nofu daʼa:
-
Hewisa moloʼö yaʼugö nitutunö Zura Niʼamoniʼö sanandrösa ba siklus nidanö ba gulidanö?
-
Me no öbaso ayati daʼö, hadia itugu faduhu dödöu ba Zura Niʼamoniʼö?
5. Ifaʼeleʼö Sura Niʼamoniʼö ngawalö zalua sabölö ebua
Baso Yesaya 44:27–45:2, ba beʼe wanema li ba wanofu daʼa:
-
Hadia nitutunö Zura Niʼamoniʼö 200 fakhe fatua lö tedudugö Mbabilona?
No ifaduhuʼö sejarah wa Razo Weresia sotöi Kiro awö ndra saradadunia zanudugö banua Mbabilona te 540 fakhe fatua lö si tumbu Yesu. So nungo nidanö ba zi fasui Mbabilona solumöʼö banua daʼö. Kiro hegöi ira saradadunia, lakhao ba laholeʼö lala nidanö andrö. Aefa daʼö, möi ira bakha ba latörö mbawa göli mbanua si no teboka. Aoha sibai khöra wokalaisi banua daʼö börö me lö solawa yaʼira. Iadaʼa, ba zi töra 2.500 fakhe aefa daʼö, hatö adudula mbanua daʼö zi toröi. Nehegö hadia nifaʼeleʼö Zura Niʼamoniʼö.
Baso Yesaya 13:19, 20, ba beʼe wanema li ba wanofu daʼa:
-
Hewisa waʼalua wamaʼeleʼö daʼa?
Adudula Mbabilona so ia ba mbanua Irak iadaʼa
6. Ifaʼeleʼö Sura Niʼamoniʼö zalua ba gulidanö iadaʼa
Ifatunö khöda Sura Niʼamoniʼö wa no so ita ba ”ngaluo safuria”. (2 Timoteo 3:1) Nehegö hadia nifaʼeleʼö Zura Niʼamoniʼö salua ba ngaluo safuria.
Baso Mataiʼo 24:6, 7, ba beʼe wanema li ba wanofu daʼa:
-
Moloʼö Sura Niʼamoniʼö, hadia manö zalua ba ngaluo safuria andre?
Baso 2 Timoteo 3:1-5, ba beʼe wanema li ba wanofu-nofu daʼa:
-
Moloʼö Sura Niʼamoniʼö, hewisa gamuata niha ba ngaluo safuria?
-
Hadia gamuata niha si no öʼila ba zi fasuimö?
SO ZANGUMAʼÖ: ”Sura Niʼamoniʼö andrö nisura niha. Tebai tafaduhusi tödö.”
-
Hadia zameʼe khöu faʼaro dödö wa tola mufaduhusi tödö Zura Niʼamoniʼö andre?
RAHU-RAHU WAMAHAʼÖ
Tola mufaduhusi tödö Zura Niʼamoniʼö börö me tefaudu nösinia ba sejarah hegöi ilmu pengetahuan iadaʼa, ba hasambalö alua fefu zi no ifaʼeleʼö.
Hadia Wamahaʼö si Tola Öhalö?
-
Hadia sindruhu no irai alua waö-waö nitutunö ba Zura Niʼamoniʼö?
-
Hadia duma-duma sangoromaʼö wa tefaudu nösi Zura Niʼamoniʼö ba ilmu pengetahuan iadaʼa?
-
Moloʼö yaʼugö, hadia tola ifatunö khöda Sura Niʼamoniʼö zalua ba zi so miföna? Hadia mbörö?
ALUI NASA DANÖ BÖʼÖ
Hadia fagölö nitutunö Zura Niʼamoniʼö ba ilmu pengetahuan?
”Hadia Tefaudu Nösi Zura Niʼamoniʼö ba Ilmu Pengetahuan?” (Artikel web)
Hadia manö zalua ba ”ngaluo safuria”?
Hewisa waʼalua wamaʼeleʼö Zura Niʼamoniʼö sanandrösa ba Wamatörö Yunani?
Baso hewisa wamaʼeleʼö Zura Niʼamoniʼö möi fanolo khö zi samösa ira matua irege faduhu dödönia ba Zura Niʼamoniʼö.
a Famaʼeleʼö eluahania oroisa nifaʼema Lowalangi, si toʼölönia ba wangombakha salua ba zi so miföna.
Te Göi Adöni Dödöu
SASESE LASOFU NIHA
Hewisa Wamahaʼö Zura Niʼamoniʼö Nifaʼema Ndra Samaduhuʼö Yehowa?
Lö muʼandrö gefe ba program daʼa. Tola öʼogunaʼö gofu hadia manö wamoʼeluaha Zura Niʼamoniʼö somasiʼö. Tola göi ökaoni nawöu mazui ösi nomou ba wefao khöu.
